ـ=+=ـ زحيفونيات ـ=+=ـ - نادي الهلال السعودي - شبكة الزعيم

واحد زاحف · #1 21/06/2007, 06:34 PM

يالله حية .. بعد غيبه طويله عن ظغطه زر ( اضافه موضوع )

هذاني اعود اليكم انا وخشتي الجميلة ..

في موضوع مشكل مثل مجلتي زحفونيات بس انها مصغره مايكرو شوي

>> شعنده الفلسفجي :p

اول فقرة موضوعنا المشكل الخفيف ان شاء الله

هي الافلام والسينمات ;) . من قلب لبنان ! ،،
ثاني فقرة عن مطعم فرايديز .. من قلب لبنان ! ،،
ثالث فقرة لفته شعرية .. من وسط الدفاتر ! ،،
رابع فقرة لفتة فوتغرافيه ،، من دبي ! ، ،
ـــــــــــــــــــــــــــــــــــــــــــــــــــــــــــــــــــــــــــ

افلام وصالات السينما ! ..

في وسط بيروت فيه خيارين لأفضل صالات عرض افلام..

* صالة افلام ABC

في منطقة الأشرفية ..

اللي فيها 7 صالات سينما ..
طبعا كل يوم خميس ينزل فلم جديد ..
طبعا ً عروض الساعه الاولى تكون 4$ ..
والبقية ب 6$ ..

اول يوم جيت كان في فلم موجود واليوم الثاني لا ..

عاد قلت مابدهاش نصور لكم الثتنين ..

برضوا التصوير ممنوع بس عاد انا فليتها <<< حس انه ارهابي من كثر مايصور :p ..

اول فلم كان ..

Spider Man 3

مدة الفلم ساعتين وعشرين دقيقة ..

بصراحه الفلم مثل باقي الاجزاء روعه وحلو وموب شين ابد >> مابقى شي وقلته هههههه ..

ثاني فلم شفتة .. في نفس الصاله طبعا ايام مختلفه بس ابحطهم سوا .. طعبا ً قصة الفلم معروفة ومايبي لها زياده حكي ..

ملف تورنت للفلم ..

Shooter

نوع اكشن ودراما
هذا الفلم الخيال .. صدق روعة روعة ..
فلم عن قناص كان في الجيش يحارب وتصير له احداث وتقلبات رائعه في الفلم ..
مابي اخرب الفلم كقصه بس ينمدح من جد ويستاهل الواحد يشوفة ..
مدة الفلم ساعتين و آربع دقايق ..

ملف التورنت للفلم ..

Blades Of Glory

نوعه كوميدي ..
قصته غريبه جدا ً .. اثنين كانوا يتنافسون في اولمبيات التزحلق ع الجليد ..
بعدين تصير احداث وينمنعون من المسابقه للآبد بس يستغلون نظام في الاولمبيات ونظام من قرار المنع ويصيرون يتنافسون مع الفرق الثنائية ..
الفلم هبال صراحه ويضحك انصح فيه

..
مدة الفلم ساعه وثلاث وثلاثين دقيقة ..

ملف تورنت للفلم ..

Disturbia

نوعه : مثير ههههه فيه رعب حبتين ..
قصه الفلم ان ولد يكفخ مدرسه ويعاقب من الشرطه ويفرض عليه ان مايطلع من بيته شهر ..
عاد تصير احداث من الزهق يقعد يراقب الناس ويشوف ويكتشف اشياء عجيبه في حيهم ..
فلم بصراحه روعه والممثل من جد فاجأني لانه كان يمثل كوميدي وبصراحه اجاد الدور ..
الفلم مدتة ساعه واربع واربعين دقيقة ..

ملف تورنت للفلم ..

طبعا ً هذه الافلام اللي شاهدتها .. في صالات Abc ..

* صالات الكونكورد

واللي تصير في شارع فردان..
طبعا فيه 8 صالات عرض ..

تقريبا ً نفس اسعار الاى بي سي ..

اظغط هنا تشوف صوره بانوراميه كبيره

.. وشفنا فيه فلم

دخلنا الصالة وصورتها ..

عاد حبينا نشوف فلم ..

Taxi 4

فلم فرنسي بس مدبلج ..
الفلم مجموعه من سلسله افلام وبصراحه كلها حلوة وخفيفه ..
فكره الفلم ان واحد راعي تكسي مظبط سيارته يوصل الناس باسرع وقت ..
ويعرف واحد يشتغل في الشرطه ويساعدهم احيانا ً .. في حل قضاياهم ..
مدة الفلم ساعه وواحد وثلاثين دقيقة .. نوعه كوميدي ..

ملف التورنت للفلم ..

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ ــــــــــ

Fridays

مطعمي المفضل ،،
يقع في وسط العاصمه اللبنانيه
بيروت - السولدير ،،

طبعا ً صوره الشخص هذا معروف ،،
للي يجي لبنان ع الاقل مره ،،
يصارخ ويخوف الناس ويقول ،،

بيروووووت ،، بصوت عالي ،، وبسرعه ،،
يبيع صور للبنان ،،
طبعا ً لقطته وهو جالس وصورته قلت ماتتفوت ! ،،

عموما ً تابعنا المسير وطلعنا لم البوابة الرئيسيه للسولدير،،

هناك يصير عاد مطعمي المفضل ،،

هنا الصوره اللي هي الطريق المؤدي الى المطعم اللي تقريبا ً ،،

يصير اخر الشارع ،، هذا ،، ع اليسار ،،

وهنا اذا مشينا شوي وخلينا المطعم في ظهرنا ،،

وعقب المشي الخفيف والاستمتاع بالجو الحلو والهادي ،،

وااااه اخيرا ً وصلنا ! ،،

طبعا احنا رحناله الليل قبل وقالوا لنا مسكر خلاص

..
صراحه تحطمت وقلت لازم اروح بدري واسوي تقرير بعد ،،
لانه من المطاعم المفضلة عندي وبقوه بعد ! ،،

بس الحين لا المطعم مفتوح

طبعا ً دخلوا الشباب الي معي وانا صورت واجهه المحل ،،

ودخلت انا وسلمت على مدير المطعم !
طبعا ً من كثر ماسنتر هناك ،، اعرفهم كلهم >> طيب درينا انك اوكيه الحين

واللي زف لي خبر فتح مطعم فرايديز في الخبر ! ..
طبعا ً مايدري وين بس يبي لنا ان رحنا الخبر نحبرش عليه !..

بعد السواليف والتصوير والاستئذان ،،
المنيو ! ،،

خل نبدا في المشروبات الحين عشان نسترسل ع الاكل ! ،،

كالعاده كل مااجي فرايديز اطلب

Electric Lemonade - non alcoholic

طبعا مكون من ليمون وشي ثاني بلون ازرق ،،
طبعا روعه طعمه وتقريبا ً حامض بس بشكل معقول ،،
وخويي خذا مثل طلبي لاقتناعه به مسبقا ً ..
>>> ماخليت احد يدخل فرايديز الا ويجربه

المشروب الثاني ،،
المفضل لأخوي ،،

Pine Apple Sun Shine ..

مكون بشكل اساسي من الاناناس ،،
والباقي مااعرف لنسيان اخوي باقي الخلطه

،،

طبعا ً للمقبلات كالعاده يجي الخيار الأفضل اللي يصير Sharing ! ..

Three 4 All ! ,,

واللي مكون من التشكن وينقز و اصابع الموزيرلا ..
و البطاطس المشويه وعليها الجبنه والحركات ،،

والخيار الافضل مكرر لي بعد

..

Boneless Buffalo Wings ! ,,

دجاج بدون عظم >> باللهي ،،
وعليه صووووص

هي كل الحكايه في الصوص حقه ،،
داهيه ،، !
الطبق هذا ينصح به اللي يحبون الاكل الحار ! ،،

صوره للجلسه بشكل بانورامي ،،

بعد المقبلات و المشروبات ! ،،،

يجي الأختيار لل Main Course

Chicken Mushroom & Mushroom ..

هذا الطبق ينفع للي يحبون الدجاج والفطر ،،
طبعا هي مكونه قطعه صدر دجاجيه

.. ومغطاه بالجبنه و الفطر المقطع ،،
و قطع فطر كامله ،، وحسب اختيارك فرنش فرايز او ماش بتيتو ،،

طبعا انا واخوي طلبنا الطلب هذا نفسه ،،

و الطلب اللي طلبه خوينا

،،

New York Steak ..

مكون من قطعه لحم ،، وبس ،، >> امحق شرح ،،
طبعا لك الاختيار في درجه استوائها ! وسط شوي ممتاز ..
كانك ماتحب تشوف دم جوا اللحم يفضل well done ,,
الا كانك شرس وتتحمس وتحس نفسك داركولا اطلب Medium Well ,,
..

بعد ماخلصنا الاكل من هالاطباق الشهيه ..
والله اعلم شلون طبق خوينا

..
قلت ابد والله ان نحلي وغصب بعد ،،

مب كل يوم احصل فرايديز

انا ههههههه ،،

Desert ! ..

طلبنا الطلب اللي احبه انا كالعاده >> وانت ماخليت شي ماتحبه يكفي ،،

طاح اختيارنا على ،،

Oreo Madness ..

Single ,, لان طبعا يجي دبل !! بس بطونا مهب صوامع غلال عاد ! ،،

هذا هو شكله من جد يسطل وانا اكتب الحين اشتهيته ! ،،
مكون من بسكوت اوريو فوق وتحت ووسطه ايس كريم فانيلا اظن ،،
ومغطي بالكراميل ،، ووووووه بس ،،

عاد هذا شكل الصحن عقب ماقضينا عليه وفرمناه فرم ،،

بعدها طلبنا الحساب ! ،،،

طبعا ً وانا اصور الحساب نسيت الفوكس من الاستعجال ،،

بس عمو فوتشوب ساعدني شوي ،،

وسامحونا عاد على عدم وضوح الصوره ..

طلعت عليها كل هالحوسه ،،،

بمبلغ 137.000 ليرة لبناني ،،
مايعادل 91,33 $ ..

اللي على عملتنا تصير 342.5 ريال ،،

طبعا بعد الحساب نزلوا لنا حبوب نكهه حقت الفم ومناديل معطرة ،،

وان شاء الله اكون وفقت في تغطيه مطعمي الافضل
،

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــ ـــــــــــــــــــــــــــــــــــــــــــــــــــــ

ثالث ثانوي

بس ان كل من جرب طعم ثالث يشتاق لها ولايامها

ايام ماتنسى طول العمر ،،

وحفل التخرج

،، وايام الاختبارات والضغط النفسي ..

كل هذه ايام اشتقت لها بصراحه ،،

وايام من احلى مراحل العمر >> ياكثرك ..

الله يوفقكم يجيب النسبه اللي تبونها..

شد حيلك وادع ربك والله يسهل لك ..

بالنسبه لي ثالث كانت ادج سنه في مرحلتي الدراسيه ..

الله يخلف علي وعلى استعدادي صراحه .. ;;)

كانت فقط رياضيات وكيميا وفيزيا وبس ! خخخخخخ والباقي بيومه ،،

وحتى اخر يوم سحبت عليه بحكم اني زهقت >> ياحبي لك انت ونظرياتك ..

عاد كان كل تحمسي في تصميم احطه ع السياره من ورا ،،

بحكم الفرحه ذاك اليوم لازم اشارك الفرحه مع الشعب ..

:p كانت فرحتي لاتوصف عاد ابدا ً ،،

حسيت لأول مره بشعور الفضاوه التامه.. !

ههههههههه يحلفون اول واحد طالع من القاعه انا ! ..

عاد ايام وحبيت اجيب طاريها واشاركها معكم ،، !

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ ـ

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــ ــــــــــــ

لفتة شعرية ..

على كثر القصيد

على كثر القصــيد.. وكثر ماجـــاب الخـيال أفـكار
........................... تعبت ومالقيت الا ثمان أشياء تشبه لك
نور الشمس.. لون الغيم.. طهر الما.. وصمت النار
........................... لين الورد فجر العيدملك وانسان ياسهلك
واذا صار العـنا رحـله.. با ســمـيك آخـر المشــوار
........................ واذا صارالبخل عمرالجزايل فاسمك المهلك
تجـين أحلى من البشـرى تغـيـبـيـن وتـشـيـن الدار
......................... هديه للزمن جيتي من الله عن طريق أهلك
صـحيـح المـدح لويقـدر يـقـوم بـنفـســه ويخـتــار
...................... غـدا عـبّـاد شمس ٍ لا لمـح زولـك تـوجّـه لـك
غيـوض وما يغيـض الـنرجـس الا ضـحـكة النــوار
......................... "نعم" والجود لو يفنا فنا من زود حبهلك
ضيـا تسعـين شمس وألـف بدر ونجـمتـين كبـــــار
.......................... آخـاف اقـول ظلك و أظـلمك والعز كله لك
ورثتي مجـد ابـوك وجـاك "منهو" زبنة المنـجار
..................... أبـو خـيريـن.. دماح الخـطا.. والعمـر مده لـك
وأنا وش عاد أقول ان صرت في وصف الغلى محتار
.................. شعـور ٍ ماقـدر ياصـل سـمـاك.. وقـلت أزمّه لـك
وعلى كـثر القصـيد وكـثر ماقـلـنا من الأ شــعــــار
...................... تعـبت ومـا لقــيت إلا ســموّك بـس يشـبهـلـك

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــ ــــــــــــــ

لفته فوتغرافية ..

صورة للمبدع يزيد الغريبي ..

اسماها : ( عندما يرسم الحلم ) ..

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ ــــــــــــــــــــــــــــــــــــ

في الختام عاد ان شاء الله نكون رجعنا لو شوي من ذاك الزمان

،،

زمان المجلس العام المتحرك

الي كانه اسهم السعودية من كثر حركتة :p ..

فمان الله

وصوتوا لمرشحكم

واحد زاحف ،، :p ..

اورفوار

الكناري الأزرق · #2 21/06/2007, 06:43 PM

السلام عليكم و رحمة الله و بركاته ..

هلا بـ واحد زاحف ..
يلعن ابليسك انت و هالاطباق , حسسّتني اني اكل مقلب انا و هالمطازيز و القرصان

إقتباس


	مدة الفلم ساعتين وعشرين دقيقة .. بصراحه الفلم مثل باقي الاجزاء روعه وحلو وموب شين ابد >> مابقى شي وقلته هههههه .. ثاني فلم شفتة .. في نفس الصاله طبعا ايام مختلفه بس ابحطهم سوا .. طعبا ً قصة الفلم معروفة ومايبي لها زياده حكي .. ملف تورنت للفلم ..

انا اذكر ان الفلم عشان تحمله لازم تنزل برنامج حجمه كبير جدا ..
هالرابط يحتاج نفس الشغله العويصه ؟!

=====

سؤال ..
الان وش موديك لـ لبنان ؟
الدنيا حرب .. و انا شاك انهم شالوك للسفارهـ الامريكيه يحسبونك مواطن امريكي انت و هالكشره

اذن المغرب

<<=== اول ره يفرح بالاذان .. عالاقل لقآ عذر يوقف الرد

و الله يا واحد زاحف تعبت مدري وش جاني ماني قادر اكتب حرف واحد

برب

هلالي2008 · #3 21/06/2007, 06:46 PM

//

بـااااك

..

هـلا والله بـ ثـااامـر

..

.. \\

إقتباس


	Spider Man 3 مدة الفلم ساعتين وعشرين دقيقة .. بصراحه الفلم مثل باقي الاجزاء روعه وحلو وموب شين ابد >> مابقى شي وقلته هههههه .. ثاني فلم شفتة .. في نفس الصاله طبعا ايام مختلفه بس ابحطهم سوا .. طعبا ً قصة الفلم معروفة ومايبي لها زياده حكي ..

خطيييـر الفلـم

..

إقتباس

منـّك لله

..

إقتباس

إبـداااع

.. ماشالله عليـه

..

إقتباس


	فمان الله وصوتوا لمرشحكم واحد زاحف ،، ..

مـا عليـك

.. بـإذن الله الفـوز لـك يالأطخـم

..

إقتباس


	اورفوار

بـون نـوي

..

.. //

عـوااافـي ثـاامـر

..

وكثـّر لنـا مـن زحيفونيـّاتك

..

\\

مطيع · #4 21/06/2007, 06:47 PM

واحد زاحف

هلا وغلا

اسفرت وانورت

عودا حميدا دسما ما شاء الله

بس بصراحة يا انا شيبت يا الخط صغير

على العموم الف شكر على زحفانك المنوع هذا

ابو طـــــلال · #5 21/06/2007, 07:02 PM

شكرا لمرشحي الاول ... زاحف ...

مجهود رائع منك .. بس جتني الصيحه يوم شفت هالصور .

. وصور سياحتنا الداخليه ؟؟ ماعندنا غير المراجيح نصورهن ...:

يعطيك العافيه .. وكان عندك معلومات عن بلدان ثانيه هاتها لو سمحت .. والا ترى اسحب تصويتي

ههههه

واحد زاحف · #6 21/06/2007, 08:41 PM

إقتباس

الرسالة الأصلية كتبت بواسطة الكناري الأزرق


	السلام عليكم و رحمة الله و بركاته .. هلا بـ واحد زاحف .. يلعن ابليسك انت و هالاطباق , حسسّتني اني اكل مقلب انا و هالمطازيز و القرصان انا اذكر ان الفلم عشان تحمله لازم تنزل برنامج حجمه كبير جدا .. هالرابط يحتاج نفس الشغله العويصه ؟! ===== سؤال .. الان وش موديك لـ لبنان ؟ الدنيا حرب .. و انا شاك انهم شالوك للسفارهـ الامريكيه يحسبونك مواطن امريكي انت و هالكشره اذن المغرب <<=== اول ره يفرح بالاذان .. عالاقل لقآ عذر يوقف الرد و الله يا واحد زاحف تعبت مدري وش جاني ماني قادر اكتب حرف واحد برب

الكناري الازرق ياهلا حياك الله

شف بالنسبه لملفات التورنت لها برامج تنزلها ايه نعم بس حجمها كبير ماظينت ولله :p
وفي منها Azureus هذا اللي استخدمه انا

..
انا رايح لبنان قبل شهر :p لاتخاف انا بالديره وماعلي خوف ان شاء الله

يالله احتريك عقب ماترجع وسلامتك يابعدي

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ ــــــــــــــــــــــ

إقتباس

الرسالة الأصلية كتبت بواسطة هلالي2008


	// محجـوز ولـي بـااك يالأطخـم .. \\

حياك الله :p نحتريك

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ ــــــــــــــــــــــ

إقتباس

الرسالة الأصلية كتبت بواسطة مطيع الهميمي


	واحد زاحف هلا وغلا اسفرت وانورت عودا حميدا دسما ما شاء الله بس بصراحة يا انا شيبت يا الخط صغير على العموم الف شكر على زحفانك المنوع هذا

هلا اخ مطيع حياك الله ، ،

الله يخليك حنا مارحنا عشان نرجع ;) ،،

الله يعافيك اهم شي عجبك والحين الخط صار اكبر

..

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ ــــــــــــــــــــــ

إقتباس

الرسالة الأصلية كتبت بواسطة ابو طـــــلال


	شكرا لمرشحي الاول ... زاحف ... مجهود رائع منك .. بس جتني الصيحه يوم شفت هالصور . . وصور سياحتنا الداخليه ؟؟ ماعندنا غير المراجيح نصورهن ...: يعطيك العافيه .. وكان عندك معلومات عن بلدان ثانيه هاتها لو سمحت .. والا ترى اسحب تصويتي ههههه

هلا هلا

الله يخليك مصوتي الاول ،،

هههههههه سياحه داخليه ميح انا صراحة ياخوك ..
شيل كاميرا بينهم وشف النظرات اللي تقل ذابح احد

ابشر منب مقصر لاتخاف

..

لي ريووووس

الهنوووف · #7 21/06/2007, 07:09 PM

هلا والله بواحد زاحف

حمستني انزل هنوفياتي

فقرة االاولى بطمرهاا بس تراني قريتها وتحمست بس مالي فيها

جلست اتامل نصف ساعه

مدري ليه استغربت الليمونه الي موجودة

وعجبني لون العصير
اذا ماعليك امر جيب لي واحد وسجل على حسا ب الزعيم

امممممممممممممممم

ابي بعد هالطبق

بس ماحب الفطر

ولااحب الشي الحار

>>>وش تحبين
يمدحون البطاطس

ابي واحد
شكل طعمـة حلووو

بالعافيه

ايه والله باي باي
ذكرونا بالـعام ياشين ذيك الايام بس حلوة

>>>شعور متناقض

حسي العـام كان فيه اكشن مدري ليه اكثر من هالسنة مدري لاني كنت بثالث

او لان الاسئله صعبه

إقتباس


	على كثر القصيد

اعجبتني

وين هالصورة التقطت >>> شوفي واسكتي

ماشاء الله عقبال ماصير المصوراتيه الهنوووف

متالق يايزيد زرت موقعك

فصفصته

عوافي اخوووي ونتمنى عودتكـ كما كنت في زمن سابق

ترى مجلسنا يستاهل

وماشاء الله المنتدى الحين متحرك شد حيلكـ معانا

اثاري التصويت يرجعكم

وينك يابوطلال من زمان

ود يليق بقلمكـ

الهنوووف
كانت
هنا
ورحلت

واحد زاحف · #8 23/06/2007, 03:00 AM

هلالي 2008

ولكم باك مان

..

هلا والله بعبادي :p

خخخخخ لاتدقق واجد وانا خيك

بعدين تراه موجود في الخبر لاتدعي علي

اي والله ماشاء الله عليه

..

ههههههههههه نقول ان شاء الله >> للحين في امل

..

ــــــــــــــــــــــــــــــــــــــــــــــــــــــــ

الهنوووف

هلا والله فيك وحياك الله ..

نزليهم الاجازة نزلت

>> مكافأه موب اجازه ههههههه ..

اطمري اللي تبين :p ..

ههههههه الليمونه لها طعم هو حامض العصير تقريبا ً فيه شوي حموضة ،،

خلاص بجيب لك المره الجايه

..

عاد الطبق من اسمه كله فطر بس موب حار عادي يعني ..

هههههههه يازين ذيك الايام خلِ عنك بس

الصوره التقطت في دبي

ايه ياحبي له طالع(ن) علي هههههه ،،

ان شاء الله ..

والمجلس ماعليه كلام يستاهل اي والله ،،

لا موب التصويت صدقيني

..

تسلمين ع الرد ،،

ــــــــــــــــــــــــــــــــــــــــــــــــــــــــ

&هلالي منذ مبطي&

.....................

ــــــــــــــــــــــــــــــــــــــــــــــــــــــــ

اليورانيوم

هلا هلا حياك الله يالكيماوي القوي

..

كبرناه يابعد حيي خلاص والله كبرته

..

هههههههههههه لا لا تتحمس واجد كلها تصويت

..

الله يرجك هالركبه البيضا بعد ذابحه ناس واجد :p .. >> انقلع بس

شاكر لك ردك

..

ــــــــــــــــــــــــــــــــــــــــــــــــــــــــ

مستر دلخ

هلا والله حياك الله اللي ماخذ التصويت كل الصفحات :p ..

ههههههه وانا قاعد ع بنك لا ياحبيبي نفسي نفسي >> انقلع بس مسوي كريم

خل عنك والله ياهو مروق هالانسان بصراحه ابتسم كل ماشفته ولاتسألني ليه

..

عاد هالصحن حق الدجاج اعشقه عشق

اشتقت له ياشيخ

..

فرايديز هو الي يفتح النفس ياشيخ وه بس :p ..

بطل هالحلى المطعم الوحيد اللي اكل فيه من أ الى ي ! ،، فرايديز

،،

بس انه متعب هالحلى قاسي الا شوي عشان تاخذ ملعقه ههههههههه

الله يخليك مرورك اروع اخوي دلخ

خخخخخخخ لا خل عنك الكاتم ماتكرهه ابو رز احمر :p ..

الله يخليك وتسلم ع مرورك ،،

ــــــــــــــــــــــــــــــــــــــــــــــــــــــــ

mo7amy

ههههههه مدراس الرياض مدراس الدف بالظفر والبوز وكل شي

.. >> يعرف نص مدرستكم

..
ايه يالسولدير وبيروت اي والله ايام

..

حبيبي لا والله منب في الجامعة الامريكية

بس اني ازور لبنان بشكل شبه دائم ..

حياك الله وتسلم ع الطلة ،،

ــــــــــــــــــــــــــــــــــــــــــــــــــــــــ

!!هلالي الرس!!

ايه حياك الله

ــــــــــــــــــــــــــــــــــــــــــــــــــــــــ

ملـــــ الهلال ــــك

الحمدالله وش دخل يعني استأذنت منه وصورته ..

ومنب مصور شي عيب ترا لاتتحمس الله يهديك :p

شاكر لك مرورك ، ،

ــــــــــــــــــــــــــــــــــــــــــــــــــــــــ

hilalemooot

وعليكم السلام هلا اخوي حياك ،،

الله يخليك مرورك المميز ، ،

لا والله موب عشان التصويت بس يعني قلت ليه مانستفيد ونحطه في اخر الموضوع

التوقيع بلحاله يكفي للتصويت ;) ، ،

امين يارب وجميع البلدان العربية ،، والاسلامية ،،

الفلم بصراحه مابي اكثر كلام عنه بس انه يستاهل انك تشوفه ،،

وانا صراحه شايفه اكثر من خمس مرات ولا امل منه ،،

ايه يايام الثانوي ووش اقول ووش اخلي بس

،،

بن سعيد اللي كاتبها وصح بدنك ولسانه

،،

والله مهضوم حقها بس عشان رابح مغنيها

،، بس انها قوية جدا ً ،،

ههههه صححناها ولا تزعل

الله يعافيك وتسلم ع الرد ،،

ــــــــــــــــــــــــــــــــــــــــــــــــــــــــ

leo messi

ههههههههه الله يرجك اجل انا وش اقول ،، >> يموت في هالصحن من جد

الله يخليك تسلم اهم شي حاز ع اعجابك ..

ابشر بقولك بس خلك جمب البيجر عشان تعرف

،،

ولاتقول تراك ماعلمتني

,,

تسلم ع المرور ،،

ــــــــــــــــــــــــــــــــــــــــــــــــــــــــ

بربون

&هلالي منذ مبطي& · #9 21/06/2007, 07:42 PM

(,..............)

Y A S E R · #10 21/06/2007, 07:44 PM

هلا بـمرشح الحزب الجمهوري

ياخي كبّر خطك .. والله لو انك تدفع فلوس !!

طبعاً مافي تعليق إلى ماترضخ لطلباتنا وتكبّر خطك ..

وبالنسبة لـ حملتك الانتخابية .. انا اقترح عليك تحط هالشعار .. << وش تبي

الشعار : نلبي طلباتكم ونجتهد لإسعادكم .. رضاؤكم هو هدفنا .. لسنا الوحيدين ولكننا الأفضل

ترا انا قررت أرد على كل مواضيعك عقب ماشفت الركبة البيضاء

Mr.DL5 · #11 21/06/2007, 08:00 PM

هلا والله بالاطخم اللي اكل التصويت علينا في اخر خمس صفحات ..

المهم هذا حجز ولي عودة ان شاء الله ..

<<< اذن العشاء ..

___________

بااااااك ..

طيب ياخي كان جبت لنا كل واحد صحن ...!!

ابو الروقان يا ناااااااس ..

<<< يخق اذا شاف دجاج بدون عظام مع صوص ..!!

وش ذا المكان الي يفتح النفس ..

قد ذقت هــ الحلى والله ياهو يعطيك جو موب صاحي ..

ياقلبي بس على هــ الحلى ..

___________

موضوع روعة اخوي واحد زاحف ..

ياخي حرام عليك كرهتنا في الكبسة ..

على العموم تلسلم يا حبيب قلبي يالاطخم على هــ الموضوع الي صراحة موضوع من زمان ما شفنا مثله في المجلس العام ..

وبالاخير .. تقبل مروري يالغالي ..

وصوت لــ مرشحكم Mr.dl5 .. للدلاخة العنوان الامثل ..

mo7amy · #12 21/06/2007, 08:06 PM

،

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــ ـــــــــــــــــــــــــــــــــــــــــــــــــــــ

ثالث ثانوي

بس ان كل من جرب طعم ثالث يشتاق لها ولايامها

اياماتنسى طول العمر ،

اي والله ايام ماتنسى ايام مدارس الرياض
ولا السوليدير وايام الشتى والصيف ولا الثلج
ولا اطلق مكان في بيروت(عاليه)

حبيبي (واحد زاحف) شكلك بالجامعه الإمريكيه مع العيال بالتوفيق

!!هلالي الرس!! · #13 21/06/2007, 08:16 PM

أقووووووول والله يأنت ماتشتهي

ملـــــ الهلال ــــك · #14 21/06/2007, 08:44 PM

طيب وين صورتكـ طيب يوم تصو رالي يدخن انا أدري وين مطيفها في جبهتكـ يالأخو

وين تصوره وهو مايقول شي الظاهر أنه ماشك في عمره تقبل مروري يا عســل

ملك الهلال

hilalemooot · #15 21/06/2007, 09:53 PM

السلام عليكم

ماشاء الله تبارك الله .. موضوع مميز .. ويحرك

بس كنّ هالعودة علشان التصويت والا

لبنان .. ماقول الا الله يعنيهم وينصرهم وترجع لبنان زي ما كانت ..

إقتباس


	Shooter

الفيلم هذا بالذات سمعت عنه كثيير .. واضح من القصة ان الفلم روعة .. وان شاء الله يحصلنا شوفتة بهالصيف ان قالها ربي

.. بقية الافلام مالي فيها اهم شي حاجة دراميّة وحبذا لو تكون القصة فيها تعقيد شوي

بالنسبة لأيام ثالث ثانوي .. بالفعل الواحد بعد سنين ان الله اعطاه عمر بيتذكر هالايام .. وراح يتمنى لو ترجع ايام الثانوي يوم واحد .. خصوصاً اذا شاف القرف بالجامعات و الكليات

إقتباس


	وأنا وش عاد أقول ان صرت في وصف الغلى محتار .................. شعـور ٍ ماقـدر ياصـل سـمـاك.. وقـلت أزمّه لـك وعلى كـثر القصـيد وكـثر ماقـلـنا من الأ شــعــــار ...................... تعـبت ومـا لقــيت إلا ســموّك بـس تشـبهـلـك

صح لسان الشاعر ومن كتب هالحروف ولسانك

يازينها بصوت رابح

<--- راح يسمعها :p ..

بس للتصحيح .. يشبهلك مو تشبهلك

يعطيك العافية .. عودة رائعة

فـ مان الله ,.,.,