ما أنت إلا مثلٌ سائرٌ,,يعرفه الجاهل والخابر,,! - نادي الهلال السعودي - شبكة الزعيم

التميميه · #1 01/07/2007, 04:06 AM

السلام عليكم ورحمة الله وبركاته,,

صبحهم/ مسهم بالخير,,

يالله حيـــــــــهم,,

يالله من فضلك الجنه,,

وه بس يازين المجلس بالاجازه,, الواحد يقرا وهو منبسط ماوراه هم,,

تيــــــــب,,ندحدر للموزوع على طول,,

الأمثــــال _في كل أمة_جزء حي من تاريخها,,ويعبّر عن إحساسها و مشاعرها,,

والمثل أدل على طريقة تفكير الشعب,, ومعيشته,, من الفنون الأخرى كالشعر,,

لأن الشعر ما يتذوقه كل الناس,, وإن تذوقوه ما يحفظه إلا القليل منهم,,

أما المثل,,فلفظه موجز,,وتركيبه بسيط,,ونطقه سهل,,يعني وذيف,, عشان كذا يعلق بالأذهان أكثر,,

ويكون دارج على لسان العامه,,

لذلك قال أبو تمام,,

ما أنت إلا مثلٌ سائرٌ,,يعرفه الجاهل والخابر,,

المناسبة,,

يوم إن الاستشاري ينّزل موضوع الحكم والأمثال بالصور,,وأجي أتميلح;) أنا وشكلي وأسوي فاهمه وأرز لهم ذيك الصورة,, وأشرح لهم المثل,,

وهم فاقين خششهم,,ومتنحين بقوووووة ,,

والله إن شرحت والا ماشرحت,, مثــــل أمس هالحزه,,!

حقيقة,,

لقد حز بخاطري,,

وشب تسبدي,,

عدم معرفة الأعضاء لهيا الرشيد,,!!

لذلك,,وايمــــــــاناً مني بضرورة تبادل الثقافات,,;)

حملت على عاتقي مسؤولية شرح بعض الأمثله الشعبيه المتداوله أبدؤها بهيا الرشيد,,

وذلك لتعــــــــم الفائده,,!!:p

أولاً,,

تصاحبت هيا الرشيد* وأمها,,

يقولون والعهده على الراوي,,ان هالهيا وأمها,, مايتوالفون أبـــد,,

يعني ثلالثه وعشرين ساعه منـــاقر,,

وساعه وحده يتصالحون و يصيرون وش حليلهم,,

وفي هالساعه يُقال,,,,تصاحبت هيا الرشيد وأمها,,

ويطلق على من هم على شاكلة هيا وأمها,,في المشاجرة والمصاحبة,,!!;)

ثانياً,,

ما انشقت,, بس تخـــر,,

انشقت:أي أصبح بها شق,,والشق هو الفتحه,,

تخر: أي تخر,,!!<<بلشت ماعرفت أشرحها,,!

ويُطلق على المفاضلة بين أمرين,,كل واحد أردى من الثاني,,!

ويحمل نفس معناه العديد من الأمثال,,

منها,,

عويره وزويره,,

العوجا والمنكسره,,

الشبكة تعير المنخل,,

ثالثاً,,

كل ساقطن له لاقط,,

كما جاء على لسان أمي نوره(جدتي),, وأميمتي,,<< الله لايخلين منهم,,

معنى هذا المثل يحوس حول,, أن الشخص الذي يمتلك بعض الصفات الغير كويسه,,

سيجد له يوماً ما من يُعجب بهذه الصفات,,

ويمكن تصنيف هذه الصفات تبعا لعدة اعتبارات,,;)

فقد تكون,,كلية أو جزئية(يعني يا كله شين,,أو نصه شين),, وقد تكون,, خَلقِيه أو خُلقيه,,!

ولي موقف شخصي مع هذا المثل,,

في أحد أيام الويك اند,,في مقلط خوالي,,حيث العائله مجتمعه,, والنقاش هادئ جداً جداً,,<<بسم الله علينا,,

اذا بجوالي يرن,,يخبرني ان احدى صديقاتي تريد محادثتي,,

فرديت,,<<قولي والله,,

المهم قالت لي,,التميميه,,أنا داقه بأقول شي وأسكّر,,

قلت,, تفضلي كلي آذان صاغيه,,!

قالت,,روحي حبي راس أمك,, وقولي لها تسلمين على هالتربية,,<< لا تشرهون عليها,, هي كذا عليها طنّات مادري وش تبي,,

!!

طبعاً وقتها غدا راسي كبر منصور البلوي,,!

وارتزيت عند أمي,, وقلت لها هالحكي,,

فما كان من الوالده الا أن قالت: ايــــــه كل ساقطن له لاقط,,<<ياحليلها أمي تحب تنكّت,,

:p

رابعاً,,

وش علم البقر رقي الطوايا,,

رقي: أي صعود,,

ولغير الناطقين بلهجتي الأم,, الطوايا: جمع طايه,, وهي السطح,,

ويقال عندما يصدر من الشخص فعل أو حتسي لا يتناسب معوه,,

مثل,,المسلسلات السعوديه اللي يجمعون لي خميم,, ويبونهم يتكلمون نجدي غصب,, وتطلع النتيجه,,يالله من فضلك,,<<كأنهم من ربع لقلك شغله,,!!

وبنفس معناه,,

ياشين السرج على البقر,,<<مدري وراهم متسلطين على البقر؟!

خامساً,,

انفكت الهوشه,,وأبونا يتحيزم,,

هذا المثل يقولونه للشخص الباصق,,(أي البارد الكووووول)!!

اللي تطلب منه طلب,, وتحوم تسبدك ماجاك طلبك,,!!

ومثل هذه العينه,,تجدها بكثره في مجتمع السواويق,,

تحول عيونك,, وتروح شهوتك ماجاك الشيء,,!!<<ماهمها الا الأكل,,!!

سادساً,,

يولم العصابة قبل الفلقة,,

يولم: أي يجهّز,,

العصابة,, أي قطعة قماش يلف بها الرأس عندما يصاب بجرح أو صداع بغرض التطبيب,,

الفلقة,,علامة من أهم العلامات التي تميز الطفل السعودي,,وتوجد غالباً بالجبهة <<اللي مو منفلق ينشك بأصلوه,,!!

وهذا المثل عكس اللي قبله تماما,,

يضرب لمن يتزمل ويتحمل لشيء أو لحادث قبل وقوعه,,

مثل أهلي تماماً لاصار عندنا عزيمة وإلا بغوا يسافرون,,!!

سابعاً,,

كلن يحوش النار لقريصه,,

قريصه,, تصغير قرص,,

والقرص هو عجينة دائرية الشكل,,قد تكون خبز,,أو قرصان,,أو مراصيع,,الخ,,!

ومعناه,,إن كل إنسان يبي الخير لنفسه وأهله,,وما عليه من الباقين,,!

هالمثل بالذات ينطبق على ناااااس واجد في الوسط الرياضي,,!!

تخبرون ابن همام يوم يعطي الجائزة لربعه,,!!ويسحب على شلهوبنا,,!

ثامناً,,

خبـر عيدي عندي,,

هو مثل يضرب لمن يتعب على شي,,وما احد يعطيه وجه,,

كأن تتكلف وتكتب موضوع وتزبرقه وتلونه,,

,, وما يرد عليك إلا ثلاثة,, وكلهم يقولون الله يعطيك العافية,,!

والله يستر لاااايصير خبر عيدي عندي على هالموضوع,,!!

*الرشيد,, تُنطق مثل خالد الرشيد لاعب الهلال سابقاً,,

ولا تنطق الرشيد مثل طلال الرشيد (الملتاع )الله يرحمه<<ما ودها تجيب طاري النصراوي أخاف تروح بركة الموضوع,,:p

ختاماً,,

اللي بس يفكر انه يسأل,,ياقف على الجدار ويرفع رجله,,

واللي يهز دميجتوه على انه فاهم وهو ماعنده ماعند جدتي,, له خمسه بونس,,

وووووووووووووووووووووبـــــــــس,,!

f*y*d · #2 01/07/2007, 04:33 AM

موضوعك عيدي عندي..................
هههههههههه لا ترى امزح
مشكووووووووور على الموضوع وتسلم
بس أغلبها اول مرة اسمعها ---------

الهنوووف · #3 01/07/2007, 05:10 AM

هلا وغلا

منزله موضوع انجاز

تنشطتي ونامو الاعضاء

إقتباس


	أولاً,, تصاحبت هيا الرشيد* وأمها,,

اول مر اسمع فيه
ورى ماصار تصاحبت البنت وامها:p

إقتباس


	تخر: أي تخر,,!!<<بلشت ماعرفت أشرحها,,!

يعني ينزل مويه من فتحه صغيره

إقتباس


	ثانياً,, ما انشقت,, بس تخـــر,,

احس مناسبته غلط

يعني احس انه يناسب لمعالجه الغلط بغلط

او اذا جيتي بتشرحين لاحد شي صعب عليه تروحين تشرحين له بطريقه ثانيه اصعب يعني كلهم صعبه

>>>> انطليني برى المووضووع بخربه

إقتباس


	فما كان من الوالده الا أن قالت: ايــــــه كل ساقطن له لاقط,,<<ياحليلها أمي تحب تنكّت,, :p

الله من التحطيم

ذكرتيني بامي تمدح في بنت بالمدرسه ماخذه مثاليه قلت طيب انا كنت جايبه مثاليه بالثانوي وراك ماتمدحيني

انقهرت الصراحه وغرت شوي

يعني وش معنى هي صارت شي خطير

علشانها مثاليه وانا مثاليتن طول عمري

ومامدحتني هالمدح
ايه الله لنا ياميمتي

إقتباس


	انفكت الهوشه,,وأبونا يتحيزم,,

اول مره اسمع فيه

إقتباس


	خبـر عيدي عندي,,

يصلح لي اجل:p

فهمتهاا بس مو كلها نقوله

مدري هي دارجه عندكم وعند الناس كلهم الا حنا

حنا عندنا امثله كثيرة بس ماقلتيها وللاسف اني نسيت وشي

مثل
كل الطرق تودي الى روما
اذا حجت البقره على قرونها >>>مثل هذا

والله مدري

الخ نسيتهم

يعطيك العافيـة وماقصرتي ياميمتي الله يخليك لنا ذخر

وكملي الجزء الثاني

>>>توهقهااا

ود يليق بحضورك

الهنووف

كانت

هنا
وررحلت

لميس الهلالية · #4 01/07/2007, 05:32 AM

حياكِ الله يا التميمية

الله يسعدك على هالشرح الوافي و الكافي

بصراحة اللي كنت أعرفهم من أول هم :
كل ساقطن وله لاقط
يولم العصابة قبل الفلقة
كلن يحوش النار لقريصه

أما الباقين فأول مرة أسمعهم

أنا تعجبني الحكم و الأمثال و أستمتع بمعرفة قصة المثل و ايش مناسبته

بس و الله أحياناً أسمع في المسلسلات أمثال مدري وش تبي بالضبط :p

خصوصاً المسلسلات المصرية مثل " قت الحزينة تفرح مالأتلهاش مطرح "

مشكوورة التميمية و يامال العافية

الكلاسيكي · #5 01/07/2007, 10:09 AM

هــلا فيكـ اختي التميميه ..

نورتي المجلس بموضوعك اللطيف الرئع ..
والحمد لله معطلين .. والاوضاع مستتبه

..

والصراحه انا احب الامثال واحب احفظها .. بس للأسف انسى اقولها في وقتها

يمكن اقولها في الوقت الضايع

إقتباس


	تيــــــــب,,ندحدر للموزوع على طول

ندحدر معك ونفصفص موضوعك ..

إقتباس


	هالهيا وأمها,, مايتوالفون أبـــد

طيب علشان نكون بالصوره . وش سلافة الهوشه

اسألي الراويه :p

إقتباس


	ما انشقت,, بس تخـــر,,

اجل انا اقول زيد اخو عبيد .. ولا ماردى من المربوط الا المنفلت <<يناسب

إقتباس


	كل ساقطن له لاقط,,

صدقت امك

.. كل خير ويجي احد يأيده في خيره <<يرقع :p

إقتباس


	يولم العصابة قبل الفلقة,,

اقولها دايم .. بس اخربها واقول يولم الشاش

إقتباس


	وتوجد غالباً بالجبهة <<اللي مو منفلق ينشك بأصلوه,,!!

اجل انا ينشك بأصولي..يمكن شامي

مافيني فلقه ..

إقتباس


	هالمثل بالذات ينطبق على ناااااس واجد في الوسط الرياضي,,!!

ايه بالحيل .. وبعد بعض الناس يضعون قرارت تناسب فريقهم

إقتباس


	الرشيد,, تُنطق مثل خالد الرشيد لاعب الهلال سابقاً,,

ياقدمك بعد

تذكرت محمد لطف وبربسته

في الختام ..
اشكرك اختي التميميه على الموضوع الخفيف اللطيف الظريف ..
الممتع .. وتم حفظ الامثال بنجاح ..

تقبلي ارق التحايا ..
دمتي بخير

@ ابو عبدالعزيز @ · #6 01/07/2007, 10:13 AM

إقتباس


	إقتباس: ثانياً,, ما انشقت,, بس تخـــر,, احس مناسبته غلط يعني احس انه يناسب لمعالجه الغلط بغلط او اذا جيتي بتشرحين لاحد شي صعب عليه تروحين تشرحين له بطريقه ثانيه اصعب يعني كلهم صعبه >>>> انطليني برى المووضووع بخربه

انا ارى ان شرح الهنوف اصح

زي قولت ما خربته بس كسرته(يتفلسف)

اما هيا الرشيد اول مره اسمع به

على العموم يعطيك العافيه

abu_riman · #7 01/07/2007, 10:42 AM

خبر عيدك عندنا التميمية ...

ضحكت كثيراً عندما قرأت المثل " خلصت الهوشة و أبونا يتحيزم !! "

شكراً على الموضوع الخفيف الممتع و للأمانة وردت فيه أمثال لم أكن ملماً بها كالمثل القائل " تصاحبت هيا الرشيد و أمها " كذلك " وش علم البقر رقي الطوايا "

مطيع · #8 01/07/2007, 10:49 AM

تسجيل حضور

إقتباس


	اللي بس يفكر انه يسأل,,ياقف على الجدار ويرفع رجله,, واللي يهز دميجتوه على انه فاهم وهو ماعنده ماعند جدتي,, له خمسه بونس,,

واللي هو من النوع الثالث اللي فهم واستغرب من بعض الامثال اللي اول مرة اسمعها وخاصة اول واحد

التميمية الله يعطيك العافية

فرانشيسكا · #9 01/07/2007, 10:56 AM

موضوع قمييييييييييل أوي أوي أوي

إقتباس


	السلام عليكم ورحمة الله وبركاته,,

وعليكم السلام ورحمة الله وبركاته ..

إقتباس


	وه بس يازين المجلس بالاجازه,, الواحد يقرا وهو منبسط ماوراه هم

ايه وش عليك .. أنا عندي جامعة

>> محد غصبك

بس لأن يقولون اللي تاخذ صيفي كل سنة تخلص الجامعة ب 3 سنين ونص .. يالله
تسهل علي .

تصاحبت هيا الرشيد* وأمها,,

ماأعرفه

ما انشقت,, بس تخـــر,,

ماأعرفه.. بس في مثل يقال بنفس الحالة ... أتحداك سمعتيه

1- وين رايحة يامطينزة ؟؟ قالت : بروح أتطنز .
والشرح: ياأيتها الفتاة التي يسخر منك الناس أين ستذهبين ؟؟ قالت : سأذهب
أسخر من الناس .

في مثل بعد أتحداك تعرفينه (أبونا عور وطاح عليه المنخل ) والشرح:
والدنا أعور ومهوب ناقص مسيكين وطاح عليه المنخل (اللي هو المصفاة )

وكملت
الناقص .

وعندي مثل أتحداك تعرفينه ( الله يسخر بن كثير لشمة ) يقال إذا واحد يبونه يوديهم
مكان مثلا وهو مو معطيهم وجه .. ولا شمة تحب بن كثير وبن كثير مايجب شمة فيدعون
الله يسخر أخوهم يوديهم السوق .. ويسخر بن كثير يحس بشمة

كل ساقطن له لاقط,,

هذا أعرفه

وش علم البقر رقي الطوايا,,

هذا ماأعرفه بس أعرف المرادف حقه(ياشين السرج على البقر)

انفكت الهوشه,,وأبونا يتحيزم,,

ماأعرفه بس عجبني

يولم العصابة قبل الفلقة,,

أعرفه .. بس في رواية أخرى عندنا تقول ( قبل الفلعة ) أي الضربة .

اللي باقي أول مرة أسمعهم .. ردي ماله داعي طويل صح ههههههه .. سوري
طولت عليك ..

Hilali88 · #10 01/07/2007, 10:58 AM

إقتباس


	السلام عليكم ورحمة الله وبركاته,,

وعليكم السلام ورحمة الله وبركاته

إقتباس


	تصاحبت هيا الرشيد* وأمها,,

مثل البزران يتهاوشون ويتصالحون على طول

إقتباس


	انفكت الهوشه,,وأبونا يتحيزم,,

هذا المثل عجبني

كل أمثالك هواش الضاهر إنك مشكلجية

لا ترى أمزح

مشكورة على الموضوع الجميل والمفيد
بانتظار الجديد

تحياتي

أسيرة الزعيم · #11 01/07/2007, 11:42 AM

موضوع مفيد وممتع جداً جداً

استطعتِ من خلاله إيصال معانِ الأمثال بأسلوب التميمية المميز

جميل أن تكون لدينا خلفية عن أمثالنا الشعبية ..
نعرف بعضها وتعرّفنا على بعضها الآخر ..
" يالتميمية كله كوم وحق أبونا يتحيزم كوم

"

شكراً من القلب لكِ ..

كلك 9 ذوق52 · #12 01/07/2007, 12:27 PM

السـلام عليكـم

أمثـال تـروع بس معـانيها لطـيفـه

أعـجـبـني المثـل : ما انشـقـت بـس تـخـر

أحـس أن المثـل يرجع لأصـول اغـريقـيه

أما ووووووووووووووووووووووووووووووبـــس

عسيريه · #13 01/07/2007, 02:46 PM

هلا وغلا بالتميميه

مآ أفهم بالأمثآل ولا استخدم الأمثآل ابد ومآعندي الا مثل وآحد
كل مآقآلي احد شي أقوله[وآثق الخطى يمشي ملكآ]عآد مدري هو صح ولا لا

أمآ أمثآلك عجيبه أول مره اسمع فيها..بس استفدنآ منها ع الاقل اغير المثل اللي ابلشت النآس فيه

إقتباس


	مثل أهلي تماماً لاصار عندنا عزيمة وإلا بغوا يسافرون,,!!

وربي نفس الحآله مدري ليش اذا جينآ نبي نسآفر أو عندنآ عزيمه يصير بالبيت حآلة استنفآر

مره شكرآ يالتميمه ع الموضوع والامثآل بستخدمها من اليوم

مع التحيه

الهلالي دائماً · #14 01/07/2007, 05:06 PM

هلا وغلا بالتميمية ..

ذكرتيني هيا الرشيد وأمها الله يصلح قلبك ;)

على فكرة تارني إلى اللحين حاقد على ها المثل

من جد ذاك اليوم انفقع مخي من كثر التفكير فيه هههههه

وماشاء الله عليك اختي التميمية من جد مبدعة ..

ومثل ما قلت الأمثال جميلة وخفيفة وسهل حفظها

وغير كذا تجي في الصميم طبعاً إلا مثل مها ;)

ما تطبق عليه هذي الموصفات ...

وبصراحة ماشاء الله على اميمتك سددت لك مثل في الصميم

هههههههههههههههههه

وأنا في ثلاثة أمثلة سوقها شغال معي ودايم أقولها

وبسدحها هون في موضوعك ...

1- حشفاً وسوء كيلة

يضرب لمن جمع بين خصلتين ذميمتين

2- على نفسها جنت براقش

يضرب لمن ورط نفسه بنفسه

3- كل إناء بما فيه ينضح

يضرب لمن يتكلم بالسوء ويتهم الناس بالسوء وهو فيه

والله يعطيك العافية أختي التميمية ..

ودمت بحفظ الله ورعايته ,,,

التميميه · #15 02/07/2007, 08:51 AM

حيا الله هالوجيه السفره,,

f*y*d,,

ياهلاااا,,

إقتباس


	موضوعك عيدي عندي.................. هههههههههه لا ترى امزح

يعطيك ألف عافيه ع المرور,,

حياك الله,,

الهنوووف,,هلااااا هنيف,,منوره,,

إقتباس


	منزله موضوع انجاز تنشطتي ونامو الاعضاء

الحين أنتي زعلانه والا مبسوته اني منزله,, ;)

أنا أشوف ان المجلس متحرك,,

إقتباس


	ورى ماصار تصاحبت البنت وامها

مدري,,هي انتشرت كذا,,

زي عين أم صالح,,

إقتباس


	يعني ينزل مويه من فتحه صغيره

وين ابن منظور عنك,,!

إقتباس


	احس انه يناسب لمعالجه الغلط بغلط

شوفي ,,هي مفاضله,,أو معالجة,, أو مقارنة,,أو تبديل شي شين بشي شين,,!!

كلها تصلح,,

مثل يوم رجعوا باكيتا بعد سيرزو قلنا ماانشقت بس تخر,,!!فهمتي,!

إقتباس


	الله من التحطيم

هذي دعابه الله يصلح قلبك,, وليست تحطيم,,<<برادايمها دايم يحسن الظن بأمها,,

<<غصب عني

إقتباس


	حنا عندنا امثله كثيرة بس ماقلتيها

ودك لو أقول كل الأمثال اللي يقولونها أهلي,,

عشان أنصك بتوقيف مؤبد,,

إقتباس


	وكملي الجزء الثاني >>>توهقهااا

ترا ماشفت هالجمله,,;) :p

عوااااافي على هالحضور المميز,,

حياك الله,,

لميس الهلالية,,

ياهلااااا والله,,

منوووووره يابعدي,,

إقتباس


	خصوصاً المسلسلات المصرية مثل " قت الحزينة تفرح مالأتلهاش مطرح "

يعني يافرحه ماتمت,,سح,,!

الأمثال المصريه رهيبه,,تجي مصفصفه,,

حياك الله خيتوووو,,

الكــلاسيكي,,

هلاااااا فيك أخي الكلاسيكي,,

إقتباس


	نورتي المجلس بموضوعك اللطيف الرئع .. والحمد لله معطلين .. والاوضاع مستتبه

الله يسلمك,,

نورك ونور الحاظرين,,

أما العوووتله,,أكوس شي في الحياة,,

إقتباس


	صدقت امك .. كل خير ويجي احد يأيده في خيره <<يرقع

ايه,,صرفها,,!!

ماتترقع أبد,,

إقتباس


	اجل انا ينشك بأصولي..يمكن شامي مافيني فلقه ..

وش عنده غســـــــان,,;)

كلاسيكو,, قلت الطفل السعودي,, مو الشايب,,:p

إقتباس


	اشكرك اختي التميميه على الموضوع الخفيف اللطيف الظريف .. الممتع .. وتم حفظ الامثال بنجاح ..