بسم الله الرحمن الرحيم

السلام عليكم ورحمة الله وبركاته

وبعد:

قبل كل شي... مبرووك التأهل.. وعقبال كأس آسيا والعالمية

مدخل:

تحب أحبك حبّة حب...أحب من حب الأحباب؟
ولا تحب أحبك حب....حبيب لحبيب وأحباب لأحباب؟

<----- الحين بينشب له أبوراس ويستقعد له ويقول: عييييب


مخرج:



يالله شباب وصبايا... نبي نشااااط ولعب وحركتات..!!

نبي المجلس يرجع مثل أول: (ضحك ولعب وجد وحب) <--- أووخس يا عباحليم :p


زبدة الهرج:

يقولون لكن زمن رجاله..!! ويقولون لكل مدري وشو ذكرياته..!! :p

وقديماً قالوا: "زمـان يا فـن"..!!

المهم:

شفت موضوع هنا عن برنامج الحصن وصور عنه..! وبغيت أبكي لما تذكرت أيام الطفولة

وقلت لنفسي ليه أنا بس اللي أبكي؟

خلني أبكّي الأعضاء معي... فالبكاء مع الناس رحمة ;)

فخطرت في بالي تجديد الذكريات للكبار في السن... أما البزران واللي ما قد وصلوا سن البلوغ فلا أشوفهم

يوطوطون هنا لأني مو فاضي لأسئلتهم: (من هذي؟ وش اسم المسلسل؟ وبأي عام طلع؟ وعطنا رابط التحميل) :p


^^^
وش رايكم بالمقدمة؟ أدري أنها مدري وش تبي

بس حطيتها على بال ما الصور تتحمل

يالله خلاص الحين خلونا نتنذكر أيام الطفولة الحلوة


=============================================

الكابتن ماجد:



من أجمل الرسوم المتحركة: الكابتن ماجد
يالنسبة لي.. ماكنت أشجع ماجد كامل... كنت أحب بسّام لأنه قوي ورجال..!!
أما ماجد ما أدانيه.. أحسه خكري :p

============================================

ماروكو الصغيرة:



وععععععععععععععععععععععععععععععع
من أبيخ الكراتين اللي شفتها... سمااااجة والله..!!

============================================

هـايـدي:



هايدي الجميلة.... هايدي الكريمة...هايدي اليتـــيمة..!!
مثل نسيم الهوا ...هي للعليل دواء ...!
هي للجرح شفاء....هي للصبح ضياااء...!
هايدي الجميلة....هادي الكريمــة...هايدي اليتيييمة..!!

يالبى قليبك ياهايدي أنتي وبيتر ... والله اشتقت لكم
أكثر ما قهرني.. أن الحلقة الأخيرة ضاعت علي.. وإلى يومكم ما شفتها

============================================

السنافر:



يا سلاااااااام عليك يا بابا سنفور أنت وباقي الشلة
شرشبيل أبوخشم تعقد منكم هو والقطو الخبل حقه :p
شخصيات السنافر رهيبة خصوصاً: سنفور مغرور <<<< كل ما شفت هامور تذكرته

============================================

بسيط:



جينا الحين للسخافة..!!
والله منيب نادم إلا على على الأيام اللي كنت أتابع فيها هالمسلسل
ثور في مزرعة يساعد الحيوانات ويحل مشاكلهم.. وبعدين؟ وش نستفيد؟!!!
ما كنت أدري أني كنت سخيف إلا يوم كبرت

============================================

عبقور:



هذي المسلسلات ولا بلاش
عبقور وصديقه عامر أو (عمور)..! اللي لاحظته أنا إن كل شي متوفر بجيب عبقور
أي شي يحتاجونه يطلعه من جيبه ( ما عنده وقت)
على فكرة: عبقور قط الكترووني ;)

============================================

ريمي:



من اللي منا ما يتذكر ريمي؟ وخصوصاً جون سيلفر صاحب القدم الخشبية
ممتع جداً هذا المسلسل.. ورحلة ريمي عجيبة وجميلة جداً..!!
أكثر شخصية أعجبتني: جون سيلفر بالتأكيد :


من أقوال جون سيلفر:
من يدري !
ربما يأتي يومٌ .... أِجدُ فيهِ ماضيعتُ كل عمري في البحث عنه
وإذا لم أجدهُ .. تصبحُ الحياة تعيسة .. تصبحُ تعيسةً جداً حياتي

============================================

سلاحف النينجا:



أنيمي إثارة ومغامرات..!! سلاحف عادية بفعل محلول كيميائي -بالخطأ- تكبر وتتحول إلى سلاحف نينجا..!
نسيت اسم مدربهم الجرذ... ونسيت بعد اسم عدوهم المقنع...!
بصراحة ما كنت أتابع هالمسلسل بشكل مستمر.. فنسيت أغلب حلقاته..!

============================================

الليث الأبيض:



اللي أتذكره أن التلفزيون السعودي زودها حبتين مع هذا المسلسل..!! ما صدقنا أنه خلص وانتهى.. قاموا يجيبونه
مرة ثانية تحت اسم ديمبا... ومرة ثالثة تحت اسم ثالث نسيته
والمشكلة أنهم قاموا يعيدون هالأجزاء مرة ثانية
مدري وش كانوا شايفين فيه؟

============================================

بشار:



بشار يا بشار... هيا إلى العملِ...!!
بشار يقوم رحلة للبحث عن أمه.. وبالأخير يحصل أمه..!!
والله إلى الآن وأنا أتذكر الدموع اللي انسكبت مني في الحلقة الأخيرة
حسيت من الفرحة أنه أنا اللي لقيت أمي موب هو

===========================================

عدنان ولينا:



ما لعب في عقولنا وعقول صغارنا بسالفة الحب غير هالإثنين
مسلسل رومانسي رهيب..!! أتذكر أني تهيضت ورحت أدور لي واحدة أحبها وأقاتل الأعداء عشانها بس للأسف
ما حصلت غير خدامتنا
شخصيات المسلسل عجيبة خصوصاً الزاحف عبسي
أذكر فيه واحدة شقراء من العصابة كانت حلوة.. وكنت والله خاق معها بقوووة بس نسيت اسمها

==========================================

زورو:



من اللي منا ما يعرف زورو؟
أفضل مسلسل إثارة وأكشن على الإطلاق
أذكر كان أخوي الكبير يمسكني أنا وأخوي الصغير.. ويصنع لنا سيوف من ورق وأحياناً من خشب
ويخلينا نمثل دور العصابة وهو دور زورو :p
وكان يضحك علينا ودايم هو اللي يقتلنا بنفس حركات زورو ونسوي أنفسنا ميتين.. وبعض الأحيان نتفاعل
مع التمثيل ونقعد نتألم ونقول: تباً لك يا زورو :p
الله يسقي ذيك الأيام بالخير
بس لا يفوتكم شعار القناة الأولى على الصورة كح كح كح
==========================================

سندباد:



سندباد من بغداد... وخويته ياسمينة اللي تحولت إلى طير..!!
الله على ذيك الأيام.. كانت حلوة.. رغم أني كنت أحلم بالليل بالوحوش اللي يطلعون لسندباد
العنقاء.. وأبو عين واحدة.. ورجل الثلج .. ورجل النار... ما كانوا يخلوني انام بالليل من الخوف

==========================================

فلونة:



فلونة الخبلة الغبية ما أحبها وما أدانيها
كنت مجبور أتابعها عشان خواتي الصغار يحبونها
فلونة روبنسون << من كثر حقدي عليها وعلى قصتها الغبية لين الحين حافظ اسمها واسم أبوها الله ياخذه

==========================================

بومبو (السيارة العجيبة) :



يا حليلك يا بومبو... كنت أتخيل وأنا صغير تكون معي سيارة مثل بومبو تتكلم وتسولف :p
أذكر فيه حرامي خبل كان يبي يسرق بومبو بكل حلقة... بس ناسي ليه؟
يا ليت من يتذكر المسلسل يعلمني السبب؟

==========================================

نبيه وصالح:



كح كح كححححح.!:p عاد هذا المسلسل قديييييم حيل.. اللي يذكره قليل..!
حتى أنا كنت ناسيه.. بس يوم كنت أبحث عن صورة لبومبو حصلت هالصورة..!
نبيه وصالح.. ومعاهم الحرامي: حسون الملعون..!
ما أذكر من هالمسلسل إلا أن أخوي الكبير اسمه حسين.. وكنا نعايره بحسون الملعون

==========================================

باباي:



بابّاي.. رجل البحار.. طووط طووط
ما أتوقع أحد ما يعرف بوباي.. حتى البزران يعرفونه :p
سيد شطيرة.. والدب بلوتو.. وزيتونة المعصقلة اللي ما عمرها غيرت ثوبها
أذكر أنها بحلقة فتحت دولابها وطلعت كل ثيابها نفس اللون ونفس الشكل <-- الحمد لله على العافية

==========================================

عقلة الأصبع:



ما أتذكره زين.. لأني ما هضمته..! بس اللي أتذكره انهم أقزام مهايطية مالهم داعي

==========================================

جونقر:



جونقر..جونقر.. البطل الجبااااااااااااااار
حماااااااس والله جونقر.. يا حبي له بس
الحلقة الأخيرة قعدت أبكي أنا وأخوي الصغير
لأن جونقر ضحى بروحه عشاننا.. عشان كوكب الأرض
مات جونقر البطل بعد ما فجر نفسه مع كوكب الأشرار

==========================================

كعبوووول:



الله الله الله عليك يا كعبوووول
كعبول.. كبول.. الكلب الأكول :p
وصديقه عبقرينو المخترع... والقط المشاكس (النشبة) نسيت اسمه..!
والله كوميدي هالمسلسل يخليك تضحك غصب ;)

==========================================

صاحب الظل الطويل:



شف وجه العنز و ... <--- كملوها أنتم
أنا قد شفت وقد سمعت أن فيه ناس يحبون من أول نظرة... وحتى من أول كلمة..!!
بس ما قد شفت أحد يحب أحد من أول نظرة لظله؟
البنت اللي في الصورة خقت مع ظل طويل لواحد ما شافت غير ظله
أصلاً واضح من خشتها أنها خبلة فاهمة الحب غلط
ما يعجبني فيها غير الآنسة "ناظلي" أم خشم هي اللي تربيهم زين

==========================================

سيدة ملعقة:



من سخافة المسلسل.. ما تابعت منه غير حلقتين بس
بس حطيته هنا يمكن فيه بعض الشيّاب يحبونها

==========================================

سالي:




أتحدى أي بنت (قصدي أي عجوز:p ) ما عجبها هالمسلسل ;)
سالي اللي تكسر الخاطر.. قمة في البراءة..!!
الله يكثر من أمثالها... تعلموا يا بناتنا الطيبة منها <--- ما ظنتي

==========================================

ليدي:



نختم الموضوع بصورة المزيونة ليدي
من اللي منا ما يحب ليدي؟
بس فيه ملاحظة ما فهمتها زمان؟ مرة كانوا يقولون لها ليدي... ومرة لين؟
بس يوم كبرت عرفت أن ليدي هو لقب.. ولين اسمها الحقيقي ;)

==========================================



خلاص أبشركم خلصنا..!!

أتمنى أنكم استمتعوا معنا مع الصور والتعليقات الخفيفة

وأتمنى ممن لديه ذكريات مع الرسوم المتحركة أن يسدحها هنا..!

مو لازم صور... أي شي ولو حتى ذكريات ومواقف..!! ;)

يالله مع السلامة..!!