فكرة و إعداد / الماسه الزرقاء




نعود إليكم أحبتي من جديد في بداية هذه العطلة الصيفية مع
(حياة @ نت ) بعد انقطاع بسبب اختبارات الطلاب والطالبات ,,
وكما تعلمون فهي عبارة عن سلسلة ستستمر معنا بإذن الله لفترة ما في مجلسنا العام إعتماداً على تفاعلكم الكريم,
يحكي فيها ضيفنا عن سيرته وحياته في العالم الافتراضي , عالم الشبكة العنكبوتية وعالمه في شبكة الزعيم .






ضيفنا الرابع فكاهي , مبدع , ممتع , شعلة من النشاط و محب للفلسفة حتى بات مدمناً عليها,
عفواً نقصد كاره للفلسفة وتوابعها , إلتحق بالمجلس العام بعد أن كان في الجمهور ,
له طابع مميز في اسلوبه خلال مواضيعه او ردوده سواء كانت جادة أو فكاهية ,
اشتهر اسمه كثيراً بين الجميع, وأصبحنا نراه من خلال غيره في مواضيعهم ,, أثبت وجوده وأكد تفوقه .



ضيفنا لرابع عدد من هذه السلسلة هو المميز المبدع كاره الفلسفة

«¤¶`المشاغب `¶¤»


نترككم مع كاتبنا وضيفنا الغالي .. ليُبحر بكم في عالمه الافتراضي ..





(( الانترنت " بلاوي متلتلة " ))


طبعاً بدايتي بالانترنت كانت مثل بداية أي شخص "داج" ما عنده ما عند جدة "صدى الدجة"
كنت بصف ثالث ثانوي عام 2003 وكان أغلب زملائي متمرسين في عالم النت.. وأنا عندهم مثل الأطرش في الزفة
ما كان عندي ذاك الاهتمام بالنت.. كنت أفكر أنه "بـلاوي مـتـلـتـلـة" فقلت ياولد ابعد عن الشر وغنيلوه
لحد ماجات حصة الحاسب الآلي وكان مدرسنا مصري ملتزم..! فجاء يشرح عن الشبكة العنكبوتية
وضرب مثال بالدردشة فكان مرة يقول دردشة ومرة يقول شات..!!
فسألته وش هي الدردشة يا أستاذ ووش هو الشات؟
ضحكوا الطلاب وابتسم المدرس حسبني أستهبل -كالعادة-
لكني حلفت له اني صادق منب فاهم الدرس..
قال: انتا عايش فين يابني؟ قلت له: ببيت جيراننا يا استاذ وين يعني؟ أكيد ببيتنا..!!
قال: يا واد يا تحفه شوف لك صرفة بحياتك المهببة دي قلت: يا استاذ أصلاً الانترنت حرام..
كله بلاوي ووساخات << بريء جداً الولد
قال: والله ما فيش وسخ زيك
المهم بعد كم كلمة وكم تهزيئة من المدرس قال لي: بعد الحصة تعال عندي.. دنا عاوزك يا سلطان.. قلت: طيب
ثم بعد الحصة اعتذر لي و كلمني عن الانترنت ونصحني فيه وانه لغة العصر ومن هالكلام..
لين مسكت في راسي اني أتعلم الانترنت..!
بس للأسف ما فضيت من كثر الدجة والطلعات في الرياض..!! والحمد لله انتهت السنة على خير وتخرجت بتقدير ممتاز






[] دخلت النت وانا متلطم . []

المهم: تعرفون انها ماسكة في راسي أدخل عالم النت منذ تلك اللحظة.. ولكن الأشغال منعتني.. وعندما أتت العطلة
الصيفية افتتح محل قريب منا "مقهى انترنت"
قلت: يا ولد ما بدهاش.. هذي الفرصة جات لين عندك..!!
قتوكلت على الله.. ودقيتها (لـطـمـة) من مسافة 100 متر عشان ماحد يعرفني خايف ان احد يعلم أهلي أني أتردد
على المقاهي وتصير فضيحة بجلاجل
المهم دخلت المقهى وارتزيت على واحد من الأجهزة وسمّيت باسم الله..
واللطمة مكانها ما تغيرت موب واضح منها غير عيوني
دخلت وما عرفت شي ناديت العامل وكان سعودي.. قلت له: بالله شغل لي الدردشة.. قال: ادخل قوقل
واكتب "دردشة" وراح تطلع لك مواقع كثيرة..!! قلت له: هوّ أنا عرفت الدردشة الحين عشان تجي تقول لي قووقل؟
وينه قوقل ذا فيه؟
قال: أنت أول مرة تدخل النت؟ قلت: ايه أول مرة.. وإذا تعلمت بأصير زبون دايم عندكم
سوّى لي الأخ دردشة جاهزة ماعلي إلا أكتب عليها بس بس المشكلة إني ما عرفت وين أكتب فيه؟
وبعد جهد عرفت أكتب في المستطيل بس ما عرفت وش الزر اللي أضغطه عشان يوصل كلامي؟ والله يا شباب ويا
شبابات اني قعدت اكثر من ربع ساعة أفحط وما عرفت وش أسوي
كنت مستحي أنادي العامل مرة ثانية ... معاد باقي إلا أخليه يجي يدردش مكاني
بالأخير سألت على استحياء واحد جنبي وما بغيته يعرف أن ما عندي سالفة..
قلت له: ياخوي مدري وش فيه الجهاز عندي خربان ما يوصل كلامي
ما قصر الدب علمني كيف .. لكنه قهرني يوم انه فاتح خشته بكبرها يضحك علي..لحد اني خفت أنه يشفطني داخل هالخشة
ومن يومها وأنا بديت أدردش.. وأتطور كل يوم.. وأتعلم حاجة جديدة.. وتعلمت أرسل بالخاص
انقطعت عن النت حتى دخلت الجامعة.. وهناك احتكيت بهاكرز وطلبتهم يعلموني التهكير
بس قالوا هالحين تعلم حبة حبة بعدين يصير خير..!!:p
وبعدها تعلمت أسوي إيميل من أحد أصدقائي اللي عرف أني داج فنصب علي مسوي فيها هكر هو ووجهه النصاب
ثم تطورت بعدها وسجلت بمنتدى أحد الفنانين السعوديين..!! واستمريت فيه سنة كاملة حتى عرض علي الاشراف ورفضته
ثم تنتقلت بعد ذلك من منتدى إلى منتدى.. حتى حطيت رحالي أخيراً في منتدى الزعيم..
وبصراحة!! والله أني استفدت من منتدى الزعيم استفادة كبيرة.. خصوصاً من قسمي الكمبيوتر والاتصالات..!!
صرت مرجع لأخوياي المبتدئين في النت والبرامج... حتى أني أنصب على بعضهم أني هكر ويصدقوني المخفات
سبحان الله بعد ما كان أخوياي ينصبون علي بأنهم هاكرز.. صرت أنا أنصب على أخوياي الثانين أني هاكر
هذي قصة بدايتي الانترنتية بشكل مختصر..!!






(( المشاغبة وإيذاء الناس ))

لذكرت لكم أني كنت أتنقل من منتدى إلى منتدى... ولكني مع هذا كنت متابع لشبكة الزعيم.!!
كنت أشوف المنتدى رياضي بحت وفيه كبار الكتاب.. وما كنت أتوقع في تلك الفترة أني كمبتدئ بأرتاح معهم فاكتفيت بالمطالعة دون المشاركة..!!
بعد ذلك تعرفت على أحد زملاء الدراسة وكان عضواً في شبكة الزعيم.. كنا دايم في معمل الحاسب ندخل النت جنب بعض
ومن يوم عرفته وهو ما عنده غير شبكة الزعيم..!! ثم شجعني على التسجيل بشبكة الزعيم... فقررت التسجيل..!!
طبعاً احترت في اختيار الاسم المناسب..!!
كان اسمي في كل المنتديات اللي كنت مسجل فيها وتركتها (جساس) لا تسألون عن سبب الاسم.. لأن الاسم
جاء من زود اعجابي بجساس بن مرة... اللي جاء في مسلسل الزير سالم.. أنا اشهد أنه سنايدي
أنا يعجبني اسم (الـفـارس) لكن عشان ما تثار أي بلبلة حولي من أخوياي اللي يسيؤون الظن قررت أختيار اسم يمشي
الحال.. فاخترت اسم (الـمـشـاغـب)
لكن البلا أن حتى المشاغب ما عجب واحد مطوع من جماعتنا.. ولامني على الاسم
قلت له: ليه حرام؟ قال إيه حرام
قلت: عطني دليل أنه حرام؟ قال: المشاغبة وإيذاء الناس حراام
والله بغيت أسطره بكف لولا احترام اللحية
والله يا أخوان كنت أعاني مع اللي ما يعرفون شي عن الانترنت
صدق من قال: (رضا الناس غاية لا تدرك)....!!
بالنسبة لأقرب المنتديات إلى قلبي حالياً: المجلس العام- الجمهور الهلالي- الاتصالات- الكمبيوتر والبرامج
وأفضّل الكتابات الرومانسية مرهفة الحس وهـ بس <<<< OUT
لا من جد.. أحب الكتابات الطريفة الهادفة.. أو الجادة التي تحمل حلول لمشكلة اجتماعية..!!
وأكره كثرة المواضيع اللي تتكلم عن الحب بشكل مبالغ فيه





[]بين العرض المغري والإعتزال من الحياة الفنية []


أذكر موقف مر علي ما أنساه أبد..!
ذكرت لكم طبعاً عن منتدى أحد الفنانين السعوديين اللي كنت مسجل فيه..!!
المهم: كتب أحد الأشخاص جزاه الله خير موضوع يذكّرنا أننا بمشاركتنا في هذا المنتدى
نتحمل ذنوبنا وذنوب من حمّل أي أغنية من المنتدى..! ويذكر كلام كثير عن هذا الموضوع جزاه الله خير..!!
كل انسان مهما كان أكيد فيه خير.. وأنا من زود الخير اللي فيني فكرت بالموضوع
وقررت أني أترك المنتدى رغم أن لي أكثر من سنة..!!
وسبحان الله بعد ثلاثة أيام تقريباً جاتني رسالة من الادارة تطلب مني أن أكون مشرف على أحد الأقسام..!
صراحة كان العرض مغري وبغيت أهوّن من التوبة بس الحمد لله الله ثبتني واعتذرت للادارة..
ورغم اصرار الادارة للمرة الثانية إلا أني رفضت رفضاً قاطعاً ولم أبدي لهم الأسباب الحقيقية..!!
المهم أني اعتزلت الحياة الفنيةنهائياً وبعد حوالي أربعة أشهر أتتني رسالة من أحد الأعضاء
يستفسر مني عن سبب إغلاق المنتدى..!!
ثم بعدها بفترة قصيرة أخبرت أحد أصدقائي بموضوع المنتدى... واكتشفت المفاجأة
طلع صاحب المنتدى اللي كنت مسجل فيه هو أخو صديقي ويدرس معنا بالجامعة
وسألته عن سر إغلاق المنتدى؟فأخبرني أن السبب هو نفس السبب اللي خلاني أترك المنتدى..!!
(الواحد ما يقدر يشيل ذنوبه.. عاد كيف بذنوب الاخرين)
وبعدها تخاويت أنا وصديقي وأخوه في السفر الى الرياض..
وفي السفرة ذيك اكتشفت أسرار خطيرة تصير في المنتدى من وراي
بس أنا الحمد لله كان سجلي نظيف عند أخو خويي وما صاد علي شي لأني أمشي دوغري
هذا الموقف اللي لازال في ذاكرتي..!!
طبعاً هناك مواقف كثيرة جداً تحصل معي خصوصاً في الماسنجر!!
جميع أنواع البشر متوفرين عندي في الماسنجر الله لا يبلاكم
كان بودي أن أذكر عدة مواقف لي مع بعضهم في الماسنجر ولكن المجال لا يتسع لذكرها..!





(( شخص مشهور طلب مقابلتي ))


ما أحب أتعرف على أشخاص من الانترنت..!! أحب تكون العلاقة بيننا في حدود الانترنت بس... وما أذكر أحد تعرفت عليه
عن طريق الانترنت إلا شخص واحد بس.. وهو شخص مشهور بخدمة الزعيم.
. طلبت إضافته بالماسنجر.. ووافق.. وفي الماسنجر من أول مرة طلب رقم جوالي.. وانحرجت منه وعطيته..
واتصل وسلم... ثم بعدها طلب مقابلتي << يالييييييييل
وقابلته بعد المماطلة مرتين حتى الآن... وهو بصراحة شخص طيب ومحترم...
لكن المشكلة اني ما أحب أتعرف على أحد من النت وخصوصاً المشاهير
ولكن ان تمنيت رؤية أحد من الانترنت... لتمنيت رؤية الأخ -الحاضر الغائب- هامور البورصة والأخ كلي هلالي...!!;)






[] شخصيتي خارج الشبكة []

أحب موقع العالمي كلوب ورابطة جمهور الاتحاد <<<< جاب العيد

لا.. لا... الصدق... أتابع موقع الساحات قبل ما يحجبونه..!!
وموقع طريق الإيمان..!! وموقع الاسلام اليوم -أحياناً-..
ومواقع البرامج..!!
مواقع كثيرة تجذبني بصراحة.. ولكن المواقع الانشادية عموماً هي أكثر ما يحوز على اهتمامي..!!
طبعاً ذكرت لكم المواقع الزينة اللي أدخل عليها... أما المواقع الثانية أخاف لو أذكرها تشوتوني مع الباب

بالنسبة لآرائي وأفكاري اللي أطرحها في المنتدى هي بالتأكيد تمثلني في الحياة الواقعية..!
أما بالنسبة للأسلوب فأشوف أن أسلوبي يختلف في الحياة العامة عما هو في المنتدى..! في المنتدى آخذ راحتي
على الآخر.. أما خارج المنتدى فلا بد من (الثقل) و (الرزانة) أو بيسفهوني الناس..!!
وأحب أقتبس هنا رد لأخوي هلالي جامعة البترول عن شخصيتي:

إقتباس وأما المشاغب من جد غريب .................. احس وضعه بالمنتدى غير عن وضعه في الحياه العامه سبحاااااااااااان الله

الأخ هلالي جامعة البترول يعرفني من الجامعة... وأنا معه (شوي رسمي)







(( يوسفية أفندية و 20 دقيقة))

أنا بصراحة أحب المقالب بكثرة.. وياما سويت مقالب في ناس كثيرة..! كان آخرهم هامور البورصة
لكن بأذكر لكم مقلب قبل سنتين سويته في واحد اسمه أحمد توه تعلم الانترنت..!
كان أحمد عليه اختبار قبول في الجامعة الساعة 7 صباحاً على ما أظن..!! المهم دخلنا مقهى انترنت بعد صلاة
الفجر ودخل أخونا في الله موقع دردشة ومن لعانتي لقطت موقع الدردشة اللي دخله أحمد ولقطت اسمه فيها
ورحت لجهاز ثاني ودخلت نفس الموقع واخترت اسم : "يوسفية أفندية" ودخلت نفس الروم اللي فيه أحمد..
وبعد الدردشة بالعام.. دخلت عليه بالخاص.. والمسكين على طول خق ما صدق على الله فيه بنت تعطيه وجه
وجلست أسولف مع المسكين أكثر من ساعتين...قرب وقت الاختبار وقال لي أنه طالع عنده اختبار وطلب رقم جوالي
للتواصل
المشكلة ما كان عندي قلب ذاك اليوم فما رحمته فكملت المقلب وقلت له أني حبيته مووت وتعلقت فيه
الولد والله يا جماعة راح فيها وقعد يحاول فيني عشان أعطيه الرقم أو على الأقل أعلمه متى يقدر يحصلني في
الشات -لأنه ما يعرف الايميل- فماطلته وماطلته لين بقى على الاختبار 20 دقيقة بس... يعني معاد يمديه يوصل الاختبار مع الزحمة
شفت أن الولد تعلق وبيضيع عليه الاختبار.. فقلت لنفسي خلاص يا سلطان يكفي... حرااام
فوضعت حد للمقلب.. وكتبت له:
( يا أحمد يا دب يا معفن.. يالله خلنا نمشي لا يضيع عليك الاختبار... مع تحيات محبك: سلطان)
ما مداني أضغط (Enter) إلا وأسمع ذيك الصيحة اللي رجت المقهى كله: (الله يلعنك يا سلطااان)
وعلى طول أحط رجلي طريق السيارة وهو يلحقني ووجهه أصفر مستحي من المقلب اللي سويته فيه
عاد هو طيب سامحني .. بشرط أني ما أعلم أحد باللي صار..!! والحمد لله جات سليمة



بقلم المميز النشيط : المشاغب





ونحن بدورنا نشكر المشاغب الغالي المبدع لإٍستجابته لدعوتنا

ولا ننسى أن نشكر المصمم المبدع عاشق بو يعقوب على تصاميمه الخاصة بالموضوع


وانتظرونا الأسبوع القادم بإذن الله في ( حياة @ نت )
مع ضيفنا الأديب الهادي ذو الإحساس المرهف " مطيع الهميمي ",







تقبلوا أرق التحايا وأطيبها
من مشرفي واستشاريي المجلس العام






«¤¶` مشرف منتدى الجمهور " الغريب" ضيفاً على "حياة @ نت" `¶¤»


«¤¶` مشرف منتدى المجلس العام " البارق " ضيفاً على "حياة @ نت" `¶¤»


«¤¶` خنفشاري المجلس العام " ماجد مقبل " ضيفاً على "حياة @ نت" `¶¤»