نادي الهلال السعودي - شبكة الزعيم - الموقع الرسمي - ذكـــريــــاتــــي مـــع الــــفــــــن الـــــســـــامـــــــــي

بصراحه ماادري وش ابدى فيه وانا اعيش لحظات صعبه ومحزنه للغايه..وكنت حاسب له الف حساب طبعا اللي هو يوم اعتزال الاسطوره سامي عبدالله الجابر..
سبحان الله مدري ليش حبيت اللاعب هذا من غير كل لاعبين الهلال..صحيح انه مر لاعبين بالهلال يفوقون سامي مهاريا وبالذات الكابتن القدير يوسف الثنيان.. بس مافيه احد ملك قلبي وحبيته اكثر من سامي..

حبيت الهلال من وانا صغير وكنت احب الهلال ككيان وماكان يهمن لاعب معين ..المهم ان الهلال يفوز وبس ومايهمن من يسجل الاهداف ان شالله يسجلها الحارس..

شوي شوي وصرت افهم بالكوره اكثر وصرت اعرف اللاعبين زين ووش ادوارهم..وسبحان الله لفت نظري يوسف في البدايه كامتاع وسامي كهداف ..وصرت احب الاثنين..لكن قلبي مال كثير لم سامي..وصرت مجنون سامي..وكنت اتمنى الهلال يفوز بأي مباراه بس كنت اتمنى ان اللي يسجل الاهداف سامي..لاني احس اذا سجل سامي بشي غريب بداخلي يختلف عن أي لاعب ثاني اذا سجل هدف..
كنت افرح باهداف الهلال لكن اذا سجل سامي الفرحه تكون اكبر .والهدف يصير له طعم خاص..واي حركه يسويها سامي اتفاعل معها اكثر واكثر عن أي لاعب غيره..

ومرت الايام وحبي للهلال يزود اكثر واكثر وحبي لسامي فوق الوصف..

بدايات 1412..بدأ يلمع اسم سامي وكانت هي بداياته مع المنتخب..ويالله يوم شفته لابس فانيلة المنتخب..خلاص من قدي كأني انا اللي العب مكانه...وجت تصفيات كأس العالم 94 وهدفه الشهير على ايران اللي حط الكوره من فوق الحارس..يالله ياهو هدف وياهي مباراه وياهي فرحه لسامي..المنتخب سجل هدف ولامن سجل الهدف سامي يعني احلى واحلى....

من بعدها صار دمي نصه هلالي ونصه سامي..وياويل اللي يتكلم على سامي قدامي..كنت مااقدر امسك نفسي..وتاصل بعض المرات للنقاشات الحاده..

وياهو شعور حلوووو مره يوم شفت سامي في اول كأس عالم له عام 94..واول مشاركه له قدام المغرب وبأول المباراه يتسبب بركلة جزاء ويسجلها..هدف في كأس العالم..يسوى الكثيييييييير...

بصراحه دورت على الاسباب اللي خلتن اختار سامي من بين الكل..وليش سامي بالذات ليش ماخترت يوسف مثلا على ان يوسف افضل مهارات..على اني احب يوسف كثير وهو يجي بعد سامي..بالنسبه لي انا..بس لو رجعت للتاريخ لقيت ان سامي هو العامل الرئيسي بالافراح الهلاليه..مابالغ ان قلت ان 70% تقريبا من البطولات الهلاليه كان لسامي دور كبير فيها..وماانكر طبعا جهود اللاعبين الاخرين

وشلون مااحب لاعب سجل اهداف حاسمه للهلال..وابذكر بعضها باختصار..ومنها ..الهلال يلعب ب10 لاعبين في البطوله العربيه عام 1415 قدام العربي الكويتي والهلال لازم يفوز عشان يتأهل..وفجأه ينتفض سامي ويسجل 3 اهداف عالميه قادت الهلال للتاهل..طبعا خلاص بدت الجماهير تحب سامي كثير وصار نجمها الاكبر مع يوسف..وطلع الهلال على ايدين يوسف وسامي...حتى الجماهير صارت تردد يوسف وسامي..ومالها سيره غير يوسف وسامي..

موسم 1416 كان الاسوء لسامي ولي انا شخصيا لان اهداف سامي كانت قليله..لكن سبحان الله عرف وشلون يراضي محبيه..واثبت لهم انه رجل الاوقات الصعبه..
المباراه النهائيه لنفس الموسم كانت بين الهلال والاهلي ..وكان الاهلي متقدم 1/0..وسامي رغم غيابه عن التسجيل الا ان المدرب كان يعرف ان سامي يبان في المباريات الحاسمه وهذا اللي صار فعلا.وسجل سامي هدفين.وفاز الهلال بالدوري..وسبحان الله صار هو عريس المباراه..بس ياهي هدفين..جابت الدوري..

موسم 1415 الهلال والرياض على نهائي كأس ولي العهد..سامي كان احتياط لعدم جاهزيته..ومع بداية الشوط الثاني دخله المدرب ودقايق بسيطه. ويسجل سامي هدف ويفوز الهلال 1/0 وياخذ الكاس..شفتوا وشلون اهدافه من ذهب تحسم بطولات..

اما موسم 1418..والمباراه النهايه والاشهر والاجمل في تاريخ نهائيات الدوري..كانت الهلال والشباب..
كنت من بين الحظور مع الجماهير الهلاليه..واول مره بحياتي احظر مباراه نهائيه..بدت المباراه..بس على غير ماتوقعنا تقدم الشباب 2/0..بصراحه جان احباط ..بس الامل موجود..ولاكان ودي اول مباراه نهائي احظرها ينهزم الهلال..وكنت اشوف الجماهير اللي ملت الملعب واقول قهر كل الجماهير هذي تطلع زعلانه..لكن وشلون تزعل وابوعبدالله بالملعب..وفعلا يسجل الهدف الاول..بس ماكان مافي..الخمس دقايق الاخيره قلت خلاص شكل المباراه منتهيه..وكنت حاط يدي على خدي وكلي حسره والم..وسبحان الله في الدقيقه الاخيره ..الكوره مع الذيب من نص ملعب الشباب.شات كوره..وياهي شوته بعد ماشفناها الا وهي في الباب..وبعدها الله لايوريكم كل الجماهير تصارخ وفرحانه واللي طاح مغشي عليه..وانا كنت بحاله مايعلم فيها الا الله ضميت اللي بجنبي من شدة الفرحه على اني مااعرفه..ودموع الفرح تشوفها على عيون الجمهور..
وشلون ماتبونا نحب لاعب اسعد الالاف من الجماهير الحاظره واللي كانت يائسه من الفوز..

طبعا هذا شي بسيط ولو ابذكر وش سوى سامي بكل بطوله للهلال..مايكفي ولا 100 موضوع..

والا البطولات الخارجيه..عد واغلط سواء كانت خليجيه او عربيه اواسيويه.. وراح اذكرها في موضوع مستقل ان شالله..

والا مع المنتخب..له صولات وجولات..وقصته مع كؤوس العالم..وخاصة 2006 ودخوله التاريخ بأربع مشاركات كأس العالم..وتسجيل اسمه مع اباطرة كرة القدم العالميه بيليه ومارادونا..الذين سجلوا في كؤوس العالم
في بطولات مختلفه..

على الرغم من الهجوم والانتقادات من الجماهير المتعصبه وبعض الاعلام.. الا انه كان يزداد تألق وكان يرد عليهم بالملعب..ولو لاعب ثاني غير سامي..واجه الظغوطات والهجوم اللي كان يجي سامي كان انتهى من زمان.

ااااااااه يااسامي..عشت معك ومع الهلال احلى لحظات حياتي..وماراح انساها..تخيلوا من درجة الجنون وحبي له..كنت اشتري أي جريده تتكلم عن سامي..سواء مدح او سب..واي مجله فيها صورة سامي اشتريها على طول

حتى اهلي كانوا حاسين بحبي للهلال وسامي بالذات واول مايشوفون خبر عن سامي بالجرايد والتلفزيون كانوا يتذكروني على طول ....وااااااه ياايام المتوسطه..كل الفنايل اللي عندي فيها رقم سامي..رقم 9..وكانت صوره تملئ غرفتي...واااااه من اليوم اللي ينهزم فيه الهلال..زعل وتكتيم..وبعض المرات كنت احط حيلي على اخوي واضربه من القهر..

وكنت انتظر اليوم اللي نروح فيه للرياض عشان اروح للنادي واحظر التدريبات واسلم عليه..والا اذا اخذت صوره معاه من قدي..

السنوات الاخيره لسامي كانت هي الزبده وكانت فيها انجازات كبيره وكانها مكافأه له على ماقدمه من بداية حياته الكرويه..

سواء مع المنتخب او الهلال..

مع المنتخب قاد المنتخب للتأهل الى كأس العالم 2002 وكان الابرز في التصفيات مع بقية نجوم المنتخب..
بعدها سامي كان يفكر بترك المنتخب والاعتزال الدولي..ولكن مازال للمجد بقيه..وكانت الفتره التي بعد كطاس العالم هي فترة استراحة المحارب..
غاب 3 سنوات وفي عام 2005 وبالتحديد في التصفيات النهائيه لكأس العالم 2006 طالب مدرب المنتخب كالديرون بانضمام سامي للمنتخب..وياهي انتقادات واجهها المدرب..من بعض الكارهين والمتعصبين ضد كل ماهو ازرق...وقالوا كيف مدرب جديد يضم لاعب منقطع عن المنتخب 3 سنوات..وقالوا واسطات ومن الكلام اللي مايوكل عيش..

لكن سامي ماهمه كلامهم..وكالعاده الرد بالملعب ..وسبحان الله وفي اول مباراه يلعبها بعد انقطاع 3 سنوات يدخل في الربع ساعه الاخيره امام اوزبكستان..ويسجل هدف جميل.وهذا الهدف هو احلى رد على منتقديه..وااكد لهم ان الكوره مالها دخل بالعمر...وتعتمد على من يعطيها..

بعدها سامي صار يلعب اساسي مع المنتخب..وفعلا قاد المنتخب لصدارة مجموعته مع باقي زملائه..وفي اهم مباريتين في التصفيات قدام الكويت واوزبكستان وكل المباريتين بالرياض واذا فاز المنتخب فيهم يتاهل رسميا لكأس العالم 2006 وفعلا يجي دور الحسم ويفوز المنتخب على الكويت وتجي المباراه الاهم وهي قدام اوزبكستان..الالاف الجماهير حضرت لاستاد الملك فهد لتزف المنتخب لطأس العالم 2006..ويوم حسم خلاص خلوه لسامي وهويعرف كيف يتصرف...وفعلا يظهر سامي كالصقر ويقتنص هدفين حلوين.. ويفرح الجماهير بالتاهل لكأس العالم

قبل بداية كأس العالم كان سامي في نفس ذلك الموسم قليل المشاركات مع الهلال وغاب عن اغلب المباريات.. ولم ينضم للمنتخب الا قبل بداية كأس العالم بطلب من باكيتا..وكالعاده يظهر المتعصبون والحاقدون ويطالبون بابعاد سامي عن المنتخب لانه كبير السن...

باكيتا كان يعرف ان سامي ليس بكامل عافيته...لكن فضل حضوره مع المنتخب ..وفعلا وفي اول مباراه مع تونس كانت النتيجه التعادل وفي اخر ربع ساعه يدخل سامي..وقبل ماتنتهي المباراه بخمس دقايق يخطف سامي هدف ثاني للمنتخب.. وياهي فرحه وكلمة ( جن جنوني الكروي ) ماتكفي لوصف حالتي بهذي اللحظه..المنتخب تقدم هذي فرحه والهدف من سامي هذي فرحه ثانيه

بعدها جت اللحظه الصعبه وهي الاعتزال الدولي قدام اسبانيا..وياهي لحظه طعمها مررررر..وانا اشوف الالم والحسره بعيون سامي...وياهي صعبه وانا اشوف سامي يودع المستطيل الاخضر مع المنتخب..

سامي بعدها كان ينوي الاعتزال نهائيا ولكن مطالبات الجماهير واعضاء الشرف خلته يأجل القرار النهائي

في الحقيقه خلاص من بعد كأس العالم ومن بعد هدفه في تونس اللي خلى سامي يدخل تاريخ كؤوس العالم من اوسع ابوابه..غير انه شارك اربع مرات في كأس العالم..لا..الا انه صار مع بيليه وماردونا عباقرة كرة القدم بالعالم اللي سجلوا في اربع مونديالات ..مابعد هذا شي ابد..انجاز من الصعب جدا ويمكن من المستحيل تكراره

العام 2005 لسامي كان استثنائيا حتى مع الهلال ..لانه عاد كما عرفناه شابا..رغم كبر سنه الا انه كان من احلى الاعوام النه قاد الهلال للفوز بالدوري والكاس..وسجل 20 هدف مع الهلال..ابرزها كانت ضد النصر والشباب والاتحاد والاهلي..

والاحلى كان في كأس ولي العهد وكانت المباراه قدام الوحده والهلال خسران 1/0 ومهدد بالخروج..لكن سامي كان له راي اخر..وسجل هدفين حلوين..خاصة هدف التسحيب الشهير..وفاز الهلال بالمباراه

الموسم الاخير سامي كان ناويها اعتزال عشان كذا ماكان حريص وكان تواجده بالفريق الاساسي قليل..

حتى حانت اصعب اللحظات واشدها ألما..وهي لحظة الوداع..وياانا كنت اكرهها...

لكن كل اللي اقوله شكرا ياسامي على كل ماقدمته لنا من امتاع وفن وبطولات افرحتنا كثير وازعلتنا باعتزالك لكن مصير كل لاعب الاعتزال..وهذي سنة الحياة

شكرا سامي اقولها من اعماق القلب ..شكرا على كل لحظه ضحيت فيها من اجل محبينك..

سامي ماراح اقولك وداعا..ولكن ابقولك راح ننتظرك ان شالله بس المره هذي ان شالله كمدرب لانك تملك فكر عالي في فنون الكره..واللعب اللي راح يحمل لوائك ان شالله في المستقبل هو ولدك عبدالله..وعقبال مايطلع احسن من ابوه بعد ..

في الختام اسف على الاطاله....لاني مهما كتبت عن مشاعري او عن جزء من تاريخ سامي الحافل ماراح تيكفيه موضوع او موضوعيبن..بالعكس يبيله مواضيع كثيره

ودااااااااااااااااااااااااااااااااااااااااااعا سااااااااااااااااااااااااااااااااااااااااااامي
وداعا ايها القلب النابض فبعدك سيتوقف نبض قلوبنا..الذي ملأته انت بالافراح والبطولات والانجازات

http://www.3rbe.com/vb/upload/2007/8...1188583596.jpg