..][ إضافة وحذف وياقلب لاتحزن !! ][.. - صفحة رقم 2 - نادي الهلال السعودي - شبكة الزعيم

شفشينكووو7 · #1 09/09/2007, 05:25 PM

بسم الله الرحمن الرحيم ..

السلام عليكم ورحمة الله وبركاته ،،

مساكم وصبحكم الله بالخير جميعاً ،، طبعاً أنا من النادر جداً إني أكتب بالمجلس العام ويمكن تستغربون الشي هذا ،، بس هالموضوع والله هو اللي شدني وقلت لازم نتناقش فيه ،،

الموضوع بكل إختصار هو جامعاتنا الحبيبه

وماأقول غير الله يخلف على اللي بعدنا إن كان هذي جامعاتنا

أنا بعلمكم وش صار لي هاليومين أمس واليوم ،، طبعاً أنا لي سنتين بالجامعه العام وقبله وكنت أضبط جدولي آخذه من النت وأضيف وأحذف وأنا بالبيت وأختار مواعيد محاضراتي بكل أريحيه ،، وكان يضبط الجدول معي

وكنت دايم أخلي الأربعاء أوف

لكن اللي حصل هالسنه شي غريب ! ..

طبعاً أنا من طلاب جامعة أم القرى بمكه المكرمه ،، المهم كانوا حاطين إعلان بموقع الجامعه إن دفعة 26 يبدأ التسجيل يوم الجمعه 26 / 8 .. جاء أخوكم في الله من صلاة الجمعه ذاك اليوم وأنا متشقق

لأني بعدّل جدولي وبخلي الأربعاء أوف

المهم فتحت موقع الجامعه وجيت بدخل على جدولي ولا فتح معي

قلت يمكن ضغط خلن أنام وإن صحيت فتحته ،،

والله يوم صحيت أحاول فيه وأحاول ومعيي يفتح

وهنا عاد جتن أم العبيد

وأعلنت الحرب ،، ويتصل علي واحد من اخوياي وقالي خذ رقمي الجامعي وشف جدولي ،، واحاول افتحه ومعيي ..

قلت له مافتح ،، قال خلاص باتسر من 8 وحنا عندهم

..

وحاولت انام وعيا يجين النوم ،، الشر يتطاير من عيوني ناويهم نيه شينه

.. ويوم صارت 8 ونص وانا بالجامعه ،، ورحنا لمّ سكرتير القسم وأخذنا الجداول والله متنا ضحك ،، كل واحد منزلين له اللي ساعتين واللي اربع وانا 7 ساعات

قلت ذولا شكلهم غلطانين محنب بترم صيفي حنا

..

المهم جينا للطامه الكبرى

.. رحنا لرئيس القسم قال انتظروني نص ساعه عندي اجتماع ومدري وشو للطلاب المستجدين قلنا طيب وننتظره ساعتين وشوي

بعدين جاء وقال وش تبون قلنا نبي نضيف مواد قال عن طريق النت قلنا مافي النت معيي وخربان ،، قال لا مافي اضافه !!!!

ويييييييييين لعبه هي يابو الشباب ؟؟

المهم قال انتظروا

وننتظر لين أذن الظهر وقعد يحاول بعدين قال اليوم مافي أمل تعالوا بكره ،، ونسحب عليه وننزل للعميد

قال غلطتكم انتم إنكم ماتخصصتوا <-- قسم إعلام ( سنتين وتتخصص ) ..

قلنا طيب وش يدرينا محد قالنا شي ،، قال الا فيه اعلان ،، اي اعلان كل يوم حنا هنا ومافيه شي قال لا فيه ،، قلنا معقوله فيه وكل الطلاب حقين دفعه 26 ماتخصصوا ؟؟ الإعلان مانزل ولا إنه نزل يوم وشالوه ،،

المهم قال اكتبوا خطاب التماس ووقعوا عليه ،، وتعالوا بكره ..

ورجع كل واحد مطأطأ راسه <-- متعوب عليه هالكلمه

.. والشمس تصقع فينا صقع

..

وجاء اليوم وجيناهم الساعه 8 وحنا عندهم

ومابوه ولا احد بالقسم

لاسكرتير ولا رئيس قسم ولا دكتور

يوم صارت 9 ويجون ،، ويجي رئيس القسم قال خذوا اوراق اضافه واضيفوا المواد العامه عندكم واضفناه ومن ضمن هذي المواد مادة ( اللغه العربيه 102 ) وهالماده صارت له قصه الله لايوريكم

..

المهم ونضيف المواد وجاء الدكتور قال خلاص يالله كل واحد يروح للأستاذ ( حاتم خيمي مساعد مدرب الوحده

) وتخصصوا عنده هو استاذ عندنا بقسمنا .. المهم ونروح ونتخصص ويعطينا ورقه فيها المواد حقت التخصص قال خذوا اوراق اضافه واضيفوهن ،،

ونآخذ وماغير ندّهر

ونضيف 3 مواد .. ونآخذ الأوراق ونروح لرئيس القسم عشان يعتمدها

يوم رحنا له قال لا انتم المفروض ماتتخصصون

<- ذا وش تسوي به بالله

والله إنه هذا كلامه ولاازيد عليكم بحرف قالنا لان انتم 26 ماتتخصصون الحين .. ويطرطع واحد من اخوياي قال يادكتور لعبه هي

ويدّهر الدكتور ويتصل على مدري مين وقالوا خلاص بكره بنسوي اجتماع وننزل لكم مواد المستوى الرابع .. لأنه صعبه ندرس هالترم بـ7 ساعات !!

وقضينا من هالسالفه ونجي لسالفة اللغه العربيه 102

سوينا ورقة اضافه وختمها رئيس القسم وطبعاً المفروض رئيس القسم يكون عنده علم إن الماده نازله هالترم ولالا ..

ختم عليها ونروح للجامعه اللي بالعابديه

واللي يدرسون بمكه يعرفون وين العابديه عن العزيزيه

ونروح والساعه كانت 12 وربع الظهر والشمس تصرررررررررررع

.. ويوم وصلنا هناك وتمرمطنا مرمطه ندور مبنى اللغه العربيه وتعرفون جامعه العابديه اوف بحر ماشاء الله

..

وأخيراً لقينا المبنى وندخل ونلقى عااااااااااااااااااااااااااااااااااااااااااااااااااااالم الله لايوريكم ،، ورئيس القسم قافل بابه والطلاب كلهم برا .. والمنسق كل مارحنا له قال عند رئيس القسم ،،

المهم وحنا واقفين عند باب رئيس القسم نبيه يفتح الباب عشان يختم لنا عالأوراق اللي معنا ونرجع لبيوتنا ،، وطلع الحمدلله وقال وش عندكم

قلنا نبيك تختم اوراق الاضافه ذي قال وش الماده ووش قسمكم انتم قلنا اعلام ونبي نضيف اللغه العربيه 102

ودخل وقفل الباب بدون اي كلمه

وندق الباب بعدين طلع قال الماده تنزل الترم الجاي مهوب هذا

والله بغيت اجدع الورقه بوجهه

وش هالمهزله ذي ليش ماقلتوا لنا من اول ..

ونرجع للعزيزيه والشر يتطاير ونطب على رئيس القسم حق الإعلام قال المشكله من عندهم موب من عندي ،، بعدين قال خلاص ضيفوا مادة ( الغزو الفكري ) وروحوا وقعوا عليها من المبنى اللي قدامنا حق كلية الدعوه ..

واوف ياهالمبنى

دخلناه وعاد تعرفون ماشاء الله كلهم مطاوعه الله يثبتهم .. بس فيه شي محزن

والله انهم يناظروننا بحقد وكأننا يهود

ليش طيب عشان مالنا لحى يعني

..

واكبر طامه لاجاك مطوع ويكذب عليك وعيني عينك !!

دخلنا على سكرتير قسم الدعوه وعطيناه اوراقنا قال موب عندي عند المنسق قلنا وين المنسق قال بالغرفه هذي الحين يطلع .. اللي عالمكتب ذا السكرتير ياطول لحيته ماشاء الله .. والمنسق اللي بالمكتب لحيته مثل لحية الشيخ محمد العريفي ماشاء الله بس الكذب شين يااخوان .. والله يوم طلع المنسق قال لنا السكرتير هذا هو ورد هالمنسق قال لا مهوب انا

ويوم حسوا انهم كذبوا وقدامنا جاء هالمنسق وحط رجله

وحطينا حرتنا بذا السكرتير قال والله انه هو ذا المنسق

..

واخذت الورقه قلت الشرهه موب عليكم عاللي يدرس عندكم

..

ورجعت السياره والشمس تدمر الواحد تدمير الله يرحمنا برحمته بس

..

وأعذروني عالإطاله وآسف إن كان مافيه تنسيق ولا شي بس والله اكتب لكم وانا تعبان ودي أنام

..

والعذر والسموحه وأتمنى أخذ آرائكم باللي صار وهل أنتم يصير معكم زي كذا ولالا

..

أخوكم

راشد ..