بسم الله الرمن الرحيم

اسعد الله ايامكم بكل خير ، وصبحكم الله بالخير ومسيكم بالخير

...][][ حركات الاحماء ][][ ...

يوم الاربعاء الماضي صحيت كالعاده قبل صلاة العصر وتغديت وجبت الشاي للوالد وما فيه الا قووووه قرقعة بيالات المهم الوالد جاه اتصال مفاجئ من عامل المزرعه يقول ان (( مدري وش يسمونها ذي )) احنا نقول لها دينمو المويه ، يقول العامل انها طاحت في البير قرر الوالد انه يروح للمزرعه لـ يشاهد الحدث بام عينيه ، عطاني المفتاح اروح اغير زيت السياره وما خلصت من اغراض السياره الا مع اذان المغرب ، رجعت للبيت واخذت الوالد وصلينا في محطة النجمه اكيد معروفه اللي قبل القديه واصلانا السير مروراً بـ ضرما ومرات الطامه الكبرى بعد محافظة مرات الطريق بالعربي طريق مقطعه كله لفات وطلعات ويمينك ويسارك نفوووووود ومشينا ومشينا وكان الخوف بدا يداعب قلبي كل شوي يشتغل نور من جنب الخط يا ولد وش السالفه مدري هم جن او انهم قطاعين طرق وفي الاخير كانت الطامه الكبرى ،

بينما انا اهم باخذ عزم للسياره لان قدامنا طلعه اول ما طلعتها الا وقدامي سيارتين ومطفين الانوار وكان واحد ع يمين الخط والثاني ع يسار الخط قربت منهم وانا امشي 100 طلع علي الاول وكاد ان يصدمني وتجاوزته وطلع لي الثاني وبـ فاصل مهاري ولا اروع كـ فن رونالدينو تجاوزتهم وكنت افكر اني خلاص سلمت منهم واشغل النور العالي الا والنور ينعكس ع الخط <<<<<<< الطريق كله زيت عشان اذا سحبت فرامل اروح ملح

الصراحه بغيت اروح وطي لولا صيحة ابوي (( شيل رجلك عن الابنص ولا تلمس فرامل )) المهم عدت ع خير بغيت ارجع لهم ادوس بحوض بطونهم بس الوالد حلف علي ما اجيهم ، استمريت ع الخط وزدت السرعه لـ 140 وطول الطريق كبس يمين وكبس يسار ، يا ولد وش السالفه ، التفت علي الوالد وقال اقر المعوذات وانا ابوك

<<<<<< محمد راح ملح

<<<<<< محمد راح شوربة دجاج

<<<<<< محمد اصابته رجفه قويه

<<<<<< محمد يقول في نفسه لا ابوها لا بو كلب هالمزرعه

واقرا المعوذات واجي باقرا آيت الكرسي وربي من قوة الخوووف ما قدرت اكملها وصلنا للمزرعه حدود الساعه ( 9.30 ) وعلى طوول الوالد سحب فراشه وناااااام ، محمد قعد يسب نفسه (( وفي رواية يشتمها )) دقت الساعه 12 وانا ما نمت ، وكان موجة الخوف التي اجتاحتني خفت واخذت لي غفوه الين الساعه 3 الفجر وع طول صحيت الوالد قلت (( يبه اذن المسجد )) الوالد ما شاء الله عليه طالع علي ذكي مثلي قام من النوم وداري اني بالع ام العافيه وافطرنا وجلسنا نتقهوي ونتمشى في ارجاء المزرعه المشؤومه << كلها نخلتين وشجرتين برتقال ومدري كم شجرة عنب وتسميها مزرعه <<<< الاخيره شطحه ترا

المهم كانت ذيك الليله من اسوئ ليالي عمري ، ورب البيت خووووف موب طبيعي واذا كنتم تعرفون نفود السر بتعذروني كلها جن وقطاعين طرق

^^^^^^^^^^^^^^^^
شرايكم في المقدمه بس ، والله ظلم اذا ما دخلت موسوعة اغسطس << ع قوله واحد من الشباب


...][][ صافرة البدايه ][][ ...

ورد ذكر الجن في القران الكريم في عدة مواضع

اذكر منها قوله تعالى [ وَمِنَ الْجِنِّ مَن يَعْمَلُ بَيْنَ يَدَيْهِ بِإِذْنِ رَبِّهِ وَمَن يَزِغْ مِنْهُمْ عَنْ أَمْرِنَا نُذِقْهُ مِنْ عَذَابِ السَّعِيرِ * يَعْمَلُونَ لَهُ مَا يَشَآءُ مِن مَّحَارِيبَ وَتَمَاثِيلَ وَجِفَانٍ كَالْجَوَابِ وَقُدُورٍ رَّاسِيَاتٍ ]

وحثنا ديننا الاسلامي على عدم الخوف من الجن ، وذكر لنا ما نقي به انفسنا من شرورهم .

دعاء الاستعاذه من الجن <<<< انصحكم تحفظوه في جوالاتكم

( اعوذ بالله من الشيطان الرجيم ، بسم الله الرحمن الرحيم ، رب اعوذ بك من همزات الشياطين ، واعوذ بك رب ان يحضرون ، اللهم اني اعوذ بك من الهم والحزن ، ، واعوذ بك من العجز والكسل ، واعوذ بك من الجبن والبخل ، واعوذ بك من غلبة الدين وقهر الرجال ، اللهم اني اعوذ بك من الفقر والعيّلة ، واعوذ بك من كل بلية ، اللهم اني اعوذ بك من الفقر الا اليك ، ومن الذل الا لك ، ومن الخوف الا منك ، واعوذ بك ان اقول زورا ، او اغشى فجورا ، او اكون بك مغرورا ، واعوذ بك من عضال الداء ، وخيبة الرجاء ، وشماتة الاعداء ، وزوال النعمة ، وفجأة النقمة ، اللهم اني اعوذ بك من شر الخلق وهم الرزق وسوء الخلق ، آمين آمين يا ارحم الراحمين . )

بالاضافة للمعوذتين
و اية الكرسي
ترديد الاذان

إقتباس روى مسلم في صحيحه عن عامر , قال :سالت علقمه :هل كان بن مسعود شهد مع رسول الله ليله الجن؟ قال :فقال علقمه : انا سالت ابن مسعود , فقلت هل شهد احد منكم مع رسول الله صلى الله عليه وسلم ليله الجن ؟ قال : لا ولكن كنا مع رسول الله صلى الله عليه وسلم ذات ليله ففقدناه فالتمسناه في الاوديه والشعاب: استطير او اغتيل.

إقتباس قال فبتنا بشر ليله بات بها قوم فلما اصبحنا اذا هو جاء من قبل حراء فقلنا : يارسول الله فقدناك فطلبناك فلم نجدك , فبتنا بشر ليله بات بها قوم . فقال اتاني داعي الجن ,فذهبت معه فقرات عليهم القران ). قال :فانطلق بنا فأرانا اثارهم واثار نيرانهم وسالوه الزاد. فقال : لكم كل عظم ذكر اسم الله عليه يقع في ايديكم اوفر مايكون لحما . وكل بعرة علف لدوابكم ) فقال رسول الله صلى الله عليه وسلم فلا تستنجوا بهما , فانهما طعام اخوانكم ) وكذلك تكرر لقائه عليه الصلاه والسلام بهم كما في بعض الروايات في صحيح البخاري : ان بعض الجن الذين اتوا كانوا من ناحيه اليمن من مكان يسمى نصيبين , فقد روى البخاري عن ابي هريره عن النبي صلى الله عليه وسلم قال :اتاني وفد نصيبين -ونعم الجن-فسالوني الزاد فدعوت الله لهم الا يمروا بعظم ولا روثه الا وجدوا عليها طعاما .

...][][ انتهاء الشوط الاول ][][...

فاصل إعلاني بين الشوطين

صور اشك في صحتها

الصوره الاولى << تبي الصور اضغط ع الرابط تراي ما اجبر احد ابد ابد

شوف اللي محاط بـ دائره في الصورتين

اكثر صوره انتشرت في النت على انها صورة جني لكن طلعت مو حقيقيه
اضغط ع الارقام ( 1 ، 2) رقم واحد اهي اللي انتشرت ، ورقم اثنين الاثبات على انها دميه



مقاطع الفيديو << اضغطوا ع الرابط بعد


يقال بانه جني عند جسر الجمرات ثيابه قديمه كانها ثياب ابو دولامه


جني في قصر افراح


جني متجه إلى سيارة تحترق

جني في البر

... ][][ بداية الشوط الثاني ][][ ...

بـ اسرد بعض القصص اللي سمعت بها

[][][] القصه الاولى

شايب اعمى وولده كانوا في البر وضيعوا الطريق وكانوا في ليل ، وهو يمشي شاف له خياااااااام كثيره راح لها ووقف عندهم ونزلوا بيتقهوون عندهم الولد شاف عيونهم بالطول [ موب بالعرض مثلنا ] كلم ابوه قال يبه يالله بنمشي قال ابوه لا اجلس <<<<< الشايب اعجبته القهوه

قام الولد وراح للسياره وقفل الابواب وجلس يطالعهم ويجيه واحد منهم يطق عليه الباب ورفض الولد يفتح له الجني قعد يضحك ورجع يجلس وتعشى الشايب ونادى ولده وراحوا وقال الولد لـ ابوه عن القصه وما صدقه اليوم اللي بعده كلم الولد اخوه وقال له كل الفتاصيل وكذبه اخوه بعد ركبوا السياره بيتأكدون من سالفة الجن راحوا لمكانهم امس وما حصلوا شي .

[][][] القصه الثانيه :

مجموعه رايحين للربع الخالي يصيدون ارانب هما 4 على سيارتين ، راعي الشاص صاد له 3 ارانب ورجع لـ اخوياه وقال لخويه الثاني اي وحده نذبحها الحين
ردت الارنب قالت اذبحهم كلهم الا انا ، <<<<< وش بيكون موقفك لو كنت مكانهم


[][][] القصه الثالثه :

قالي عنها واحد من اقاربي وهي حاصله لهم

كل ما نزلوا في بيت يحوسهم جني عيشهم في عذاب ، حياتهم انقلبت فوق تحت ، قرروا انهم يطلعون من البيت ، راحوا للبيت الثاني وهو معاهم اذا ناموا يروح للمطبخ ويكب صابون التايد في السكر وكل شي يلعب فيه

اذا صحوا من النوم وطلعوا من غرفهم يروح لغرفهم ويوسخها بكل انواع الوساخات ابوهم يشتغل مع الشيخ ابن باز الله يرحمه وسئله وش يسوون به ؟؟ قال له الشيخ لا تطلع من البيت لانكم اذا طلعتوا لبيت ثاني بيلاحقكم ، استمروا 3شهور في البيت وهو معاهم اذا شغلوا المسجل ( قرآن ) يرجعون ويحصلون الشريط مقطع ، لحد الان الجني مسالم مع كل اللي سواه

وصل الامر انه يقول لهم اذا ما زوجتوا فلان بكسر رقبته وما زوجوه وفعلاً وهو نازل مع الدرج طاح وانكسرت رقبته رجع وقال لهم اذا ما زوجتوه بذبحه ، ومن اليوم الثاني وهم مملكين له واستمر في ازعاجهم الى ان طلع مره لزوجة الرجال وقال لهم (( اطلعوا من البيت )) قالت [ نطلع من البيت اذا ذبحتك ان شاء الله ] وصار يزعجها هي لحاله من دون الباقين الى ان دخل فيها كلموا شيخ يقرا ع المسحورين ، وقعد يقرا عليها الين ما تكلم الجني وقال له الشيخ وش اسمك قال [ دينار ] قال من وين قال [ من العراق ] قال وش تبي فيها قال [ هم ذابحين ولدي الصغير ] قال له الشيخ كيف ذبحوه قال [ انهم غاسلين دورة المياه بـ مويه حاره وكان ولدي فيها ] وكان الشيخ قوي في تعامله قال له لو ما تطلع بذبحك انت و اولادك واستمر يقرا عليها اكثر من اسبوعين وكان يجيب معاه ماء زمزم وعسل وحبه سوداء وكان اذا شربها الجني يقعد يصيح [ خلاص خلاص بطلع بطلع ] واذا وقفوا من تشريبه رجع يسب ويرفض انه يطلع الى ان استمر معاه الجني اكثر من ساعه وهو يقرا عليه قال الجني [ خلاص خلاص بطلع ] قال له الشيخ يالله بسرعه قال الجني [ بطلع بس بكسر رجلها وانا طالع ] قال الشيخ والله ما تكسر رجلها وقعد يقرا عليها الين طلع ورجعت حياتهم افضل من قبل ولله الحمد .

^^^^^

القصه ورب البيت حقيقيه واللي صارت لهم من اقاربي اما القصص الباقيه فـ انا مجرد ناقل لها

نهاية الشوط الثاني


الان مع قصص طريفه حصلت لي او سمعت بها

انا ولله الحمد ما اخاف من الجن ابد ابد واللي قال لكم اني اخاف من الجن تراه صادق

واذا طلعنا ايام الامطار بعد العذابين اطلع واروح مواصل عشان اول ما اصلي العشاء اناااااااام على طول

يما صارت لي مواقف وياما خانوني اخوياي

اذكر مره كنا طالعين لـ روضة خريم وكنا الظهر جايبين معنا دجاج للعشاء وصار الدلخ ( عزوز ) ناسي لا يحط الدجاج في حافظة الثلج وحصلتها ذايبه فقررت اني اتكرم عليهم واروح اشتري لهم دجاج ركبت السياره وشغلت ( الكلام هذا بعد صلاة المغرب ) ومعاي ولد عمي ويوم انتصفنا في الطريق الا واللي متمسك في السياره من ورا ويصيح وكان لابس فروه انا تجمدت عروقي من الخوف والله ما وقفت الا لما وصلت المحلات [ اي محلات يابو الشباب كلها خيام وتخب ] وصار عزوز الاهبل وانا ابد ابد ما سويت له شي ما سويت الا اني حلفت ما يركب معي ومشيت وخليته ويوم وصلت للعيال قلت لهم روحوا جيبوا خويكم .


القصه الثانيه

كان فيه شباب كلهم من حارة وحده وكان كل خميس يطلعون للبر ويوم من الايام طلعوا من دون ما يقولون لـ احمد ( احمد اسم مستعار ترا ) قام احمد من النوم دق على اخوياه ما احد يرد طلع وقابل واحد يعرفهم وسئله عنهم قال له انهم طلعوا للبر،

فكر فكر احمد كيف ينتقم منهم واخيراً جاب الفكر اليهوديه

طلع لهم ووقف السياره بعيد وراح للبير اللي قريب منهم ، ونزل كل ملابسه وجلس ورا البير الين غابت الشمس تقريباً وصار يطلع راسه ويصيح لهم وينقز فوق بسرعه ويصيح لهم (( اهم يفكرون انه من جوا البير وهو لا من برا البير )) وكل واحد منهم ركب سيارة من دون ما يشيلون اغراضهم وانحاشوا ورجعوا لبيوتهم وقابلهم احمد وسئلهم وين راحوا وقالوا انهم راحوا للبر وطلع لهم جني من البير انتهت القصه .









كثيره القصص اللي في بالي لكن والله متعيجز اكتبها كلها لكن اعيد وازيد المقدمه لازم تكون في موسوعة فياظ لـ الشطحات الغبيه .

فمن مبدا انك اذا شطحت شطحه غبيه في المقدمه لابد من انك تشطح شطحه غبيه في الاخير

الختام

تراي كاتب الموضوع مو لعيونكم لا انا كاتبه عشان تشوفون توقيعي الجديد تراه هديه من اخوي ( كان هنا ) والله يا اني استهلكت هالولد كل شوي اقول له ما اعجبني هـ التصميم والولد والله حبووووب وطيب ما يرد لي طلب عاد اللي يبي تصميم ولا شي تراه في الخدمه وما يرد احد ابد ابد <<<< وهقتك صح

<<<<<<<< يفكر ان اشراف المجلس العام بيسوي مسابقه لـ اجمل شطحه في موضوعي واللي بيصوت لي ماني معطيه شي واللي موب مصوت لي بفك عليه جني صغير

جد عاد وش افضل شطحة اللي في البدايه ولا اللي في النهايه .

ايه نسيت اقول ان الرد الاول محجوز لفياض والرد الثاني لـ مواصل والرد ثالث لـ ادارة الموقع تقول لي باي باي حميدوووووووووه عاد الرد الرابع ما اقدر اشوفه الا كـ زائر [ يرد علي ابليس ويقول ايه تستاهل قاعد تتريق علي وعلى عيالي ]

ما ودي اخلص من كتابة الموضوع احس اني مستانس وياليت كل يوم تجونا <<< هذه الشطحه برعاية الشايب فياض


اخيراً ان غبت عن المنتدى فـ ادعوا لي

نسيت اقول لكم ان:

ارنب = ضب
وان المباره الغيت بعد ما وصلت النتيجه لـ 99-0 تدرون ليش علق وفي روايه خرب البلايستيشن


سلااااااااااااااااااااااااميشن

^^^^^
أتشــرّف أحجــز باللوك الجديد عنـدكـ يا جرحرح ,,, و مبروك التوقيع
و الله يعافي اللي كان السبب
--------------------------------------------------

أول شي ..
بسم الله الرحمن الرحيم ........أعوذ بالله من الشيطان الرجيم

إقتباس اسعد الله ايامكم بكل خير ، وصبحكم الله بالخير ومسيكم بالخير

ابو الخير والسعادة للي تعرفها اذا هذا موضوعكـ >>استغفرالله

إقتباس <<<<<< محمد راح ملح <<<<<< محمد راح شوربة دجاج <<<<<< محمد اصابته رجفه قويه <<<<<< محمد يقول في نفسه لا ابوها لا بو كلب هالمزرعه

عندي سؤال ممكن تجاوبه.....















مين محمد؟؟!!!!!! <<<<برررررررررررررا

---------------------------

جرحرح الصراحة ما شفت ولا مقطع بايع عمري انا!َ

انت ماتتوب؟؟ ماتخاف؟؟ ...؟؟>>>خاف

إقتباس كان فيه شباب كلهم من حارة وحده وكان كل خميس يطلعون للبر ويوم من الايام طلعوا من دون ما يقولون لـ احمد ( احمد اسم مستعار ترا ) قام احمد من النوم دق على اخوياه ما احد يرد طلع وقابل واحد يعرفهم وسئله عنهم قال له انهم طلعوا للبر، فكر فكر احمد كيف ينتقم منهم واخيراً جاب الفكر اليهوديه طلع لهم ووقف السياره بعيد وراح للبير اللي قريب منهم ، ونزل كل ملابسه وجلس ورا البير الين غابت الشمس تقريباً وصار يطلع راسه ويصيح لهم وينقز فوق بسرعه ويصيح لهم (( اهم يفكرون انه من جوا البير وهو لا من برا البير )) وكل واحد منهم ركب سيارة من دون ما يشيلون اغراضهم وانحاشوا ورجعوا لبيوتهم وقابلهم احمد وسئلهم وين راحوا وقالوا انهم راحوا للبر وطلع لهم جني من البير انتهت القصه .

ههههههههههههههههههههههههههههههههههــ احسن عشان مايسحبون عليه

إقتباس ما ودي اخلص من كتابة الموضوع احس اني مستانس وياليت كل يوم تجونا <<< هذه الشطحه برعاية الشايب فياض

يازين شطحاتك احلى شطحات

ارنب = ضب

هههههههههههههههههههههههههههههه
هههههههههههههههههههههههههههههههههه
ههههههههههههههههههههههههههههههههههههههه






المهم مبروك التوقيع الجديد والله حلــو
بس بلاش تجرح مشاعرنا مرة تانية بمواضيعك وشطحاتك المهببة بستين نيلة

إلا تعال كدا بص ف عيني ونتا بتكتب الموضوع دا
مابصيتش يمين ولا يسار ولا فوؤ ولاتحت!!!

ياراجل بلاش أرنبة عالظهر



برايفت : ماتحس ان رد ابوريمان توقيعه اكبر من الرد
اتضح لي ان اغلب الاعضاء خوافين محد رد طويل
تلقاه يكتب بسرعة وطيران برا الموضوع






نصيحة مني لا تنتظر للي حجزوا واحمد ربك اصلا
ترا كلهم خايفين بس استحو مايردون عليك ياجرحرح!!!!!>>:-d

الحين انت منتظرني اكتبلك قصة
ياشيخ ترا ااخاف انا >>>باللهي :p

ما أحب أحجز

بس الكلام اللي بأقوله مهم و لازم يكون في الردود الأولى

إلى ذلك الحين تقبل تحيتي


عودة
_____________________________________________________

بعض الباحثين في مجال تحليل رؤية أشياء غريبة أثبتوا على أن الانسان قد يرى ما يحاكي به عقله

فمثلا لو أنك تفكر في رؤية ماء في وقت عطش سترى ( سراب )
لو فكرت في طعام ستتخيل رؤية ما يؤكل من المخلوقات كالأغنام و غيرها

فمن الممكن أن يكون ما يراه الناس تخيلا .. هذا واحد

ثنين .. أحيانا و بسبب تداخل الأشغة مختلفة التسطح على الغشاء الهوائي .. تظهر أشياء على غير حقيقتها كما يحدث عندما يسطع طيف

و يستخدم السحرة هذا الشيء لـ ( اغفاء ) أعين الناس عن الحقيقة فمن الممكن أن يريك كمية من المال أكثر مما تبدوا

فتبدوا الأمور مختلفة لناس عن ناس فمنهم من يرى مالا و منهم من يرى شيء اخر

فيبقى الاحتمال الأخر تخيلا فقط

الاحتمال الثالث:

أن يكون ما نراه هو فعلا جن و لكن أليس الجن عالم غيبي؟

نعلم أن لهم القدرة على التحول على مخلوقات اخرى و نعلم قدرتهم على التحدث و نعلم أن لهم اثار

و لكن هل نعلم كيفة ترك اثار؟ لا

و هذه حكمة الله في خلقه

فلا ينبغي علينا الخشية منهم بل يجب أن نخشى الله و هو سبحانه القادر على حمايتنا منهم

الاحتمال الأخير هو أن ما يراه الانسان مجرد ديجا فو لما هو حقيقي و لا أريد أن أشرح هذا الشيء في رد واحد لان الموضوع طويل جدا

فلنؤمن بالتوكل على الله عز و جل في جميع أمورنا

جرح يشكي

نفع الله بك و وفقك الله

إقتباس وع طول صحيت الوالد قلت (( يبه اذن المسجد )) الوالد ما شاء الله عليه طالع علي ذكي مثلي

<<< بس ما تنلام لو اني مكانك كان قلت المنارة اذنت

إقتباس والله ظلم اذا ما دخلت موسوعة اغسطس << ع قوله واحد من الشباب

إقتباس [][][] القصه الثانيه :

إقتباس مجموعه رايحين للربع الخالي يصيدون ارانب هما 4 على سيارتين ، راعي الشاص صاد له 3 ارانب ورجع لـ اخوياه وقال لخويه الثاني اي وحده نذبحها الحين ردت الارنب قالت اذبحهم كلهم الا انا ، <<<<< وش بيكون موقفك لو كنت مكانهم

^^^
^^
^

اسئل فياض اقول له عبيط رد وبعدها انحذف الرد

قلت الله يستر بس لا اوصيك اقرا المعوذات واذا جيت تنام ولع النور <<<<<<< مثلي

هلا بالغالي جرح يشكي ;) ..
الله يكفينا شرهم الجن .. والله يحفظنا بحفظه و يحرسنا
وعلينا بالمداومه بقراءة أالورد اليومي فهو حافظ للانسان بعد الله سبحانه ..

اتصدق دخلت للمنتدى من مقهى زائر عجاز اسجل دخول ..
ويوم شفت موضوعك طويل قلت لازم ارد باول شئ عاد من الاستعجال
بدل ماأكتب نكي بريماكس كتبت محجوز واكتب الباسورد وعيا يدخل

قلت وش السالفه ؟ واناظر اثرى النك محجوز واسجل بريماكس ويدخل الحمدلله

إقتباس الرسالة الأصلية كتبت بواسطة جرح يشكي مقاطع الفيديو << اضغطوا ع الرابط بعد يقال انه جني عند جسر الجمرات ثيابه قديمه كانها ثياب ابو دولامه جني في قصر افراح جني متجه إلى سيارة تحترق جني في البر

والله يانت حبيب حاط مقاطع بعد .. اتصدق لمني شفت كتابة جني خفت
على طول اقول يمممممممه :p اجل كيف الفيديو :p ..

إقتباس الرسالة الأصلية كتبت بواسطة جرح يشكي [][][] القصه الثانيه : مجموعه رايحين للربع الخالي يصيدون ارانب هما 4 على سيارتين ، راعي الشاص صاد له 3 ارانب ورجع لـ اخوياه وقال لخويه الثاني اي وحده نذبحها الحين ردت الارنب قالت اذبحهم كلهم الا انا ، <<<<< وش بيكون موقفك لو كنت مكانهم

سبحان الله ..
الظاهر ان القصه كلها ارانب ..

ذكرتني بقصه ماهب بعيده من قصك هذي يرويها لنا احد الشباب اللي
معروفين بـ مايتسذب الا شوي بس المهم يقول كنت مره برحله
صيد وكنت بسيارتي وشاهدت طير .. فلما صوبت بندقيتي اليه لاصطاده ..
قال لي :
يامحمد ( ترى مب انت ياجرح مابه الا انت محمد )لاتصيدني ..
يقول فتركته وذهبت ..

إقتباس الرسالة الأصلية كتبت بواسطة جرح يشكي انا ولله الحمد ما اخاف من الجن ابد ابد واللي قال لكم اني اخاف من الجن تراه صادق

ايه اشواء كتبت تراه صادق ولا كان علوم ..

إقتباس الرسالة الأصلية كتبت بواسطة جرح يشكي عاد اللي يبي تصميم ولا شي تراه في الخدمه وما يرد احد ابد ابد

تصدق ياجرح انه معجبن التصميم اللي في توقيعيك >> يعرف يلمح

إقتباس الرسالة الأصلية كتبت بواسطة جرح يشكي جد عاد وش افضل شطحة اللي في البدايه ولا اللي في النهايه

كلهن مب زينات :sad: >> يلعن ام التحطيم ليتك ساكت افضل
امزح يالغالي انا احس الاولى افضل ;) ..

يعطيك العافيه ياجرح على الموضوع ..

سلام ،

الله يحفظ المسلمين من شياطين الجن والانس !!
موضوع رعب × رعب ...بس الواحد يقراء الاذكار ويتكل على الله
كشتات البر في الليل يكون الوضع مزري شوي !!
تحياتي لك و مبروك التوقيع تقطعه بالعافيه

لو كنت مكانك كنت بموت من الخوف

ماشاءلله ع الوالد >>> اقرى المعوذات <<< شكله متعود

يسلمووو خيووو عالموضوع

ولاتحرمنا من جديدك

في امان الله

امسح الموضوع ولا ابكسر رقبتك ,,,

وش ذا الرعب بالذات بقصة اقاربك الله يحفظهم ويحفظنا ان شاء الله ,,,

اما قصة قطاع الطرق تخوف ياخي ؟؟ ياااربيه الواحد صار يخاف يسافر !!

بس كويس قدرت تتخلص منهم وزين ماثوروا فيك فيه واحد كان مسافر من القصيم للمدينه

وتعرض لطلق ناري وعايلته كانت بالسياره .. الله ياخذهم قل امين ويحفظنا

هلا والله بجرح

كيف الحال

أجل جن .. لا حوول

هههههههههههه زوجوه اجل

يعطيك العافية

موضوع بالعرب متعوب عليه ..

تحياتي لك

جرح يشكي
بسم الله عليك الرحمن الرحيم
أتمنى أن أعود بالليل إن شاء الله

,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,, ,,
الله الله الله وش هالرعب الحمدلله إني ماحصللي أكمل القراءة وأطالع الصور بالليل والا كان علوووووم

عموماً موضوع شيق ومتكامل فيه المواقف وفيه النصائح التي نحن بأمس الحاجة لها ....

لا أملك أمام هذا التعب والجهد إلا أن أدعو الله تعالى لك بأن يستر علينا وعليك وأن يحفظنا بحفظه إنه ولي ذلك والقادر عليه 000

الله يخليك لا تتواجد بمواضيعي

^(للي فوق بوريمان)
^
^
^
شماسي انت مجنون ترجع ف الليل..!!!!!!!!!!!! :p


ترى جرح قاصد ينزله الحين ف عز القايلة \
وانت تبي ترجع ف الليل