في احد ايام الرياض الجميله وبعد توقف نتفات الثلج << اولها تسذب
كنت في الجامعه مع اصدقائي الخمسه
محمد ابو جبهه
وتركي الفاقد
وعاصم (مريم الغضبان رجالي)
وسعود النصاب
وعابد لهلبه
وقرروا انهم يسحبون على المحاضره ويطلعوا يتغدون
ولاني كنت على وشك الحرمان فودعتهم وكلي دعاء ان تكون مهابيطه المستشفى الجامعي << وش يقرب له تركي 2000
عدت ادراجي << اضن انها جمع درج حق الدولاب
وفي احد مختبرات العلوم شاهدت بريقا ساطعا ، دخلت بسرعه ابي اشوف الا انعمت عيوني واذاني انسدت وحسيت اني بموووت وغيبت

بعد لحظات مرت بسرعه كانها سنه << كني بديت اخوره
لقيت نفسي على سرير في زنزانه ومعي 7 اشخاص بس الغريب ان بشراتهم غير كانو 4 بشراتهم برتقاليه و3 بنفسجي
وكان موضوع على اذاني زي سماعت الهدفون تغطي اذاني بالكامل ولابس دسوس والغريب ان كل نزلاء الغرفه عليهم هالسماعات وهالدسوس
قمت اتلفت ومستغرب المكان ولان اذاني كانت معرقه رميت الغطا الي عليها ، الا قامو البنفسجيين من اسرتهم ويتبسمون وقربوا مني وقاموا فصخوا دسوسهم وقاموا يحككون خشمي واحد قرب من اذني .. قمت ادفهم

الا اسمع صوت واحد وراهم عرفت انه عسكري من خطوط على كتفه قال اقعد يا وصخ انت وياه وانت يا قليل الادب غط اذانك وقم الضابط يبيك
انا كنت خايف وودي ابتسي وما فهمت شي وخذاني ودخلني غرفه فيها جهاز وشبكوني في الجهاز ((في هاللحظه ذكرت بريزن بريك يوم بيذبحون مايك بالكهرب))
قمت اتشهد واذكر الله واتذكر ايامي وعسى ربي يتوب علي
الا دخل واحد برتقالي له لحيه طويله ومغطي اذانه ولابس دسوس وكان يبتسم
سلم وجلس جنبي
قال وش جايبك كوكبنا يا الارضي؟
قلت وين انا فيه اصلا؟
قال جاوب وش جايبك؟
وهل انت طليعه لغزو الارض لكوكب ثويرين؟
قعدت اضحك لما قال ثويرين الا العسكري الي دخلني يصفقني على راسي لين طارت الهدفون، تغير وجه الضابط ونزل راسه وقال تستر يا ولدي
انا يوم قال يا ولدي بديت اهدى وشيكت على نفسي الا انا متستر وان صروالي المشقوق ما لبسته اليوم
نزل الضابط وخذا الهد فون وحطها على اذاني وقال : قلي يا ولدي وشلون جيت ما اعرف ان في الارض حظاره للدرجه الي تقدر توصل لثويرين؟
قلت اسمع انا مدري وشلون جيت بس بقول لك وش سويت من اصبحت لين لقيت نفسي هنا كودك تفهم وتفهمني
وانطلقت احكي يومي والضابط ما رفع عينه عن شاشه في الجهاز الي قدامي ولما خلصت
ناضرني الضابط بطيبه وقال مسكين يا ولدي انت جيت بالغلط مع الرحله الاستكشافيه لجامعات الارض وانك انتقلت معهم بدون ما تدري
قلت يعني انا برئ وما سويت شي؟ وما راح تكهربوني بهذا وانا أأشر عالجهاز؟؟
قال انت برئ واي كهرب واي خرابيط هذا جهاز متطور لكشف الكذب << صورة البلوي خايف ان هالجهاز يجي عندنا

كل هذا وانا ميت خوف وش ذولا جن والا انس والا وش قصتهم ووش ثويرون
استجمعت شجاعتي وقلت انت الان عرفت الي عندي ممكن افهم وش السالفه لاني ما عاد ادري عن شي << صورة نور وهو يكلم الحكم الاجنبي في بطولة الخليج
قال وش تبي تعرف؟
قلت وين حنا؟ ووش انتم ؟ وليش مغطين اذاني واذانكم ولابسين دسوس ؟ وليش بشراتكم برتقاليه وبعضكم بنفسجي؟
قال حنا سكان كوكب ثويرين وعندنا حظاره متطوره ونقدر نلف كل العالم بسرعه حتى الارض الي تبعد مليارات السنين الضوئيه نوصلها في ثواني وسكان الكوكب الاصل فيهم ان بشراتهم برتقاليه والبعض بنفسجي وهم زي السود الافارقه عندكم << اشوى ان الامين عبد الهادي مهوب فيه والا كان نقلك
اما الدسوس وغطا الاذان فهي عوره لاننا غيركم ، انتم تبدا الاستثاره بالشفايف وتنتهي بالتزاوج الي انت خابره
اما عندنا فالقبله هي اثارة الخشم والتزاوج عن طريق ادخال الاصابع في الاذن
انا انصدمت وطحت عالارض قلت تقصد ان خوالكم الي تو معي في الزنزانه باغين ....... ااااااااااااه
قال باغين ايش ؟ قلت لا ولا شي وانا احكم غطا اذني
قال عموما خلاص احنا بنطلعك وبنحطك في فندق حتى نشوف فرصه نرجعك لاهلك بس لازم تمر تسلم على ملك ثويرين الملك( ذا الثور) وانا بمرك لاني اكثر واحد يعرف عن كوكب الارض وتاريخه واهله وانا اسمي جحيشان

قم يا ولدي اوديك عشان ترتاح ، طلعت مع جحيشان وانا مغير اعدل في الهدفون وخاصه اذا مريت جنب ذا البنفسجيين << صورة صعيدي يقول النار والا العار يا هريدي
طلعنا وشفت شوارع غريبه وعماير طوال وحضاره عظيمه طلعنا ووقف قدام جهاز وكان فيه 900 زر قلت وش هذا قال هذا نبي نطلع لك وسيلة اتصالات زي الجوال عندكم بس وش تبي أي شركه؟
عندنا 900 شركه؟ قلت اسف يا جحيشان بس ما معي ولا هلله
قال ولا يهمك انت ضيفنا واصلا الاتصالات عندنا بلاش تعرف بحكم المنافسه << صورة الملحم وهو يضحك ويعد فلوس الضعوف
قلت اجل ابي رقم تسعه اكيد انه زين
قال صدقت هذا رخيص ويعطونك جهاز بعد
ضغطه ونزل من المكينه جهاز في زر واحد وقال تضغط على هالزر وتقول اسم الي تبي تكلمه وتتخيله ويدق
استغربت قلت حتى لو بنات <<صورة القصبي وهو في الدور القروي المشفوح
قال لا لا احنا يا الثويريين مؤدبيين ما عندنا هالحركات ابدا احنا نخاف الله وثانيا الشاب ما يحتاج هالشي لانه من يبي يعرس كل شي موفر له بيت وراتب وكل اموره زينه لان شعبنا يعمل ويجتهد
مسكني وحط بيدي قرش صغير وقال هذي وسيلة المواصلات
هنا انا قفلت معي قلت شايفني تركي وهو لاكها عرقو تلعب علي
ابتسم ومسك يدي وقال نبي فندق الثيران شوي الا انا وهو قبال الرسبشن وكل هذا بهالقرش <<العلم بحر
قال وش رايك في مواصلاتنا قلت وانا فاق خشتي روعه والا الغشيان في عزه بس اكيد غاليه
قال ابدا عندنا 300 شركة نقل مهوب زيكم << صورة اعلان الخطوط السعوديه "نتشرف بسرقتكم"
وبعد ان حطني في غرفتي وعطاني ريموت التلفزون قال فيه عشر الاف قناة
ابتسمت بكل خبث وانا اتذكر بنقالي في شارع موسى بن نصير واتخيل روعة هالعشر الاف قناة
قال جحيشان لا تستانس كل القنوات تعليميه من الحروف الى اعظم الاختراعات عشان تستفيد منها الاسره مهوب زيكم ااه ونص ومسخره
قلت فيه مسلسلات ؟؟ قال ايه بس كلها تعلم الفضيله والاخلاق الحسنه وتحث على الهمه والتعلم مهوب زيكم قلة حيا ومسخره
سألته والاخبار ؟
قال فيه 3000 قناة اخباريه تنقل اخر المصانع الي فتحت والعلوم الي اكتشفت وحالة الطقس وبس
مو زيكم حروب ودمار وبرامج اخباريه كلها صياح وزعيق
وبعد كل برنامج لازم تتمشكل دولتين مع بعض بسبب البرنامج <<مهوب يدق على القاسم ابد

قلت يا اخ جحيشان ذليت ام جابتني خلاص مهوب تحط كل مشاكل الارض على راسي

شفت في عيونه حيا وجلس يعتذر قلت لا عادي حصل خير
وهو بيطلع قلت ما اشوف عندكم قنوات كوره قال للاسف احنا ضعاف في الكوره ودايم الكواكب المجاوره تهزمنا
وهو ماسك الباب قال بوصي الفندق على كل شي وابخليهم يجيبونك لقصر الملك بعد المغرب بس لا تنسى شغله لازم تجيب بيت واحد تقوله للملك ذا الثور
قلت ابشر بقصيده
دخل ثانيه وقال لا لا هنا عندنا تقول بيت واحد بس عشان ما يمصخ الشعر << صورة خلف وهو يتفلت في الجنادريه
قلت خلاص ابشر البيت امره سهل
طلع وجلست اقلب في القنوات الممله الي فيها كل علوم البشر والتفت والقى رف مليان كتب والقى جريدة الثور الكبير واجلس اقرا الا كلها افتتاح مصانع واكتشاف علوم وافتح عالصفحه الاقتصاديه واحصل مؤشرهم صافق 80 الف وتحته خبر عن 3 مضاربين حلموا وهم نايمين مجرد حلم انهم يتلاعبون بالسوق فصدر فيهم حكم اعدام<< جلست اتذكر حالنا لدرجة ان تركي خويي صار يشم بتكس والسبب الاسهم ماعاد يلقى عرق

لقيت كتاب لهم عن الكوره في الارض الا احصل صور اندية القرن في قاراتهم وكانت كالتالي
الريال والبوكا والاهلي المصري والهلال <<صورة منصف ثويريني وده يطق ابن همام
وكان في الكتاب خبر دخول سامي مع ماردونا وبيليه وزيلر
وانا املي عيوني من هالكتاب الا يجي واحد بنفسجي لابس احمر وانا بسرعه اطمر البس الهدفون الي كنت فاصخه قال يله الان موعد رحلتك للملك قلت وشلون اروح قال قل للقرش ابي
قصر الملك
وانا الي اركب قرشي وامشي
الا وانا في قصر ماقد شفت مثله << تكفى يالي مقطع القصور تعرف وشي
والا قدامي واحد لابس تاج عرفت على طول انه ملكهم تقدمت منه وسلمت عليه وقلت بكل ثقه ابي اهديك ذا البيت طال عمرك
وأخلاق ذا الثور .. اذا شئت مدحه وان لم أشأ .. تملي علي وأكتب

يوم استانس الملك وقال انا جمعت عنك كل المعلومات يا الارضي وعرفت انك انسان محترم وانك رياضي خطير لذلك اعرض عليك رئاسة اتحاد كرة القدم وان قبلت ابعطيك قصر وابزوجك بنتي
انا بصراحه خقيت يوم جا طاري العرس بس لما ذكرت ان الدعوى حرمة برتقاليه احك خشمها ثم ادخل اصابعي في اذنها زهدت في الشغله
قلت يا شيخ الله يبارك لك بشعبك وبنتك اما رئاسة الاتحاد فكايدة علي وخاصه اني ما اعرف للخطط المدروسه وانا رجال ابي اهلي وابي الارض وانا خذوني علمائك بالغلط وهم يدرسون الارض ولا ابي الا الرجعه
قال اجل انت تعشى معنا وبعدها نرجعك
قلت عجل طال عمرك
قال تحرم علي زوجتي واذانها ان تتعشى << ياكرم ذا الملك شكله من خوالد ذاك الكوكب
جلست في حظرة الملك ودار نقاش مع مستشاريينه ان البلد حتى بعد هالتطور لازم يتطور زياده وان الاسعار على رغم رخصها الا ان الملك يرى انها ترخص اكثر
وشوي الا يجي العشاء الله يكرم النعمه اثرهم في ذا الكوكب ما ياكلون الا تبن الله يكرم القراء
وبعد وجبه هنيه حانت لحظة الفراق وقبل الرجوع للارض اخذني جحيشان بالاحظان واخذ يبكي على الفراق وقال وهو يمسح دموعه ترى ما بغيت افشلك مع الملك والا ادري ان بيتك مسروق من المتنبي في كافور الخال
بعد ما رأيت من عجب عجاب في ذاك الكوكب حطيت الرحال في البديعه المباركه


مايستفاد

1) لاعاد تلقف وتدخل مختبرات العلوم
2) لا تغرك الاسامي فجحيشان اطيب من الف واحد من اهل الارض
3) جرب تاكل تبن لو مره في الاسبوع .. اكيد انه مفيد دام ان هالمتقدمين ياكلونه
4) الانصاف دائما ما يأتي من الخارج