مشروع طباخه (فاشلـــــــه) .... - نادي الهلال السعودي - شبكة الزعيم

~بنت الزعيم~ · #1 24/06/2007, 11:53 PM

مراحب
عدد ماردد لساني عشقكـ يالرياض
وعدد من زار مكه ومن زمزم ارتوى
مراحب
كثر حنان أمي علي وكثر مافاض;)
وكثر ماشويت لحم الدجاج ومااستوى

من الحماس اللي فيكم وكل اشوي واحد منزل موضوع عديتوني وخليتوني انزل موضوع

مع اني ما كان فيني حيل
انزل موضوع وحاله بس يالله قلت خلني اصير مثلهم وتهورت :p ونزلت لكم هالموضوع ...

مشروع طباخه فاشله

هلا وغلا بكل اخواني واخواتي ..
عاد اليوم ابي اغير طريقتي اشوي عشان محدش يقول إني حزينه

ومواضيعي تجيب الكآبه << ابد ما اقصد احد;)
لي اسبوع وانا اقول ابي اسوي ايسكريم عشان الاجواء تخبرون صيف يعني هووت

وعاد ما خليت احد الا قلت له
وانا كل ما قلت لحد انواع الطنازه والتحطيم

.. ووحده من خواتي
اتقولي صلحي الشاي بالأول واعرفي كيف اتصلحينه زين وبعدين
ادخلي بالعميق وجربي لين تتقنينه بس تكفين لا تجربين
فيني ولا بعيالي لان لوجربوه بنروح المستشفى على طول

عاد انا ارتفع ضغطي من كلامهم وقررت ادخل المطبخ

بس بشرط إني ما اشوف ولا واحد قدامي عشان ما يعكرون مزاجي

واخرب الطبخه << مسميه الايسكريم طبخه الله يخلف

عاد قلت لهم اللي بالشيف نجم موب احسن مني :p ..
والميدان يا حميدان بس من غير لجنة تحكيم خايفه من الهزيمه

وجاء اليوم اللي دخلت فيه المطبخ عشان اضبط الايسكريم
واحرهم مثل ما حروني .. كان كل اللي بالبيت نايمين << لاني
مسويتها بالليل 12 بتوقيت الرياض

ومحدش صاحي إلا انا واختي عاد ان صرفتها وقلت لها
مسلسل إنتقام الورده بدا روحي شوفيه وبعدين قوليلي وش صار فيه
<< انا ما احبه بس ابي اصرفها

بهالوقت انا استانست واخيراً استفردت بالمطبخ بلحاله

ومير اشمر اكمومي وكأني داخله هوشه موب مطبخ
وقعدت لحالي وجهزت كل شي وكنت متحمسه << يا حليلي بس

واخذ المقادير كلها من الجوال لأني كنت كاتبتها فيه << امحق طباخه
عاد انا من كثر الحماس جبت المقادير ونسيت الطريقه

وقمت حطيتها كلها على بعض << ما عندي وقت:p
الايسكريم اشوي يكون جامد واللي سويته طلع سائل
يعني مثل العصير واللي قاهرني إني ما استفدت من الحوسه هذي كلها
شي بس خربت المطبخ على الفاضي

.. والله تعبت ذاك اليوم تعب لا يوصف
المهم ان الطبخه افشلت بس الحمد لله محد درى عني ;)
يعني سترت على نفسي عندهم وفضحت نفسي قدامكم

عاد كنت اسأل نفسي كيف الشيف رمزي قدر يتحمل المطبخ
لين صار طباخ رائع ..؟؟<< الله ياخذ ابليسه كل ما اشوفه اتحطم

لان الطباخ تعب ويبيله صبر وانا امل بسرعه وما احب اعيد الطبخه لين اتقنها

..
ما اقول إلا يا زين الاندومي والبيبسي وبس

...

قبل الخروووووج
الف مبروك لكم كلكم الاجازه والنجاح واللي ما نجحوا بيعوضونها بإذن الله

..
ودمتي بكل خير وسعاده ..