السلام عليكم ورحمة الله وبركاته

يالله حي الربع والربعات .. يالله حي كلن باسمه واللي ماعنده اسم

يالله حيه باسم اخوه .. وقبل ماندخل بالموضوع ابيكم تعذروني على القصور

أول موضوع خاص بالمجلس العام انزله يمكن الطفش وعمايله هي اللي حدتني

على هالشي والله على ماقول شهيد ..!!



في بداية القرون الوسطى من عام 200 هـ كانت هناك إحدى الحواري يسكنها

ناس ابظاوات .. يعني رجاجيل على قوله اخواننا السعوديين< ---- (انت وش انت

منتب سعودي يالثور ) .. وكانت هالحارة مشهوره بمهاوشاتها ومشاكلها ..

وكان فيها زعيم للحارة اسمه (فياض ) طبعاً فياض وارثاً هالمنصب أباً عن جد

وكان له هيبته في الحارة وكان كل مايطلع للحارة عشان يتفحص أحوال الرعية

لازم يمر ويشطف على (أبوطلال ) اللي هو راعي الخضار .. وياخذ له كيلو كراث

وكيلو طماطم ويقول لأبو طلال احجزها طبعاً الزعيم فياض مشهور بالحجز

ثم ينحاش وماله شووفه من بعدها وتستمر حجوزات فياض في انحاء الحارة

حتى الحلاق ماجد مقبل ماسلم منه وكان دايماً يمر عليه ويحجز رقم للحلاقه ثم ينحاش

مثل ماعودنا الزعيم فياض <---- (أحس ان فياض وده يكفخني )

وكان الزعيم محبوباً من الكل وكان عضيده الايمن اللي هو الكلاسيكي نائب الزعيم

وكان الكلاسيكي ينووب عن فياض في بعض التعاقدات اللي تتم في الحارة ..ومنها

انهم تعاقدوا مع المخبزاتي ( المشاغب ) بعد شد وجذب وتدخل أطراف أخرى بالصفقه

وعمت الفرحة أرجاء الحارة لأتمام هالصفقه اللي انتظروها أهل الحارة

كل هذا عشااان يبون يذوقون خبز المشاغب على هالصبح <-- ( وش عنده علي ابو ركبه )

وكان الزعيم فياض له اليد الطولى في اتمام هالصفقه خصوصاً انه سافر للحارة الثانيه

عشان يتمم هالصفقه .. !!

ووعد الزعيم أهل حارته بصفقات جديده راح تكون حديث الحواري الثانيه واوفى

الزعيم بوعده وتعاقد مع ..العميد اللي هو (ليو ميسي )

والأدعشري اللي هو (هامور البورصة ) ورجاءاً لااحد يسألني ليش سمووه بالأدعشري

لاني انا مادري بس الظاهر ان امه يوم جابته كان يوم 11 سبتمبر

بعد ماتمت هالصفقتين بدات الحياة في الحارة تسفهل وكل مالها والحارة في نجاح

اقتصادي وكل شخص يتمنى انه ينضم للحارة ..!!

وفي صباح باتسر دعى الزعيم فياض ابظاوات الحارة لأجتماع عشان يناقشون أمور

الحارة <--- (ياشيخ ولا مجلس الوزراء )

اجتمعوا الأبظاوات في مجلس الزعيم فياض وكان فيه شد وجذب ومداخلات مال امها

داعي من هامور والمشاغب حتى ان الزعيم فكر انه يحطهم على لائحة الانتقال

من الحارة بس تدخل بعض الأبظاوات خلى الزعيم فياض يشيل هالفكره من راسه

خصوصاً ان فياض ماعنده أمي ارحميني وهو اللي نسق اخوه من الحاره

وفي الاجتماع تدخل ابو طلال اللي هو راعي الخضار

بلباقته المعهودة وقال : زملاااااي الأبظاوات أحييكم في هاليوم المبارك اللي اجتمعنا

فيه عشان نتابحث في أمور الحارة واحتياجاتها .. وعشان تسذا انا داخلن على الله

ثم علاكم انكم ماتقاطعون هرجي والا ترى ابقطع لسان اللي يقاطعني بالشبريه

وضع ابوطلال النقاط على الحروف في الاجتماع وكان هرجه يدل على انه مثقف

مو راعي خضار .. ورعص الحلاق ماجد مقبل على اللمبه عشان يهرج وسمح له

الزعيم فياض بالهروج <--- (يسمع بالفصحى ) ..!!

وقال ماجد مقبل : اخواني الأبظاوات يعلم الله اني احبكم واعتبركم قطعه من تسبدي

واشار بأصبعه السبابه إلى تسبده .. وابيكم تحللوني وتبيحوني لاني ذااك اليوم

حلقت لواحدن من بزران الحارة كبوريا وسويتله سبايكي :p

وحلقت لواحدن من شباب الحارة لحيته لانه قالي خلها سكسوكة وانا ماطاوعني قلبي

اني اخليه يكحل ويتميلح بسكسوكته عند بنات الحارة وشلت له الشنب واللحية

وصار وجهه املط تقل صاكن كيماوي الله لايبتلينا ..!!

وقالوا ابظاوات الحارة بصوت واحد : حللناك وابحناك ياحلاقنا بس لاتتعودها

والا ترى بنعلقك على باب الحارة ونحطك قفل للباب


وفي هذه اللحظة قام المخبزاتي المشاغب وقال : هلاوالله بالزكرت حياااكم الله

وعلي الطلاق لتتعشون عندي الليلة < ---- (قايلكم الأحتراف لاعبن بمخه )

قال المشاغب : والله ماعندي شي اقوله بس حبيت اجرب المكرفون ابي اشوف

هو أصلي والا تقليد


هنا تدخل الزعيم فياض وقال : لعنت تلعن ابليس انت وهالخشه هاللي كنها قطعه

ارض في ضاحيه لبن الحين مزعجنا ومنادينك من اقصى الحارة وبنجتمع وآخرتها

جالسن تستهبل شايفن الوضع يسمح لمثل هالتدخلات الشنيعه < --- (بيني وبينكم فياض

يسمع بالمجاملات ماعمره جامل احد ) ..!!

والله وفياض ياخذ المكرفون من المشاغب ويقول : اما الآن مع كلمة الأدعشري

هامور البورصة < --- ( ياخي تسنه في اذاعه مدرسيه ) ..!!


أخذ الأدعشري هامور البورصة المكرفون وقال : اخواااني الزلمات والحونشيه

والله ماعندكم ماعند جدتي هالحين يوم انكم منادينا على هالأجتماع ورى ماجبتولي

بكت دخان امزمز وامخمخ عليه


هنا تدخل الكلاسيكي وقال : اقول يالأدعشري والله من زين الأسم لو انك مسمي

عمرك صنيتان والا شليويح كان اهون .. الدخان وانا اخوك مضر بالصحه

والدختور موصينا اننا مانبيعه في بقايلنا تسانك تبيه رح خذلك علف ولفه بورقه

واصمخ ومخمخ على كيفك ..!!


وبدأ الأجتماع ياخذ منحنى الذب والأستهبال وبدى كل واحد يذب على الثاني

حتى الزعيم فياض ماسلم من الذب .. يوم قاله أبوطلال : يازعيم والله الود ودي

اكتفك من عند خشمك واخذ شنبك واستعمله حكاكه للجسم


وانتهى الأجتماع بعواقب وخيمه تنبىء بحدوث كارثة للحارة وفكر الزعيم فياض

انه يحول المحترفين بالحارة إلى هواة .. وصعد بعض الوجيه الشابة للمرتبة الأولى

في الحارة وحطهم على قائمة المحترفين ..!!


ومن بعد ماتصرف الزعيم فياض هالتصرف والحارة صارت ماشيه صح وكلن بحاله

وعاقلين ويبارون الساس ومالهم من الشيطان طاري ..!!


وفي الصباح الباتسر دخل الحارة واحدن اعمى الظاهر انه منسق من حارتهم

بصراحه مدري وش اسمه لاني ماشفت معه بطاقة احوال <--- (ياشين المصالة على

الصبح ) ..!!

وكل هرجه : بدي امي .. وحدووووووه <--- (احس انه يلعب كرة طائرة )


واخذووه اهل الحارة للزعيم فياض .. وجاء الزعيم وسأله وش اسمك انت

ومن وين جاااااي ؟؟ وبعدين وراك تقولب بعيونك تسنك اعمى < --(يقال انه جابها

الذيب ) .. رد عليه هالعمى : بدي امي .. قال الزعيم : تراااك غثيتنا انت وامك

والله من زين الأم لو فيها خير ماخلتك تسربت في هالحواري تسنك قطوو ..!!


والله ويدخل العميد ليو ميسي على الزعيم فياض ويقووله ترى هاللي جالسن قبالك

تسذوووب ابقع مهووب اعمى توني شايفن مسلسل باب الحارة ووشايفن هالسمرمدي

يطعن راعي الحمبص ابو جميل .. والله ويجي الزعيم فياض ويمسكه مع اذوونه

ويرفعه فوووووق عالي السحب .. ويطيحه على ظهره وهي الطيحة ومامنها قومه ابد .!!


والله ويمسي الليل على أهل الحارة وكلن نايمن بمرقده من بعد صلاة العشاء

وكان الأدعشري هامور البورصة جالسن في بيته يخطط لسرقه بيت أبوطلال

عاد الطفرة شاقه جيبه يبيله كم من قرش يشتري فيهم بكت دخان

ويوم حانت ساعه الصفر .. والله ويجي هامور ويطلع للحارة وهو صاكن اللطمه ..!!

ويقعد يناقز من بيت لبيت لين وصل لبيت ابوطلال وهي الطبة ويقعد يحووس

في البيت ويدور مكان الفلوس مالقى الا سروال ابوطلال معلق في حنايا الحوش

ومبلول الظاهر انه مكبوب عليه شاهي < ---- (ماتسنه يلمح لشي ) ..!!


والله وهامور يقعد يحوس لين مالقى خزنة ابوطلال وفيها اربعين جنيه ذهب

< ---- (عاد لاتسألوني كم تساوي بالريال السعودي ) ..!!

عاد هامور مافي راسه رحمه اخذ الفلوس وخلى السروال المبلول :p

وراح هامور لبيته وسلم يااااارب .. ومن الصباح الباتسر الا وصوت ابوطلال

يلعلع في الحارة : لحقووني ياناس انسرقت جلست على بساط الفقر .. !!

والله ويجي الحلاق ماجد مقبل ويسأل ابوطلال

وش اللي انسرق منك يابو طلال : انسرق مني يوزري وتوقيعي .. لعنت تلعن ابليس

العدوو الحين لي ساعه انابح في ذا الحارة وماتدري وش اللي انسرق مني اقوول

انثبر فيذاك وخلني اروح عند الزعيم فياض كوود يلاقي حل لمصيبتي ..!!

عاد اللي في الحارة مستغربين ان واحد سرق اربعين جنيه من بيت ابو طلال

وماطاحت نعاله على الدرج وانت بكرامه . يقالهم سندريلا على غفله


ويدخل ابوطلال على الزعيم وهو يصيح ودموعه على خده تسنها شلالات نياجرا

ويقوول : يازعيم انا داخلن على الله ثم عليك انك تساعدني وتلقالي هاللي سرق

فلوسي .. انا مالي غير هالفلوس هاللي كنت ناوي اكتتب فيها بشركة الحارة

ومابقى غير يوم وينتهي الأكتتاب ..!!

والله ويرد الزعيم بدبلوماسية مستفحله : ابشر يابو طلال فلوسك بترجع لك

بس رجاءاً لاتصيح ياشيخ لوعت تسبدي مع هالدموع تسنك بزر ومضيع ابوه

بسوق عتيقه ..!!


وكانت جميع التهم تشير للأدعشري هامور البورصة مايسوي هالحركات وهالخنبقه

الا هامور راعي السوابق .. والله ويجي الزعيم فياض ويستدعي هامور ويقووله

احلف على المصحف انك ماسرقت الفلوس .. والله وهامور تصكه الغلقه

ويقوول : والله مااحلف ورعنة هي كل شوي تحلفوني ..!!

تبوني احلف بشرط قولو للمخرج مايقطع يدي واموت بآخر المسلسل


تشششششششششششش <--- انقطع البث



=-=- ومضات =-=-

1- إن الطفش يخلي الواحد يدهر ويبدع ويفكر وينزل مواضيع ..!!

2- اعتذر من الأعضاء اللي انذكر أسمائهم بالقصة ..
وماذكرتها الا لسمعتهم الطيبة في المجلس العام

3- =- اهم شي الاخلاق

4- ماعندي شي بس الله الله بالردود .. ويمنع الحجز والنحشه
والكلام موجهه للزعيم فياض باشا



تقبلوا طحياطي واشواكي ,,
الغدير الأزرق