من هو المقصود في مقال معوكس ؟؟؟؟؟ - نادي الهلال السعودي - شبكة الزعيم

فيصل العبدالله · #1 04/09/2007, 11:49 PM

بعيدا عن الفصحى
(مرتزقة) الرياضة

معوكس
عقب خفايا استثمارات الهلال المدوية اكتشفت إني أنا يمعوكس (مخفه) واني ضيعت عمري بالصرقعة و(مناقر) خلق ربي بعواكيس وغيري يكحش بالملايين ويسترزق على حساب الأندية باسم الحب.. باسم الشوق مأساتي معاك تزيد... ادري إني قلبت محمد عبده بس من حر مافيني يمكن اقلب مزعل فرحان!!
هذولا (المرتزقة) يجونك بطرق صعب تنكشف، بالنهار تصريحات مثالية موزونة وتقطيع في (أم المصلحة العامة)، وبالليل يخططون لخطف العقود وشفط الأندية مستغلين مناصبهم!!
احسب الدنيا تمشي بالمثالية. ماكنت احسب الناس مثل العملة بوجهين اثاريهم بلاوي يادافع البلا..
أنا بصراحة ما انصدمت إلا بواحد يعرف نفسه زين، لأنه كان مثل الملاك ومقطع نفسه بالتصريحات اللي يوم تقراها تقول "أشوى والله الدنيا بخير" واثر الرجال ممثل بدرجة كبيرة يعني انصحه يدخل سباق الممثلين وينافس على جائزة الأوسكار!!
بس الزين مايكمل (أبو الشباب) خانه ذكاؤه بالمرة من يوم ماحس أن الملايين طارت وان الفرصة اللي كان يخطط عليها سنين حتى يمص دم الاندية انتهت، انفجر وانهبل وكشف نفسه المسيكين بكم تصريح، لأنه يعتقد أن اللعبة مستمرة وأن الناس لازالوا يصدقون مثاليته!!
عاد أنا يوم دريت بالموضوع وصل الأمبير للH ونبشت أكثر وإلا أنا قدام كنز جديد وفضيحة تسوى لها مليون دولار على الأقل،( أبو الشباب) ماكان هو وحده المتورط بمثل هالأستثمارات الملتوية، فيه عناصر ثانية لابسة بشت المسؤولية وجالسين ينحرون بارقاب الأندية المسيكينة، وتبون تتأكدون من كلامي بس نبشوا عن ملاك بعض الشركات اللي استثمرت بالأندية وشوفوا كم دفعوا مقابل مص دم أنديتهم وتعرفون معوكس ليش انهبل!!
الكارثة إن بعضهم من أهل الدار وياكثر ماشفناهم يبكون من عشق وحب أنديتهم!!
وعقب هالفضايح الأخيرة صار لازم علي أنا يامعوكس إني أغير خطة اللعب، هالمرتزقة ماهم أحسن مني، أبي أصير مثل بيلاتشي مرة وحدة يعني ممكن فجأة أقدم الظهير يكون رأس حربة وارجع الوسط ظهير وإذا لزم الأمر أهاجم بالحارس!!
أصلا عقب خساير الأسهم ماعاد تفرق عندي، كل اللي (حيلتي) سيارة نص عمر وبيت إيجار فمهما غامرت ماهي مشكلة لأن مافيه شي اخسره!!
هو يمكن بيع الذمة صعب شوي علي بس عاد أبي أدور لي حبوب مسكنة وإلا اسأل (المرتزقة) عن نوع الأدوية المستخدمة للحالات هذي وبعدين أول مليون يجي كافي انه يسكن اكبر ذمة مهما توجعت!!
أنا ماني مصلح اجتماعي ولاني قايل لكم الله يعين الرياضة السعودية على هالأشكال ولاني بعد خايف على مستقبل الرياضة، الموضوع عندي صار اكبر بكثير وهو وشولن أصير مثلهم وأدل الطريق اللي دلوه قبلي؟!!
أبي (اكشخ) مثلهم كل يوم بديره، وكل ليلة بمحطة فضائية، ولولا إن (أم العيال) تقرأ هالزاوية كان علمتكم وش بعد أبي أسوي بس من خاف سلم!!
النوع الثاني من (المرتزقه) هم اللي يعيشون على حساب سمعة الأندية، يعني تصريحات وترزز قدام الكاميرات وكل يوم مناظرات ومسوين أنفسهم محامين ومن كبار أعضاء الشرف وهم مايدفعون ولاقرش واحد وخطفوا الأضواء ببلاش لأنهم يعرفون وش السالفة؟!! وبالأخير أقول، بعض الاندية ماخلى شيء، حتى بالصفقات يكسر الخشوم ويفتح الملفات عز الله انه يستاهل القابه وسلموا لي على المثالية.