مع إحترامي الشديد فأنا ممن تسمونهم جماهير سلبيه ..
أنا شخص اعتقد أن عمري لايسمح لي بلبس تي شيرت بلاستيكي أو القفز على الكرسي والصراخ بأعلى صوتي .. هلاليتي تعطيني الحق في حضور المباريات .. وليس لكم الحق في التحكم بتصرفاتي ..
مره جلست في الممتازه ودفعت 200 ريال ثمناً للتذكره لكي أجلس بعيداً عن الحب المرمي والكلام البذيء وقلة الأدب .. ولكن وجدت من دخل بالمجان بيننا وأخذ يصرخ فينا قومو سوو موجه وعددنا أقل بكثير من جماهير الواجهه .. طبعاً فيه ناس ردت عليه وسكتته ..
اللي أقترحه أن تركزون في استاد الملك فهد على مدرج الواجهه فقط لأنه الأقرب للاعبين وهو الأجمل دائماً في تنفيذ الحركات وهو الظاهر غالباً في الاعلام .. وتحاولون تركزون نشاطكم فيه بدل تضييع حماسكم على كامل المدرجات .. واللي يبي يتعاون بيقدر يجي بدري وتبدون من المغرب تطبقون الحركات اللي تبونها .. وأنا واللي مثلي نجلس ورا البيبان ومن حقنا مانتعاون ..
اللي بوصل له إن الجماهير مختلفة الاعمار .. وبيني وبينك فيه ناس فوق الثلاثين والاربعين .. ودايم نشوف في المدرجات رجال ومطاوعه عليهم الوقار لكن كلنا نحب الهلال .. ولا لكم حق بصراحه وأنتم في مثل عمر أبنائهم تفرضون أشياء مايبونها عليهم ..
برضه نقطه غايه في الأهميه مدامكم مجلس جمور وخيركم كبير على الهلال ... ليه ماتسوون خطه قويه وطويلة الأمد لتثقيف الجمهور الهلالي وخصوصاً حقين الأحياء جمب الاستاد من اللي اعمارهم في العشرين وتحت .. يعني بيني وبينك وبصراحه أكثر ترى أكثر مايضايقني في الملعب ويخليني ما أجيب الصغار معي إنه يكون جمبي واحد مراهق يستهبل علي وعلى الجمهور ومسوي نفسه مهرج ووسيع صدر .. وهو في نظري أحقر من الحقاره خصوصاً إذا كان واقف على الكرسي وهو يدخن يعني شوفوني .. ليه مثلاً مانمنع بعض هالسلوكيات ونحاول من خلال التركيز على بقعه من الملعب زي ماقلت لك في التنظيم إننا نرقيهم ويكون جالس على الدرج عضو منكم ( زي ماتقولون لابس فسفوري ) لما يسمع كلمه مو حلوه يطلب من اللي قالها مغادرة المدرج والتوجه لمدرج آخر .. وأتوقع إن العسكري بيساعده في ذلك بل إننا مع الوقت بيكون كل مدرجنا يتساعد في منع هالظواهر .. أتوقع بإذن الله بالإصرار على هالشيء راح نكون شيئاً فشيئاً جمهور واعي ويحترم الناس وتساهمون في رقي المجتمع .. وربي موب ناسيكم على وقفتكم مع أبناء مجتمعكم ..
لكم مني كل التقدير والاحترام .. وأعتذر إن كنت ضايقتكم بكلامي ..