#1  
قديم 26/11/2001, 12:34 AM
زعيــم نشيــط
تاريخ التسجيل: 20/08/2000
مشاركات: 776
النكتة التي أضحكت جميع الشعوب .....


السلام عليكم ورحمة الله وبركاته ...
مساء الخير للجميع وللهلاليين خاصة ..

أعذروني أحبتي فربما خرجت عن النص قليلاً ولكنهم أرغمونا على هذا الأسلوب الساخر .

المعتاد في جميع الدول وجميع الحضارات أن لكل بلد مثل ولكل بلد قصص تاريخية ولكل بلد نكتة تضحك شعب ذاك البلد .. وهذا هو المتعارف عليه.
فلا يستقيم أن ترى سعودي يروي نكتة لصيني وبعدها تجد ذالك الصيني يتمدد من الضحك على نكتة السعودي ... ولا يستقيم أن ترى روسياً يروي نكتة لسوداني وبعدها ترى السوداني وهو لا يكاد يفيق من شدة الضحك .. وهكذا دواليك لكل بلد نكتة ....

نحن هنا سبقنا الجميع وأتينا بما لم تأتي به الأوائل (غير art) فقد أطلق مسئوولوا الأتحاد السعودي ممثلاً بلجنته الفنية نكتة وجدت أصداء لدى الجميع وضحك عليها كل شعوب الدنيا ...


فما عليك الا ان تختار اسم البلد وترى مذا فعلوا تجاه هذه النكتة!.

/\/\/\/\/\/\/\/\/\/\/\/\/\/\/\/\/\/\/\/\/\/\/\/\/\/\/\/\/\/\/



***الصين ***
في الصين جلس شايبين تحت سور الصين وجاهم واحد من بعيد ما يشوفون عيونه من الضحك وما يقدر يمسك نفسه
قالوا واش فيه هذا يضحك ؟ هذا له 20 سنة ما ضحك بعد ما ماتت زوجته أم ونق هو يونق الله يرحمها .. المهم وصلهم الرجال ابو ونق هو وقالوا له وراك تضحك واش السالفة ؟قال لهم فيه اتحاد كرة قدم قدم له نادي شكوى على لاعب مزور في عمره .. المهم قبلوا الإحتجاج بعد عشرة ايام دراسة تقول سكانهم مليار مثلنا .. قالوا طيب هذا عادي وما فيه شيئ يضحك .. قال لهم أصبروا
الله يهديكم اللي يضحك فيها أنهم قبلوا الأح..اوههههههههههه.. أيه كمل وبعدين .. أوهههههههههههههه.. الرجال يبي يموت علينا الحين من الضحك ويلحق زوجته الله يستر ..... خلاص وبعدين كمل أقبلوا الإحتجاج انت واش اللي يضحك الحين ... اللي يخليني أموت من الضحك أنهم قبلوا الإحتجاج وثبتوا النتيجة على ماهي عليه . المهم الشيبان يحلفون انهم من أمس الى الحين وهم يضحكون
واللي يعرفونهم يقولون ان لهم 60 سنة ما فتحوا خششهم . ؟

/\/\/\/\/\/\/\/\/\/\/\/\/\/\/\/\/\/\/\/\/\/\/\/\/\/\/\/\




***الأسكيمو ***

أما في الأسكيمو يقولون ان فيه برد عندهم بالحيل وميتين من البرد المهم بحلوا بهم واشلون يدفونهم لأن هالسنة جاهم برد غير طبيعي حطوا لهم حطب وكثروا الملابس عليهم وهم يرتجفون وما يزيدهم الا برد والهواء عليهم يحلفون انه نسري من شهرين المهم وهم بها الحال جاهم واحد من بعيد ما عليه الا فنيلة علاقية وشورت قالوا ...عمى....عمى ... هالخبل يبي يموت من البرد امسكوه
لا يقمص قلبه من البرد بعد جهد وركض امسكوه وقالوا له وراك انت تبي تنتحر ؟ ياخي علشان عيالك لا تموت الحين أصبر شوي وجع يفضخ قلبك (بها اللهجه قالوها).. وما دروا الا الرجال يتصبب عرق وعرقان ويقول لهم شغلوا المكيف البارد على max الله لا يهينكم !! قالوا له انت مجنون رسمي واش فيك مكيف هالوقت والهواء نسري وحنا تصاكك حنوكنا هنا من البرد ... قال والله يا نا سمعت لكم نكتة
تموتكم من الضحك شرط بعدها تقومون كلكهم وتدعون هالملابس وانتم عرقانين قالوا علمنا واش هالنكتة اللي خلتك كذا ؟ قال في في الخليج اتحاد كرة قدم فيه لجنة فنية اوههههههههه. اهههههههه ..ايههههههههه.. طيب وبعدين ؟ وفيه نادي هناك مقدم على احتجاج بعمر لاعب مزور . اوهههههههههه ... وبعدين تراك ذبحتنا وحنا مقابلينك بها البرد ؟ قال اللجنة قبلت الإحتجاج ولكنه ثبتت النتيجة على ماهي عليه
. أوههههههههههههههههههههه.. ويقول المراسل اللي عندهم انهم يحلفون أنهم طلعوا من الخيمة مصاليخ ما عليهم شيئ ابد ومعهم مهاف وراحوا يسبحون يتبردون .ذبحهم الحر في الأسكيموا ؟

/\/\/\/\/\/\/\/\/\/\/\/\/\/\/\/\/\/\/\/\/\/\/\/\/\/\/\/\



*** جنوب كليفورنيا***

في جنوب كليفورنيا قبل بقالة ابو حسن على يدك اليمين في طريق صحراوي لف معه وعلى طول لا تلف يمين ولا يسار يبي يجيك قرية أم الحزوم هذي القرية مافيها الا اطفال وعجز وشيبان وشابين المهم طلع الشابين يصيدون ضبان وتركوا القرية مافيها احد غير هالعجز والبزارين جاك ابو خشم (قاطع طريق الله لا يوريك ) وذبحهم كلهم وما ترك فيها أحد وما درى ابو الشباب الا وواحد من الشابين ماسكه من رقبته
ورافعه فوق وهو يلعن ابو خامسه ويقول له وراك تسذا الحين واش يقالك أنت ؟ ليش تذبح بزارينا وعجزنا الله ياخذ وجهك.. قال العذر من الله ثم منك والله ما دريت انهم لكم أحسبهم مجدوعين هنا سبيل ... قال الحين اوريك منهو السبيل يا ابن الكل...... المهم علقوه الرجاجيل على الحبل ويبون يشنقونه وقبل ما يشنقونه يرمونه من بعيد بخرازه علشان يتعذب .... الهم الرجال اللي هو ابو خشم خاف
وقال لهم ابقولكم نكتة واذا ما ضحكتوا أذبحوني مرتين (على باله جاب جديد الحين ) المهم قالوا له يالله اخلص علشان نذبحك ونروح نشوف البعارين ... قال في في كنق دم أوف سوديا إريبيا اتحاد كرة قدم المهم في هالإتحاد لجنة فنية ( الله يسلم محاكيك ) قالوا طيب وبعدين ؟قال فيه فريق كبير هناك بالمرة قالوا عارفين مافيه غير الهلال ..قال ايوه وصلتوا لخير .... هذا الفريق مضلوم على طول
قدم احتجاج على لاعب مزور تاريخ ميلاده في البطاقة على اللجنة اللي قبل اشوي وبعد عشرة أيام أصدروا قرار قبول الإحتجاج شكلاً ومضموناً ....قالوا هذا القانون ما جبت جديد انت وخشتك ...... قال اصبروا اشوي تجيكم النكتة ... قالوا يالله أخلص علينا ..... قال بعد ما قبلوا الإحتجاج ثبتوا النتيجة على ماكانت عليه .... قالوا ثبتو ههههههههههههههههههههه....اووهههههههههههههههههه ....
الله ياخذ بليسك اجل ثبتهههههههههههههههههههههههه ....يارجال رح والله ما نذبحك يا شيخ الله يوسع صدرك بالعافية وراح الرجال وهو ينفض ثوبه ويقول الله يجزاكم خير يا اتحاد ال......... ؟


/\/\/\/\/\/\/\/\/\/\/\/\/\/\/\/\/\/\/\/\/\/\/\/\/\


***نيجيريا***

في نيجيريا قرية كل اللي ساكنين فيها سحرة ومشعوذين المهم فيهم واحد يقاله تونقا هونقا بونقا هذا أكبر السحرة
له بنية كلحه تقول كفر ليلة خمسطعش الله يصلح لنا وله العطا ....... هالبنية ذي سحره واحد ومات وما يدرون وين حاط السحر وبحلوا وين يلقون هالسحر ...... جابوا كل الشياطين اللي منا واللي منا وما لقو لها حل ....... ذبلت البنية وصارت مثل اللستك اللي مبنشر من المرض الله لا يبلانا ...... ابو البنت بحلاً بها البنت وما لقا لها حل ....... جاك شيطان صغير توه ما خط شاربه
...قال ان ابخلي بنتك تقوم الحين وهي
ما فيها الا العافية بس على شرط .....
قال اشرط اللي تبي الله ياخذ وجهك ...
.قال تخلين انا الشيطان اللي تستخدم دائما .....قال ما يخالف يالله بس بسررررعة لا تموت البنت الحين وتصير كفر سيكل من المرض ......... قال ابقولكم سالفة تبي تقوم البنت من السرير وهي ميتة من الضحك وتسلم من السحر ....
قال كان ياماكان في لجنة فنية في اتحاد كرة قدم (ما يبي يقول لأنه محلوف عليه من مشعوذ يستخدم هناك لبعض الفرق اللي انتم خابرين ... وهو مطلق ما يقول اسم البلد ) المهم قال في لجنة فنية في هذا الإتحاد قدم عليها واحد من الفرق هناك اتجاج على لاعب مزور بتاريخ الميلاد واللجنة هذا قبلت الإحتجاج شكلاً ومضموناً ولكنه ثبتت النتيجة ... جلس الساحر يضحك اوهههههههههههههه
وقامت البنت من السرير وهي ميتة من الضحك ورجعت له صحتها وصارت مثل كفر الطيارة من الصحة والعافية .... ؟


*****************************************
المعذر ة للجميع فلم أتعود الكتابة بهذا الأسلوب ولكن الواضح أنه الأسلوب المناسب لمثل هذا الموقف المثير للشفقة والضحك بنفس الوقت على حالنا وحالهم معنا .... اللهم لا تؤخذنا بما فعل السفهاء منا يا رب
  #2  
قديم 26/11/2001, 01:24 AM
زعيــم نشيــط
تاريخ التسجيل: 13/10/2001
المكان: u.s.a
مشاركات: 617
لا والنكته الي تموت من جد انهم قبلوا احتجاج لفريق الي ريسهم اقشر شكلا ومضموناوتعديل النتيجه والقضيه سيم سيم
بس مانقول الا حسبي الله ونعم الوكيل
  #3  
قديم 26/11/2001, 02:07 AM
زعيــم مميــز
تاريخ التسجيل: 05/07/2001
المكان: الرياض
مشاركات: 5,074
ما دريت ياشاهين

يروى أنه في جزر الواق واق كاتب عليه أسلوب الله لا يضره متقدم على وقته.تدري وش اسمه؟ شاهين.

ماشاء الله عليك .
   

 

أدوات الموضوع
طريقة عرض الموضوع

قوانين المشاركة
غير مصرّح لك بنشر موضوع جديد
غير مصرّح لك بنشر ردود
غير مصرّح لك برفع مرفقات
غير مصرّح لك بتعديل مشاركاتك

وسوم vB : مسموح
[IMG] كود الـ مسموح
كود الـ HTML مسموح
Trackbacks are مسموح
Pingbacks are مسموح
Refbacks are مسموح



الوقت المعتمد في المنتدى بتوقيت جرينتش +3.
الوقت الان » 05:01 PM.

جميع الآراء و المشاركات المنشورة تمثل وجهة نظر كاتبها فقط , و لا تمثل بأي حال من الأحوال وجهة نظر النادي و مسؤوليه ولا إدارة الموقع و مسؤوليه.


Powered by: vBulletin Version 3.8.7
Copyright ©2000 - 2024, Jelsoft Enterprises Ltd

Google Plus   Facebook  twitter  youtube