صباح الورد على أحلى أعضاء بالدنيا




أحلى أمورتين بالمنتدى هلالية سنعة وتغريد
أقترحوا مسابقة حلوة للطبخ.



وشكلها بتندلع حرب جديدة بين التماسيح الله يحمينا
وبين الآنسات النعومات والمؤدبات ..





المهم الجميلتان ولاتهون الهنوف وسووسو وسارة الله يكثرنا
وبقية العضوات الجميلات السندريلا والرائدة والتميمية ومحبوبة
يوة شكلي بأعد كل البنات والله يستاهلون بعد عمري .....





تصدقون نسيت أنا ليش هنا شكلة برنامج إهداء



وأهني ماما وبابا ...





عاد مطبخ المنتدى دخلني المطبخ وخلاني أطبخ والله شي
وصرت كل يوم من عقب ذيك الطبخة وأنا أطبخ
وصرت كل عصرية أسوي شكل حلا <<والله من الفراغ.




المهم وأمس جونا عماني وأنا اللي مليت من شي أسمة طبخ
عاد يوم جا الجد قلت لأمي يووووووه والله مااشتهيت هم
ترى عمي أحد الأعضاء يعني لين قرى الموضوع قضي علي :p
المهم قالت امي من حالف عليتس تجلسين معهم لين جا بيتس لاتعزمينا
وراحت أمي للمطبخ تكب الجريش
وهنا صحى ضميري ;) أمي التعبانة داخلة تطبخ وانا وياوجهي اتذمر
وأشمر عن أكمامي وأسوي صينية حلا قهوة وصينية شابورة
طبعاً خدامتنا تحب أي شي الا أن حضرت سموي أدخل المطبخ
لأنها لازم تغسلة بعد ما أطلع ومايبقى ملعقة ماطلعتها ولابادية ما وسختها
ولا كاس ماطلع من مكانة ناهيك عن الطلبات
ترنم جيبي الطحين لين جابتة
- هاه عريب يبي شي ثاني
-لا شكراً :p ,لين راحت - ترنم
-جيبي بيض لين جابتة
- هاه عريب بعد أجيب شي
- لا شكراً
لين راحت-ترنم وين الصينية
لما تجيبها-هاه عريب يبي شي
- لاشكراً:p
عاد أنا لو أحد سوى فيني كذا ياويلة ومستحيل أجيب طلباتة

المهم وتستمر مثل هذي الحركات على أمي والخدامة
عشان كذا أثنين بالبيت مايحبون ادخل المطبخ ماما والخدامة
ثم يجي أبوي هاه مساعده <<<لأنه أحد الأشخاص اللي مايثق فيني بالمطبخ
ثم اقول لا الله يعافيك لين جا بالليل قطع السلطة أحب شغلك فيها <<
للمعلومية <<أنا ما أحب السلطة لكن عشان مايقولون قطعيها
عاد ياحبي له بابا يطبخ احلى مني أنا ووجهي




المهم رغم أني قلت للخدامة تشغل المكيف عاد بعد مامات عمي فهد
صرت ما أقرب على أي شي فيه كهرب عشان ما أموت بسم الله علي
إن شاء الله رايس ولا انا الله يخليني لي ولايحرمني مني آمين

لكن الحر ذبحني ياعمري أميمتي كل يوم تطبخ وماقالت شي


المهم يوم تعشوا قالت أم صلاح لأمي الله يغنيكم ياام عصام شقينابكم
قالت امي هذي الساعة المباركة اللي شفناكم مير ماتنشافون
لاشقيتوبنا ولا شي كل شي سووه البنات الله يعافيهم الخ من العبارات المعهودة

لحد الآن والوضع طبيعي

قالت عهود الله يعافي عفاف كل شي هي اللي مسويتة<<فعلاً عفاف سنعة وماطلعت عليها

لحد الآن والوضع ماشي وانا أتفرج أحتري أحد يعطيني وجه

قالت عفاف حتى أنتي ساعدتيني

هنا تدخل ابليس وخاطبني بقولة_هي أنتي دايم يحشون فيتس ومايعطونتس وجه
دايم حقتس ضايع ولا أنصاف ولاعدل دافعي عن حقوقتس
ملحوظة<<ابليس يكلمني بلهجتي عشان يكون وقع الكلام أوقوى

وهنا حاولت أتميلح يمكن يعطوني وجه قلت أحم نحن هنا :p

قالت عهود وش انتي حتى الشاهي ماصبيتي لي وانحشتي
"قالت عهود صبي وكنت مشغولة قلت اصبري لين ارجع"
<<عندي سوابق في مثل هذي السالفة <<

المهم وأنا اللي أنقهر ويرجع ابليس يمارس الاعيبة معي
انقهرت مرة بغيت اصيح وانا اتذكر الحر

قالت امي عريب سوت الحلا الله يعافيها قالت وفاء وحصة<<زوجات أعمامي
أي والله الله يعافيها زين منها ويكفي الحر والوقفة بالمطبخ
عاد ارتفعت معنوياتي شوي دايم مايعطوني وجه
الله يخلي لي أمي ويشفيها هي الوحيدة اللي تنصفني دايم





وأجلس معهم لما الآذان ورحت انوم عطيتهم وجه
بالعادة لين مليت رحت لغرفتي عاد ماادري متى راحوا
ولما صحيت لقيت عمتي وعيالها نايمين عندنا



عاد استروا ماواجهتوا صح حشيت فيني لكن عشان ماتنغرون
وأعطيكم الوجه الحقيقيي وأن مافية إنسان مثالي فلازم نحب أنفسنا رغم أخطائنا
ولاتنتظرون الثناء من أحد فما بيعطونكم وجه مثلي :p
أعطوا الثناء لأنفسكم لأنكم لو أحتريتوا الآخرين بتتعبون




الهم بارك لنا في شعبان وبلغنا رمضان




دعاء

الهم اقسم لنا من خشيتك ماتحول بيننا وبين معصيتك ومن طاعتك
ما تبلغنا به جنتك,ومن اليقين ماتهون به علينا مصائب الدنيا,
ومتعنا الهم بأسماعنا و بأبصارنا,وقواتنا أبداً ما أحييتناواجعله الوارث منا,
واجعل ثأرنا على من ظلمنا,وأنصرنا على من عادانا,ولاتجعل مصيبتنا
في ديننا,ولاتجعل الدنيا أكبر همنا ولا مبلغ علمنا ولا تسلط علينا من لايرحمنا.




وقفات


.قال رسول الله صلى الله عليه وسلم"إذا دعا الرجل لأخية
بظهر الغيب قالت الملائكة:ولك بمثل"
رواه مسلم وابو داوود


قال علي بن ابي طالب رضي الله عنه :ثلاث هن راجعات الى أهلها
المكر والنكث والبغي...ثم تلا قوله تعالى"ولايحيق المكر السيء الا بأهله"
وقوله تعالى"فمن نكث فإنما ينكث على نفسه" وقوله تعالى"إنما بغيكم على أنفسكم"



سُئل الإمام أحمد بن حنبل رحمه الله عن الرجل يطلب الحديث؟
فقال ينبغي أن يكثر العمل به على قدر زيادته في الطلب ثم قال
سبيل العلم مثل سبيل المال . إن المال إذا ازداد زادت زكاته.


سئل الأحنف عن المرؤة فقال: التفقه في الدين,وبر الوالدين ,
والصبر على النوائب.


عن أبي هريرة رضي الله عنه قال :قال رسول الله صلى الله عليه وسلم
"من جلس في مجلس فكثر فيه لغطه فقال قبل أن يقوم من مجلسه ذلك:
سبحانك الهم وبحمدك أشهد أن لا إله إلا أنت أستغفرك وأتوب اليك,
الا غفر له ماكان في مجلسه ذلك
رواه الترمذي



"رجاءً تذكروا تقولونه دائماً"







بعض مني وضعته هنا.....

هذي أول قصيدة نزلتها المنتدى ...


هاك عمري يا بعد عمري فداك
تستحق تعيش في حب ونعيم

والله أيامي أنا آمنها معاك
تاركة ايام عمري مع كريم

تدري أن الزين يحتار فبهاك
وتدري ان الشمس في حبك تهيم

يختفي كل الحلا ليجا حلاك
وتشرق شموس الضحى لوكان غيم

كل أوصاف الحن ربي عطاك
وكملك بالعقل والراي السليم

ما الوم القلب من شافك هواك
من يعرفك هام بك والله العظيم

يزعلون الناس لو هذا رضاك
لو زعلت الكون في عيني جحيم

تعجز الكلمات ماتوصف غلاك
جرب احساس الزهر وقت النسيم

جرب احساس الفكر لامن طراك
مثل صوت النور لاشق العتيم

هاك قلبي ياهوى قلبي فداك
جعل ايامك نعيم في نعيم


بالحب والإشراق

وش هالموضوع طالع تقل مشكل بدون منجا :p



والله ما أدري وش أقول وش أخلي








والله يا عليه لون مادري وش يبي من البياخه


الحين ليش هالألوان تجوز للبنات ولا يجوزن لنا يالشباب !!

إقتباس ولاتنتظرون الثناء من أحد فما بيعطونكم وجه مثلي أعطوا الثناء لأنفسكم لأنكم لو أحتريتوا الآخرين بتتعبون

هذا اللي كنت أبقوله


يعني الواحد لا صار ينتظر المدح ولا جاء بيتحطم



وأهم شي يصير الواحد راضي على اللي سواه




يعطيتس العافية على الموضوع

إقتباس هنا تدخل ابليس وخاطبني بقولة_هي أنتي دايم يحشون فيتس ومايعطونتس وجه دايم حقتس ضايع ولا أنصاف ولاعدل دافعي عن حقوقتس ملحوظة<<ابليس يكلمني بلهجتي عشان يكون وقع الكلام أوقوى

ههههههههههههههههههههههههه

ياحبني لتس حسيتس طييييبه حيييل < ماتصلح الطيييبه وانا اختس تبي تخرب

=======

إقتباس الهم بارك لنا في شعبان وبلغنا رمضان

آآآمييييييييييين

إقتباس .قال رسول الله صلى الله عليه وسلم"إذا دعا الرجل لأخية

إقتباس بظهر الغيب قالت الملائكة:ولك بمثل" رواه مسلم وابو داوود

إقتباس هاك عمري يا بعد عمري فداك

إقتباس تستحق تعيش في حب ونعيم والله أيامي أنا آمنها معاك تاركة ايام عمري مع كريم تدري أن الزين يحتار فبهاك وتدري ان الشمس في حبك تهيم يختفي كل الحلا ليجا حلاك وتشرق شموس الضحى لوكان غيم كل أوصاف الحن ربي عطاك وكملك بالعقل والراي السليم ما الوم القلب من شافك هواك من يعرفك هام بك والله العظيم يزعلون الناس لو هذا رضاك لو زعلت الكون في عيني جحيم تعجز الكلمات ماتوصف غلاك جرب احساس الزهر وقت النسيم جرب احساس الفكر لامن طراك مثل صوت النور لاشق العتيم هاك قلبي ياهوى قلبي فداك جعل ايامك نعيم في نعيم

عشتي والله عاد انا جديده اول مره اقراها روعه قدا قدااا

يعطيتس الف طليون ململون عافيه ياراري

صباح النور

يسعدك ربي اختي موضوع مميز

يعطيك العافيه يا رائده الزعيم

سؤال وش دخل التمساح بالموضوع والجزمه بنفس الوقت

صورة البزر النايم واللا بتوب احس مالها دخل بالموضوع
يعطيك العافيه..

G o L d E s T


هلابك أخوي الغالي نورتنا
بالنسبةللون الوردي أعرف شباب يحبونة بس يستحون يلبسونة
عني أنا أفضل اللون الأزرق لأن أختي تحب الوردي
لكن مع الأسف غرفتي لونها وردي فأضطريت أتعايش معه
ومن ناحية إنتظار المدح أحنا شعب نحب ننتقد
يعني لو كل شي عاجبنا لازم ندور عيب عشان نقولة
من باب أحنا نحب الصراحة

يعطيك كل العافية على مرورك العطر


\

/

\



سندريلا الهلال


يا هلا ويامرحبا بحبيتنا السندريلا
وأنا أقول موضوعي مشرق ليييييييه

أنا أحب الأطفال فأحط صورهم على الفاضي والمليان
حتى جوالي كله صور أطفال ومعذبة بنت أختي مصورتها أكثر من 200 صورة
هذا غير صور باقي الشلة سواء عيالنا أو عيال الناس أعرفهم أو ما أعرفهم

أكثر شي خلاني مسبوطة اليوم هو أني شفتك يالغالية



\

/

\


¤ ريـموو ¤

هلا والغلا بالغالية ريموو

إقتباس ههههههههههههههههههههههههه ياحبني لتس حسيتس طييييبه حيييل < ماتصلح الطيييبه وانا اختس تبي تخرب

هذي شغلتي ياماما أنا أخرب ما أخرب
بعدين لاتحكمين على أحد ما عاشرتيه على ماقال المثل المصري
"تعرفه آه عاشرتوه لا تبئى ماتعرفوش"
يعني أنا شوي طيبة شوي شريرة بالذات لين بدا أبليس يخربني

بصراااحة مبسوطة أوي أوي أوي وأنا أشوفك ياعسل
وتسلمين يالغالية على حضورك وحروفك



\

/

\


دلـوعـة الزعيـم

هلا والغلا بدلوعتنا الغالية
يسعدلي أيامك يالغالية
وكل الشكر لمرورك الكريم


\

/

\


شذى (ع)

هلا والله بحبيبتنا شذى
مبسوطة بشوفة الغالين أمثالك ولاتهون أنا ومن يسمع<<مقطع من مسلسل بدوي
صباحك ورد ياريحة الورد

بالنسبة للجحدة فهذي متعوده عليها
تخيلي حتى لين جو يروحون زواج أو عزيمة يذبون عيالهم عندي
وياليت يسألون إذا عندي شي لا على طول أنتي ماتحبين تروحين خليهم عندك
هذا مو ذنبي إذا ما أحب أطلع أجمع عيال خلق الله عندي

عاد أمنيتي الوحيدة أصير أختهم الكبيرة مع أن أختي الكبيرة عسل
هذولا الوسطانيات أنا خلاص تعلمت ما أصير أختهم الصغيرة لو وش صار
بالعكس الوسطانية ماخذة حقها وحق غيرها
أحنا الصغار المساكين
لأني أصغر البنات وأصغر مني ولدين أمارس ضغطي عليهم
أولاً عنصرية وثانياً لأني مدعومة من قبل ماما وبابا وأخوي الكبير

وإذا على الهدايا رغم أني أتلاقها منهم لكن لازم أهدي نفسي لأني أستاهل
لا وكنت شارطة عليهم عندي 12 مادة أبي على كل مادة أنجح فيها هدية
بس ابوي وأمي وعهود اللي عطوني وجه والباقي جحدني بهدية وحدة

تصدقين يوم سافرنا شريت لهم هدايا وأشتري لي بعد عشان أعطيني ايها بالرياض
كلهم شكوا في قدراتي العقلية لكن الحمدلله مو أنا لحالي

تسلمينيالغالية على تواجدك وسعة صدرك

بالحب والإشراق

هلا والله رائدة الزعيم
مشكورة على الموضوع الي ياطوله

وبالنسبة للطبخ عادي لاتنتظرين المدح المهم إنك راضية عن نفسك وعن طبخك
والله مع ذا الحر الوحده مالها خلق تدخل المطبخ الله يخلي انا أمهاتنا آمين