بسم الله الرحمن الرحيم

مرحبا بكم اخواني الزعيميون واخواتي الزعيميات في مشاركتي الاولى في منتدى المجلس العام جعله الله ذخرا للوطن والمواطنيين ونفع به الامه الاسلاميه والعربيه ولا ننسى اخواننا واخواتنا الناطقين باللغه العربيه في ارجاء المعموره

ادري نصكم يقول في نفسه ... يالله لا تبلانا .. وش يبي ذا اللي قاعد يتميلح ويستخف دمه !!
ويمكن البعض يقول... عطوه فرصه !! يمكن يكون عنده سالفه !!
واحتمال ان البعض لم يصل لهذه السطور بحكم انه صك الموضوع بكل بساطه !!

خذيت اليوم فرّه على منتدى المجلس العام ( على غير العاده ) !!
ولقيت والله مواضيع توسع الصدر عاد مسكت غلط الا اكتب موضوع احاول اونسكم فيه

في البدايه ..

ذهلت وانا اقرا موضوع زواج ريم بنت الوليد !!
الله يوفقهم ويسعدهم بس ماكان ذا العشم يالوليد !!

اذكر فيما اتذكر ان الوليد وعدني انه بيزوجني بنته بس الله يصلحه ماعطاني فرصه ( اكوّن) نفسي..

حتى اسألوا صديقي فهد كان موجود يوم انه يوعدني !!

مره ثانيه ادعي لهم بالتوفيق والله يبارك لهم....

لقيت مواضيع كثيره وجدت تفاعل كبير من الاعضاء في هالمنتدى الرائع فعلا ... وحبيت اطرح موضوع لعل وعسى يلقى قبولكم ...

ياريت كل واحد منكم يذكر موقف طريف مر عليه ... يعني عمرك ماحسيت انه ودك الارض تنشق وتبلعك ولا تنحط بهالموقف!!

للتشجيع ابذكر لكم موقف مر علي قبل 5 سنوات تقريبا.....

كنت ايامها ادرس بجامعه الملك فيصل في الدمام وكنت ادرس في الفصل الصيفي ...( يعني عزّ الحر) ومايحتاج اوصف لكم حر الخبر ورطوبتها ...

كان عندي فتره غدا ساعتين عاد انا قررت ارجع البيت وارقد تحت المكيف !!

اركب السياره وكأني راكب فرن... الله يكفينا شر جهنم ( قولوا امين) ومن زين الحظ المكيف مايبرّد !!

تخيلوا الاخلاق وقتها !!

واحذف الغتره في حضني واكلم الوالده الله يحفظها عشان تشغل مكيف غرفتي وتصك الباب وافتح الشبابيك وطيران على البيت !!وكل اللي اشوفه في الطريق هو سريري والمكيف يضرب فوقه

وصلت البيت اخيراااا... واصك الشبابيك وانزل ركض للبيت تقول خبل...

شوي واشوف عجوز فوق ال60 لابسه (برقع) تأشر لي !! عاد وقتها الاخلاق مهيب لهناك واخر شي ابي اسويه اني اوقف لطراره!!

قمت ااشر بيدي واقول : الله يعطيك الله يعطيك...

قربت مني العجوز وقالت...

ياوليدي منيب اطّر منك... بس ترى غترتك طاحت على الارض يوم انك تنزل من السياره !!!

انتم متخيلين الموقف !! والله وجهي قلب مليون لون ...
المهم العجوز مشت وانا مافتحت فمي بكلمه !! خذيت غترتي ولاقدرت ارقد من تأنيب الضمير ...






اكرمونا بردودكم .. وتعليقاتكم... ومواقفكم الطريفه ...

وان شاء الله مااكون ثقلت عليكم ...


ودمتم سالمين..
D