بسم الله الرحمن الرحيم !!

بداية الحمد لله على كل حال والتعادل في هالمرحلة صحيح انه مؤلم لنا ولتطلعاتنا لكنه افضل من التعثر في المراحل الجاية !!

بصراحة مدري ليه كتبت الموضوع !!
من عقب مباراة الكويت ودي ارد في كل موضوع انكتب لكن ماكان لي خلق اكتب اي كلمة !!
كانت صراحة صدمة كبيرة لي من مستوى الهلال ومن اللي كنت وكنتو تفكرون وتحلمون ان الهلال بيسويه !!

عموماً الموضوع فيه بربرة عن كم نقطة اذا مليت من وحدة نط للثانية !!

-البداية من مستوى الهلال بشكل عام هالسنة !!
وابتكلم عن الدوري فقط !!
لعبنا إلى الحين 16 مباراة في نظري ولا مباراة باستنثاء مباراة الشباب ارضتني كمشجع محب للهلال !!
اغلب المباريات يانفوز بحظ يا ان لاعب يتألق بشكل لافت وينهي المباراة !!
اكيد بيجي واحد وبيقول هذي الكورة ياحظ يا لاعب يشيل الفريق .. انا معه بهالكلام لكن تصدرنا اللي جاء بالبركة جاب اثره الحين وشفنا كيف مستوانا من سي لاسواء !!

انا ماادور المتعة ولا ابحث عنها اذا كانت تتعارض مع الفوز .. لكن ابي مستوى يطمني ابي تجي الدقيقة 70 وانا مرتاح ومتيقن ان فريقي بياخذ الـ 3 نقاط !!

كل مباراة وبدون مبالغة إلى اخر دقيقة والواحد حاط يده على قلبه وينتظر
هدف علينا !!
هالموسم فرق اصغر من صغيرة بالنسبة للهلال لعبت فينا لعب !!
اغلب مباريات هالسنة نفوز فيها من عنق الزجاجة وبالكثير بفارق هدف واحد !!

الحزم فزنا 1/0 والاياب خسرنا 2/0 !!
الفيصلي وفي اخر الدقايق فزنا 1/0 والله يستر من الاياب !!
الخليج فوز طبيعي 3/0 وتعادل بالاياب !!
القادسية فوز 1/0 والاياب جاي !!
النصر 2/1 وكانت تعادل إلا شوي !!
الطائي فوز بملعنة 3/2 !!

طبعاً اللي يشوف هالنتايج يتوقع انها مع اندية تنافس معنا بالصدارة مايدري انه فرق النصف الثاني الاخير من الترتيب !!

- الاعداد السيء !!
بسيرو انا احمله مستوانا الحالي .. صحيح انه ماشي من اكثر من شهر لكن ارهاق اللاعبين وابتعاد الرديف عن جو المبارايات سبب لنا هالمصيبة !!
بسيرو الدور الاول كله اعتماده الكلي على 16 لاعب ولا يعترف إلا فيهم !!
وهالشي سبب لنا فجوة بين الاساسي والرديف !!
اقرب مثال بدر الدوسري و مباراة الكويت ولعبه كانه اول مرة يلعب كورة !!
طبعاً بدر معذور لاعب شاب وهذي يمكن ثاني مباراة له هالسنة وفي مباراة اسيوية ووقت صعب !!
ومايحتاج اذكركم بعد باحمد الصويلح اللي كان يفك ازماتنا كل ماضاقت ودخوله الايجابي المواسم الماضية اللي تحول الحين للاعب كل اللي يسويه الركض وبس !!
والكلام ينطبق على محمد العنبر !!
سعد الذياب الموهبة اللي يلعب مباراة وعشرة لأ !!
فهد سرور .. مشعل الموري وينهم هالسنة !!
كانو مصابين رجعو ولا شفنا احد منهم ولا ادري وش السبب !!

هذولي عماد فريقنا المستقبلي واللي بيسدون النقص لاي لاعب اساسي
ما أعطو الثقة !!
فكيف نطالب منهم اي شي وهم مغيبين !!
طبعاً ماانسى دمار لياقة اللاعبين وكثرة اصاباتهم !!
ومن يوم ماراح مادينا من النادي واللياقة الله بالخير !!

-ياسر .. الغامدي .. عزيز .. الشلهوب !!
لولا الله ثم هالرباعي كان الهلال مهو الهلال !!
غياب اي لاعب منهم يأثر ويفرق كثير !!
وهذا خلل بنادي كبير ويطمح لتحقيق الانجازات .. الاكيد انه مو معقول ان الاحتياط زي مستوى الاساسي .. لكن المصيبة بالهلال الاحتياط ولا حتى ربع الاساسي !!

ياسر ماله بديل ويغالط نفسه اللي يقول غير هالكلام !!
عمر .. عزيز برضه مالهم بديل !!
صاحب الـ 13 مليون الغنام للاسف من اصابة لاصابة ومستواه اذا لعب مهو ذاك الزود !!
البرقان الله يشفيه .. و الهليل .. والدوسري !!
برضه مستواهم مايأهل باستنثاء الدوسري اللي لو اعطي الفرصة كاملة بيبدع والقريب منكم للنادي يسال عنه يوم كان يلعب بشباب النادي !!
الشلهوب وبديله التمياط اللي للاسف مستواه دمار !!
مستواه متراجع بشكل غريب ولا فيه اي مبرر لهالشي !!
المفروض السنة الماضية يكون مستواه سي مهو هالسنة !!
السنة الماضية كان مشغول بتجديد العقد وكاس العالم ومع هذا مستواه كان حليو !!
هالسنة ماعنده اي مبرر عقده وتجدد وبشروطه ولافيه اي شي يشغله !!


- الادارة !!
نبدأ براس الهرم محمد بن فيصل !!
طبعاً انا اتكلم هنا مع هلاليين والكل اتوقع ماينكر اللي قدمة ابوسلطان بالسابق ومازال يقدمه للنادي !!
ابوسلطان للاسف فيه له طلعات سلبية على النادي وانا كنت للاسف من اللي يكابرون قبل وكنت اقول هالشي مايأثر وايجابياته تغطي كل هفواته !!

بداية من الابتعاد المتكرر عن النادي هالسنة بدايتة غاب وبنصه غاب والعذر اجازة !!
على عيني ورأسي يأخذ اجازة ويريح باله خاصه انه الرئيس الوحيد اللي مر علينا بالسنوات الاخيرة اللي ملازم للنادي بكل مباراة وحضوره اليومي
للنادي ومتابعته كل صغيرة وكبيرة !!
المشكلة بتوقيت اجازاته كانت بظروف صعبة للنادي وتشترط حضوره !!
غيابه الاخير والنادي يشكي من ازمه مالية كبيرة !!
غير ان النادي كان بيجيب مدرب ولاعب اجنبي والمفروض لاعبين سعوديين !!
هذي نقطة والنقطة الثانية تصاريحه !!
صحيح اني معه جزئياً بتصريحه الاخير بمباراة الكويت !!
لكني مني معه بان هالكلام يطلع عند الاعلام .. المفروض يكون قداام اللاعبين ويكون الانتقاد بالاسماء مهو مجرد تعميم !!
المخطى لازم يعرف غلطه ويصحح له ولا الباب يفوت جمل الحمد لله نادينا ماوقف على احد ولا هو موقف باذن الله !!
فيه ناس تخالفني بهالراي وتقول انه تعب وهو يوجه اللاعبين بينه وبينهم !!
واخر المواجهات كانت بمباراة الحزم اللي كان فيها النقاش قوي حسب ماوصلني !!

برضه تصريحه على اعضاء الشرف عند الاعلام وتراجعه بعده !!
اللي اعرفه ان الامير محمد تعب برضه وهو يكلمهم بينه وبينهم ويجيب وساطات لكن مافيه فايدة !!
فطلع بتصريحه للإعلام اللي نشوف انه جاب فايدة كبيرة وشفنا الاعضاء يتبرعون بمبالغ مهولة !!
من المكافات لكل مباراة من عمه الامير عبدالعزيز بن سعود !!
إلى الدعم القوي اللي وصله من ابوه وخاله فيصل بن سلطان بدون مايينشر بالاعلام واللي وصل لـ 17 مليون !!
هذا اللي اعرفه غير اللي يخفى عني !!
فحسب اللي اشوفه ان ابوسلطان حب ينشر مواجته وعتابه للاعبين للإعلام عشان تكثر عليهم الظغوط من الصحافة والجمهور واعضاء الشرف !!
وهذي رؤيته وتفكيره ونقول ان شاء الله يتحقق اللي يبي يوصله !!

** على فكرة وصلني من شخص ثقة ان ابوه الامير فيصل بن سعود
قاله لا تصرح للاعلام اذا كنت معصب وهالكلام بعد مباراة الكويت !!

خلصنا من الامير محمد ونبدا بالباقين ( ياكثر بربرتي ) !!
البابطين واستقالته اللي فرحتني بكل صراحة !!
عضو ضره اكثر من نفعه .. فاهم عضويته بمجلس الادارة بشكل غلط !!
يحسب الدعوة ترزز وطلوع بالاعلام ومقابلات بدون اي فايدة للنادي !!
مسك المجلس الثقافي وتركه ولاندري وش سوى لان المجال الثقافي مغيب اعلامياً !!
لكن من يوم مامسك مجلس الجمهور طلعت سيئاته !!
استلم المنصب وتركه بدون مايدفع ريال واحد للجمهور !!
بدون اي تنظيم وبدون اي دعم ولو معنوي لهم !!
واللي سمع تصريح المطرفي بالاخباريه يشوف حجم معاناة مجلس الجمهور معه !!
والصراحة من يوم مادريت انه صديق مستر فلاش وانا غاسل يدي منه
ولا لأ يبوفهد !!
التويجري والحسنة الكبيرة لمجلس الادارة !!
بصراحة نائب رئيس فاهم ومتمكن واتمنى من الامير محمد يخلي طارق يصرح اذا كان الهلال لاقدر الله طلع بخسارة او تعادل!!
الرجال اسلوبه زين ولايخلي عصبيته تأثر عليه !!


- المفرج المفرج المفرج !!
هاللاعب ماشاء الله عليه بديت احس ان احساسه مفقود !!
في النادي يسبونه في الملعب يسبونه ماادري شلون متحمل هالشي !!

اللي اشوفه ان فهد لاعب روح ومتحمس ويحب النادي والله يكثر خيرة !!
مثل الفريق من عام 1417 إلى الحين !!
مستواه جيد لكن مشكلة فهد يغلط غلطات كوارثية بكل صراحة !!
اللي اتمناه مننا كجمهور بالذات اللي يحضرون للملعب وللنادي انهم يشجعونه على اساس انه مصيبة ونرضى بالمقدر لنا !!
على الاقل إلى نهاية الموسم خاصة ان -طلعتة من النادي او تنسيقه او على الاقل يصير احتياط للصاعد المرشدي - قرار ما نوقش او بيصدر قريب !!
مثل هالكلام ينطبق على الدوسري بدر وعلى العنقري والتمياط !!
اللاعبين بالملعب ماله داعي نسمع صيحات عليهم ان كنا بنشجعهم هذا المطلوب ولا نسكت وبدون مانصير جمهور محبط !!


- الجمهور !!
طلعنا من مباراة الكويت والجمهور يحلف ويتوعد انه بيقاطع الحضور ولا هو مقبل للاستاد !!
بيني وبينكم هالشي له جانب سلبي وله جانب ايجابي !!
الايجابي لازم اللاعبين يحسون ان الجمهور مهو راضي وان كان مستواهم بهالحال الحضور الكبير ينسونه !!
السلبي الجمهور المفترض انه مع النادي بالحلوة والمرة والكبوة ماتخلينا
ننسى نادينا !!

فيه نقطة اللي هي عودة الجمهور للمدرجات !!
طبعاً الكل عارف ان الجمهور جاي للهلال ماجاء عشان رئيس ولا لاعب !!
لكن ماننكر ان الفضل بعد الله لرجعة الجمهور للامير محمد بن فيصل !!
رسايله على الجوال ومواضيعه بالمنتديات ومواقفه مع النادي تحرج الجمهور للحضور وهذي نقطة في بحر ايجابياته !!

اتمنى اشوف النقاش معى بالموضوع
ياسر2006