:: هروب ميسو وكايدهم من السجن :: - نادي الهلال السعودي - شبكة الزعيم

الفيروسه الزرقاء · #1 07/03/2007, 01:09 AM

مرحباً الساع

.

..:: [ مدخل ] ::..

أعتذر لكم أني تأخرت فـ تنزيل هـ الموضوع

لكن شسوي الظروف الظروف

.. المهم اليوم عندي لكم قصة هروب إحدى الطالبات مع أحد طلاب جامعه الملك سعود

، إلا ع طاري هـ الجامعه يقولون اسحبوا العالميه منها

أفا بس أفا سحبوها ع حظي

يعني إذا تخرجت إن شاء الله شهادتي موب معترف فيها عالمياً

.

..:: الهروب الكبير ::..

ابد ماخذت هـ السبجكت من مسلسل

..

اثناء اجتماعاتنا فـ قاعة الاستشاريون - قسم النسائي :p ، اقترحت ميسو ع فكرة جهنمية

قالت : فيّو مليت وطفشت وانا مابعد تخرجت

وهـ الجامعه معقدة اموري وكل شهر لهم رأي ثاني ، مادري بيحطوني ع النظام الجديد وإلا القديم ... شرايك بـ هـ الخطة الجهنمية طبعاً مانيب قايلة مضمون خطة بنت عمي

علشان لأ تسوونها وتهربون

، قلت خطة تكتيكيه بس ماني طالعة معك

قالت ليش

امشي خل نهرب محد داري عنك
قلت لأ ابد انا احب كليتي

احب عليشتي مانيب طالعة إلا لما يفتحون الباب لي

---->> صه بس

قالت أفا مانتب ماخويتني ، تعالي بس معي بنهرب من الجامعة عن طريق مبنى 4 " عمادة والقبول والتسجيل " نروح نقتحم غرفة الملفات ونطبع سجلنا الاكاديمي وطبعاً نطقطق ع جهازهم ونزور وندحدر من البدروم ونطلع من مبنى 4 إلى مبنى 3 " التمريض " ونروح من الجسر ونطلع من عند كلية العلوم التطبيقية

ويادار مادخلتك شر

---> ماتحسون انها قالت الخطة

..

قلت : نووووب ماطلع الا لما تجي د. نادية أل الشيخ " رئيسة قسم القبول والتسجيل " وتعطني ملفي بين يدي وتقول تفضلي يـ فيّو ملفاتك ، ومع السلامة ودربك اخضر ---->> الاخيره مدري شلون جت فـ بالي

.

ميسو : هذا وانا ابي احررك من السجن ترفضين

الشرهه ماهيب عليك ع يوم رحمتك وقلت بنت عمي لازم تطلع معي ماارضاها تجلس تصارعهم لـ حالها

.

طبعاً صوت ميسو ارتفع

وموب من عوايدها ترفعه ، سمع صوتها كايدهم وهو مار من عند قاعة الاستشاريون القسم النسائي

قال وش السالفه

شعندكم تصارخون

فيّو سوي لي كوب شاهي وجيبيه لـ المكتب

قلت يصير خير

..

سويت الكوب الشاهي غصباّ ورأ خشمي ، لأن كايدهم عصب اتصل ع الغرفه وهو ينافخ وين الشاي

ماصار شاي ... ويقولون لك اتقي شر كايدهم إذا غضب

ياهو يعفس لكم الدنيا يسوي اشياء لا تخطر ع البال

- الله يكفني شره :p - .

صلحت الكوب وديته له وتوني حاطته إلا يقولي وش سالفة التحرير

منهوالمسجون ..
قلت هاه وشو مافيه احد انسجن قال تعلميني وإلا شلون

قلت كايدهم كم لك مسجون بـ الجامعه

قال مدة طويله وانا مسجون عندهم

قلت طب كم باقي مدة ويحررونك

قال كل ماجبت واسطة اتحرر استقعد لي واحد من هـ السورين

" ابد ماتقصد ذاك الجني من الجن

" قلت : طب وش رايك بـ اللي عندها خطة تحررك من السجن

قال ع يدك هاتي الخطة

ناديت ميسو قلت كايدهم بيهرب معك يـ الله اختبصي انتِ وياه ..

جلسوا اسبوع وهم يخططون وكل مااسال ميسو وش صار ع موضوعكم

قالت مانيب معلمتس مانتب هاربه معنا

..
مرت الايام تلو الايام .. وجاء موعد تنفيذ الخطة

،،

طبعاً فـ هاليوم عرفت ان ميسو بتهرب ليش

لأنها ماتدبر شي بـ عليشه ولازم تسأل الفيروفيلد عن مخطط عليشه

، تقابلت معها ووريتها الطريق الصحيح

.. وبعد ماسرقنا ملفها وزورنا وخلصنا فـ اخر اللحظات الهروب
راحت ميسو عند باب الجسر ولقته مغلق

الوقت صباح ومسكر موب فاتحينه

يـ ربيه ياميسو ماسويتي بروفه ع الهروب

، رحت لـ كافتريا مبنى 3 ونقزت فوقها

" بطله شي شي

" وامسكت ببنت عمي ونقزتها فوق الجدار .. هي فالحه تمشي ع السور وعليها عبايتها

موب مثلي ماجبت عبايه ضامنه اني مانيب طالعه من عليشه

، واحنا واقفين ع السور .. قلت هينا نفترق

انزلي من هـ الشجره ودحدري ع الشارع

.. اثناء وقوفي انا وبنت عمو لمحتنا وحده من هـ الفلبينيات وراحت وعلمت علينا وحده من اعضاء الهيئة .. جتك مسررررعه بـ السيارة انزلوا يـ الله

وميسو واقفه مبلمه اقولها اهربي تقول لأ خايفه مااقدر رجولي انشبت .. صارت رجل ع السور ورجل عند الشجره " برا الجامعه

" ..
نقزت من ع السور والحمدلله ماجتني اصابه

وامسكوني

وميسو مدري وشلون انقذت نفسها وكايدهم واقف برا بـ سيارته هارب من الدرعية وجاي يهربها من عليشه

، شلون هرب من الدرعيه الله اعلم ! لكن ترى ذا يروع ويخوف وارشح انه دخل ع وكيلهم وهدده لين ماطلعه من الجامعه

ماعنده وقت لـ خربت اخلاقه وخروا عنه :p .

المهم مسكوني وافتحوا معي تحقيق من اللي كانت معك وانا ماعترفت

يعذبوني

.. يضربوني

وملتزمه الصمت والسكوت

---->> فدائيه

حولوا امري إلى نادية ال شيخ .. قالوا ذي لقيناها واقفه ع السور وشكلها تبي تهرب تفاهمي معها

ناديه طقطقت ع سجلي عندهم وقالت انتِ مؤدبه

وماخالفتي القوانين السجن

.. لذالك ماراح نشدد عليك العقوبه بس قولي لنا وش كنتِ تسوين وليش بتهربين

قلت مانيب اسوي شي غلط

واقفه انتظر اخوي يجيب لي الحلقةالجديدة لـ مسلسل Prison Break ، والحمدلله كن هـ التصريفه مشت عليها

...
وعدت الامور ع خير

..:: مابعد الهروب ::..

ميسو : تعالجت رجولها الحمدلله

وطلعت سليمة من الجامعه

كايدهم : محد كشف امره والوكيل ستر عليه

وسلم له الوثيقه بيده وهو يقوله تؤكل ع ربك ولا عد اشوفك بـ الدرعية

تحملناك سنين ومافينا حيل نتحملك زياده

..:: الحمدلله ::..

تم بحمد لله .. تخرج كايدهم وميسو من جامعة الملك سعود ، بعد معاناة شديدة

أتمنى لهم التوفيق بـ حياتهم المستقبليه

وبـ هالمناسبه نزلت هـ الموضوع لهم والقصة مجرد تغيير طريقة توصيل الخبر لكم ، مدري شلون اصيغها

وترى هـ الموضوع سويته قبل شوي من دون لا اخطط للكتابه لأني تأخرت بـ تنزيله وماكان ودي يكون بـ هالشكل لكن أنت تريد وأنا اريد والله يفعل مايريد

يـ الله ادهروا بـ الزغاريط وباركوا لهم

من جد فرحت لهم انهم تخرجوا

.. ودي اقولكم خبريه زينه عن سهل بس ماش ماهوب طالب بالجامعه يعني وش دخلني اجيب طاريه فـ هـ الموضوع

--->> نذله :p

..:: تصميم ::..

كل الشكر والتقدير لـ زميلي معذبهم ع هـ التصميم الرايق والله يحفظه من كل شر " قولوا آمين

" .

الفيروفيلد