جيت من للبيت على اذان الفجر .. ادخل غرفتي واهبدهـا نومه .. توني نايم الا وابوي يصايحلي ولــعنه ياهدف لي سنه احاتسيك ولا ترد علي ؟؟ ومادريت الا والعـقال يمشي مليونين وصـاك بجبهتي .. وارد عليك .. امــرك سيــدي >> ( بيفهمونها اللي يشوفون مسلسل ديوان السبيل ) .. ابوي يرد علي وش امرك سيدي قل يـله بنروح نسلم على عمانك سلام العيـد ولا تبي تنوم جعلك الوصله >> اموت واعرف معنى الوصله !!
المـهم قلت الا ابي اقوم كيف يمر العيد وانا ماسلمت على عماني وخوالي !! الله من الصدق !!
المهم واجـيك اهز راسي واسوق ببوي عاد تونا راكبن وتوني بمشي الا واكف جايني على علابي ؟؟ اناظر ابوي وش سويت ؟ ابوي وراك مسـرع هد لااجي اسوق بدالك يله امشي ولاتتلفت !! امشي وبيسوق ولا التفت حلوها عـاد .. المهم ماعلينـا واجيك اسوق وانا مداري لاني خابر ان سويت يمين يسار بيجيني كف ثاني وانا عاد مليت من هالكفوف صار راسي حفر ضفادع .. ونجيك نوصل لبيــت جـدي ندخل اف امة البشر جايه تسلم وش يبون كل ذولي نبي نسلم عليهم ؟؟ والله المشوااارر بس يله تحمل كلها ساعتين وراجع تهبدها نوومه للفجر !!
ونجيك داخلين مع الباب ابوي هو وبشته وانا بتكملتي قصدي بثوبي وعقالي ويجونك بزراين عماني يسلمون على ابوي ويحبحبون راسه وابوي خايف يطيح العقل .. ونسلم وندخل المجلس .. ونشوف امة الصمد ونسلم وهلا مرحبااااا كل عام وانت بخير من العيدين من الفايزين >> كل العالم يقولون كذا محد يرد ... ليه ؟؟
والعـالم جاين رايحين كل عام وانت بخير وطاقين شخــص ... لا واللي يحوم تسبد الـواحد الين جاك بزر من هالمبزره بشماغه ولابسن عليه بـــشته وياله يلتفت .. اعنبوا بليسه توه مابلغ توه بزير ويقعدون بهالبشوت يــرزون اعمارهم >> ماعنده بشت وحاقد
نــخلص من السلام والبربره وتفضلوووووا على الغداء عاد الواحد ماله نفس على الغداء توه قايم من ساعتين وياله فنجال قهوه وحبتين تمر ... عاد نقلط من باب المشاركه ... عاد يجونك عيال عمي هالمتافيخ ماشاء الله تبارك الله الله لايضرهم هـــات فووول .. قرررب المـرقه .. لا ويقولي قطــعلي لحم .. ههه انا اقطلعك انا النتفه اجي اقطعلك يالمنفووش .. معصي ماوالله واسوي عمري ماسمعته ..

نخـلص من الاكل نرجع نغسل وصب قهوووه .. شااهي ... نعناع ... عوود .. قهوه .. شاهي .. نعناع .. الطيب هذا اكثر كلمه نسمعها بعد الغـداء .. عاد يطلع انواااااع العجز في عيال عمي مافيهم واحد نفسه خفيفه يقول انا والله اليوم بمسك القهوه والشاهي ودي اريح عيال عمي لالالالا كل واحد اعجز من الثاني بس يعجبني الين جاء عمي وقال يله ياسعد ماودك تجيب القهوه >>> يحرررجه كذا ههههههه
عــاد الين جاء العصر دق سلف وارجع لبيتكم واهبدها نووومه للساعه 2 ويصير بعدها الف حــلال ..

هـذا مجرى يوم العيد لاغلب شباب الرياض وانا منهم