.
.
.

انتهت المباراه وراح ابو سلطان وراح تفاريس (وطس) باكيتا
انتهى الدوري والهلال ما حقق ولا بطوله على غير العاده


الأكيد
اهني الاتحاد اللي ابدا ً ابدا ً ما اخذنا طقطقه ولا سوو ولا شي
اهني الجماهير اللي ابدا ً ابدا ً ما وقفت مع حبيبها ولا جت من بعد صلاة الجمعه
عند الملعب تنتظر بس يفتح الملعب ابوابه
اهني محمد بن فيصل اللي ابدا ً ابدا ً ما اخلص لناديه وترك دراسته لعيونه بس
شي اسمه هلال ولا دفع هو وابوه اي ريال عشانه هالنادي


بس عندي شيء في خاطري ودي اقوله
وش ذنب هالناس اللي سوت كل شي وتركت اعمالها ودراستها وتعبت وسهرت وحتى
ورب الكعبه انها تدعي لهالنادي في الصلاة اكثر مما دعت لنفسها في حياتها
وش ذنب الناس اللي قلتوا لهم ما قصرتوا حظرتوا للملعب في مباريات واجد وتعبتوا بس
باقي بس بس هالمباراه محتاجينكم لا وتقولون كان طالع الحظ واقف ضدنا
وش ذنب هالعالم اللي تبكي في الملعب وتطلع وهي ما تغدت واغلبهم وربي حتى ما افطر
جاي من صلاه الجمعه وهو توه صاحي ولا تعشى بعد ولعيون مين

يا ناس من بعد مباراى الشباب اللي انتهت بأربعه وانا ما اشوف شي اسمه هلال
ما يطري علي وربي في كل مباراة الا هلال ادموس
الله لا يعودها من ايام

تصدقون عاد
كان عندي اختبار يوم الخميس وكنت مره مهتم في المباراة ورواتبنا في امريكا ما نزلت
وفي نصف الشهر يعني طفرة الى ابعد حد والله اني رايح اشتري نك في البالتوك ورايح
اجدد الواير ليس ومتأخر على صلاة الجمعه لأنها على بداية المباراة وأقول لا ان شاء الله
الشباب توهم جايين من العين وداقين في كبسات راشد ابن السامر وما عليهم نفسياتهم
زينه وعارفين ان فيه ناس تحبهم وان شاء الله الكاس لهم

ورب الكعبه اني ادعي دعاء في الصلاة اقول يا رب لهم بس ماش ما فيه ناس تقدر
ما فيه ناس تحب ناديها وتموت بشي اسمه شعار مثل ما يحبه ادمي لاهو مسلم ولا هو
عربي ولا هو حتى سعودي
تبون تقولون لي باكيتا ما لعبها صح طيب اوكي انا معكم ووربي عارف هالشي
بس تذكرون وش سوا الهلال في مباراة الكويت ووش سوا قدام الاهلي وكيف وقف معه
الحظ في مباراة النصر


طيب خلونا نفكر شوي ونقول اذا نبي شي اسمه اسيا اللي فيه انديه ما يسوى الاتحاد
عندها شي
وش الخلل بالله عليكم .. ما تلاحظون انا صرنا نفكر في الانديه الثانيه اكثر من ناديها
من متى الهلال يحسب حساب كلام خلق الله من متى والمواضيع تنزل في المنتدى هنا
وتقول ترى النصراويين قالوا والا خلّوا من متى وهم يقولون ترى الاهلاويين يقولون
ويسبون من متى وهم يدخلون الدين في امور ما تسوى ان الدين يدخل فيها مثل هالكوره
من متى وهم يغيرون في اسامي اخوانهم في الاسلام عشان الكوره

من متى الهلال يعتمد على لاعب واحد في الملعب ويترجى مسؤولين في بلد ثاني عشان لاهب واحد
مثل ما صرح المسؤول الليبي اللي يقول ان جتنا اتصالات كثيره من اصحاب سمو ومسؤولين
سعوديين عشان واحد يعتقدون انه يبي يفوز فريق والفريق اصلا ً يلعب بدون روح

من متى يا ناس والهلال منهزم من قبل يلعب .. يا ناس صّفو نياتكم يا ناس هذا الهلال
يا ناس والله ما حببنا في هالنادي الا اخلاقه واخلاق جماهيره يا ناس الهلال زعيم في كل شي
يا ناس ليش عليه وش فيكم على هالنادي يا ناس كنّا نثق فيه اكثر وربي من ثقتنا في انفسنا
ورب الكعبه اني كنت اقول في يوم من الايام قبل المباراة اللي يلعب فيها مع اتحاد او نصر
او غيره من فرق اني اقول ان شاء الله ان الهلال ما عليه خلاف وعارف ان الفوز لنا

شفتوا وش سويتوا فيه .. تسبّون في فلان وفي علان وكأن الفريق فريق اسرائيلي
موب فريق يلعب كوره

المهم الاكيد ان الكوره فوز وخساره .. بس اجباري اجباري لكل محب لهذا الكيان
انه يفكر بينه وبين نفس ويقول انا وش اخطيت فيه مع هالنادي ووش قصرت فيه
من اداري او مسؤول في الزعيم الى من يقول او يدعّي انه يحب الزعيم ويحاول يعدله
بس عشان هالنادي





ابو سلطان .. بقول لك كلمتين واعذرني على القصور
بيض الله وجهك ووجهك ابوك عز الله انك سويت اللي عليك وزياده وحتى لو ودنا فيك
مصلحتك اهم ودراستك اهم من اي شي
بس انت مريت بتجربه في حياتك ووضحت لك من كان يطبل لك ويقول انت الشيخ وانت
اللي ما مثلك احد ولا قال لك انت مخطي في شي بس لمصلحتك
بس اللي في قلبي وعلى لساني بقول
عز الله انا فقدنا رجال وعز الله العزيز ان من قال انه ما يبيك ويحب الهلال انهي يبي
يفقدك

.
.

سامي لبى والله قلبك والله لو تدري وش سويت انا يوم انك واقف تبي تحاول بكل
ما تحاول انك تسويه وتشجع اللعبيه وانت برى
يا سامي والله ما فيه ادمي يقدر يلومك
ياخي انا كيف بشوف هالنادي بدونك يا ادمي ماني مصدق ورب الكعبه انك تبي تعتزل
يا ابن الناس لا تروح ولا تخلي الهلال
ياخي ارتاح اذا ما تبي تلعب بس ابي اشوفك قريب ابيك لابس هالفنيله وجنب المدرب
وقول انا ما اعتزل خلني بس احلم انك تبي تدخل وتسحب فلان والا علان على وجهه
واجتمع انا واخوياي النصراويين والا الاتحاديين وانبسط عليهم
واذا ما لعبت العن الساعه اللي ما دخلك فيها المدرب
يا ادمي ليش تخلي الهلال ليش بس بسأل ؟؟

.
.

تفاريس بقول لك كلمه ابيك ترسلها للي تبي
قول لمن قال انه يحب الهلال قول له
(من عافنا عفناه لو كان غالي)
ما عليك من احد .. سويت كل اللي عليك ولا قصرت واوفيت للشعار اللي تلعبه
وبكيت وكل شي سويته بس حسافه ما احد همه شي وطلبتك لا تلوم ابو سلطان
تكفى لا تلومه كل شي سواه بس ما عاد بيده شي

.
.
.


هارد لك الزعيم ولا عاشوا الخونه

الله يعينك على الغربه اولا والخساره ثانيا

وأحسن الله عزانا وعزاك