23/08/2007, 09:29 AM
|
| المجلس العام | | تاريخ التسجيل: 28/04/2003 المكان: المجلس العام
مشاركات: 2,104
| |
«¤¶`صاحب الحضور الراقي/ جــرح يشكي .. ضيفاً على حياة @ نت `¶¤»
فكرة : الماســـه الزرقاء .
تصميـم : عاشق بويعقوب .
اعداد&تنسيق : الكــلاسيكي .
نعود إليكم أحبتي من جديد مع (حياة @ نت )
وكما تعلمون فهي عبارة عن سلسلة ستستمر معنا بإذن الله لفترة ما في مجلسنا العام إعتماداً على تفاعلكم الكريم,
يحكي فيها ضيفنا عن سيرته وحياته في العالم الافتراضي , عالم الشبكة العنكبوتية وعالمه في شبكة الزعيم .
ضيفنا التــاسع .. ضيف عرفه أعضاء المجلس بروحه المرحه .. واسلوبه الجميل في الطرح ..
أبــدع كثيراً في حضوره .. بقلمه .. بروحه ..بفكره .. بأنسانيته الرائعه .. بصراحته النقيـه ..
بدأ في المجلس بخطى الملك الواثق .. سار عليها .. اصبح احد افـراد عائلة المجلس العام ..
ضيفنــا هو العضو المتألق صاحب البسمه المشرقه والتعامل الجميل ..
«¤¶` جـــرح يشـكي `¶¤»
نترككم مع كاتبنا وضيفنا المميز.. ليُبحر بكم في عالمه الافتراضي ..
السلام عليكم ورحمة الله وبركاته
بعد ما طُلب مني المشاركه في الموضوع قمت اعيد شريط ذكرياتي في شبكة الزعيم ، ما زلت اتذكر اول موضوع كتبته وكم كانت فرحتي به ،واستمر الشريط في الحركه الا ان انتهى فلم ارى شي يستحق ان اقدمه لشبكة الزعيم ولاعضائها ومشرفيها ، فكرت ... ثم فكرت ... فلم اجد سوى قلب اصبح بحبكم ينبض ،اصبحتم انتم كل ما فيه ، فهنياً لي بكم ، اخيراً اعجز ثم اعجز ثم اعجز ان اوفي بعض ما قدمت الشبكه لي ، فهي مدرستي والله .
][ ... بداية جرح في النت ... ][
بداية دخولي لعالم الانترنت كانت قبل 5سنوات تقريباً , والسبب ان مدرس مادة المكتبه كلفني بعمل بحث وقتها كنت في اول ثانوي , و ما كنت املك جهاز فطلبت من الوالد الله يحفظه ان يشتري لي جهاز , فبالتأكيد رفض الوالد يحسب انه مثل البلايستيشن , لكن بعد ما اقتنع راح وشراء لي جهاز بعد تدخل الوالده والعائله كلهم
اول موقع دخلته حبيب قلبي ))google)) وثاني موقع كان موقع مكتبة الملك فهد الوطنيه .
كانت عندي فكره قبل ان الانترنت هو دردشة فقط فما حرصت عليه.
بدات كمتصفح للمنتديات وطفشت منها قبل لا اكون علاقات ثم دخلت عالم الشات وتعرفت على عالم وكان نكي في الشات بـ (( جمس الهيئه )) بدات كشات كتابي ثم تحولت الى الصوتي وبقيت على الشات حدود السنتين وطول المده اللي قضيتها في الشات ما زدت من مخزوني الثقافي الا (( س1 )) و (( ك1)) والشله كلها تحولت للبالتوك وينطبق عليه المثل اللي يقول (( سعيِد اخو مبارك )) كلها هذره في هذره يعني معلومه وحده مفيده ما فيه ،
اما مجال الهكر اخذت لي كورس من واحد من الشباب بس للحين ما تخرجت , وتعرفت على واحد اسمه في عالم الهكر
(( الذئب الازرق )) بديت اتعلم منه بعض الحركات لكن توقفت بعد ما عرفت ان السالفه كلها لغه انجليزيه .
][ ... الاستاذ سليمان العنقري .... هو من دلني على الزعيم ...][
فانا تعرفت على الشبكة عن طريق استاذي سليمان العنقري احد موسسي الشبكه كنت من طلابه في المرحله المتوسطة وكان دائماً يقول لنا عن الشبكة وتمنيت وقتها ان اكون عضو من اعضائها والحمد لله سجلت في الشبكة بتاريخ 2005/5/5م ومن فرحتي بالتسجيل ما خليت احد الا وقلت له اني سجلت في الزعيم ،
اما سبب اختياري لمعرف (( جرح يشكي ))
في البدايه نصحني واحد من الشباب باسم انجليزي وقال ان معناه الزعيم ومدري ايش انا صدقت بس الطامه لما عرفت ان معنى الاسم المجنون بدال الزعيم ، واشار علي اخوي باكثر من اسم كان بينها جرح الغدر عاد انا مالي ومال الغدر والكلام هذا قعدت افكر الين حصلت هالاسم واللي يبي اسمي القديم يرجع لاول موضوع لي
][ ... اسعد لحظه في حياتي ... كانت في النت ...][
قبل حوالي سنتين كنت في مقهى نت وطفشت منه ووقتها كنت ما اعرف احد في الشبكة وماسنجري ما فيه احد وكانت الساعه حدود الـ 4 الفجر قلت يا ولد ليش ما ادش واقرا الجريده وارتاح بدل ما انتظرها بعد الصلاه المهم دشيت موقع جريدة الجزيره الا والاقي في الصفحه الاولى خبر كذا بالخط العريض نزلت النظاره ومسحتها ورجعت ولبستها واقرب وجهي من الشاشه الا ومكتوب (( نتائج قبول كلية الملك خالد العسكريه )) وافتح الخبر واطلع الرقم من المحفظه وادقق لما حصلته بغيت انهبل قمت وطلعت من المحل رايح للبيت امشي 200 وثلاث اشارات سلمت عليها وقطعتها دخلت البيت والكل نايم رحت للوالد الا وانا اقول له بصوتي كله الرقم طلع الرقم طلع والوالد ما يدري وش يسوي من الفرحه وقتها لو اقيس ضغطه حصلته صفر
وبعد هالخبر المفرح جاتني افضل واغلى هديه من الوالد الله يحفظه (( المقبول في الكليه اخوي الكبير)).
][ ... اولادي عمي ما عرفتهم الا في الشبكة ... ][
* انا كنت في السابق لا اؤمن بصداقة الانترنت لكن بعد معرفتي باخوان لي في الشبكة تغيرت نظرتي للنت.
ومن الشبكة تعرفت على اثنين من الاعضاء واستمرت علاقتي معاهم اكثر من سنه عبر الماسنجر والجوال وعرفت عنهم كل شي الا اسمهم الكامل واحد منهم في الجبيل والثاني في الاحساء وفي يوم من الايام كنت معزوم لزواج واحد من اقاربي ما دريت الا اخوياي يتصلون فيني ويقول انهم في الرياض وبيحضرون زواج واحد من اولاد عمهم وطلبوا يقابلوني في اي مكان قلت لهم اوكي
وتطفلت عليهم وسئلتهم عن اسم القصر اللي اهم حاضرين فيه الزواج فتفاجئت انهم موجودين في نفس القصر اللي انا فيه وطلعوا من اقاربي كانت مفاجئه بالنسبة لي والله اكرمني بـاخوي عبدالمحسن واخوي محمد فوالله ما كنت اتوقع ان نكون اقارب (( فرقتنا الدنيا وجمعنا حب الزعيم ))
وتشرفت بمعرفت الكثير من اخواني الاعضاء
كان اولهم الاديب ماجد مقبل فهو اول واحد اتعرف عليه واخوي هامور البورصه ماجد وهامور اهم اكثر الاعضاء بيني وبينهم اتصالات وبعدهم كان هنا (( عبود البطل سابقاً )) والمشاغب وليوميسي والكناري الازرق والشايب فياض f*y*d وكلي هلالي وزعيموفيتش وعندي بالمسن مجمووووعه من اخواني اعضاء الشبكة اللي افتخر بمعرفتهم .
(( فرقتنا الدنيا وجمعنا حب الزعيم ))
وتشرفت بمعرفت الكثير من اخواني الاعضاء كان اولهم الاديب ماجد مقبل فهو اول واحد اتعرف عليه واخوي هامور البورصه ماجد وهامور اهم اكثر الاعضاء بيني وبينهم اتصالات وبعدهم كان هنا (( عبود البطل سابقاً )) والمشاغب وليوميسي وعندي بالمسن مجمووووعه من اخواني اعضاء الشبكة .
][ ... جرح خارج الشبكه ... ][
المنتديات انا تشرفت بالانظمام لكوكبه من المبدعين في الشبكة
وتعتبر الشبكة اول منتدى اسجل فيه وبيتي الثاني ويبقى للشبكة واعضائها مكانه خاصه في قلبي اسئل الله ان يجمعنا على طاعته ، اما عن المنتديات الثانيه فاكون مظطر لتسجيل فيها لان اغلبها تشترط التسجيل . لكن اغلب المنتديات اللي ادخلها المنتديات الرياضيه وخصوصاً الهلاليه منها .
* اما عن المواقع الثانيه
فصيد الفوائد اكثر موقع ادخل عليه ,وموقع الشيخ مشاري العفاسي وموقع المنشد هاني مقبل ، وبعض المواقع الاخباريه وبعض المواقع ذات الطابع العلمي خصوصاً مواقع الفيزياء (( مجال تخصصي ))
][ ... مواضيع آسرة تفكيري ... ][
كثير من المواضيع اعجبتني في المجلس او في النت بالاصح لكن يبقى لموضوع اختي الماسه الزرقاء
تأثير كبير في حياتي~~~~~~~ (( حينما يؤذن المؤذن .. فسنتوجه حتى لو كنا بأعالي الجبال ))~~~~~~~
مع ان الموضوع عباره عن صور الا ان الصور ابلغ من مليون حرف .وموضوع كدت ان انحرم من ماده بسببه
كان ماجد منزل الموضوع وانا قاعد اقراه وافكر فيه واحاول اطبق الموضوع في حياتي المهم جلست افكر فيه تقريباً يومين وانا شغلتي بس البارايوم، المهم ذاك اليوم كان عندي محاظره كيمياء وكانت اخر محاظره وانا تعبااااااان كانت الساعه 2 الظهر وانا في في المحاظر مسرررح سئلني الدكتور عن رمز اليورانيوم وكنت وقتها افكر في الموضوع وسمعت اللي جنبي يقول لي الباراديوم بس بصوووت خفيف وبكل صوتي قلت الباراديوم يا دكتور بعد ما قلتها دريت اني مضيع قعدت اضحك لحالي وزعل الدكتور المصري وطردني من المحاظره وبسببها بغيت اخذ حرمان في الماده .
][ ... الجانب الاخر من النت ... ][
(( هكرز نصراوي خخخخخخخخـ ))
الموقف الاول :
كنت في مقهى انترنت وباقي على صلاة العشاء عشر دقائق وكنت على المسنجر وما دريت الا وتجيني طلب اضافه وقبلتها بديت معاه سلام وكيف الحال المهم الولد قعد ينرفزني ويسب الهلال وانا معطيه على جوه ااخر شي قعد يتحدى ينسف ايميلي الصراحه انا خفت (( لان ايميلي السابق مفجره واحد نصراوي من العيال )) وصار يعد من 60 ولما وصل الى رقم 5 تقفل الجهاز وصار وجهي اشكال والوان وقلبي يمشي طبلونه من الخوف قلت خلاص راح الايميل منه العوض وواخر شي صار صاحب المقهى قطع الاتصال علي لان المسجد بيذن وما يمديني اطلع الا(( ماجد مقبل يتصل بك ))
قريت اسمه في شاشة الجوال كأن قلبي هدء اول ما رديت عليه لا وابو الشباب ميت ضحك بغيت اتهور واتوطى ببطنه بس قلت هذا اخوي الاديب الخنفشاري مالها داعي بس الصراحه اكلت المقلب جااااااااامد بس انا لك .
الموقف الثاني :
كنت ايام الابتدائي غاث طلاب المدرسه كل يوم بوجيههم في الاذاعه وما عندي الا حكمة اليوم وحكمة اليوم وكنت كل يوم اقراء (( من حفر حفره لاخيه وقع فيها )) .
قبل كنت اقراها من دون ما افكر فيها بس البارق وسهل والمشاغب عطوني درس خصوصي انما ايه (( في موضوع [ بعض إعضاء المجلس العام ومشرف ___ !!! ]¦[]¦[مقالب × مقالب ] ))
لما طلبت من المشاغب انه يساعدني في اصطياد البارق راح المشاغب وخانني واتفق مع البارق انهم ياكلوني المقلب وارسل لي البارق قال ان شبكة الزعيم مو للاشكال هذي وانا عطيته مهله اذا ما اثبت كلامه ولا برفع باسمه للاداره ، وادق على سلطان مقفل ، جات الساعه 12 الليل طلعت انام وما دريت الا الجوال يدق (( سلطان )) هلا سلطان وش السالفه قال (( انا خربتها مع البارق )) والولد كان حزين عاد انا خربت اخلاقي قلت انا السبب ، صحيت الصباح وارسلت للبارق وقلت له بالحرف (( ان سلطان ما يستحق الانذار لان المشكله كلها مني انا وسلطان مجرد ناقل لا اكثر )) وبعدها ارسلت لسهل ابيه يكون واسطت خير بيننا رد علي سهل قال البارق يقول على اخر عمري المشاغب وجرح يبون يضحكون الاعضاء علي ، خلاص انا قلت ابي اطلع بكرامتي احسن اتصلت على ماجد بما انه اديبنا ابي استشيره وقلت له يشوف اذا كتوب تحت اسمي موقوف ولا لا ، بعدها ارسلت للاعضاء اللي سويت فيهم المقالب اعتذر منهم واودعهم ومعاهم سلطان. ارسلتها ودق علي سلطان وقال لي كل الموضووووووووع بس والله مقلب جامد ما اكلت مثله ولا اظن باكل مثله .
][ ... فيس × فيس ... ][
تقابلت انا وهامور البورصه وليو ميسي واديب المجلس العام ماجد مقبل وانا مهندس الاجتماع حددت لهم المقهى (( بلاك هاوس )) بين طريق الملك فهد وشار العليا العام وكان اول الحاضرين للكفي هامور وليو ميسي اتصلت على هامور وقال انه مع ليو ميسي ووصف لي مكان جلستهم وجيتهم وسلمت عليهم وجلست حدود الـ ربع ساعه ما ادري وين طارق ووين يسلم اخر شي عرفت بعد ما دققت في اصواتهم وانظم لنا ابو مقبل حدود الساعه 11 وجلسنا الى حدود الساعه 2.30 من دون ما نشعر بالوقت وكان من المفترض ان ينظم لنا ثلاثه من كبار اعضاء المنتدى بس الظروف ما سمحت لهم ، على امل ان نجتمع بهم في اقرب فرصه باذن الله .
][ ... خلاصة دخول جرح للنت ...][
كسبت معرفه اخوان افتخر فيهم .
ثاني شي بسبب النت جاتني سياره هديه من الوالد (( قصة جريدة الجزيره )) .
ثالث شي ما بقى الا السواق ويقول لي (( ايه هذي اخرت الانترنت اللي اربع وعشرين ساعه قاعد عليه ))
خسرت النظر وصرت (( دكتور )) .
][ ... اهداء للمجلس العام ... ][
"إهداء بسيط لكم"
=======
نبقــــــى والزمن شاهد ...
حبايب ،، قلبنا واحد ..
وتربطنـــا أخوتنا ،،، => رباط الكف بالساعد <=
هذا الكلام من قلبي نابع ..
وعلى قلبكـ خليهـ طااابع ..
اخيراً اعتذر لك من اخطيت عليه فاحنا اخوان اجتمعنا في حب الزعيم بعد الاخوه الاسلاميه
_ أعزكم حيل _
اخوكم
جرح يشكي
ونحن بدورنا نشكرالأخ/جــرح يشكي لإٍستجابته لدعوتنا وانتظرونا الأسبوع القادم بإذن الله في
تقبلوا أرق التحايا وأطيبها
من مشرفي واستشاريي
منتدى المجلس العام
للإطلاع على الحلقات السابقه لـ ضيوف حياة@نت
«¤¶`أرشيف حياة نت " `¶¤»
|
الوضع الشجري
