السلام عليكم ورحمة الله وبركاته،،


صبحكم / مساكم الله بالخير ...



يقول الشاعر : آآآه يا ألبي نقطه انتهى.


انشغل بالي في الايام الفائته بعدد من الظروف الطارئه والمواضيع الشاحبه كشحابة جو الرياض أمس البارح، وكانت هذه الظروف سبباً اضطراب نومي..

اتجهت الى الفراش وعيناي تفيض من دموع التثائب، وحين انبطح على الفراش يطير النوم !!

و دَخلك يا طير اليمامه وصل للغالي سلامي..

من الأساليب الحمقى للهج عن الارق هو متابعة التلفزيون وهو ما قررت أن أفعله في أحد الليالي الملاح..

أخوكم في الله مهوب راعي تلفزيون أبد ولا يعرف يتابع شي ، لدرجة ان التلفزيون اللي عندي بالغرفة ما فتحته لي أكثر من 3 شهور..

المهم شغلت البتاع وبديت أقلب بهالقنوات وما لقيت شي يحمسني اتابعه خصوصاً واني من عشاق برامج السياسه والرياضه وغيرها مالي خلق ..

المهم وانا مجلعد بالريموت وقفت عند أحد القنوات اللي اساميها ما أدري وش تبي ( شعار هالقناة يشبه توقيع أمي على الجواز) ، وفيها شات ومسخره وكان سبب وقوفي هو صوت مياده الحناوي الله يعفو عنا وعنها..

كنت أتصور اني ابدخل جو مع " يا من ملك روحي بهواه ... الامر لك طول الحياه... الماضي لك وبكرا لك وعيد الفطر واجازة القمه العربيه كل ابوهن لك.."

وبدال ما أدخل جو وأقعد احب واشتاق وأصيح جلست منسدحاً أكاد أتقطع من الضحك والقهقهه الممزوجه بالسخريه

هل تدرون لماذا أنا تقهقهت وضحكت


سامي أميره >>>>>> 92% علاقة حب هبااال

فيصل حنان >>>>>> 81 % علاقة حب جيد مرتفع

رامي أبرار >>>>>> 76 % يبي لكم شوي وتضبطون

مصطفى زيزي >>>>>> 70% تقارب كبير يا باشا

عثمان فاطمه >>>>>> 59% دوروا لكم جامعه تقبلكم

يوسف خديجه >>>>>> 40% يبي لكم شغل واجد

حمود فضه >>>>>> 9 % اختلاف النسب دامركم

الهاوي الشلهوب >>>>>> 99.9 % قلوبكم صافيه ( الـ 1% راحت للتايب )


ولاني على نياتي اعتقدت للوهلة الأولى ان اللي يرسلون لهالقنوات هم من فئة المراهقين والمراهقات ، ولكن عندما جاء بكرا وقابلت أحد الاصدقاء(و قد تجاوز سنه الـ 26 ) في ملحقه الواقع في منزله ، وكان يقلب في الريموت حتى مرت علينا أحد القنوات ، فتذكرت سالفتي وسولفت معه عن هالقنوات والخرابيط اللي يعرضونها، فقال لي بالحرف الواحد " ياخي بعضها حلوه وتخليك تعرف مدى التوافق بينك وبين خويك " ، فقلت له يابو عبدالله انت صادز أو انها مداعبه ؟!قال لأ صااادز ، وراح أثبت لك( طبعاً يمزح)..

قال لي وش رايك بي وحنا نعرف بعض من 8 سنوات أول ما دخلنا الكليه قلت اذا طلعت أقول لك ( بمعنى اني لن أمدحك في خشتك) ، قال تهقى اننا متوافقين قلت ايه قال أجل خلنا نصغر عقولنا شوي ونجرب نرسل أسمي واسمك ونشوف ( بدت حركات البزران على تالي عمر الله يخلف على أمٍ جابتنا )..

أرسلنا الرساله وجلسنا نترقب النتيجه والصمت والقلق والهدوء يحيط بارجاء المكان فلا تكاد تسمع سوى صوت صارور المزارع ، وبدأ العرق ينساب من أسفل الرقبه وكأننا ننتظر اختبار 106 ريض

وما هي الا لحظات ويتوقف التصويت لتظهر النتيجه!!



محمد عبدالرحمن >>>> 79% علاقة حب عظيمه

اللـــــــــــــــــه يالها من وناسه

طلعت أنا انا واياك يابو عبدالله عظيمين

قم أرجوك وخليني أخمك وارتمي بحضنك واروني من نبع حبك العظيم ودعني أغرف لك مرقوق غلاك

انه الحب ثمان سنوات وانا احبك ولا انتا داري ولا انا داري !!


لا أحد يضحك علينا صدقوني لو جربتوا ذلك الشعور لسويتم مثلما سوينا وأكثر


5000 رساله باليوم في 5 ريال للواحد رساله >>>>> 25000 ريال باليوم وبعد وحده

ويستمر اللعب والنصب على أصحاب الغفله وتستمر خمسات الريالات في التجول والتنقل بين القنوات!!

ما أري نضحك على أنفسنا ولاّ نضحك على أنفسنا ؟!!

لو شاف أحدنا أحد المساكين اللي بالشوارع يشحذون كان ما يعطيه ولا ريال !!

واذا سألته وش السبب وليش ما تتصدق؟؟

كان يقول هذولا نصابين ، ويمكن يكون معه الحق لأنه فرض انهم نصابين ( وانا اقول يمكن)....

بينما الدشير السرابيت أصحاب هالقنوات اللي كلها أغاني وحب وغرام ودردشة سخيفه ، ندري ونتأكد انهم نصابين ومع هذا نكز لهم خمسه ريال هوا ولا عندنا أي مشكله وأهم شي نستانس


الصراحه وللاسف الشديد ان 90% من هالجيل ضااااااايعين و تفكيرهم محدود جداً ، ما عندهم احساس بالنعمه ولا يعرفون يشكرونها..

تمادينا بقلة الحياء ، و أكثرنا من الذنوب والمعاصي الى ان صارت الجزء الاكبر من يومنا ، وأصبحنا نعصي الخالق بدون ان نشعر ، ونرتكب الذنوب بدون أي احساس بالخطأ والندم..

نحب الدنيا ونغرق في حبها ونتمسك بها وننسى الهدف اللي خلقنا له ..

ياااااااااااااالله انك تهدينا وتصلحنا وتغفر لنا استهتارنا وموت الوازع عندنا ..

لن تدوم النعم التي نعيش فيها ما دمنا لا نشكرها بطاعة الله والخوف من عقابه ، ولن يدوم حبنا للدنيا اذا فارقناها ، حينها نتمنى لو عدنا اليها لننساها ونتذكر الآخره ، ولنستمتع بها في طاعة الله طمعاً في جناته وخوفاً عذابه ..



كانت السالفه كوكتيل من السواليف وبالاخير هو تذكير لي قبل كل شي ، وتذكير لكم لعل الله يصلح حالي وحالكم


وفماااااااااان الكريم

اهلين

إقتباس انشغل بالي في الايام الفائته بعدد من الظروف الطارئه والمواضيع الشاحبه كشحابة جو الرياض أمس البارح

عسى بس انبك ضميرك على الي قطعت شبوكهم

إقتباس اتجهت الى الفراش وعيناي تفيض من دموع التثائب، وحين انبطح على الفراش يطير النوم !!

ياللهول
:p
صدق انا ملاحظه الارق صاير منتشر كثير!
وحده من زميلاتي متصله علي تبكي تقول يومين ابغا انام مو قادره
شوفولكم حل الله يصلحكم وخلو قعده التلفزيونات

إقتباس بدت حركات البزران على تالي عمر الله يخلف على أمٍ جابتنا

إقتباس وجلسنا نترقب النتيجه والصمت والقلق والهدوء يحيط بارجاء المكان فلا تكاد تسمع سوى صوت صارور المزارع ، وبدأ العرق ينساب من أسفل الرقبه وكأننا ننتظر اختبار 106 ريض

قياسا على 101 ريض وصف ولا احلى

إقتباس محمد عبدالرحمن >>>> 79% علاقة حب عظيمه

محمد يحب عبد الرحمن ولا عبد الرحمن يحب محمد؟ مافهمت

بس احس فشلا متحمسين تستنون ويطلع العكس مثلا
اش شعورك لو طلع 1.5%

إقتباس لو شاف أحدنا أحد المساكين اللي بالشوارع يشحذون كان ما يعطيه ولا ريال !!

اي واللــه!!
اذا الي يشحذ نصاب اجل هالقنوات اش يسيرون
عالاقل هذولا تاخذ من وراهم اجر اما الثانيين اثم الله يغفر لنا


الهاوي ارجع لوحده من مواضيعك الي كتبت فيها حلول للارق

الا صح! انت محمد ولاعبد الرحمن؟

يا حظك تحبه لك 7 سنوات من قدك وانا شهر وتخب

تقبل مروري

إقتباس الصراحه وللاسف الشديد ان 90% من هالجيل ضااااااايعين و تفكيرهم محدود جداً ، ما عندهم احساس بالنعمه ولا يعرفون يشكرونها..

من جد ..اتفق معك بالوصف .. بس النسبة اتوقع واتمنى ان فيها مبالغة

تذكر قصص الف ليلة وليلة

شهبندر التجار من يوم تجيه الاموال يبني في هالقصور ويجمع جواري ومرجان

وفي النهاية يطلع دلخ وبطنه متفوخ .. رقص بالليل ونوم بالنهار

لا علم ولا عمل ولا شغل ..بس عالة ع الدنيا

واذا جاو الغزاة طبوا على ديرتهم واحتلوها كانها شربة مية


شفت ذا الوصف اللي فوق،

مدري اذا فيه مبالغة بس في ناس في مجتمعنا صايرة نسخة من كذا


قال تعالى: (وإذا أردنا أن نهلك قرية أمرنا مترفيها ففسقوا فيها فحق عليها القوم فدمرناها تدميراً )

قال عليه الصلاة والسلام: ((لا إله إلا الله، ويل للعرب من شر قد اقترب، فتح اليوم من ردم يأجوج ومأجوج مثل هذه، وحلق بإصبعه الإبهام والتي تليها، قالت له: يا رسول الله أنهلك وفينا الصالحون؟ قال: نعم إذا كثر الخبث))


مشكوووووووووووور سنيور الهاوي

أسلوب جديد من أساليب الاحتيال انتشر بشكل كبير ..
تدني مستوى الوعي لدى المتلقي يجعله يهتم بمثل هذه الأمور ...

ولو كنا واعين بالدرجة المطلوبة لما انسقنا خلف هذه الترهات ..

الهاوي دمت للواقع ملامساً ..

تغريد

هلا ومسهلا فيك..

إقتباس عسى بس انبك ضميرك على الي قطعت شبوكهم

شبوك !! أي شبوك يا تغريد لست فاهم شي >>>>> يمدحون ضرب الحوِله بهالمواقف >>>>أشك انك تعرفين وشلون ضرب حوله

إقتباس وحده من زميلاتي متصله علي تبكي تقول يومين ابغا انام مو قادره

لا حول ولا قوة الا بالله تبكي!! قولي لها تترك المناكير وتطويل الظفور وتقرا قرآن وتصلي لها ركعتين واذا خلصت تكلمك ، واذا ما قعدت تضحك افلقيني ببلكه

إقتباس محمد يحب عبد الرحمن ولا عبد الرحمن يحب محمد؟ مافهمت

سبحان الله ما تغيرين طبعك لازم تلقين شي ما فهمتيه

إقتباس اش شعورك لو طلع 1.5%

ابترك له البيت وامشي

إقتباس الهاوي ارجع لوحده من مواضيعك الي كتبت فيها حلول للارق

كنك داريه اني طبقت نفس الخطوات ونمت

إقتباس الا صح! انت محمد ولاعبد الرحمن؟

انا القلب المتيم المحلوت في البركاني


تشكراتي على مشاركتك وتواصلك


_______________________________________



دلع-20

إقتباس والا تتوقع الي يرسلون علشان يشوفون هالخرابيط لهم عقول؟؟؟ مستحيل والأدهى والأمر نصهم من الشعب السعودي

اي والله هذا اللي يحز بالنفس ان نصهم من السعودية!! لامبالاة وقل تربيه وترف ماله سنع ، تلقين ثلاث أربع مراهقين ببيت واحد وكل واحد منهم عنده تلفزيون وريسيفر بغرفته وكل واحد معه جوال اذا ما كان جوالين!!

إقتباس مااتوقع عندها هالكميه من الجهله.؟؟

لا وانا اخوك بالعكس عندنا عدد كبير من الشباب والبنات اللي رايحين وطي ولا نرجي منهم شي ينفع ، ما غير عقولٍ فاضيه لو حطينا فيها ديزل شربته، غير ان أمورهم زينه ومقتدرين مادياً ..

إقتباس ,, ندفع لهم علشان ينصبون علينا!

هنا مربط الفرس وهذا هو أكثر شي رافع ضغطي يستسخفون عقولهم عينك عينك وهذولا مبسوطين يدفعون وما عندهم مشكله


الله يسلمك وتشكرااتي لمشاركتك


_______________________________________


ملـــــ الهلال ــــك

إقتباس يا حظك تحبه لك 7 سنوات من قدك وانا شهر وتخب

قل لا اله الا الله لاتنحتنا وبعدين شهر عسل أحلى من 7 سنين طحينيه;)


تشكرااتي لمشاركتك


_______________________________________


سهل

الله مير يحييك ويبقيك ، هلا وغلا بالشايب النشيط >>>> ما شاء الله تبارك الرحمن

إقتباس اجل تحب التايب من ورى الشلهوب اشوفه جته اصابه ..

بس يعجبك التايب اذا شافني غارق مع الشلهوب يسوي باص عيون يقالي مناااب لمكم

إقتباس ما شاء الله عليك تصلح امام خطبه بمسجد محطه على الطريق السريع

مالك حق

شف لي تكفى مسجد محطه بس يصير فيه بيت للأمام بيني وبينك ماسكه معي هاليومين عرس

إقتباس والله يهدي هالمرتزين على قنوات الشات اللي تشعرك بالقهر وانت بس تشوف من كثر هالرسايل ( ما ودك نفتح لنا قناة )

آآآمين الله يهديهم حرااام أوقاتهم وفلوسهم تطير على مسخره..

ومن ناحية مشروع القناة والله ياهو يبي يدر علينا مصاري ونبدا نطق هالبشوت وراح الشيخ سهل وجا الشيخ الهاوي وطال عمرك والسامعين ..

إقتباس وبالنسبه للمساكين المحتاجين والله الريال ما يضر

الا ينفع ويدفع البلاء ، لكن حنا الله ما غير ناكل ونشبع ونفسق وناسين ان فيه حولنا ناس محتاجه العيش..

تسلم يابعدي وتشكراات على المسمار عل الله ينفع بخطيب المحطات ويرزقني واياك على قدر نياتنا

_______________________________________




راااجع للغالين باذن الرحمن ،،

موضوع مهم بقالب فكاهي<<< اعقب

والله طرح رايع

بس ما أعرف أناقش ولا كان حجرت لك

بس تدري وش اكتشفت

إن عمرك فوق السته وعشرين

ما تبي تعرس ياوليدي

وتعزمنا