مرحبا شباب

ابشركم وصلني الجزءالثاني من استراحة مطنش ( غريبه جايبه في الموعد ) تفضلوا :

( وقالت : ما عرفتوني ؟؟ هه الصوت صوت رجال ههههههههههه ( ابو غمزه ) ههههههههههه الله يرجك هذا اخر واحد في الشله عينه اليسار دائم شغاله ( شغاله والا سوائق ) شغاله غمز ( طبعا لا ارادي ) ويقول انه يبلش اذا طلع للسوق كله بسبب هالغمزه مره اقصد مرات ينفرش ومره تسلك معه ويطلع بصيده على شان كذا احترف الغزل والترقيم والمقالب مع ان شكله (اللهم لا تبلانا ) تقولن قطو مروع . ما علينا بعد ما جلس عطانا سالفته هو ولبس العبايا وقال : ان توه جاي من العليا والتخصصي راكب ليموزين ومبهذل خلق الله ( تخيلو واحد اقصد وحده في ليموزين وتغمز ) عز الله راحو فيها الشباب ويقول بعد انه جمع 25 رقم و 13 كرت شخصي في ساعه .
المهم بعد ما خلص صاحبنا من سواليفه قلت للشله عندي موضوع هــــــــــــــــــــــــــــــــــــام نبي نتناقش فيه اللي نط وصك الباب واللي نطل المعسل واللي صك الدش وقالوا : وش عندك ؟؟؟؟ قلت : ما عندي الا سلامتكم بس ما ودكم تسافرون في العيد يوم تطامروا اللي يقول نبي نروح لبنان وهذا يقول مصر وذاك يقول ما عنا وعن المغرب واخوكم جالس في النص مره الف يمين ومره يسار ( تقول مروحه قعادي تدور راعيها ) اسمع الشله وش عندهم . والله صدعت منهم ومن صياحهم وبعد مداولات دامت 3 ساعاتتوصلنا الى القرارات التاليه ( يخسى مجلس الامن ) :
1 ـ يدفع كل عضو في الاستراح مبلغ 222 ريال ( رقم مميز ) ويستنى حارس الاستراحه لانه مو مسافر معنا
2 ـ السفر يكون الى المنطقة الشرقيه ( هذي اخرتها )
3 ـ ان يكون الدفتر الاخضر ساري المفعول ( حشا علاج مو جواز فضحت ربعي )
4 ـ السفر يكون بسيارة العضو ( التاجر ) ويستثنى من القطه ( حظه )
5 ـ التحريك يكون فجر العيد وتكون صلاة العيد في الخط .
6 ـ عدم اصطحاب الاطفال عفواً اقصد البياجر ( اعذرونا مامعنا جوالات )
7 ـ اخذ جوال ( وائل ) حارس الاستراحه غصب عنه
8 ـ الاكتفاء بوجبه وحده في اليوم .
9 ـ عدم الالتفات الى الملهيات او المغريات حتى في اصعب الظروف
10 ـ العوده تكون بعد انتهاء القطه بحيث لا تتجاوز عشره ايام
قايلكم يخسى مجلس الامن
وبعد ما خلصنا من الاجتماع السري نط ( ابو غمزه ) وقال : بهذه المناسبة انا عازمكم على السحور راح هو ووجهه يجيب سحور وانتظرنا ساعه ساعتين ثلاث ساعات ........ صح عليكم ....... الرجال زلبنا ماهي غريبه عليه راعي مقالب وقالوا الشله مالنا الا الله ثم هالشاهي نحط حرتنا فيه . وفعلاً حطو حرتهم فيه حتى مشو وبقى اخوكم يرتب للسفره على رواق ( يا قاهرهم ) موعدنا بعد العيد ياشباب ان شاء الله .......... تصبحون على خير )

هاه شباب وش رايكم ما ودكم اكلم مطنش وربعه عشان نخاويهم . ( مالت عليكم انتم وسفرتكم ) موعدنا بعد العيد مع ..... استراحة مطنش ......


ورمضان كريم .