نادي الهلال السعودي - شبكة الزعيم - الموقع الرسمي - ديرة خوالي السهول ((مسلط العتيبي)) والرد مني...!؟

بسم الله الرحمن الرحيم

امتداد لعزف القوافي قصيدة جديدة مشابهة لما قبلها القصيدة ارسلها لي الشاعر مسلط العتيبي مداحاً لديرة خواله الرويضة ديرة السهول من فخذ الظهران ومثني عليهم
وهي التالي :

يانديبي جهز الجيب وأملـه بالوقود=وأطلـب الله فـي الخفـى تنفتـح بيبانهـا
إطلبـه لازل ثلثيـن والعالـم رقود=كـل نفـس مذنبـه تطلـبـه غفرانـهـا
جهـز الموتـر قبـل لايبيحـن السدود=كـل نـاس يانديبـي تحـب اوطانهـا
بنحـر ديـار عزيـزه ورى ذيـك النفود=الديـار نعزهـا مـن غـلا سكانهـا
ديرتي ديرة خوالي عريبيـن الجدود=السهـول اهـل الكـرم مكرمـه ضيفانهـا
الكرم عاداتهـم مـن علـى عـاد وثمود=والرسالـة للعـرب بينـن عنوانهـا
جعلها للسيل من عقب زلزال الرعود=جعل سيل الوسم يمطـر علـى ريضانهـا
والخزامى والنفل ظاهرٍ فيـه الورود=والفيـاض المزهـره ينطحـك ريحانهـا
شوفتي للدار يبرد لواهيـب الكبود=والعيـون اللـي حزينـه تـروح احزانهـا
وانا ربعي تذبح الحيل وتلطم بالخدود=لابتي وقت اللقاء تحتمي عربانها

فكان الرد مني على هذه القصيدة :

ياسلامي كل ماشفت براق(ن) ينود =أتخيل ماطره من حقوق امزانها
شاقني بدع المثايل وفكيت القيود =والمعاني عشت معها ونشت اغصانها
لين صرت ألاعب القاف وابدع ياسعود =والهواجيس المغيره حضر شيطانها
ساقني ربي وولًعت ناري بالزنود=والبيوت الشارده جبتها برسانها
وابتديت اخذ بها في نمط فكري بنود=الهجوس العاتيات امتطت فرسانها
وقمت ألاعب روحي الي تقافتها الورود=والسلع من طيبها تحتفظ بأثمانها
يوم شفت ابيات مسلط تبنيت الردود=وابتديت ابني على القافية وألحانها
خصها لديارنا وانتخى فيها بزود =في بيوت من سمعها عرف برهانها
مرحبا بك في ضيافة متمين الوعود=عند قوم(ن) بالوفاء ماهفى نيشانها
ربعي الي تعطي الحق وتحل العقود=في فعول المرجله وافي(ن) ميزانها
شعله(ن) وقت الملاقى ويرقون السنود=والقبايل عزها من صلابة شأنها
انت من قوم(ن) لها في فضاء الغبة وجود=لاد روق وكل ميده على سيسانها
وانت اخبرك ياعميل الوفاء رجل(ن) صمود=وخابرك حجيت مكة وطفة اركانها
اطلب الله دايم(ن) في ركوعك والسجود=ان يحفظك من جميع الصدف وألوانها

كل المنى ان تكون قد حازت على رضاكم تحياتي لكم "مشاري السهلي"

والقصيدة لها اكثر من عام