المكان : مطبخ ( الشيفه ) أم سعيدان
الزمان : ساعة عرض أفلام كارتون بتوئيت السعودية :p

مها : يمه شوفي سعيدان النذل حاط التلفزيون على قناة المفاصيخ أل البيسي وهم ولا شي .. وأنا أبغى القناة الاولى ..
الأم : ليه وش تبين بـ الأولى ؟!
مها : فيها بنك بانثر !!
الأم : صدق والله ؟! ... أي حلقه ؟!
مها : حلقة الورود .. اللي وردة تطلع ووردة تدخل ........

الأم : إلى الحين يعيدونها ؟!
مها : ليه ؟! كم مره جابوها ؟!
الأم : والله حسب علمي وخبرتي في الحياة أنها فوق الالف .. ان كانها ما صارت أكثر !
مها : يا نصبك يمه نصبااااااااااااه .. أنا ما شفتها ألا عشر مرات بس !!
الأم : أقووووول .. ورا ماتنطمين ؟!
مها : يوووووووووه .. وأنتم أي واحد يعبر عن رأيه بصراحه .. تقولون له انطم ؟! وش فيكم صايرين كأنكم مجلس الامن !!
الأم : مهاوي ووجع .. وين طلعتي هالحكي منه !!
مها : سمعتك مره تقولينه لأبوي وجازت لي !!
الأم : وأنتِ يالفالحه مهوب عيبٍ عليك تتسمعين علينا ؟!
مها : ما تسمعت !! .. أنتم اللي كنتوا تتناقشون بصوت عالي !!
الأم : صدق أنك ما تستحين .. طالعةٍ على أبوك !!
مها : ليه ؟! وش قالوا لك أبوي بن لادن كل شي بتحطينه فيه !!

الأم ---------- >>
مها : وشفيك تناظريني كأنك مهبوله ؟!
الأم --------- >> مها : يمه .. ترى الاختلاف في وجهات النظر لا يُفسد لعلاقتنا أي قضية !!
الأم : نعنبوا بليسك .. أنا أمك احترميني على الأقل !!
مها : يا يمه .. احترمك على عيني وعلى راسي .. بس من حقي أني اختلف عنك .. انتم ليه تبغون كل عيالكم يصيرون كوبي منكم ؟! من زينكم !
الأم : ووجع .. ووجع ... ووجع !!
مها : يمه استغفري .. عيب عليك .. أنتِ قدوه !!
الأم : وشووووووووو ؟!
مها : أقول يمه .. تعرفين الديكتاتوريه ؟!
الأم : ايه اعرفها .. وش فيها ؟!
مها : ايــــــــــــــــــــــه .. علشان كذا !!
الأم : وشووووووو ؟!
مها : لا أبد ولاشي !!
الأم : مهاوي .. قولي لي أحسن لك !!
مها : يا ربيه .. آلحين ما يحق لي أصير مثل أمريكا إذا ما جازت لي السالفه أغيرها ؟!
الأم : مهاوي ووجع .. وش دخلك في امريكا ؟!
مها : أنا وش دخلني ؟! ألا هي وش اللي دخلها ؟!
الأم : وش قصدك ؟!
مها : يمه .. هذي أشياء ما تعرفينها أنتِ !!
الأم --------- >>
مها : ما تعرفين أن فيه أشياء ما نعرفها .. وما راح نعرفها .. يعني لا تفهمين أحسن لك!
الأم : مهااااااااااااااوي ؟!
مها : يا لبيــــــــــــــــه ...
الأم : وش أخبارك ؟!
مها : الحمد لله .. بخير .. تمام .. أزقح .. بس عاد لا تصدقيني .. ترى أنا مثل بعض الناس نقول أننا بخير والاوضاع رايحه وطي .. علشان ما نتعب حبايبنا وسائل الاعلام .. اللي من كثر ما يمونون علينا يحرفون في كلامنا ويعدلون .. ألا يمه .. تعرفين وجه الشبه بين الاعلام العربي وأدوات التجميل ؟!
الأم : أهااااااااااااا بس !! ما بعد جا توم وجيري ؟!!!!!


والمصدر عند نايف :p :p :p :p :p

اتمنى ان تعجبكم ;)