السلام عليكم

والله انا ما تعودت احش بالناس او اغلط عليهم او حتى انقدهم الا اذا كان الكلام موجه لي لكن معليش هالمره راح انقد واقول (تكفى). عموما اتمنى ان اغلبكم اشترى الرياضيه يوم الخميس اللي هو امس بتاريخ 7 رمضان واطلع على مقالة الاخ صالح الحمادي ( رئيس تحرير جريدة الرياضية) واللي يتحفنا بمقاله الرهيييب ( على قد عقله) تحت اسم - بهدوء وعقلانيه- واللي كتب فيه عن رأيه بتعيين ناصر الجوهر مدير فني للمنتخب وانه ضد جلب مدرب اجنبي يكلف الملايين وماراح يسوي شي احسن من اللي سواه ناصر الجوهر.
لو انه سكت لحد هالكلام كان هانت وقلنا كلامه فيه شي صح لكن الاخ بدا يغلط على لاعبين المنتخب ووالله العظيم اني ماراح ازود اي كلمه من عندي وهذا اللي قال له

*يعني وش بيسوي المدرب الاجنبي مثلا, هل بيسوي سامي زي بيكهام او الواكد زي فيرون وقال لاعب ثالث ونسيت على مين شبهه.
هل وصلت الوقاحه انك تهين لاعب منتخب بهالطريقه او حتى تجرحه بكلام بايخ وانت اول واحد كان يقول لازم نرفع من معنوياتهم (والله انك نكته).

انا اتذكر ايام كاس العالم الاخيره لما جاب مايكل اوين هدف بالارجنتن وانهزمت انجلترا بالمباره , جانا الاخ صلوحي وكتب بالحرف الواحد ( ياليتني تزوجت امه كي انجبه). شسوي بروحي ياناس ؟؟؟؟؟؟؟؟؟؟

عالعموم المفروض اني ما اشره على واحد زيه كان مراسل للقناة الثانيه في برنامج الرياضه يروح يسوي مقابلات مع اللاعبين وبقدرة قادر صار رئيس تحرير جريده ( وش هالواسطه) انا صار لي شهر ادور احد يلغيلي مخالفات المرو عشان اجدد رخصتي والاخ عنده واسطه تخليه رئيس تحرير.

والله الدنيا حظوظ .
والله ترى استانس اذا احد رد علي وشكرا

والله اذا انه قال هالكلام فيدل على الوقاحة

لكن اتمنى انها تكون غلطة مطبعية

اخوي ابو لهب ... برد عليك علشان تستانس;)

ولاتعليق على كلامك اللهم اني صائم .. ولاهي غلطة مطبعية يا العرين .
لاكن بذكرك باللاعب الثالث .. الشيحان بريفالدو

لاكن للحقيقة وللحقيقة فقط ... الجريدة برئاسته للتحرير صارت روعة .. احسن الف الف مرة من رئاسة الشرقي لتحريرها ... ولا يقدر اي متابع رياضي يستغني عنها . وماعلينا من الواسطة علينا من شي نقراه ونستفيد منه .

متابعة دقيقة للرياضة المحلية والعربية والعالمية .. واركز على العالمية .. لأن طيب الذكر الشرقي كان مايهتم فيها ابد... وصفحة يومية للرياضات المختلفة ... يوم سلة يوم طائرة و يوم يد ... يوم صفحة عن العاب القوى ولا رياضة المعاقين ولا الألعاب الفردية مثل التنس والكراتية والتايكوندو والجودو... وكذلك في صفحة اسبوعية للأنترنت.. ومتابعة للفروسية ... وفيها صفحات للثقافة الدينية والمنوعة والفنية والشعر والأدب....
يعني تقدر تقول شبه كاملة والكمال لله وحدة سبحانه .

خذها من واحد متابع للرياضية من اول يوم لصدورها ;) ولا ماني هنا اسوي دعاية للجريدة ولا للحمادي ... لكن الحق يُقال .. ورد على كلمة واسطة (( ويازين كذا واسطات ))

تحياتي لك

كلامك حلو ياخوي بس تراك تسوي دعايه بقوه ولا تنكر هالشي يا بعدي لانه لو انك صحيح منتب تسوي دعايه كان علقت على النقطه الاهم واللي ركزت عليها وهو مقالاته السخيفه واخرها اللي شبه فيه الاعبين الثلاثه

وعلى العموم ترى الجريده صحيح انها صارت احسن من ناحية التركيز على العالميه لكن كثرت خرابيطها والمقالات اللي عناوينها غير ومحتواها غير(حلوه محتواها, والله اني خطير) وعلى ما اظن كلنا نذكر المانشيت الكبير اللي مكتوب فيه وفاة الشريده وفوقها بخط صغير مكتوب خبر يردده ضعاف النفوس.

ردكم تكفون.

اخوي ابو لهب ...ماهدفي وربي الدعاية
لاكن كلمة حق وقلتها .. وانا ماقلت كذا الا علشان كلمتك بالواسطة ... وبقولك ان يا زين هالواسطة اللي تسوي كذا .
اهم شي يصير عندنا جريدة صح .

وبعدين لاتغرك الإثارة الصحفية والعناوين .. كل هذا علشان التسويق وهذا شي معروف اعلامياً . يعني حاجة ماهيب جديدة .

وبالنسبة لمقالاته هذا شي راجعله ... بصراحة ماني كفو نقد رئيس تحرير انا ووووجهي;)

تحياتي الك