السلام عليكم ورحمة الله وبركاته...
كيف حالكم وش اخباركم هاه احد سمع ان بكره رمضان ولا لا؟؟
<<انجزي لايجيك طراق

السالفه ومافيها ان عندي اخومبهذلني بكثرة كلامه وقرقرته>>من شابه اخته فما ظلم
بس عاد هو فيه ميزه انه يلطش في اليوم عشرطعشر بيت شعر ويرطنها علي..
يقال انه يحب الشعر ولاهو وين الدنيا وين أهلها..!!

الموهم كلما طنت عليه وفضى ناداني قال اسمعي اسمعي تكفين ذا البيت توني مألفه قلت تكفى يالمتنبي ولا سعد علوش أقول قم بس قم الله يستر عليك..
بعدين يجي يسردها علي مره وحده أتحداك يعيدها مره ثانيه ولايكثر الأبيات يعني تقريبا اربع ابيات واذا خلص قال هاه قيميني كم تعطيني؟؟
قلت أعطيك تحت الصفر لأن الصفر يخب عليك أنت ووجهك..

لأنه واضح انه مب هو اللي مألفه باين انه زارفها وحافظها..
بس وش وراه لقى من يعطيه خشه انا وخشتي..
وياليتها أشعار على سنع وتستاهل من يلطشها<<يالله تنبلع..

يوم جا ذاك اليوم ولاني جالسه أقرقع على سريره وهه كأني سمعت حس خرفشه
ولاكأن تحتي شئ يخرفش يوم رفعت المفرش مار ألقى كومة أوراق مقصصه
وملفوزه يوم فتحتها ولاها كلبوها أشعار مزروفه...
قلت اها وأنا اقول وراه يرطنها علي كأنه ملحوق بس الظاهر يخاف ينسى منها شئ ثمين أكفشه فعشان كذا مايكثر الأبيات...
>>بس صدق من قال فك اثمك*يرزقك الله..
(اثمك:فمك)>>للي مايفهم لهجتي الخاصه

وصار أخونا في الله كلما طق عود حصاة قام يزرف وينسبها لنفسه
>>عاد أقول في نفسي وين الشعراء يشوفونك ان كان مدري وش بيسون بك
ان كان بتروح في خرايطها وأنا أختك..
بس صراحة مابي اظلمه وياي صحيح انه يلطش عيني عينك وماتعوق معه
بس عليه خمات يجلس يألف فيها أشعار بس متى...في السنه حسنه..

وسأوافيكم باخر مستجداته الشعريه وأسدحها عليكم ان شاء الله بس عساه يطيع..
ساعه اقول لكم السالفه وش عشانه عشان ابيكم تجاوبن على الأسئله...

والأسئله المطروحه.....
1)ماهو أفضل بيت شعر قرأته او سمعته أو مألفه بنفسك..؟!!
2)من هو أفضل شاعر بالنسبة لك..؟!!

واللي مايدير الشعر ولايدري وش سنعه<<يترزق الله
واللي مايحب الشعر ولايدري وش سالفته يجاوب على هالسؤال..
1)ماهي حكمتك في الحياة..؟!!
الله الله بالردود السنعه المسنعه ..

ياويل احد يطلع لي خطأ املائي لأن كلها قاصدتها

تحياتي...