ليه أنتوا كذا ياأولاد ؟؟؟ - نادي الهلال السعودي - شبكة الزعيم

فرانشيسكا · #1 12/05/2007, 05:26 AM

السلام عليكم ورحمة الله وبركاته ..
صباح / مساء الخير جميعا ..
بعد أن أفقت من صدمة ال7 من مانشستر >> روماوية جدا..

وأفقت من صدمة الإختبارات ..حبيت أدخل المنتدى وأطرح موضوع قاهرني جدا جدا ..

ألا وهو :
التطنيش عند الأولاد ..
يعني أخواني وعيال عمي والأقارب عموما من الأولاد .. رافعين ضغطي .بالذات اللي بثالث ثانوي
يعني 24 ساعة يدورون .. وماعمرهم فتحوا كتاب .. واللي يزيد القهر يجي واحد منهم
مبسوط : تصدقين سلمت الورقة فاضية

أنا أعصب .. مجنون أنت ؟؟ مبسوط .؟؟؟ عادي عندك

يقول : إي .. والثاني يضحك معه : بالعكس أصلا أفتخر ..
لا وإذا دخلوا وشافوني مثلا ماسكة كتاب : لا حول وأنتي بس تذاكرين ؟؟
وهو أصلا مو كتاب دراسة لا .. رواية .. بس هم أي شي اسمه كتاب عندهم هو عدو .

يعني أنا العام الماضي لما كنت ب 3 ثانوي ,, كنت حريصة جدا لأنه مستقبلي ..
والحمدلله تعبي ماراح ع الفاضي وجبت نسبة مرة حلوة

أنا ماأدري ليه أغلب الأولاد كذا .. يعني لما يجلسون يسولفون معي ودي أشوتهم ..
لا وإذا جيت أنصحهم مايعطوني وجه ,, يعايروني بأم سبعة .. ماتسوى علينا ..

يعني كأن الإنتر ماخسروا 6

أنا ماأدري .. لما أقول لهم أن هذا مستقبلكم ,, بكرة شلون تتوظف .. من وين بتصرف .
كيف بتتزوج .. أحاول أخليهم يحسون مافي فايدة ..يقولون لي : إختبار دنيا مو آخرة
ولا يقولون : بناخذ نص راتبك إذا توظفتي

.. يعني أنا أتكلم جد وهم ماخذينها ضحك
.يقولون : أجل زيك نجلس نصيح ليلة الإختبار .. يالدفرة

.

يعني هذاك اليوم شغالتنا تقول لي : (فرانشيسكا >> هذا أنا ) .. أنتي في يعطي فلوس حق
جامعة ؟؟
قلت : لا .. قالت : أنا في ولد ياخذ درجات في زين ., هو يبي يدخل جامعة .. جامعة
فلوس كثير في إندونيسيا .. وقصت لي معاناة كبيرة ..كسرت خاطري ..
جلست أقارن بين ناس فقراء يتمنون هالفرصة .. والحلوين اللي عندنا 4 أيام بالأسبوع
مايحضرون ..
يمكن تحسون كلامي وحدة ثقيلة دم .. لكن شي يرفع الضغط ...يعني هذا شباب المستقبل
.. أي مجتمع وأي اقتصاد بيقوم على هالأشكال .. طبعا في بنات مطنشات بس مقارنة
بالأولاد ولا شي ..

أنا أبي أعرف عندكم زي معاناتي ولا لأ؟؟ وإيش الحل مع هالنوعية التي لاتبالي
ولاعندها إحساس .؟؟

سامحوني على الموضوع مو مرتب وشوي ثقيل دم .. بس هذا اللي الله قدرني عليه ..
تشااااااااااااااااااااو