( leo messi ) ( و هامـــور ) ( ذكريـات اثـنــين مطافـيـق بالمملكه ) - نادي الهلال السعودي - شبكة الزعيم

leo messi · #1 01/08/2007, 09:28 PM

مساء الخـيـر يـا قـاري موضوعي
مساءك شـــوق مع عطر الـورود

مساءك فـل مـع كـادي وجـوري
مساءك مسك مع عنـبـر وعـود

أخبارك كيف وعلومك يا غالـي

عسـاك بخير يـا أحلى الـوجـود

نبذه تعريفيه بأبطال الفيلم

1_ leo messi << مستشار ريس موزنــبيــــق

واحد الناجين من حاثة ( عين جالوت )

فارس مغوار

ويقال على ذمة الراوي انه سدح ستين فارس بـ نبـيـطه

2_ هامور البورصه << شــاب عانــس

.. 3مباريات دولية

اشعث الشعر

طالعه رقبته جحه بدلا من تفاحة ادم

المهم في مرة من الامارير وفي يووووم من أيــــــام الربيع .. وبينما كانت أوراق الشجر تسقط على الارض .. ووتسقط وتسقط وتسقط
.. آخر شي جات الأرض واشتكت عالبلديه

إن الشجر يرمي عليهم مخلفــــااااات ..

نفس اليوم هذاك طرت في بال هامور البروصه فكره يروح يتمشى في المملكه
فكر انه يتصل فيني بحكم اني اتميز بالذكاء الخارق وسرعة البديهه يعني عكس هامور << مداح نفسه صادق

المهم اتصل علي وانا كنت زعلااااان
وقتها الوالد يهاوشني ويهايط علي وصاكني
بجركل مويا على جبهتي <<< طبعا انا ساكت له لانه يمون وبينا عيش وملح فماودي اقلب عليه

قالي هامور وش رايك : فقلت خلنا نروح المملكه ذي اللي ماعمري طبيتها والناس يمدحونها

خلنا نشوف وش فيها هاللي مزعجينا فيها والله لو انها البطحاء يشيخ

جاااني هاااامور ورحنا بسيارته( ميــتــيـن ال ) موديل 13 يالله يالله تمشي
وللمعلوميه حتى بيبان سيارته شايلها ومركب لها أبواب حديد مثل حقت البقالات

وحاط فيها أقفال

,, يعني إذا جا يركب سيارته كنه يفتح بقاله

,, واذا أذن للصلاة يوقف على جنب وينزل من السياره ويقفل الباب الحديد ,,

لأن الهيئه لو شافته يمشي وقت الصلاة بتلقطه للمركز ,

عاد حنا مسوين عيال نعمه ومشخصين كوبرا من كبرها اللي يشوفنا يقول مشخصين بشراع مهيب اشمغه

ونسولف وكل واحد وجهه على قدام يخاف تخرب الكوبرا ان التفت

وصلنا بحفظ الله ورعايته الى المملكه الساعه 9 وحنا محركين من العصر << لو رايحين كعابي كان وصلنا اسرع من القرنبع اللي جينا فيها

المهم صفطناها بعيييد عشان محد يشوفها على بالنا جايين في همر خشينا السوق
ياسلام اول امره ازور مكان حق مطخطخين << بيني وبينكم حسيت اني باقي لي ريالين واصير مطخطخ زيهم

المهم دخلنا السوق الا والعالم يركضوون ويركضووون

وانا مدري وش بلاهم هذولي قلنا خلنا نروح نشوف وش يلحقون ؟؟

وانا اللي اشلع ثوبي واعضه وأناظرهامور واقوله بييب بيب بيووووووووو

لحقناهم وصلنا عند العالم وشفنا وش اللي يحلقونه

وش تتوقعون ؟؟؟؟؟؟؟

طلعوا يلاحقون واحد عماني يحسبونه سندباد

جينا انا وهامور ونوخر العالم عنه الا العالم

يناظرون فينا معجبين والبنات يصفرون ويصيحون << طراله فزااااع

( ويتبسمون والبنات من بعيد ياشرون علي.. كني سمعت وحده تقول هذا ليو ميسي !!

عاد انا وهامور طرنا ( بالعجاجه )<< العجاجه = غبار صغينوط على ذمه حسن كراااني وعبداللطيف العيوني

عاد وحده مدري شقالت لهامور وهو يحسبها تبي الرقم ..الرجال خق وفق خشته وسعابيله
تقوطر وخشمه يسيل بلا رقيبٍ او حسيب

المهم بعدها بدينا الهيااط يوم شفنا البنات خقن معنا قام هامور وقال اعرفكم على انفسنا
انا هااامور الراجحي

وهذا ولد عمي ليو ميسي الراجحي

<< يبيهم يقولون عيال نعمة

المهم الا شوي وجاب العيد هامور قالهم ترا اليوم كل اللي بالسوق عشاهم على حسابي

وانا اناظره ودي امردغه بالعقال لين يعرف ان الله حق انا مافي جيب الا 12 ريال وهو مطفر ويعزم العالم

الناس ماصدقت خبر وقالوا يالله على المطعم

انا قلت لهم : طيب فيه مطعم عند الباب يلا نروح له << ابي اشوف الباب والله ان مايشوفوني يشيخ والله لا اشق الشعيب

قالوا مافيه نبي المطاعم اللي فوق ... والله الورطه وش نسوي وش نسوي وشلون نفتك من هالبلشه

شوي الا وربك ستر ذيك اللحظه طفت الكهرباء في برج المملكه << عشان الوليد ماسدد الفاتوره وحنا استغلينا الوضع وحطينا رجولنا .

ذا ايـنـــــد

تمت الترجمة بمـعــامـــل انيـــس عبــيــد بالقـاهـــرة

مايستفاد من الموضوع

1 _ مــد رجلك على قد لحافك وخــل الهياط والفشخره

2_ كالعادة الناس يتجمهــرون على اي شيء بسيط يحدث ... الى متى؟

3_

_4 جميع ماذكر

عاد انتوا بعد قرأتكـــم للمـــوضوع استخــرجوا ماستفدتـــوه

عوااااااااااافي

أول العنقود · #2 01/08/2007, 09:29 PM

حـــــجــــــــز

ـــــــــــــــــــــــــــــــــــــــــــــــــ

قصة رائعة من كتب الأدب العربي
ما يستفاد من القصة :

1/ إن هامور البورصة نكبة ..

2/ أن ليو ميسي إنسان مطفر ... و على كثرة الألوان بالموضوع تحسب إنه يملك محل قرطاسية

3/ لا أحد يخاوي هامور البورصة ثم يبتلش

4/ الوليد بن طلال يدور سلفة من أحد علشان يسدد فاتورة المملكة

لا هنت يا ولد ميسي على هيك موضوع ... أضحكتني أضحك الله سنك

بس اعترف من اللي إختار لك العنوان

وش رايك بألوان الرد

الـمـشـاغـب · #3 01/08/2007, 09:30 PM

موضوع يستحق الحذف

وينك يا كلاسيكي ؟

----------------------------------

استخرجت :

1) أن الفضاوة تسوي أكثر من كذا

2) أن ما عندك سالفة

3) أنك متأثر من الورطة الي حصلت أمس

4) أني أمزح معك بس

يعطيك العافية على الخيال اللي عندك أخوي ليوميسي

abo_nasser · #4 01/08/2007, 09:33 PM

حجز

قسم بالله كتبت رد طووووووووويل وفي الاخير جتني المقلم

عاد والله مادري يمكن لي عوده والا لا

ويعطيك العافيه على الهرجه الممتازه

تقبل مروري

سلاااااااااااااااااااااااااااام

لــوريــن · #5 01/08/2007, 09:36 PM

هههههههههههههههههههههههههههههههه
<<من الضحك ماتعرف ترد

برب وبعد الضحك برجع

f*y*d · #6 01/08/2007, 09:51 PM

محجوز للشايب فيّاض
Leo Messi منزل موضوع ..!

بالعااااافية يالغااااااالي

ومن طول الغيبات جاب الغنايم.

والله معليش حاجز عندك بس لي عودة

حقوق لون الخط محفوظة لليو ميسي

-----------------------------------------------
بااااااااكـ واحلى باك لأغلي ميسي في الدنياااااااا

(من اولها بدينا رفع أجل وشلون تااااليها..؟!!!!)

------------------------------

إقتباس


	مساء الخـيـر يـا قـاري موضوعي مساءك شـــوق مع عطر الـورود مساءك فـل مـع كـادي وجـوري مساءك مسك مع عنـبـر وعـود أخبارك كيف وعلومك يا غالـي عسـاك بخير يـا أحلى الـوجـود

مساااااااء الخير ..........

والله مدري وش اقول غيرها مافي سلام الا وانت جبته

ترى خلاص فهمنا تبي تسلم علينا >>خربت الاخلاق 0

تعال بسألك الحين مين تقصد في " أحلــى الوجود "

أكييييد أنا طبعا

تسلم

والله

أنا والله حمدالله بخيــر مادامك منزل موضوع وتقوللي "أحلى الوجود"
يؤ يؤ أخجلتني وأخجلت تواضعي>>خخخ ترى متعوب عليها الجملة

إقتباس


	1_ leo messi << مستشار ريس موزنــبيــــق واحد الناجين من حاثة ( عين جالوت ) فارس مغوار ويقال على ذمة الراوي انه سدح ستين فارس بـ نبـيـطه 2_ هامور البورصه << شــاب عانــس .. 3مباريات دولية اشعث الشعر طالعه رقبته جحه بدلا من تفاحة ادم

والنعم فيييكـــم والله إنكم أحسن ناااس

بس تعال بسألـك سؤال تحجيري

:
الحين وش دخّل موزنبيق بحادثة عين جالوت

الصرااحة شكلـك ماتدري وش موزنبيق اصلا ههههههههههه
ترى هي تنكتب موزمبيق وليس موزنبيق

خخخخ وين شذى (ع) عنّك بس

جمهوريةموزمبيق

اللغة الرسمية اللغة البرتغالية (رسميا) ، اخرى متداولة
العاصمةمابوتو
رئيس الدولةارماندو غيبوزا
مستشار رئيس Leo messi

المساحة- 801,590 كم

- الكثافة السكانية المصنفة 55 عالميا
19,104,696 (تقديرات يوليو 2000)

--------------------------------------
هههههههههههههههههههـــ كفوو يالمستشار

إقتباس


	المهم في مرة من الامارير وفي يووووم من أيــــــام الربيع .. وبينما كانت أوراق الشجر تسقط على الارض .. ووتسقط وتسقط وتسقط .. آخر شي جات الأرض واشتكت عالبلديه إن الشجر يرمي عليهم مخلفــــااااات ..

اااااااااه بس البلدية حتى المقاهي قفلتها "غير نظامية"

إقتباس


	جاااني هاااامور ورحنا بسيارته( ميــتــيـن ال ) موديل 13 يالله يالله تمشي وللمعلوميه حتى بيبان سيارته شايلها ومركب لها أبواب حديد مثل حقت البقالات وحاط فيها أقفال ,, يعني إذا جا يركب سيارته كنه يفتح بقاله ,, واذا أذن للصلاة يوقف على جنب وينزل من السياره ويقفل الباب الحديد ,, لأن الهيئه لو شافته يمشي وقت الصلاة بتلقطه للمركز ,

ههههههههههههههههههههههههههههههههههههههههههههههههههههههههههـــ هههههههههه
ياخي عليك تشبيهات انما ايه

إقتباس


	عاد انا وهامور طرنا ( بالعجاجه )<< العجاجه = غبار صغينوط على ذمه حسن كراااني وعبداللطيف العيوني

اما عاد عليك تعريف والله مافهمت شي

إقتباس


	انا قلت لهم : طيب فيه مطعم عند الباب يلا نروح له << ابي اشوف الباب والله ان مايشوفوني يشيخ والله لا اشق الشعيب

ياخي يا انه عليك نصب غير طبيعي أبدا

>>>>دااااخل جو مع القصة

إقتباس


	عاد وحده مدري شقالت لهامور وهو يحسبها تبي الرقم ..الرجال خق وفق خشته وسعابيله تقوطر وخشمه يسيل بلا رقيبٍ او حسيب

اذا شافو هامور وسوو كذا أجل لو شافوني أنا

أحس البرج بينقلب فوق تحت

دا انا عسل ينقط كدا هو

>>>>>>>>مادح نفسه كذااااااااب

إقتباس


	ذا ايـنـــــد تمت الترجمة بمـعــامـــل انيـــس عبــيــد بالقـاهـــرة

إقتباس


	نبذه تعريفيه بأبطال الفيلم

ههههههههههههههههههههههههــهههههههههههـــ

باللهـ عليك الحين انت كاتب موضوع ولا روايات مصرية للجيب
ولا فيلم..

.......وللي يرحم واالديك حدّد
لحست مخي انت ووجهك

ههههههههههههههههههههههـ

وفي النهااااية .... ما يستفاد من هالموضوع اللحس::::::::::

1-أهم شي : إنه ليو ميسي إن طوّل علينا بمواضيعه فثقوا وتيقنوا
إن جديده رااااااااااااااااائع وحلو.

2- إنه هو وهامور ناس تفتخر فيهم في عالم الدجة والهيط

3- يازين الهيط لكن عاد لا تهايط اكبر من للي تقدر عليه
ياخي هايط على قدّك عشان لايجيك اللي أهيط منك ويهيطك
>>>ترا مافهمت شي اصلا

4- ليو ميسي لديه موهبة فذّ’ة ولكن الهيط لعب ف مخه .

5- إني انا فياض أحب الحجز وإني اذا مارديت على موضوع بيصير بااايخ وماله طعم

6- فياض أبد مو خبيث والبرااء تقطر من خشتي !

7- إنه للي يمدح نفسه كذاب وميسي أولهم وانا ثانـيهم.

8- إن الفلسفة بايخة

9- إن ما استفدت منه كثيير وتورطت وش اكتب زيادة

10- إن ردّي أطول من الموضوع

11- خلاص انتهى عاد لا يكثر.

12- إن حقوق لون الفونت محفوظة لـــ ليو ميسي .

The End النهــــايـة

الهلالي دائماً · #7 01/08/2007, 09:55 PM

[

COLOR="Red"] الموضوع شكله قوي دام اللي كاتبه ليو ميسي

اكيد لي عودة ان شاء الله بعد المخمخة عليه[/COLOR]

ــــــــــــــــــــــــــــــــــــــــــــــ

عـــــــــــــــــــــدنا

ماشاء الله عليك اخوي ليو ميسي خيالك من جد خصب ينفع نزرع فيه شعير

>>> ههههههههه ترى متعوب على كلمة خصب ;)

حقيقة قصة كلها فوائد من كثرة الفوائد ما صرت اجمع

إقتباس


	تمت الترجمة بمـعــامـــل انيـــس عبــيــد بالقـاهـــرة

بس انيس عبيد هذا بالحاله تحفه ههههههههههههه

قسم بالله ذكرتني ايام نتكي على افلام القناة الثانية

بس ياهو كسب اثم ها الشعب العربي ..!!

وعلى طاري الكهرباء اذكر قبل سنتين تقريباً كنت في الفيصلية البرج وتطفى الكهرباء وانواع الفلة ههههه

عاد المصاعد ما صارت تشتغل وعطونا شمعات ونزلنا مع درج خلفي مدري وش يبي بس كان فيه اختلاط !!

عاد العالم انواع اضحك والوناسة وكل واحد وضميره

الا خلنا نرجع لمحور الحلقة ( الفوائد )

1- المهايط ها اليوميين أصبح ضرورياً

عند بعض الناس ;)

وهذه المشكله تحتاج الى حل جذري وسريع

2- اسواق المملكة صارت (اوبن )ويدخلون الشبهات ولله الحمد

3-أكثر البنات على الريحة

واي شي يلاحقونه لو انه قطو ;)

4- ان كاتب الموضوع ورفيق دربه خروفان على قد الحال

5- جميع ماسبق

الله يعطيك العافية اخوي ليو ميسي ها الموضوع المنعنش ...

والخيال الخصب >>> مصمم على الخصب

ودمت بحفظ الله ورعايته ,,,

شـــذى · #8 01/08/2007, 09:56 PM

مايستفاد من القصة

1- الحكومة كالشعب إذا ما سددت تُقطع عنها الكهرباء

2-

إفتقدنا حسن كراني ..

3- يا شين القراوية

4- الشاب السعودي مهايطي

5-ابدأ فروسيتك بنبيطة

فطريق الألف ميل يبدأ بنبيطة أقصد خطوة

leo messi

يعطيك العافية

فهد عاشق البرسا · #9 01/08/2007, 10:00 PM

الله يوسع صدوركم
قسم بالله وسعتوا صدري

>>>>....... ولا مالها داعي بس

سلام

G o L d E s T · #10 01/08/2007, 10:28 PM

ما يستفاد من الموضوع

1_ لا تخاوي قروي اذا صرت قروي

2 _ لا تعزم قبل ما تشيك على مخباتك

3_ لا تعدى محلات الفوال ابرك لك وأحسن للمنظر العام للشعب السعودي:p

4 _ لا عاد تدخلون المملكة وتراي منب قاعد اطفي لكم الكهرب كل شوي اذا توهقتوا

المـشـاكـس · #11 01/08/2007, 10:33 PM

حجز
|)|)|)|)|||)|)|)|)|)|)|)|)|)||) (|(|(|(|(|(|(|(|(|(|(|(|(|(|(|(|

باك

إقتباس


	مساء الخـيـر يـا قـاري موضوعي مساءك شـــوق مع عطر الـورود مساءك فـل مـع كـادي وجـوري مساءك مسك مع عنـبـر وعـود أخبارك كيف وعلومك يا غالـي عسـاك بخير يـا أحلى الـوجـود

الله يصبحك بالنور والسرور
بس مدري ليه حسيت ان اليبت الرابع كان

بالله تتقهوى عندنا

وانحذف مدري ليه

إقتباس


	1_ leo messi << مستشار ريس موزنــبيــــق واحد الناجين من حاثة ( عين جالوت ) فارس مغوار ويقال على ذمة الراوي انه سدح ستين فارس بـ نبـيـطه

انا عندي سؤال مهم
منهو ستين فارس هذا
وهل هو ولد فارس مغوار
وبعدين هو وش كان معه يوم انت معك نبيطة

إقتباس


	2_ هامور البورصه << شــاب عانــس .. 3مباريات دولية اشعث الشعر طالعه رقبته جحه بدلا من تفاحة ادم

ياخي ليش والله هامور ما يستاهل
بعدين ياخي حتى لو فاته القطار يمديه مسيار

<<<< نسي ان الدعوى مزح

إقتباس


	المهم في مرة من الامارير وفي يووووم من أيــــــام الربيع .. وبينما كانت أوراق الشجر تسقط على الارض .. ووتسقط وتسقط وتسقط .. آخر شي جات الأرض واشتكت عالبلديه إن الشجر يرمي عليهم مخلفــــااااات ..

اضحك الله سنك
وبعدين ترى البلدية ارسلت مندوب وكتبوا على الشجرة
انذار بالازالة يرجى مراجعة البلدية خلال اسبوع من تاريخه
>>>> بس كيف حافظ ..... اعجبكم ;)

إقتباس


	المهم اتصل علي وانا كنت زعلااااان وقتها الوالد يهاوشني ويهايط علي وصاكني بجركل مويا على جبهتي <<< طبعا انا ساكت له لانه يمون وبينا عيش وملح فماودي اقلب عليه

ما عليك هو ما كان زعلان عليك هو زعلان على الجركل
لذلك رمى الجركل في جبهتك يبي يربي الجركل زي الناس

وبعدين ما لك الا الصبر
و نصيحة لك
ترى الاب مثل الوالد

عاملهم نفس المعامله ولا تفرق بينهم ابد

اهم شي المساواة

إقتباس


	عاد حنا مسوين عيال نعمه ومشخصين كوبرا من كبرها اللي يشوفنا يقول مشخصين بشراع مهيب اشمغه

يا حبي لكم يا اهل الرياض انتوا وذي الكوبرا
اشوفهم بالمطار وبالتلفزيون
24 ساعة بالشماغ والكوبرا <<<< على باله ان بينهم فرق

تصدق انه فيه شباب جو من الرياض
وطلعوا البحر مرسمين كلهم 7 اشخاص

انا قلت لهم اذا احد سالكم تعرفون عبيط..!! قولوا لا
لا والمصيبة نزلوها الا يوم راحوا يبون يسبحون
<<<<< يبون يفهموني انهم بالرياض صح بس يسبحون

إقتباس


	المهم دخلنا السوق الا والعالم يركضوون ويركضووون وانا مدري وش بلاهم هذولي قلنا خلنا نروح نشوف وش يلحقون ؟؟ وانا اللي اشلع ثوبي واعضه وأناظرهامور واقوله بييب بيب بيووووووووو لحقناهم وصلنا عند العالم وشفنا وش اللي يحلقونه وش تتوقعون ؟؟؟؟؟؟؟ طلعوا يلاحقون واحد عماني يحسبونه سندباد

تكفى لا تذكرني
والله ان هذي السالفة انها ترفع ضغطي اتش

لو تكلمت راح اخسر الكثير

<<<< طيب ليش تقتبسها اجل

<<<< عشان العالم تعرف اني متضايق

إقتباس


	( ويتبسمون والبنات من بعيد ياشرون علي.. كني سمعت وحده تقول هذا ليو ميسي !!

اكيد كانت وحدة
ليو يمين يسار
ما يمديها ;)

اجل وحدة

إقتباس


	عاد وحده مدري شقالت لهامور وهو يحسبها تبي الرقم ..الرجال خق وفق خشته وسعابيله تقوطر وخشمه يسيل بلا رقيبٍ او حسيب

هذا وهو يقول انه مطيح قلوب العذارى
امحق مطيح

بس يا ليو مرة تراك جرت على هامور بهالموضوع
مرة مرة سفلت فيه

<<<<< يبي يقومها بينك وبين هامور

طحت فيه حش وكلام
من سيارته الى سعابيله

وبصراحة اظهرته بمظهر الشخص اللي ما عمره تخرفن
وانا انكر هالشي

صح يا هامور ولا لازم نسال المشاغب

هامور لا تنسى بيتزا تجمعنا ولا برقر يذل اثنين ;)
والدعوى مثل ماقالوا الشاعر
(مدري وشو) قالها ....... (مدري وشو) رجالها

(مدري وشو ): انا نسيت وش قال الشاعر بس اذا تذكرت بكتبه

إقتباس


	انا قلت لهم : طيب فيه مطعم عند الباب يلا نروح له << ابي اشوف الباب والله ان مايشوفوني يشيخ والله لا اشق الشعيب

هالحين نجي للتخصص
اللي هو التحجير

وين ذي الشعيب اللي عند المملكة

انتوا اكيد رحتوا لناطحة السحاب حق الوليد
ولا رحتوا لذي اللي بالصورة

اذا ما فتحت الصورة
مع الرابط
http://www.m5zn.com/showimage.php?im...639ea7ccb6.jpg

إقتباس


	تمت الترجمة بمـعــامـــل انيـــس عبــيــد بالقـاهـــرة

اي والله هالانيس ما خلانا نتابع الافلام صح
كل الدنيا
عليك اللعنة
وتبا لك
واغرب عن وجهي
واذهب الى الجحيم

|)|)|)|)|)|)|)|)|)|)|)|)|)|)|)|)|)|)|)|)|)|(|(|(|(|(|(|(|(|(|(|(|(|(|(|(|(|(|(|(|(|(|(|(|(|(

الله يعطيك العافية على هالموضوع

تصدق ان الرد اخذ مني ساعة كاملة

لكن لعيونك يا يسلم كل شي يهون

اما الفوايد من الموضوع فلا عاد ورا كلامك كلام
ما خليت لي ولا فايدة ابد

Hilali88 · #12 01/08/2007, 10:35 PM

سنعود بعد قليل

=====================

عدنا

يعطيك العافية ياليو ميسي الراجحي

على هالقصة الحلوة

أما سالفة العماني إللي كنه سندباد قعدت حول الدقيقة أضحك عليها

ما يستفاد من القصة

1- إنك مطفر أكثر من هامور

2- الوليد مطفر أكثر منكم

3- الشعب السعودي ملاقيف كل ما شافوا شي تجمعوا عليه >>> لا تزعل

4- القصة اعجبتني

5- إني أكره أبوبلوتوث وعماد >>> خاشة غلط

يعطيك ألف عافية

بلد الوليد · #13 01/08/2007, 10:46 PM

إقتباس


	مساء الخـيـر يـا قـاري موضوعي مساءك شـــوق مع عطر الـورود مساءك فـل مـع كـادي وجـوري مساءك مسك مع عنـبـر وعـود أخبارك كيف وعلومك يا غالـي عسـاك بخير يـا أحلى الـوجـود

انا من شفت الموضوع وانا متفاااائل احسبه بيصير مثل مواضيع ابو ريمان ولا من شلة الادباء

لكن تتوالى النكبات يا سلطان >> محد يفهم الا ليو

إقتباس


	هامور البورصه

المخلوق هذا وش لاقي فيه تخاويه

نكبه درجه اولى

كذاب والي صار امس يا طارق يشهد

طفران

مركب في سيارته مكيف صحراوي انا هذا لي مصبرني عليه

إقتباس


	الأرض واشتكت عالبلديه

والله الارض شكلها تقرب لجيرانا

كل يوم البلديه صاكينا بانذار اهدار المياه في تغسيل الحوش

يعني نغسل حوشنا بوش بديزل؟

إقتباس


	انا هااامور الراجحي وهذا ولد عمي ليو ميسي الراجحي

لاحظو معي الذهانه كيف
ما قال ال سعود لان الحركه هذي خلاص قديمه

قال الراجحي يعني فيه امل نصدق

مليت

باي

@ ابو عبدالعزيز @ · #14 01/08/2007, 11:08 PM

إقتباس


	عاد انا وهامور طرنا ( بالعجاجه )<< العجاجه = غبار صغينوط على ذمه حسن كراااني وعبداللطيف العيوني

خابره طروا بالعجه موب العجاجه

إقتباس


	3_

اموووووت على الفائده اللي كذا المفروض يحطونك حكيم المجلس العام

عوافي على الموضوع الحلو

Mr.DL5 · #15 01/08/2007, 11:26 PM

حجز