#1  
قديم 19/03/2007, 08:10 PM
زعيــم مميــز
تاريخ التسجيل: 16/10/2005
مشاركات: 15,355
سعــيدان و الدحمي من حــارتهم للندن !!

السلام عليكم و رحمة الله و بركاته ,,

بسم الله الرحمن الرحيمـ ,,

هلا هلا كل واحد بمكانه تكفون بلا حب خشوم ,, يا سحيمان صب القهوة للرجاجيل و صب العصير للحريم <<------ ما انصحكم تشربونه لان عصيري يا [ مرة ] يا [ حلتيتة ]

و اذا كنت متطور مرة فحيليب نياق يحبه قلبك طازج من الناقه للثلاجة قصدي من الناقه للخشة على طول ,,

منب مطول عليكم و أبدخل بسالفتنا :_

أجتمعوا البزران حول الجدة بعد صلاة المغرب و النوم يلعب بهم لعب ,, ذولاك بزران اول موب مثل بزراننا الله يخلف الواحد ما ينام الا بعد الفجر و هالشمس ما يشوفه مدري وش لون يبي عظامه تكبر و تنمو و تصير قوية ,, كلهم عايشين على النيدو !!

المشكلة ان النيدو صار منتج دنماركي !! وش لون يعيشون !!

[ احسكم تقولون يالله لك الحمد على نعمة العقل الحين البزران ما يعرفون الصلاة عشان يعرفون ان المنتج الدنماركي حرام ,, اجل اخوي اقوله رح توضآ خل نروح الصلاة يقول على وضوء متوضي الشهر اللي راح ! ]

المهم قالوا يا جدة قولي لنا حكاية تكفين ..

قالت الجدة سم سم يا عيالي تامرون امر بس هاه ما اوصيكم لازم بعد القصه تمرخون رجليني

قالوا البزران : موافقين بس لا تكونين داهنته بفكس و فازلين و احتمال جيلوسيد ؟!! <<----- حشآ مفاعل نووي ذا

قالت الجده : ابد ما حطيت شي اليوم ,, قضآ برميل الفازلين اللي جابته لي ام سلطان قبل امس ,,

المهم ,,

أبحكي لكم قصة سعيدان و الدحمي من حارتهم للندن !

بسم الله ..

***

الشخصيات :_

سعيدان : شيطان و عليه ضروس و لا ضروس شغالتنا يحب عنز جده !

الدحمي : اخو سعيدان و رفيق دربه شيطان زي اخوه و يحب الحمام !

***

دخل ابو سعيدان على عياله و لقا كل واحد شخيره و لا كنداسة ددسن غمارة موديل 30 ما قبل الميلاد !
بس الابو كان يحب شخيرهم لانه يصحيه لصلاة الفجر ,,

و ناظر الدحمي لقاه مدخل رجله بخشة سعيدان و دالقن خشته و يشاخر زي اخوه ..

قال الابو :_ سعيدان الدحمي قوموا جعلكم للمضراب اللي يضرب روسكم .. قوموا صلاة الفجر ,,

سعيدان :_ اووووه يا يبه خل ننام شوي ترى حتى الديك تووه يشاخر و انت جاي تقومنا .. ما امدى سعيدان يكمل كلامه الا و يصكه ابووه برجله لين كمل على سنونه اللي بالرفرف الامامي ,,

طار واحد من الضروس و دخل بإثم الدحمي و هو دالقن خشته و نايم ,, و مار يغص من كبر الضرس و بدا يكحكح و مار يجي سعيدان و يضربه مع ظهره لين طلعت عيونه من محجريها و قال اشهد الا الله الا الله ,,

و بعد كثرة تطبيل طلع الضرس ,, لكن المشكلة ان العامود الفقري حق الدحمي يطلبك الحل لكن ما يخالف متعودين الشباب

راحوا صلوا الفجر همن رجعوا للبيت و لقوا امهم كالعادة مسنعة القهوة و التمر و يجونك الشباب و بسم الله و قحن بالقهوة و لا هم حاسين بالحرارة لعبنو ابليسهم تماسيح ما يحسون

و يقحنون بالتمر حتى مع العجلة اكلوا العبس و غصوا و صار كل واحد يضرب ظهر الثاني عاد العامود الفقري حق الدحمي من حينه منعوج تقل رفرف كورسيدا مصدوم عاد بعد الضرب صار تقل عجين لكن برضه لا مشكله

قالهم ابوهم ياله ياله قووه للمزرعة ..

مشو للمزرعة و مع صباح الله خير قاعدين يسمعون زغزغة الغربان ,, <<------- كل العصافير اللي بالمنطقة نسفوه بالنبيطة

الدحمي راح لم الحمام يقصد بهن و يشربهم ماء بإيدينه <----- شكل الحمام تسمم لانه ايدينه ما يغسله الا بالشهر مره يجي يتوضآ همن يقعد على وضوء لين الشهر اللي بعده <<------ لا يكون اخوك بس

و سعيدان راح لم عنز جده و قعد يتغزل به و يأكله بإيده مطازيز من فضلة عشاء امس ,, [ احس العنز لو تكلمت قالت وراه المطازيز صار مر ؟! طبعا انتم تعرفون ليش .. ايد سعيدان زي ايد اخوه ] ..

و هي تبادله نفس الشعور و تأكله بكراعينه علف له شهرين ,,

و بينهم هم بهالمشاهد الرومانسية الا و يجي وقت المدرسة و يجي الابو و يشوتهم و يقول قدامي على المدرسة ,,

و قابل المدير بطريقة و قال له حكمته المشهورة ,,

[ لك اللحم و لنا العظام ]

دخلوا الشباب الفصل لقوا خويهم المتطور سلمان .. راحوا لمه و طبعا بأخر الفصل مكانهم .. و ما في كرسي بس ماصه .. لانه الله يسلمكم ذولا ما عمرهم قعدوا دايم واقفين من كثر الشغب !! ..

دخل إستاذ الدين و قال السلام عليكم و رحمة الله و بركاته ,,
قال سعيدان هلا و الله .. و ما درآ الا الزبيريه جايته ماسحه الطبلون و على راسه , و ما درو الاخوان الا و الزبيريه منقسمه نصين من راس سعيدان اليابس

عصب الاستاد و قال خلك زي ما انت واقف و ارفع ايدينك رغم اني شاك انك تبي تطيح لانك بقره و البقره لازم تتكي على اربع رجول

المهمـ ,,

امس اخذنا درس الوضوء .. يا الدحمي وش حكم الصلاه بدون وضوء ؟!!

الدحمي : مكروه يا استاذ ..

قال سعيدان بصوت خافت ترى زعل ان طلع كلامك صح .. اجل مكروه و انا و وجهي لي خمسطعش سنه اتوضى بالشهر مره !! <<----- خوينا عمره 15 و قد الفحل

الاستاذ : لا يا شيخ يقولون انه مستحب ؟!!

الدحمي : آووووهـ و الله اني كنت شاك يا استاذ

دقت الحصه و طلعوا خويانا و قعدوا مع بعض للفسحه <<------- الفسحه بعد الحصه الاولى لان الفحول ما يقدرون ينتظرون ثلاث حصص بطونهم ما تستحمل و الله ان تنقلب المدرسه اجراس من صوت بطونهم ..

سعيدان معه سندويش بيض متقاسمه مع اخوه الدحمي ..

جايبين مسطره عشان يقيسون الصاموليه و ما يجي احد ياخذ اكثر من الثاني ,, <----- لو تشوف دقتهم بالقياس وش لون .. صاروا دوافير بالرياضيات يا شيخ

و لا يوم جو يقصونه جابوا منشار كهربائي عشان يقصه صح ,,

طبعا السندويشه قضت بلمح البصر .. لعنبو ابليسهم تحسهم اكلوا قطن ما امداهم حطوه بإثمهم الا و هي ذايبه ,,

يوم قضو قعدوا يناظرون خلق الله ..

سعيدان : يا سلمان وش قاعدن تاكل ؟!! و وراه صاموليك مدوره تقل دوار .. لا يكون استاذ الرياضيات قاصن العجينه بالفرجار حقه ؟!!

سلمان : يا هدر هذي همبرغر ,,

سعيدان : وش الهم هم هم هم بقر

سلمان : و الله ما البقره غيرك .. اسمه همبرغر .. خل اكتبه بورقه عشان تعرف تقراه

سعيدان : ياخي حل عن سماي انا ياله ياله اقرآ اسمي و اتعتع به و انت جاين تقول هم هم هم بقر

الدحمي داخل عرض :

شباب وش رايكم نهج بس ؟!!

سعيدان شمر الثوب و قضآ و سلمان قعد يشاور نفسه و ما درآ الا سعيدان شايله و راميه فوق السور لعنبو ابليسه من تقل رامين كوره موب فحل .. المهم تسلق سعيدان و اخوه السور بلمح البصر ..

و كان فيه بعرصي متغبي وراء الجدار و قال ايهب ذولا بعارصه بمكاين بعد .. !!

قال سلمان : شباب قووه معي تراي شاري تلفزيون و جايبه بالتهريب بس لا تعلمون احد ..

سعيدان : وشو التلفزيون ذا ؟!!

سلمان : هذا يجيب لك العالم بشاشه صغيره ..

سعيدان : يعني اقدر اشوف مزرعتنا و انا عندك ؟!!

سلمان يحمد ربه و يقول : ايه بس انتم تعالوا

سلمان قعد يحتري رد لكن ما درآ غير خوياه سبقوه لم بيته ,,

دخلوا المقلط و شغلوا الدش و مار تطلع لهم قناه ارتيريا و اثرهم قاعدين يعلنون الاخبار .. و كانت مذيعه موريتانيه اللي تقول الاخبار ,,

سلمان غير و ما درآ الا البيت بدآ يهتز من كثر الصراخ من الدحمي و سعيدان كلن عطاه درزن سب على كيف كيفه و قالوا له يا غبي ارجع <<----- تحس انك بمدرجات الاتحاد , انواع الشتايم و كلها غير مفهومه

رجع سلمان و قعد يناظر وجيه سعيدان و الدحمي ..

لقاهم قاعدين يسابقون بعض من اكثر واحد يكب سعابيل .. لو انهم قاعدين بوادي كان مشى الشعيب من سيل السعابيل .. !!

[ بهالوقت سلمان راح يدور الطفاشات خاف يغرق ] <<----- اها يالخكري بأيامهم ما يعرفون غير الستبنه حقت كفر السياره

بعد ما انتهت الاخبار سعيدن و الدحمي بدو يوزعون ابتسامات و و قال الدحمي آآهـ يا قلبي .. و أسف يا عنز جدي صحيح اني حالف ما احب غيرتس لكن ماش ما اقدر ,,

غير سلمان و حط ام بي سي 2 [ طبعا هذي ام بي سي 2 حقت اول ,, ما يعرضون الفلم الا مقطعه كل اللقطات الاحم احم .. عاد الفلم تلقاه 6 ساعات يخلونه نص ساعه ,, لعنبوا ابليسهم لو تجي عجوز و تبان كراعينه حذفوا اللقطه و حطو عليه قفلين ]

و بينما هم مندمجين الا و تجيك ذيب الممثله البريطانيه اللي تطيح الطير من السما <<----- احسكم تقولون المطوع دج ,, ترآ مالي دخل انا مجرد راوي

بهالوقت ناظر سلمان الدحمي و سعيدان و لقاهم اغمى عليهم !! ..
















وش صار على سعيدان و الدحمي ؟ الباقي بالجزء الثاني بإذن الله لاني بصراحه تعبت و مالي خلق اكمل [ شباب لحد يقولي كمل الجزء الرابع حق المدرسه لاصكه بطراق اوكي ؟ ]

و السلام عليكم و رحمة الله و بركاته ,,

اخر تعديل كان بواسطة » الكناري الأزرق في يوم » 20/03/2007 عند الساعة » 04:59 PM
اضافة رد مع اقتباس
  #2  
قديم 19/03/2007, 08:16 PM
الصورة الرمزية الخاصة بـ Z I D A N E
زعيــم مميــز
تاريخ التسجيل: 27/03/2005
مشاركات: 5,510
أخيرا شفت لك

موضوع << أمزح

الله يرجك رجا مبرحا

والله إني فطست ضحك

وبإنتظار الجزء الثااني

يا

نايف

الله يعطيك العافيه

والله أنا شاك إنك

فليسكوو

على فكره توقيعك معجبني

ياخي أحس فيك خير
اضافة رد مع اقتباس
  #3  
قديم 19/03/2007, 08:19 PM
زعيــم مميــز
تاريخ التسجيل: 22/10/2005
المكان: شبكة الهلال (قلب) ..
مشاركات: 3,413
ههههههههههههههههههههههههههههههههههههههههههههه الله يرجك

ويعطيك العافيه على قصة سعيدان والدحمي
اضافة رد مع اقتباس
  #4  
قديم 19/03/2007, 08:27 PM
الصورة الرمزية الخاصة بـ الـمـشـاغـب
مايسترو المجلس العام
تاريخ التسجيل: 18/02/2005
المكان: كاشت مع ويلهامسون بين المروج :$
مشاركات: 7,060
يالييييييييييييييل....!!!

كل ذا موضوع؟؟؟؟؟؟؟؟؟؟!!!!

طيب طيب...!!
اضافة رد مع اقتباس
  #5  
قديم 19/03/2007, 08:40 PM
زعيــم مميــز
تاريخ التسجيل: 16/03/2006
المكان: الرياض
مشاركات: 2,368
كع كع كع كع ك كع كععععععععععععععععععععععععععععععععععععععععععع

والله فطست من الضحكـ اجل خقوو على موريتانيه ياحليلهم هععععع

كمل كمل
اضافة رد مع اقتباس
  #6  
قديم 19/03/2007, 08:50 PM
زعيــم مميــز
تاريخ التسجيل: 05/05/2005
المكان: R ! y a d h
مشاركات: 2,831
ههههههههههههههههههههههههههههههههههههههههههههههههه

الله يرجك رجاً مبرحا

الكناري الازرق وين موهبتك ذي من زماااااااااااان

اثاريك منسم

اقسم بالله بغيت اموت

وانت وضروس سعيدان السبب

اقسم بالله انها كانت قافله معي

الله يوسع صدرك مثل ما وسعت صدري
اضافة رد مع اقتباس
  #7  
قديم 19/03/2007, 09:07 PM
زعيــم مميــز
تاريخ التسجيل: 19/01/2006
المكان: ســواار المقبـــره !
مشاركات: 5,409
يادب انا فاضي اقراء !!!!

وقتي من ذهب
اضافة رد مع اقتباس
  #8  
قديم 19/03/2007, 09:10 PM
الصورة الرمزية الخاصة بـ الهنوووف
عضو استشاري للمجلس العام
وعضو تحرير مجلة الزعيم
تاريخ التسجيل: 18/01/2005
المكان: زاوية ارى الناس ولايروني
مشاركات: 11,542


منتب سهل يالتسناري والله
اثاريك كاتب روايات :p منتاز

على سالفه الي انهبلوو على المذيعه اول الخير قطرة >>>صح المثل خبري به مطر:p
هذي ملامح الانحراف
موريتانيةبعدين تتوسع مداركهم وهكذاا :p

اقول اها بس تحسمنا وبعدين تقول تعبت
مانيب احب المرمطه ترى والانتظــار
يالله بسرعه الجزء الثاني الله لايهينك ولك مني تسناري لونه زرق وابيض:p هديه مني

اخلص علينـا


الهنوووف


كانت

هنا

ورحلت
اضافة رد مع اقتباس
  #9  
قديم 19/03/2007, 11:14 PM
زعيــم مميــز
تاريخ التسجيل: 17/03/2002
المكان: الرياض
مشاركات: 2,196
إقتباس
ما امدى سعيدان يكمل كلامه الا و يصكه ابووه برجله لين كمل على سنونه اللي بالرفرف الامامي ,,

طار واحد من الضروس و دخل بإثم الدحمي و هو دالقن خشته و نايم ,, و مار يغص من كبر الضرس و بدا يكحكح و مار يجي سعيدان و يضربه مع ظهره لين طلعت عيونه من محجريها و قال اشهد الا الله الا الله ,,

و بعد كثرة تطبيل طلع الضرس ,, لكن المشكلة ان العامود الفقري حق الدحمي يطلبك الحل لكن ما يخالف متعودين الشباب

>>>بطنها عورتها من الضحك

كمل
اضافة رد مع اقتباس
  #10  
قديم 19/03/2007, 11:26 PM
زعيــم مميــز
تاريخ التسجيل: 23/04/2004
المكان: بين النجوم
مشاركات: 4,461
الكناري عندي اختبارات ابرجعلك بعدييييييييييين
وثاني من عادتي ان اقرى القصص كلها ما احب نظام الاجزاء
فانتظر لين ما اقرا
تشــــــــاو
اضافة رد مع اقتباس
  #11  
قديم 20/03/2007, 02:37 AM
مشرف سابق في منتدى المجلس العام
تاريخ التسجيل: 17/12/2000
مشاركات: 8,956
يا سلام على الكناري لا غرد ..
موضوع شيق وبانتظار التكمله
اضافة رد مع اقتباس
  #12  
قديم 20/03/2007, 04:59 AM
زعيــم مميــز
تاريخ التسجيل: 21/02/2005
المكان: الصين مؤقتاً
مشاركات: 1,663
وعليكم السلام ورحمة الله وبركاته

يالله حيوه واسعدوه <<< بالقصمنجي

ازيك عامل ايه <<< قلبنا مصري

شو هيدي الحكايه عم تهوس كتير <<< خربناها بالشامي

<<< استر ماواجهت تراها الفجريه الحين





تطورات والله وصار يعطينا حركات تشويق بعد

عشانك ماصفيت لنا القصه كلها خلني افصفص لك الرد على هالجزء :p بس عاد انهج علينا ترى اكره ماعلي الانتظار



إقتباس
موافقين بس لا تكونين داهنته بفكس و فازلين و احتمال جيلوسيد ؟!! <<----- حشآ مفاعل نووي ذا

ليش تضحك
ترانا نسويها ... وباقي إضافات عليها بعد


إقتباس
و مار يجي سعيدان و يضربه مع ظهره لين طلعت عيونه من محجريها و قال اشهد الا الله الا الله ,,

هذي مدري جت بالغلط منك:p ولا الدحمي عجز يطلعها من قوة الضرب اللي جاه


إقتباس
و يقحنون بالتمر حتى مع العجلة اكلوا العبس

ههههههههههههههههههههههههههههههههههه
ههههههههههههههههههههههههههههه
أجل التمر ينقحن


إقتباس
قال سلمان : شباب قووه معي تراي شاري تلفزيون و جايبه بالتهريب بس لا تعلمون احد ..

أما قوه منين طلعتها حقتي ذي:p


إقتباس
لقاهم قاعدين يسابقون بعض من اكثر واحد يكب سعابيل .. لو انهم قاعدين بوادي كان مشى الشعيب من سيل السعابيل .. !!

ياحياة الشقى



إقتباس
وش صار على سعيدان و الدحمي ؟ الباقي بالجزء الثاني بإذن الله

أكثر من كذا تشويق ماشفت




لا تبطي علينا يابطل




سلاااااااااااااااااااااااام ,,
اضافة رد مع اقتباس
  #13  
قديم 20/03/2007, 05:29 AM
موقوف
تاريخ التسجيل: 18/07/2005
المكان: بين حدائق العـــشق
مشاركات: 83
ههههههههههههههههههههههههههههه
ههههههههههههههههههههههههههههه



صراحه اول ماشفت الموضوع قلت ويييييييي هذا يبي له شهر
بس ماادري كيف بديت بالقراءه ولاقدرت اتركها كملتها للاخر...


المشكله عندي اختبااااار بس ما عليك مذاكره<<احلى يالدافورة..

يلا ابي ارجع من الجامعه واقرا الجزء الثاني<<لاتهتم تراها اليوم تخرج 4 العصر!!


بس من جد قصه خطييييييييييره

سلمت يا جدي على هالقصه الروعه
اضافة رد مع اقتباس
  #14  
قديم 20/03/2007, 06:29 AM
الصورة الرمزية الخاصة بـ ريم9
زعيــم نشيــط
تاريخ التسجيل: 18/10/2006
المكان: في صندقه!!
مشاركات: 711
مدري احس انك ماتقصدني انا وصديقتي صح ؟؟


إقتباس
دقت الحصه و طلعوا خويانا و قعدوا مع بعض للفسحه

فسحه فسحه واللي نايم يصحى <<< كلي تراب

إقتباس
جايبين مسطره عشان يقيسون الصاموليه و ما يجي احد ياخذ اكثر من الثاني

تهئ تهئ تهئ ذكرتني بصديقاتي ايام المدرسه لمن نجيب ورق عنب لا بقت وحده

ماعندنا تفضلى والله ان تاخذين اخرهااطيبها !! ماتشوف الا تشويت وفي النهايه

ياتطيح ولا تنثر وكل وحده تخز في الثانيه << امحق صداقه

إقتباس
و كانت مذيعه موريتانيه اللي تقول الاخبار ,,

طبعا مب انا!! لاحد يزعجني ويقولي شفناك في التلفزيون!!

إقتباس
[ بهالوقت سلمان راح يدور الطفاشات خاف يغرق ] <<----- اها يالخكري بأيامهم ما يعرفون غير الستبنه حقت كفر السياره

اهم شي الطفاشات !! الصراحه حتى حنا استخدمناها تشيل لك المويه

من دفه وحده !!

إقتباس
و أسف يا عنز جدي صحيح اني حالف ما احب غيرتس لكن ماش ما اقدر ,,

لا والله ماسامحك طول حياتي انت خاين خاين خاااين ...ابعد عن طريقي خلني

اشوف لي تيس ثاني.... دج << هذا الباب لمن تقفل

اما موضوعك كذا داج ...... بانتظار الدجه الثانيه.. عفوا اقصد الجزء الثاني
اضافة رد مع اقتباس
  #15  
قديم 20/03/2007, 08:40 AM
عضو سابق في إدارة شبكة الزعيم
تاريخ التسجيل: 11/04/2003
المكان: USA
مشاركات: 13,487
إقتباس
اذا كنت متطور مرة فحيليب نياق يحبه قلبك طازج من البعير للثلاجة قصدي من البعير للخشة على طول

مووضوع زين

بس مدري هذي غلطه والا انت متعمدها من متى والبعير يحلبونه
اضافة رد مع اقتباس
   


إضافة رد

أدوات الموضوع
طريقة عرض الموضوع

قوانين المشاركة
غير مصرّح لك بنشر موضوع جديد
غير مصرّح لك بنشر ردود
غير مصرّح لك برفع مرفقات
غير مصرّح لك بتعديل مشاركاتك

وسوم vB : مسموح
[IMG] كود الـ مسموح
كود الـ HTML مسموح
Trackbacks are مسموح
Pingbacks are مسموح
Refbacks are مسموح



الوقت المعتمد في المنتدى بتوقيت جرينتش +3.
الوقت الان » 12:38 PM.

جميع الآراء و المشاركات المنشورة تمثل وجهة نظر كاتبها فقط , و لا تمثل بأي حال من الأحوال وجهة نظر النادي و مسؤوليه ولا إدارة الموقع و مسؤوليه.


Powered by: vBulletin Version 3.8.7
Copyright ©2000 - 2024, Jelsoft Enterprises Ltd

Google Plus   Facebook  twitter  youtube