<><> يوميات الأعضاء في رمضان مع الغدير الأرزق <><> - نادي الهلال السعودي - شبكة الزعيم

المنتدى الاستشاري · #1 20/09/2007, 03:14 AM

فكرة : سندريلا الهلال
متابعة : الفيروسه الزرقاء - الماسه الزرقاء
تصميم : عاشق بو يعقوب
إعداد : سهل

مرحباً بكم احبتي مع ضيفنا السادس في يوميات الأعضاء في رمضان
وضيفنا اليوم هو الزعيــم فعــال الغدير الازرق

بسم الله الرحمن الرحيم

السلام عليكم ورحمة الله وبركاته

كل عاام وانتم بخير ياأبظاوات المجلس ,, وعيدكم مبارك

وعساكم من عواده << لاتلومونه هاذي آثار الخروج من

المسابقة بدري

قبل لانبدأ .. أسأل الله العظيم رب العرش الكريم أن يجعل أعمالنا خالصة لوجهه الكريم ,, وان يعيننا على صيام
رمضان وقيامه..وأعطاءه حقه وأن يجعلنا من عتقاءه
في هذا الشهر الكريم

أحبتي في الله .. أما بعد :- << ماتحسون انه ناوي يلقي
خطبة الجمعة

هذه اليوميات برعاية :-

اتشرف اخواني واخواتي الأعضاء إني اكون من الأعضاء اللي يسردون لكم يومياتهم في هذا الشهر الفضيل ..

وزادني شرف إن يومياتي برعاية (مناحي بن مطلق ) اللي كان منافس لشركة موبايلي على رعاية هاليوميات

قبل لاأبدا بسرد يومياتي لاتنسوون تربطون الأحزمة لسلامتكم من جراء يومي البايخ

نبدأ على بركة الله بالأقلاع في اليوميات الرمضانية وفي اليوم السادس من رمضان ..

وراح ابدأ من قبل صلاة الفجر في سادس أيام رمضان
كنت في بيت جدتي الله يطول بعمرها لأنها عازمتنا على السحور وتسحرنا وعينا من الله خير ..!!

بس الغريب إني بعد ماتسحرت نسيت اشرب مويه عاد انتم تعرفون عواقب اللي ينسى يشرب مويه براطمه تتشقق وريقه
يتصحر وفوق كذا تخلص لياقته

رحت صليت الفجر في المسجد وبعد الصلاة رجعت لبيتنا
وفي رواية أخرى وكرنا كما يحلو للمساطيل

تسميته وحسيت بالعطش وبنفس الوقت نسيت إني صايم ودخلت المطبخ وقعدت اسرح وامرح مثل البزران وافتح الثلاجة واشرب موويه

والقى فيمتو متوزي ورى كرتون التفاح واخذلي جغمه

وفي حزتها ادخلت علي الوالده الله يحفظها وشافتني وانا اشرب فيمتو وصرخت في وجهي يوم صرخت عرفت اني مسووي شي غلط بس وشهو مدري ..؟؟؟

وقالت لي الوالدة ورااك تشرب ماتستحي ماتخاف من ربك
في هاللحظه تذكرت اني صااايم

(بس والله اني نااسي
ومن غير قصد يعني لاتسيئون الظن فيني

) ووجهي صااار احمر تسنه طماطم مصري وجعان

والله يعيننا على قضاء هاليوم والله يغفر لنا ..
وبعدها فهمت الوالدة الموضوع وانتهت السالفة على خير وطلعت لغرفتي ومسكت المصحف وقعدت اقرى قرآن لين أشرقت الشمس ثم بعدها خمدت وأحلى نوومه >> يمكن بعضكم بيستغرب لاني ماجبت طاري الدراسه سلمكم الله الكلية
ليومكم ذا ماعطونا جدول المحاضرات يقولون الكمبيوتر خربان وهذا الأسبوع الثاني اللي ماادوام فيه

وأحس إن رمضان بيخلص وحنا ماداومنا ولااخذنا محاضرات ..وبيني وبينكم ابركها من ساعه خلنا نريح في هالقايله بدل الفرفرة في هالشموس

ونرجع لمحور حديثنا بعدها صحيت على آذان الظهر وصليت ورحت للبقاله واشتريت مستلزمات للبيت واشتريت جريدة
الرياض واللي يشوفني وانا شاريها يقوول ذا شكله متوفي
لهم وااحد قاعد اتفحص واقرى صفحة الوفيات انا وخشتي

ورجعت للبيت وسلمت امري للنوم وفعلاً نمت وماوعيت الا على صووت الوالد الله يحفظه يصحيني على صلاة العصر
بكل رقة وحنيه << اييه هين ياراعي الحنيه

.. وترااه ماهاوشني بس قالي قم صل

وقمت صليت العصر ..وبعدها رحت للحلاق وحلقت..وبعد ماخلصت من الحلاقة مريت المطعم واشتريت (منتو )

ومريت الخباز واشتريت من عنده تميس بالجبن << ياوالله المزاج

وبعدها رجعت للبيت قبل آذان المغرب بربع ساعه وأخذت لي شاور عالسريع (ترويشه ) وطلعت وأفطرت ورحت صليت
المغرب في المسجد ورجعت للبيت وجلست مع العائلة الكريمة وقعدنا نتبادل أطراف الحديث
عن شؤون المنزل << اييه هين

وجلست انا واخوي قبال التلفزيون وكل واحد حجزله زاوية في المقلط وقعدنا نتفرج على مسلسل غشمشم وطواعينه ..
وبعدها قعدنا نقلب في هالقنوات ومافي شي أعجبنا وقلبناها بلاستيشن ومافي الا قوة تكسير رؤوس وجميع المباريات خسرتها

وبنتيجة كبيرة ..المباراة الأولى ( 8*2 ) << ماتذكركم بمباراة منتخبنا مع ألمانيا

والمباراة الثانيه انتهت (5 * صفر ) حتى ماكملت الشوط الثاني اعلنت انسحابي حفاظاً على سمعتي بين الناس

وبعد هالفضيحه المدوية طفينا البلاستيشن وقعدنا نتفرج على مسلسل (بيني وبينك ) ورحنا صلينا العشاء وصليت ركعتين من التراويح ..!!

ورجعت للبيت وقعدت اتفرج على (باب الحارة )<< ويينك ياالأدعشري عشان تشوف المسلسل من دونك مايسوى

وضاق صدري من هالمسلسل خصوصاً يووم تهاوشوا وبغوا يطقوون ابو بدر هالخبل

وبعدها شديت الرحال للأستراحه داقين علي الشباب يقولون مشترين كورة جديده وودهم اني اجربها بظهورهم وامزعهم
عشان يتاكدون انها اصليه

ورجعت للبيت في حدود 12:45 ولقيت اخووي الصغير جالس على النت وداخل بيوزري على منتدى الزعيم ولقيته
داخل على منتدى المغتربين مدري وش ودااه فيذاك وطلعته
من عند المغتربين خفت لايدشرونه هالمغتربين

وبعدها جيتكم طاير ودخلت على المجلس العام يمكن لعلى وعسى الحق على بعض المباريات بس للأسف مالقيت كراسي في المدرج الشمالي ورحت للمدرج الجنوبي عند الرابطة بقيادة هامور وريري هكتور

الأول يطق الطار .. والثانيه قاعده توزع كراث
ومكتوب على الكراث شركة هاتريك يقالها بالونات

وبكذا ينتهي يووومي السادس من رمضان انا دااري
انه يلوع التسبد ويجيب المغص بس تصبروا علشاني
وجاملوني وارفعوا من معنوياتي واحتسبوا الأجر في هالشهر الكريم ..!!

وأحب أشكر كل القائمين على هاليوميات وعلى حسن الأستضافه وحسن الأستقبال

وماقصروا بيض الله وجيهم جميعاً بدون استثناء
والله يكتب لهم الأجر ..!!

أخووكم / الغدير الأرزق ..

كل الشكر للمبدع الغدير الأرزق وانتظرونا غداَ مع ضيف آخر

.

أرق التحايا وأطيبها
من مشرفي واستشاري
المجلس العام

ابو طـــــلال · #2 20/09/2007, 03:18 AM

حليـــــــــــــــــــــبوووووووووه الغدير

انا اول واحد يرد .............

ماقريت ولاكلمة بس متاكد انها ممتعه جدا جدا

راجع بعد مااكل اللقمه اللى بيدي

( هنك ترووح )

صقيقي راجع لك ان شالله

BLUE SHADOW · #3 20/09/2007, 03:33 AM

بالتوووفيق

إقتباس


	وسلمت امري للنوم وفعلاً نمت وماوعيت الا على صووت الوالد الله يحفظه يصحيني على صلاة العصر بكل رقة وحنيه

<<<ايه اكيد بس لكمه خطافيه ولا معكاز خطافي
وكل سنه وانت طيب باذن الله
ودمتـــ بخيــــ ر

مــــهــــنــــد · #4 20/09/2007, 03:38 AM

من جد يوميات مدري وش تبي هههههههههههههههههه

الله يرج بليسك اجل مفطر اليوم بس الظاهر اللي ياكل أو يشرب وهو ناسي مافيه مشكله يكمل صومه مايقضيه .

وبعدين وش النتايج المخزية ثمانية اثنين ولا تظلم السعودية مع المانيا لأن يدت البلستيشن كانت خربانه

وتقبلوا تحياتي ،،،،

الهنوووف · #5 20/09/2007, 03:51 AM

إقتباس


	وقالت لي الوالدة ورااك تشرب ماتستحي ماتخاف من ربك في هاللحظه تذكرت اني صااايم (بس والله اني نااسي ومن غير قصد يعني لاتسيئون الظن فيني ) ووجهي صااار احمر تسنه طماطم مصري وجعان

عيني بعينك

تصدق الظاهر ماقد نسيت اوقات استغفر الله ودي انسى واشرب

بس ماتجي معاي

ماشاء الله يومكم طووويل كل هالاشياء سويتها

انا بس انام واروح الدوام واشوف المسابقه هنا ويخلص وقتي

يعطيك العافيه اخووووي

ولاعاد تنسى وتشرب

ترى بعلم >>

شكرا للجميع

الهنوووف

كانت

هنا

ورحلت

القيصر رهيب · #6 20/09/2007, 05:10 AM

ياحظه شرب فيمتو

badori999 · #7 20/09/2007, 05:19 AM

وعليكم السلام ورحمة الله وبركاته...
يعطيك العافيه اخوي الغدير...
ياخي ما شاء الله يومك طويل تسوي اشياء كثيره فيه...

ينطيكون العافيه مشرفيي واستشاريي اليوميات...

تقبلوا مروري...

عاشق الزعيم!! · #8 20/09/2007, 05:34 AM

ههههههههههه

يعطيكم العافيه على التميز

كل الفن هلالي · #9 20/09/2007, 06:32 AM

وعليكمو السلام وكل عام وانت بخير يا الغدير الازرق * هذا أولاً
==============================
ثانياً * نخش في الموضوع
يومك يوم فايت هايت وممل جداً ومشحب ومن جمبها وبرنامجك ماله اي هدف
وتقدر تسمي هذا اليوم يوم ضايع !!
>>>>> طبعاً هذا رد واحد ما قرأ برنامجك اليومي زين ان لم يأكن ما شافه

[quote=المنتدى الاستشاري;6270605]

[/quote]

انا من شفت يومايتك برعايتة مناحي راعي يانا يانا وانا عارف انك جايب العيد !!!!

ولا اللي أزود من هذا ،، انك مفطر وانت ناسي !!!! علينا يامناحي

وانت تقول انك بعد ما تسحرت عند جدتك الله يحفظها نسيت تشرب مويه

وصرت عطشان يعني شف غيرها

>>> بيتطاق معه

على العموم عندي كلام شديد اللهجة على يومايتك بس حبيت اختصر

لاني جوعان وبروح أنام
( لاتنسى تشوف البرايفت اللي تحت

)

تقبل مروري وقبلها تحياتي يالغالي ،،
^
^

برايفت لـ الغدير الازرق فقط >>>> والله يومك جميل يا راعي الشاورما بس لزوم الهياط لازم نحطمك شوي
صعبه الكل يمدح برنامجك لازم يصير فيه اكشن بالموضوع وشكرا على رحابة صدرك مقدماً

هلالي من كندا · #10 20/09/2007, 06:46 AM

ورجعت للبيت في حدود 12:45 ولقيت اخووي الصغير جالس على النت وداخل بيوزري على منتدى الزعيم ولقيته
داخل على منتدى المغتربين مدري وش ودااه فيذاك وطلعته
من عند المغتربين خفت لايدشرونه هالمغتربين

ربي يوفقك بالكلية ويطور مستواك بالبليستيشن

خالي من الهم · #11 20/09/2007, 07:31 AM

بالله هذي يوميات صايم ولا يوميات واحد مفطر

وش هالكلام وش هالمسخره يخي عطنا يوميات زين الناس ولا اعتذر

.

يالبى قلبك طلو وصلني انك زعلان مني قلت ازعلك اكثر يخي وربي يومياتك فله وشكلك شربة الفيمتوا لانك متاثر بدعاية حيخلصوه قال نسيت قال

.

وثانيا قلت لك بعطيك كورس سوني عييت ولا خمسه و8 فضح الله عدوك

.

طلال ما بجلس أمدحك بوجهك بس أمانة انت اضافه للمجلس العام تحيتي لك ولمناحي بن مطلق وياليت تتسحر دايم عند جدتك لجل ما تشرب مويه

مَاهِينُورْ · #12 20/09/2007, 07:57 AM

.

وعليكم السلام ورحمة الله وبركاته ..
:: ، ::
الغدير الأزرق
:: ، ::
يوم رائع ..
والأروع اسلوبك في الكتابة ماشاء الله ..
عوافي الغدير ..
ـــــــــــــــ

:: ، ::
فكرة : سندريلا الهلال
متابعة : الفيروسه الزرقاء - الماسه الزرقاء
تصميم : عاشق بو يعقوب
إعداد : سهل
:: ، ::

ما أقول الا الله يحفظكم ولا يحرمكم الأجر ..
تعجز الكلمات عن شكرم ..

ـــــــــــــــــــ

في أمان الله ..

بنت عز ماتنهز · #13 20/09/2007, 12:33 PM

::::وعليكم السلام ورحمة الله وبركاته ::::

:::: الغدير الازرق ::::

::::يومك كاان رائع وجميل لانه برعاية مناحي

::::

::::الله يوفقك ويسعدك ان شاء الله

::::

فكرة : سندريلا الهلال
متابعة : الفيروسه الزرقاء - الماسه الزرقاء
تصميم : عاشق بو يعقوب
إعداد : سهل

::::شكرا جزيلا لكم

::::

المـشـاكـس · #14 20/09/2007, 07:52 AM

الله ..
علينا هالنصب ..
قال ناسي قال ..
اقول الشرهة مهيب عليك ..
على اللي عطاك وجه وخلاك ادمي مثل الناس وسألك عن يومياتك ..
ولا انت اللي مثلك عنده يوميات ..
من جد انت مدري وش تبي في المجلس ..

اللي فوق رد واحد يطلب حرش ... ولا وده يلعن ابليس

..

الحقيقة ..
كلمات رائعة وكأنها سطرت من نور ..
ويوميات تستحق ان يقتدى بها ..
وان تكون نبراسا ..
لأجيال قادمة ..
ستجعل منهم هذه اليوميات ابطالا ..
يحققون نصرا مؤزرا لأمتهم ..
ويجعلون منها منارا للعلم والقوة والعدل ..
شكرا لك اخي الغدير ..
وشكرا جزيلا لمن كانوا كرماء معنا ..
واضافوا لمجلسنا ميزة على ميزاته بإستضافتك ..

اللي فوق رد واحد مطبل .. ومنافق .. وكذاب

..

شكرا

اللي فوق هذا ردي الصدق

..

الجد ..
يوميات استمتعت بقراءتها ..
وبالعكس ما كانت مملة ..
خصوصا انها برعاية فيروز ..
اقصد مناحي ..
<<<من كثر ما يغني "يانا يانا" لخبطت بينه وبين فيروز

..لكن يهبي اني ألخبط بينه وبين اللي كانت مع فيروز

يعني اني لغمت المعلومة

لا هنت الغدير ..
وترى اللي فوق كله مزح ..
وعلى فكرة ..
لو انك اكلت وانت ناسي ..
ركز على" انت ناسي "

..
فترى ما عليك قضاء ..
لان معنى الحديث " من اكل او شرب ناسيا ... فقد اطعمه الله وسقاه "

شكرا للاستشاريين ..
على مجهوداتهم ..
ولو اني ما شفت منهم اي مجهود من سجلت بالزعيم

<<< اكبر انسان جاحد في تاريخ الشبكة

..
شكرا لهم ويعطيهم الف الف عافية ..

.

f*y*d · #15 20/09/2007, 02:52 PM

إقتباس

الرسالة الأصلية كتبت بواسطة المنتدى الاستشاري


	ورجعت للبيت في حدود 12:45 ولقيت اخووي الصغير جالس على النت وداخل بيوزري على منتدى الزعيم ولقيته داخل على منتدى المغتربين مدري وش ودااه فيذاك وطلعته من عند المغتربين خفت لايدشرونه هالمغتربين .

ههههههههههههههههههههههههههههههههههههههههههـــ

ياخي انت منسم

كل عام وانت بخير

<< كان ناوي يرسلك مباركة بس الظروف << نصاب عيني عينك

<< لا والله اني كنت ناوي بس اشغلتني هالمسابقة

<< ماتحس قلبناها شات

<< والله من قصة لفيمتو أصابعي ترتجف

يوم غبي ومنسم كعادتك