نظرا لركود الساحة الكروية من الأحداث ولما يعانيه إخواننا الطلاب من شدة نسأل الله أن يخفف عنهم وأن يخرجهم منها سالمين غانمين الدرجات العلا والنسب القصوى 000
حاولت جاهداً من خلال هذا الموضوع أن أرسم البسمة على شفاه كل قارئ لهذا الموضوع ,, أتمنى أن أكون وفقت في ذلك , وإن لم أوفق فالعتب على التعبير واختيار السيناريو (متعوب عليه) أتمنى التماس العذر والعفو لي منكم 000
طبعاً الموضوع تأخر عن وقته كثيراً والعتب على المسئول عن التفعيل (دارين عنك ؟!! انتبه لاتتسحت بس )
أبدخل بالموضوع طول
في مباراة الهلال والوحدة في الدوري قررت أن أشاهد المباراة بالبيت بعيدا عن الإزعاج وقريبا من الهدوء والراحة ولكي استمتع بمشاهدة المباراة بتذوق واستمتاع 000
المهم صليت العشاء أخذت الشاهي وقليلاً من الفصفص ونحوه من المكسرات وجلست داخل الغرفة وشغلت التلفزيون على الإعلانات ,,
المهم شوي وبدت المباراة 00
انا مستمتع بالمشاهدة ماعندي من ينكد علي من زمان ماتابعت لوحدي ,, المهم راح عشر دقايق ماحسيت فيها من المتعه والبعد عن التنكيد 000
شوي إلا
(طق طق طق طق ) الباب
: مين
: افتح
: من انت
: أنا ابوالجيران افتح منهو يعني انا ابوك !!
غريبة؟!!! ماهب عادة ابوي ( والدي الله يحفظه ويخليه لنا ويخلي لكم والديكم كبير في السن ماله ومال الكوره ) اكتشفت فيما بعد أن سبب مجيئه الغريب يعود إلى أنه في نفس اليوم سامع محاضرة مفادها أنه إذا كبر ولدك خاوه وخلك قريب منه
المهم فتحت الباب : هلا ابوي حياك تفضل
,دخل وناظر وتلفت : وراك غرفك وصخه كذا وين اجلس به الحين ؟ (اوووه أجل راعي طويله !!) كيف؟ أبد والله برّح (بمعني ابعد ماتحتك وبرّح بالمناسبة كلمة فصيحة قالت العرب برّحت الناقة أي بحثت عن مكان!! ) لك بين الجرايد واجلس
المهم جلس وناظر وإلى الشاهي : ماشاء الله عندك شاهي رح جبلي بيالة 00سم جيت صبيتله بيالة ناظر للتلفزيون
: من بينه المباراة؟؟
قلت : بين الزرق والحمر
: لاااااااه والله عندك معلومات ماشاء الله عسى ماتكلفت بس !!!! أشوف إنهم زرق وحمر لكن من ذولا وذولاك ؟
قلت : بين الهلال والوحدة 00
قال : ماشاء الله إلى الحين يلعبون ؟!! والله ماأدري وش يبي السؤال !!! المهم سكت وأنا أحاول أتابع ,,
إلا : وأنت من تشجع فيهم ؟ طبعاً أعرف أبوي راح يكون ضدي وخوفاً على الهلال ومراعاة لنفسيتي ولكي يميل للهلال قلت : أشجع الوحدة 00
المهم جت الكامرا على الفان قال منهو هذا قلت هذا برزيلي اسمه الفان قال : وش يصير لريفالينيو ولده ؟!!! قلت إيه . قال سبحان الله نفس البوهه ( يعني الشكل ) حتى باين من شكله إنه فنان ولعيب صدق من قال ابن الوز عوام !!! (والله أبوي عقب هذي يصلح مكتشف بالحواري !!!)
وصلت الكورة لابوسعيد وآآآه يابوسعيد وهو يسحب باثنين تحت أنظار الوالدقال : وذا من يكون قلت هذا ياسر سعيد القحطاني 00 قال : والنعم 0 قلت تعرفه ؟!! قال : أعرف أبوه كنا نكد بالقلابيات على طريق الدمام البحرين ؟؟!!!: ماشاء الله عليكم !!
المهم الكاميرا على ياسر وكان رابط يده قال وشفيه ؟: ماادري والله00000 قال : يمكن صايده الباب ؟!!! (ياحبي لأبوي )
قلت: ماادري !!
الوالد بلش بياسر وشفيه توقع منين المهم حبيت أريحه شوي لكي يريحني وأتابع قلت : أدق عليه بعد المباراة وأعلمك 000 قال : خلاص طمني عليه وقله يسلم لي على أبوه 00قلت: سم 00 شوي سكتنا خلص الشوط الاول
وأنا ماتابعت وفي نفس الوقت أدور حيلة أشغل الوالد فيها حتى إنتهاء المباراة 000أخذت الجوال وبغيت أطلع أبدق على عمي يوسع صدر الوالد قال لي : وين تبي؟ تدق على ولد سعيد ؟ لا تنسى يسلم لي على أبوه !! قلت : سم ..
دقيت على عمي : عم الوالد يبغاك لا تأخر زين 000 عمي : طيب شوي بس 00
جلست برا أدور وش قاللي القحطاني 00 جيت إلا : هاه قلت له يسلم لي على أبوه ؟إيه قال إن شاء الله ,,: وشفيها يده ؟؟: أبد يقول إن الوالد جايب لحم واجد للبيت وجلست أساعد الوالدة وأقطع معاه إلا والسكين حادة وقطعتني شوي 000
: ماشاء الله على الولد والله والنعم هذا اللي ماهب أنت ووجهك بس ورا هالكورة بالنهار لعب وبالليل متابع ,, الواحد ينظم وقته ويساعد أهله ويقدم مصلحة أهله على اللعب ,, وتجيك ذيك المحاضرة 00 قوامها الخمسة والأربعين دقيقة 00 وأنا أتسمع لعمي وانتظره يجي والمنتظر مل صبره ! خلصت المحاظرة مع صافرة الحكم بفوز الهلال إلا يقوم الوالد يبي يطلع عاد يبغى يلطف الجو : من اللي فاز ؟؟قلت : الهلال قال : الله يخلف على أمك ماأفلحت ولا بالكورة ماتعرف تشجع صح إذا بغيت تشجع شجع الهلال اللي دايم فايز
00000طلعت من البيت إلا عمي يقف عند البيت وأنا أشغل هارباً وأنا أردد بدري !!
000000000000000000000000000000000000000000((ختاماً أسأل الله أن يحفظ لنا ولكم الوالدين ويلبسهم ثوب الصحة والعافية فهم ذخرنا وملاذنا في هذه الحياة )),,,
أتمنى وآمل أن أكون وفقت في كتابة مايحوز على رضائكم واستحسانكم ,,,
من يشرفني عليه أن يأخذ بعين الإعتبارأن هذا أول موضوع أقوم بكتابته حيث أنني ممن تم تفعيلهم مؤخراً لذا فأنا أحد الوجوه الشابة لديكم التي بحاجة إلى شيء من رفع المعنويات ( ماقلت جاملوني ) 0000
ســبــــب تـــشــــجــــيــــعـــي لـــفـــريــق الــوحــــدة هــــو والــــــدي ؟!! 
ــههههههههههههههههههههههههـ 
!
الوضع العادي
