|
نصائح للقياده في الرياض نصائح للقياده في الرياض أولا يا اخ العرب .. تدق إشارة يمين والا يسار يعني تكشف نفسك ، لا تعطيهم فرصة يعرفون وينك رايح ، والا وين تبي ... حسب خبرتي ، إذا انا دقيت إشارة محد سمحلي ، الدنيا عبط يا حبيبي مكتوب في كتاب دلة إنك تترك مسافة بينك وبين اللي قدامك تحسبا لأي خطر مفاجئ ، لا يهمونك ، الخطر والله اذا تركت مسافة وجا واحد يبي يدخل بينك وبين السيارة اللي قدامك . خللك إنسيابي ، هذا سر "المهنه" يعني ريح يمين يسار وتنقل بين الخطوط في الشارع ، هذا يعطيك مساحة تتحرك فيها بسهولة ، وتسهل حركة الثانين . إذا ولعت حمرا ولا أمداك ، حط رجلك ترى إذا صرت ستيمه وهّديت خطر تكمخ أو تنكمخ . لا تحارش السيارات الخجمة (= قديمة = خشلة = كبيرة الحجم على غير سنع) هذولا إن صدموك ما عندهم دراهم ، وإن صدمت أحد منهم ، ما لقيت له قطع غيار . الرقم اللي تشوفه في لوحة مدوره في الطرق السريعة هذا مهوب السرعة القصوى ، هذا السرعة المقترحة ، وهو مجرد إقتراح ، تبي تاخذ فيه كيفك ، ما تبي بكيفك بعد . الرياض كلها طرق مختصرة للي يفهمون والخبراء ، لا تصير حبّيب وطيب وتمشي مع الشوارع الكبيرة كلها زحمات ومهاوش .. إزرق مع شوارع صغيرة ولفلف وما جاك علي . هاللي يأشرون لك على الطريق يبون فزعة لا تعطيهم وجه ، أصلا ما يتعطل الا الضعوف اللي سياراتهم قرنبع يعني ما منهم نفع ولا فود ، سلم عليه وعدي .. والله يعطيه سيارات الجيب هذي مصنوعه للمهاترات والمناكفات وكل واحد شرى جيب ترى سيارته اللي قبل صغيرة وشاري الجيب عشان ينتقم ، دير بالك منهم ولا تحارشهم تراهم والمين . السواقة في الرياض متعه للي يشعر بملل ويدور وناسه ، إذا ضاق صدرك يوم إطلع على الدائري وخل بينك وبين سيارتك تحدي على انك تطق الطبلون ، ياهي وناسه ، كنك في الملاهي ، والأونس العالم اللي يتنطلون يمين وشمال ياهوووووووووووووووووو FUNNNN في الرياض لازم تضرب بوري اذا ولعت خضرا ، بيب والا طاط ، والا ترى اللي قدامك ما يمشي ، حنا تربينا كذا ، وتأكيد لكلامي ، انتبه لواحد واقف لحاله عند إشاره ، تلقاها تخضر وتحمر وهو ما جاب خبرها . حمرا وقف ، صفرا تزهّب ، بس خضرا مهوب معناها امش ، معناها ، اذا ما فيه احد فيمكن تمشي ، العالم هذي مستعجله ، والحمرا لغيرهم مهيب لهم ، الين بغيت تمشي تلفت يمين يسار بعدين امش . هدف كل واحد يسوق في الرياض انه يصير الأول ، في الإشارة ، والا في المسار ، وانه يوصل لمكانه بأسرع وقت ممكن ، ولهل الغاية ، ما تهم الوسيلة . اللي يسوقون صح في الرياض من المخضرمين ، ممكن يقرا جريده وهو ماشي ، والا يجيب شي من الشنطه وهو يسوق ، ويقدر يفتح الباب ويشيك الكفرات والسيارة تمشي ، لا تستغرب عادي يا بابا ، واللي مهوب قد السواقه لا يسوق . مطر ، والا عج ، والا ظلما ، هذي من الله ، إنت مالك دخل وخللك طبيعي ، وترى هذا غرض اللي يسوقون صح ، وهنا نعرف الحرّيف من الغشيم ، وتقدر وقتها بعد تختبر كفراتك ، ونور سيارتك ، ونظرك بعد . البنزين غالي ، وكل ما سقت بسرعه نقص استهلاكك ، لو تمشي 200 للخرج ما نقص من التانكي الا لترين ، من قال ان السرعه ما تفيد؟ ما فيه شي اسمه سايد واحد ، والا ون وي عندنا ، العالم ما تعترف بهالخرابيط ، اذا شفت نور قدامك تراه في خطك ، لا تحط رجل على رجل وتأمن . -------------------------------------------------------------------------------- |
| الوقت المعتمد في المنتدى بتوقيت جرينتش +3.
الوقت الان » 06:12 PM. |
Powered by: vBulletin Version 3.8.7
Copyright ©2000 - 2025, Jelsoft Enterprises Ltd