احبتي هآنذا اتواصل معكم من جديد على امل ان ابقى معكم الى الابد وايضا احببت ان اجمع كل قصائدي التي تشرفت بنشرها بين يديكم متفرقة في عدة مواضيع واتشرف ان يكون هذا المنتدى هو الذي رأت النور من خلاله فأحب ان اجمعها لكم كلها في موضوع واحد وذلك تحت الحاح احد الاخوة الاعضاء وارجو ان تنال اعجابكم واستحسانكم واعدكم بالمزيد :
+=+=+=+=+=+=+=+=+=+=+=+=+=+=+=+=+=+=+=+=+=+=+=+
ميت الاحســـــــــــــاس
تجاهل حبنا يازين ؟ ولاّ ميت الاحســـــــــــــاس *** لزوم انك تراعي خاطري وتحس باحساســــي
احبك يانظر عيني ومن شانك نسيت النّـــــــاس *** نسيت الكون ومن بالكون مع انك دايمٍ قاسـي
احبك حب ياروحي ومعاليقي لكم يبّــــــــــــــاس *** وعروق القلب في جيتك تروى عقب الايباسي
وزولك لاختفى عني يدق بقلبي الهوجــــــــــاس *** خيالك دايمٍ فالبال لاداله ولاناســـــــــــــــــــــي
ترى حبك رسى بالقلب ثابت بانيٍ له ســــــــاس *** ولو طال الزمن ماينهدم من قوة الساســـــــي
غريقٍ في بحر حبك واخاف اصبح بدون انفاس *** تصير انت السبب في موتتي مع كتمة انفاسي
ترى حبي لفى يمك بلا حدٍ ولا مقيـــــــــــــــــاس *** ولو قسته تتعب ماوصلت لحد مقياســــــــــــي
ترى ماهو مجرد هرج ولاحبرٍ على قرطــــــاس *** هذا حبكم عشته وسجلته بقرطاســــــــــــــــي
الاسير الهلالي - الرس
=+=+=+=+=++=+=+=+=+=+=+=+=+=+=+=+=+=+=+=+=+=+=+
عـــــــــــنود
سلامات ياعينٍ هوى الزين يبكيــــــها **** تهل العباير كل لحظة وسلهامــــــــــه
لها مدةٍ والنوم ماهوب ياتيـــــــــــــــها **** تنام الخلايق واسود الليل ماانامــــــه
ونفسٍ حزينة فايدتها تمنيــــــــــــــــــها **** على من حكم قلبي وانا طعت لاحكامه
حكمني هوى الغالي والاحكام راضيها **** مطيع لحكمه طاعة العبد لاعمامـــــه
واداري محبتها عن الناس واخفيـــــها **** وعند العرب كني خصمٍ من اخصامــه
وانا احبها واحب دارٍ ربت فيـــــــــــــها **** واحب المكان اللي مشت فوقه اقدامه
واحب المجال اللي يجي فيه طاريـــــها **** واحب المنام اللي تجيني فيه أحلامــه
انا اغليتها واغليت من كان يغليـــــــها **** ونفسي بحب الزين ماهيب منّلامــــــه
حسينة نبا بالبيض محدٍ يحاليـــــــــــــها **** شبيه الغزال اللي رعى هضبة تهامـه
(عنودٍ) تقود الصيد ماهيب تاليــــــــــها **** مليك الجمال وباقي البيض خدامـــــه
ولو طالت الفرقى مانيب ناسيــــــــــــها **** ولاينمحي حبٍ على العز مرسامــــــه
الاسير الهلالي - الرس
=+=+=+=+=+=+=+=+=+=+=+=+=+=+=+=+=+=+=+=+=+=+=+
ضيعت مستقبلي
ضيعت مستقبلي جعلها والله تضيـــــــــــــــــــع ^^^^^ وحدةٍ فالبادية ضيعت مستقبــــــــــلي
الوظيفة والدراسة غدن مني جميــــــــــــــــــع ^^^^^ وباقي الحال النحيلة وروحي ياعـــلي
ياعلي من حبها ظاق بي نجد الوسيـــــــــــــــع ^^^^^ وديرتـه لاجيتها ياعلي راح زعلـــــي
ماحصل لي من دهر عمري ولو ساعة ربيـــع ^^^^^ في عناي ودمع عيني يفيض ويمتــلي
ياعلي يومك تسافر مع الخط السريـــــــــــــــع ^^^^^ من هموم او من محابيلهن منتب خلي
ياعلي من حبها للنصيحة مااطيــــــــــــــــــــــع ^^^^^ دايمٍ كبدي على شوفها تغلي غلــــــي
والله اني ياولد شمر ماعاد استطيــــــــــــــــــع ^^^^^ كان ماقلت لمجاهيم الليالي ارحــــلي
الاسير الهلالي - الرس
=+=+=+=+==+=+=+=+=+=+=+=+=+=+=+=+=+=+=+=+=+=+=+
الفصيح اللي يصيح
احسب ان اللي تجود مايطيــــــــح ***** حافظٍ للوقت معلومة خطـــــــــــــاء
لين صرت اشابه الطير الجريــــح ***** وقمت اعيد الذاكرة عقب البطـــــاء
اتذكر والصدور فياض شيــــــــــح ***** الحمام اسراب واسراب القطــــــاء
محسب ان احدٍ لدمي يستبيـــــــــــح ***** كنت اظن ان الحياة اخذ وعطــــــاء
والتوجد حلّ من بعد المديـــــــــــح ***** بانت الاسرار وانزاح الغطــــــــــاء
عقب ماشفت الفصيح اللي يصيـح ***** وشفت سيف الغدر في قلبه سطــاء
يالله انك لاتحلّ ولاتبيـــــــــــــــــــح ***** من ربط سرج النميمـــــــةوامتطاء
شفت من هرجه عسل والقلب قيح ***** لو وطا فالنـــــــــــــــار ماكنه وطاء
الصحيح ان الخطاء اصبح صحيح ***** والصحيح ان الصحيح اصبح خطاء
الاسير الهلالي - الرس
=+=+=+=+=++=+=+=+=+=+=+=+=+=+=+=+=+=+=+=+=+=+=+
( حــــــــرب الاشاعــــة )
آخر الاخبار عن حرب الاشاعـة ***** انتصار افراق واستسلام لامـــــــا
العواذل صاغوا الشي ببراعــــة ***** باختيار الدور واخراج الدرامــــــا
إزرعوك اشواك ياحقل الزراعة ***** وتركوك تعيش لاساقي ولا مـــــــا
ليتهم عاد ازرعوا فيك الشجاعة ***** مثل تحفيز النشامــــا للنشامــــــــا
كنت قبلك ماتعلمت القطاعــــــــة ***** ولا دخلت بمعمعة حرب الكلامــــا
من خلقة الله زرع فيني مناعــــة ***** من خفافيش الطيور اللي ترامــــا
أكره التزييف واحب القناعــــــــة ***** بس معك اسرفت واخلفت النظاما
الله اكبر لو تعدا نصف ساعــــــة ***** اجتماعي بك على الدنيا السلامــا
الاسير الهلالي - الرس
=+=+=+=+=+=+==+=+=+=+=+=+=+=+=+=+=+=+=+=+=+=+=+
(غلطـــــــــان)
اهرج وانا لك مستمع ماتكلمــــت **** مادام توجد بالصدور الرحابــــــــة
وش فيك ياصرح الحقايق تحطمت **** وش بك تقول اليوم مابه غرابـــــة
وش بك تعلمني بعد ماتحلمــــــــــت **** ان التعاسة والسعادة تشابـــــــــــه
في ذمتك باي المدارس تعلمــــــت **** من وين اخذت اسلوب فن الخطابة
والله مطيعك بالخطاء لوتظلمـــــت **** انا نظامي لازم اقرا الكتابـــــــــــــة
يومك تجي في حشمتك ماتحشمـت **** إسمع بعد وقّفْ رشاش السحابــــة
غلطان ولك نبدل الصمت بالشمـت **** قدام تغلط خايف من الرقابـــــــــــة
واليوم اباصارحك ياللي تهجمــــت **** ونهبت قلبي دون مارضى نـــــهابة
قلبي بردّه لو بالاعيان سلهمــــــت **** ولو كان وسط حلوق شهب الذيـابة
لاعاد مني تطلبه لو تكرمــــــــــــت **** ارجوك مابيني وبينك قـــــــــــــرابة
حرّمت ماقرب مثل عشرتك حرمت **** لو انها ترجع حياتي خرابـــــــــــــة
والله لو اجلس طول الايام مانمــت **** احسن من اجلس معك مالي مهابـة
الاسير الهلالي - الرس
=+=+=+=+=+==+=+=+=+=+=+=+=+=+=+=+=+=+=+=+=+=+=+
الدقيقة معك تسوى حياتي كلها
لوبغيت ارتاح عين الشقاوي ماتنــــــــــوم ***** قل لها ياخافق الريش قل لـــــــــــــــها
اتصبر عارف ان السعادة ماتــــــــــــــــدوم ***** واتقرب بين الامال واقابل لـــــــــــــها
اتخفى في لعل وعسى واجلس واقــــــــــوم ***** ليلة فيها رجا وصلها ما املـــــــــــــها
كنت اشوف الشمس واحيان تحجبها الغيوم ***** هي على سطح السحابة وانا في ظلها
هيه ياللي وسط قلبي معززّ ومحشـــــــــــوم ***** لوتساعدني جميع الرموز نحلّـــــــــها
في نجوم القايلة يالغضي مالي لــــــــــــزوم ***** دلني درب السعادة تراك تدلـــــــــــــها
يالطيف الروح قل لي تريح ومخـــــــــــــدوم ***** لاتغني للهواجس وتطبل لـــــــــــــــــها
التحالف يبتدي بالحقايق والحلــــــــــــــــوم ***** العقول الها سمها والقلوب ارضٍ لــها
اندماج ايام وشهور وتصير الهمـــــــــــــوم ***** بالتعاون مثل سـلّ السلوك نسلّـــــــــها
وش تساوي فرحتي معك يوم او نصف يوم ***** والدقيقة معك تسوى حياتي كلــــــــــها
الاسير الهلالي الرس
=+=+=+=+=+=++=+=+=+=+=+=+=+=+=+=+=+=+=+=+=+=+=+
اجامل واتظاهر بالسعادة واجحد جــــــــــــروحي ** ولاابغى جرح روحي للعرب يظهر وينشافــي
امثل ضحكة الفرحة وصدري قدره يفـــــــــــوحي ** واقول بخير ومعافى وانا مانيب متعافــــــــي
صبرت وطال صبري مير مافالصبر مصلـــــوحي ** نفذ صبري وجوّي فالهوى ماهوب لي صافـي
بتالي الوقت جرح الشوق زاد وصار مفضـــوحي ** بعد طول الصبر بيّن بروحي شرها الخافــــي
ياروح الروح جرح الروح ابيه يروح عن روحي ** ترى طول الجفا بـذّ الخفا يالصاحب الوافــــي
عجزت اطرد هواجيسي وعيّا همي يــــــــــروحي ** هجوسي صارت فراشي وهم فراقك لحافـــي
حبيبي كيف تترك خافقٍ يغليك مذبـــــــــــــــــوحي ** وتخون الخافق اللي بالغلا مع حضرتك وافي
يصيح الجرح ياروحي ياليتك تسمع وتـــــــــوحي ** تطالبك الجروح اللي تفوح بعدل وانصافــــــي
ترى طول الجفا بيّـح جروح الـــــــــروح ياروحي ** ومن جفواك يالجافي تبيّن شـرّي الخافـــــــي
الاسير الهلالي - الرس
=+=+=+==+=+=+=+=+=+=+=+=+=+=+=+=+=+=+=+=+=+=+=+
هذه القصيدة كتبتها عندما سافر اخي الغالي الحبحر الحار الهلالي الى خارج المملكة للعلاج
أنا مدري وش الله فيك ســــــوّى *** وروحي معك يابعد روحي رهيـنة
على همك لزوم انك تقــــــــــوّى *** ومن يرضى بحكم الله يعيــــــــــنه
انا بعدك عليّ الهـم خــــــــــــوّى *** وبراكين الغضب عقب السكــــينة
وَرَدْ قلبي على الهم وتــــــــروى *** على بير الشقا قلبــــــــــي مكينــة
الا ياغلى عيال آدم وحــــــــــــوّا *** عليك الروح ياروحي حــــــــــزينة
سهير الليل ماغير اتطـــــــــــوّى *** علي النوم باحصونٍ حصيـــــــــنة
اهوجس فيك واصبر واتكــــــوّى *** واجامل واكتم اسراري دفيـــــــنة
صفق قلبي بصاروخ ارض جوّى *** منه مادوّت اجراس المدينــــــــــة
ياخوي فيك شعر الحــــــزن دوّى *** ومني جتك واعزفها حزينــــــــــة
الاسير الهلالي - الرس
=+=+=+=+=+=+=+=++=+=+=+=+=+=+=+=+=+=+=+=+=+=+=+
هذه القصيد اعتبرها اجمل ماكتبت حيث ان لها ذكرى عزيزة جدا جدا جدا على قلبي وقد عشت احداثها لحظة بلحظة وقد كانت هذه الكلمات نتاج الواقع الذي عايشته مع هذه القصيدة
بُعدك سبايب عزلتي واحتجـــــــــابي *** وقربك يسبب لي جروح ومخاطـر
ان جيت زادت ذكرياتك عــــــــــذابي *** وان رحت ناديت القلم والمساطـر
ارسم خطوط وتـلتقي مع ســــــرابي *** واكتب واسطّر لك بيوت وخواطـر
كلش خطر بالبال قبل انسحـــــــــابي *** الاّ انهيار الحب ماكان خــــــــاطر
يوم ارتوى زرع الهوى من سحابي *** جيت استغيث ولاحصل منك ماطـر
وعشت الضياع بغربتي واغتـــرابي *** واتعبت نفسي مالقيت المشـــــاطر
أكرم لي ابعد لو يطـوّل غيــــــــــابي *** أبعد ولا أضحك بالعواطف واخاطر
وشلون اعيشك نار تحرق شبــــابي *** واكسر خواطر ناس لعيون خاطــر
وداع ياحبٍ مع النبــــــــــــض رابي *** مانيب ياسود المقادير نــــــــــــاطر
الاسير الهلالي - الرس
ولمن اراد حفظها لديه من هنا
=+=+=+=+=+=+==+=+=+=+=+=+=+=+=+=+=+=+=+=+=+=+=+
يامرحبا ياهلابك يابعد حيّـــــــــــي *** ماني معاتبك ليه ابطيت بالجيـة
سود الليالي كوتني وانجظت كيّـي *** عقبك تراها طوتني طيّ زوليـــة
بالله ظويّ ظلام الليل ياظيّــــــــــي *** تراي ماعشت عقبك ليلةٍ حيّــــة
كن الغرابيل عقبك مالقت زيّــــــي *** ناظر بعيني شوف الحال مبريــة
طويت فرقاك خليها على طيّـــــــي *** وجتك السعادة بخيّالة ورجليــــة
معك لو الوقت كله ليل ياهنيّــــــي *** دام الهنا كاش والافراح فوريــة
عيّـي على الليل لايسري بنا عيّـي *** لو ياخذ من النهار الليل عاريــة
ياليل خلّك جليسي مع بعد حيّــــــي *** تعبت ياليل من الروحات والجية
الاسير الهلالي - الرس
=+=+=+=+=++=+=+=+=+=+=+=+=+=+=+=+=+=+=+=+=+=+=+
وحدة طرقا
يامل قلبٍ هوى له وحدة طــــــــــــــرّقا ***** ماعاد يرتاح لو ساعات في نومــــه
لو انها من ورى عمّان والـــــــــــزرقا ***** قلبي عليها يتوق وتكثر همومـــــــه
هي شف بالي وبعض الناس يافـــــرقا ***** ماطب سوقه ولا ابيعه ولا اسومـــه
وهي تدري اني عليها منحرق حــــرقا ***** وانا بعد داري ان (الريم) محكومــــه
سود الليلي تصلّي بالعرب شــــــــــرقا ***** لاواهني الحرار الشقر بالحومـــــــه
لو لي جناحين كان انزل لهــــــا وارقا ***** واناجي الغيم عن حاجات مكتومـــــه
يطري علي لاسريت ولاح لي بــــــرقا ***** ساري واسوي بنور العين منظومـــه
ساهر وبعض العرب في نومهم غرقا ***** ولاسمع مناعق غراب البين والبومه
الاسير الهلالي - الرس
=+=+=+==+=+=+=+=+=+=+=+=+=+=+=+=+=+=+=+=+=+=+=+
مبروك
خذ ماتبي ماعنــــــدي الا حلالك ***** مادام اخذت القلب خذ باقي اعضاي
واذا بغيت الصدق هي كلهــا لك ***** خذها ترى مانيب رايح ولاجــــــاي
روحي على راحة يدي جبتها لك ***** العاصية طاعت لاساليب الاغـراي
ابيك فيني مايزيـــــــــــد انشغالك ***** ياكامل الاوصاف بلواك بلــــــواي
اشفق لقربك واتمنــــــى وصالك ***** لاقمت افكر فيك ياطول مســـــراي
سلكت من شانك جميـع المسالك ***** اطا على الشوك ولاطالع لماطـاي
ملكتني واصبحت ملكك لحـــــالك ***** انا بدونك مالي تصـــــرف ولاراي
لاسولفوا عندي وجابوا مجــــالك ***** تاصل بي الدوخة الى حد الاغماي
مبروك من قبل وبعد كيف حـــالك ***** مبروك يابحري وموجي ومينــاي
الاسير الهلالي - الرس
=+=+=+=+==+=+=+=+=+=+=+=+=+=+=+=+=+=+=+=+=+=+=+
قصـــــــة هوانــا
ياليل مانـوّر قمرنا سمانـــــــــا ***** ياشيننا ياليل لاغاب عنّــــــــــــــــا
انت تعرف ياليل قصة هوانـــــا ***** من يوم صرنا منك واصبحت منّـا
ياللي تسامرنا الى منتهانــــــــا ***** وافي وخليت الكواكب تغنّـــــــــــا
ويضيق خلقك لاتغيب حدانـــــــا ***** وتفرح الى من الظروف جمعنّــــا
والله وفي ياليل لكن بلانـــــــــــا ***** من النهار اللي يشتت ظعنّــــــــــا
ياليل قل للوقت ليه يعصانــــــــا ***** وليه الظروف القاسية فرقنّــــــــا
ان كاننا مخطين وش هو خطانا ***** الحل والترحال داخل وطنّــــــــــــا
نغيب ونردد لعل وعسانــــــــــــا ***** نلقى الغرض ونعود من حيث كنّـا
نتعب ويتعب صبحنا مع مسانـــا ***** محدٍ عرف بظروفنا غير حنّــــــــا
ولو نبتعد مانبتعد عن وفانــــــــا ***** يالله تجمع شامنا مع يمنّــــــــــــا
الاسير الهلالي - الرس
=+=+=+=+=+==+=+=+=+=+=+=+=+=+=+=+=+=+=+=+=+=+=+
مع عالم الحرمــان صعب التعايش ***** ماتقدر الفرقى قلــــــوب المجاريح
ياغالية سود الليالــــــــــي وحايش ***** وتزيد ظلما يوم اولّع مصــــــابيح
من يوم ماناشك من الــهجر نايش ***** أسرع . ولم الشمل يحتاج تصحيح
والله لو اني بستمــــــــــع للولايش ***** اني لاروِّح ياحياتي مع الريــــــح
نبني ونفتح للسعادة درايــــــــــــش ***** نعيش ونكحِّل عيون المشافيــــــح
مانيب متهور ولا نيب طــــــــــايش ***** أمسح دمع حتى عيون التماسيح
لكن لعمر شعيب مانيب عايــــــــش ***** ولا معي لقلوب الأمة مفاتيــــــح
الاسير الهلالي - الرس
=+=+=+=++=+=+=+=+=+=+=+=+=+=+=+=+=+=+=+=+=+=+=+
أتمنى ان تنال على القليل القليل القليل من اعجابكم واستحسانكم . ولكم تحياتي وحبي واشواقي .
ماشاء الله شاعر مبدع 
هلا بك اخوي الاسير طالعن علي شاعر بس 
الوضع العادي
