#1  
قديم 17/11/2001, 02:09 PM
رئيس تحرير مجلة الإقلاع
تاريخ التسجيل: 11/10/2001
المكان: الولايات المتحدة الاميركية
مشاركات: 75
Thumbs down الصمرقع والهلال والكورة والزبيريات... سيرة كروية خربوطية!!



قبل ما اكتب اي موضوع ابقول اني اتابع هالمنتدى منذو مبطي(طيب ولا صار) ولي منذو مبطي بعد وانا ادور فكرة ابدا فيها الكتابة في هالمنتدى، ومرة اقول يا شيخ استح لا تصير من فئة: رحبوا بي تراي عضو وش حليله، ومرة (مرة ولا حلتيت) اقول يا اخي الهلال والهلاليين يستاهلون انك يا ابا عبدالله تصير رجال وتقعد تحك دميجتك كود الله يفتح عليك بشخمطة، حتى اعياني التفكير، فقلت يا ولد (هذا اللي هو انا لاني لي طقوس في تعاملي مع نفسي منها اني ما اخطاب نفسي من باب التواضع بمعالي او سعادة) ما بدهاش، ليش ما توضب سيرتك الكروية يا ظلال باستن وتأنتكها وتخليها مدخل (يعني انتريه باللغة السواحلية) للكتابة في هالمنتدى.
وعليه قررت افيض عليكم من خرابيطي، على اعتبار ان الفارق بين الخربطة وانك تقول كلام يجمد على الشارب(الا تسانك من جماعة عقال احمر للمشجع الوحداوي) شعرة...

@@سيـــــــــــــــــــــرة عاطــــــــــــــــــــــــرة@@
يوم حنا بزران (بزعمي اني كبرت هالحين ) ما كان عندنا من المتع غير الكورة، وما ادري ليش ما كنا نطرب لاي لعبة غير الكورة، يمكن لان الكورة فيها مجال للتكسير
-------------> مصطفى ادريس على غفلة وانتم بكرامة
المهم اني كنت افت كورة مع عيال جيراننا من نطلع من المدرسة لين يجي ابوي الله يحفظه يجرني مع اذني علشان ادخل انام وكنت اعول اني اطلع شي مهم يعني مثلا لو اصير مثل طارق العواضي ولا يحيى عامر ( داري انكم بتقولون تكرم)، المهم اني ما اذكر انجاز غير عادي سويته الا اني قد جبت قول دبل كيك وانا في رابع ابتدائي وانكسرت ايدي وجلست ما العب عقبها ثلاثة اشهر، وفي خامس سجلت قول براسي، وللتاريخ اقول ان الكورة هي اللي صقعت في راسي، ولا ازال مؤمنا انها سعت الي بحثا عن تخليد ذكرها لاقترانها برأس احد العضماء اللي هو أنا(أيه هين).
يوم وصلت للمتوسط بدأت اؤمن بالحقيقة المأساوية التي تقول اني مالي لا مستقبل ولا ماضي ولا مضارع في الكورة واني يجب ان اؤمن بان فيه شي اسمه لاعب تكملة عدد وان فيه شي ثاني اسمه اللعب لاجل اللعب فاقتنعت بهالشي واقنعت زملائي اني من انصار المدرسة الفكرية اللي تميل الى ان الفن يجب ان يكون لاجل الفن وبس، واحمد ربي ان زملائي كانوا اكثر دلاخة مني ولا لو قال لي واحد وشلون كان قلت له: تبي اسلفك تراي غيرت رأيي وما عندي مانع من باب تصريف الموضوع.
ولا يزال في ذاكرتي (الله واكبر يا الصمرقع بن سعيد) اننا كنا نعطي بلنتي للي ينكسر علشان ما يعلم امه علينا، واننا لا بغينا ندعي على احد قلنا له جعل احد يشوت كوره في وجهك في الشتاء (الله من النجاسة)، واننا كنا نعتبر الكورة لا نقزت للجيران اوت لين زادت الخطورة بانتهاج ابو الجيران نهجا عدوانيا جديدا في التعامل معنا عندما كانت بداية نهجه باعادة الكورة الينا مع محاضرة في حسن الجوار فقررنا اننا نحط بلنتي على اللي نقز الكورة ويوم باعها ابو الجيران بتبن (تكرمون) وصار يشق الكورة لا قمزناها عليهم، مالقينا عقاب على اللي قمزها الا تفلة (تكرمون) وبلنتي ويشري للشلة كورة من كيسه.
واذكر اننا خلينا المرمى باب حوش جيراننا تارة، والباب الايسر الخلفي لسيارة ابو مصطفى الفلسطيني اللي كان قاهرنا في الحارة لانه قد طق واحد من العيال (خوينا حالت على بنته حصاة وفقلتها ) تارة اخرى، وعمود الانارة تارات وتارت، كما صنعنا بالزبيريات عوارض لين ما قلنا بس، ما نتج عن ذلك مفاوضات اشق من عملية السلام حول صحة الكورة اللي تجي فوق النعلة وهل تصنف على انها ضربت في العارضة وبالتالي مفروض نعطي اللي شات ادفاندج فياخذ كورنر ولا تصير ضربة مرمى، خلافاً للمداولات التي نختلف فيها على هل الهدف صحيح ام لا؟!


علاقتي بالهلال
كنت احس اني اهم مشجع للهلال بعد ابن سعيد وعبدالله بن سعد الله يرحمه، ومرجع هالاحساس اللي ما ادري وش يبي اني مرة وانا بزر حضرت مباراة للهلال وقبل ما ينتهي الشوط الاول تجمعت مع اللي يتجمعون عند السياج اللي فوق غرفة اللاعبين في ملعب الملز ويوم مر صالح النعيمة قلت له : احلىىىىىىىىىىىى ابو اشواااااااااااق (قبل فهد الله يخليهم له ويخليه لهم، ولو على ذا الدعوة تسني امي هيلة بس يا الله رمضان ولازم الواحد يسوي فيها ثقيل)، والتفت علي ابو فهد وابتسم لي طبعا لانهم كانوا فايزين في الشوط الاول ولا لوهم منهزمين كان احتمال يكفخني ببوت حسين البيشي...
اذكر اني كنت لا جت مباريات الهلال كني ابدخل امتحان التوفل يبدا قلبي يرجف مثل رجف الماكينة على ما قال حسين عبدالرضا، ولا هوب قبل نص ساعة الا قبل يومين، وكني موكل بالهلال، يزول لي كل واحد اعرفه وما يشجع هلال(على اعتبار ان الناس يا يحبون الهلال يا ما يحبونه) ووش يبي يقول لي لا تعادلنا(خبركم ما تعودنا على الهزايم)...
وبحكم ان تربيتي صالحة (احسه اسم حرمة حارس مدرسة ابتدائية) فانا نشأت ولم تر عيني الا الهلال ومن يشجع الهلال وكنت يوم انا صغير احسب اللي يشجعون غير الهلال لهم مواصفات غير آدمية لين دخلت المدرسة وشفت لي كم واحد من هالضعوف اللي مالي الا اتحمد الله على العافية واقول يا الله انك تعافيهم ولا تبلانا...


كانت هذه جوانب من سيرتي الكروية العظيمة...
قلت افتتح بها مشاركاتي هنا وارجو اني ما اكون غثيتكم
ان جازت لكم ابكمل وان ما جازت لكم ابكمل بعد (والله الديموقراطية) لأني مؤمن بأهمية تعدد الآراء، وفي المثل الموزمبيقي: لولا اختلاف الآراء لاكتفى الناس بالتصريح عن الايماء(اقسم بالله اني مسكت اللي طلعت مثل مسجوع ويلوموني في روحي يا شيخ)...




  #2  
قديم 17/11/2001, 02:28 PM
زعيــم نشيــط
تاريخ التسجيل: 10/06/2001
مشاركات: 760
هلا والله بالصمرقع وحقيقة انك ونستنا بمذكراتك يا معوكس الصمرقع وحياك الله بين كل الهلاليين بس ابسألك انت قبل تجي عندنا في البيت قصدي في المنتدى وين كنت لاني كني شايفك ( واحد يقط وجهه يبغى يتعرف ) قصدي كني سامع صوتك اوه القصد يا ابن الحلال ان اسمك مار علي في احد المنتديات غصب طلعت
  #3  
قديم 17/11/2001, 02:30 PM
مشرف سابق بشبكة الزعيم

تاريخ التسجيل: 18/08/2000
مشاركات: 2,099
يا هلا والله وغلا ومسهلتين ..

هلا بالصمرقع - غفر الله له - .. اهلا بك يا أبا عبدالله بيننا ..

اولا .. الشهر عليك مبارك .. وجعلنا الله واياك من صوامه وقوامه وجعلنا فيه من المقبولين .. آمين يارب العالمين ..

والله اني امبسطت يوم شفت اسمك واجيك خاش على الموضوع ( مكيّم ) ..

هذي والله الساعة المباركة اللي شفنا وقرينا لك موضوع في شبكة كل الهلاليين .. واحنا مغبوطين بوجود قلم هلالي رائع و ( ساخر ) ومفيد مثلك ..

الصمرقع غفر الله له ( رئيس تحرير مجلة الاقلاع ) متواجد معنا يا حظنا والله ..

ذكريات رائعة .. سطرها قلمك الرائع .. والله يذكر ايام الزبيريات - اجلكم الله - بالخير ..

بس يا بو عبداالله - غفر الله لك - فيه كلمة قلتها وقعدت احك راسي ابي اعرف وش معناها وهي ( ادفاندج ) ..!!

تصدق .. بغيت احذفها احسب انها سبّة .؟؟!!

حياك الله وبياك .. ويا مرحبا والله ومليوم مسهلا مرة اخرى ..

بس لا تبطي علينا بمواضيعك .. تراك شحيح فيها .. ورمضان كريم ..

ولك خالص تحياتي وتقديري ..

اخر تعديل كان بواسطة » أبو ناصر في يوم » 17/11/2001 عند الساعة » 02:38 PM
  #4  
قديم 17/11/2001, 03:26 PM
رئيس تحرير مجلة الإقلاع
تاريخ التسجيل: 11/10/2001
المكان: الولايات المتحدة الاميركية
مشاركات: 75
محمد المصربي
هلا فيك والله والله يونسك بالايمان دايم
ما كان ودي تلمح قدام الناس انك شايفني
يعني لازم تقول اني كنت اشتغل في شارع العصارات
-----------> شاورما دجاج





أبو ناصر
هلا وغلا ومرحبا بابو ناصر
----> اكثر واحد يقدر مسح جوخ للناس المهمين
يا ابو ناصر واعذاب العين من شيٍ تشوفه
ترى رمضان وما نشوف والله الا الدجة يا ابو ناصر
اما الدجة كثر منها
الا تعال يا ابو ناصر يخوي ما عندك حل للي يبي يصوم ويداوم بامريكا ويبي يغض نظره وما تزاوله الفخوذ اللهم عافنا الا بالنهار، لعنبوهن برررررررررد مووووووووووت وهم متمصلخين الله لا يوفقهم
-------> بيثبت لكم ان الغربة شينة غصب(الا قل ابعلمهم اني بامريكا)
كل عام وانت بخير يا خالي ووالله اني فرحت باحتفاءك وحملتني فيه مسؤولية التواصل، وبالنسبة لواحد زوداني مثلي مشهور بالكسل وده لو ما احد رد عليه علشان يفتك ازين من ان العالم تطير بك وتقول لك لا تخلينا...

وبعدين يوم قريت مكيم رحت اتأكد يا خالي انا كاتب الموضوع بمنتدى الجمهور الهلالي ولا في منتدى الضبان والصمان يخوي احس انك راعي بر وموترك شاصي وفيه اربع تواني اثنين بنزين وواحد حليب والثاني شاهي

بالنسبة يا غالي لكلمة (ادفاندج) فالجواب ان اصلها ادف اندج واندج نوع من الحبوب اللي تجيب العيد ففلان يدف ابيض وفلان بدف ولذا قيل له( لا تدف) وعندما يكون الضمير للمتكلم يقول ادف اندج
وبعدين ترى معناها وصخ معنها وانت بكرامة: تلعب كيرم؟


-----------> راح يشب على السحور (بيصخن بيتزا من دومنيز بيتزا لها ثلاثة ايام في الثلاجة)، وبعدين علشان تعرفون نعمة الله عليكم ترى ما عندنا لا سمبوسة ولا توت ولا تانج ولا طاش ما طاش، واللي يمزنا عنكم ما يصلح برمضان
---------> قصده ادمان مشاهدة الاخبار في الcnn ;)
  #5  
قديم 17/11/2001, 04:31 PM
زعيــم متواصــل
تاريخ التسجيل: 04/10/2001
المكان: الرياض
مشاركات: 84
هلا والله بالصمرقع ,,,,,,,

الصمرقع عندنا
يا مرحبا يامرحبا

يا جاريه اسقي هذا الصمرقعي قليلاً من (المودماني)
@@
ودي اجاملك و ودي اقول ان منتدانا كويس
عشان كذا بحلتبها,,,,,

وابقول لك : (مدري من اللي تشرف بالثاني)
@@
على العموم انا صار لي نفس اللي صارلك اول
ما نجحته من (الساته) بس ما عرفت اصرفها مثلك
واتفلسف بـ ( اني من انصار المدرسة الفكرية اللي
تميل الى ان الفن يجب ان يكون لاجل الفن )
@@@@@

اخيراً وليس آخراً ( والله مدري وش الفرق بينها)
الله يحييك بين اخوانك والاستمرار صار مطلوب

وســــــــــــــــــــــــــــلا متـكـــــــــــــــــــــــــــــم

اخر تعديل كان بواسطة » ابو دلامه في يوم » 17/11/2001 عند الساعة » 06:25 PM
  #6  
قديم 17/11/2001, 05:08 PM
زعيــم مميــز
تاريخ التسجيل: 14/08/2000
المكان: الرياض
مشاركات: 2,890
لا لا لا لا لا ..

قولوا غير هالكلام ابا عبدالله الصمرقع - غفر الله له ولوالديه ولمن يعز عليه - بشحمة ولحمة بيننا في شبكة الزعيم .. والله انها اسعد الفرص واروعها ان يتواجد بيننا رئيس تحرير أول مجلة سعودية على الانترنت ( مـــجلة الاقلاع ) www.eqla3.net

تمنيت لو اني المتنبي فانظم القصيد ابتهاجاً بتواجدك ..

تمنيت لو انني الثنيان (لاسحبك) على خشمك فرحاً بمشاركتك ..

تمنيت لو انني الجمعان (لامزعك) مع كرشتك

واحمد ربك اني لست خميس العويران والا ( ... ) انت خابر عاد اللي يبي يصير

@@

ابو عبدالله واللي خلقك اني منبسط لتواجدك الكريم ولو بموضوع من الارشيف ... لان ارشيفك ما يقدم ابد .. وما تكتب صالح لكل زمان ومكان ..

عموما انا ودي أسال وش جابك الحين !!؟؟؟

اذكر اني فاوضتك قبل فترة وطلبت مقدم عقد علشان تكتب هنا .. والحين اشوفك جيت من نفسك .. ودي ترسل لي بالايميل وتقول لي كم اندفع لك علشان تكتب ..

عموماً انت فوت علي فرصة اني (أمن) على ادارة الشبكة لو انك كتبت ذاك الوقت .. واقول لهم ان من انجازاتي اني جبت لكم ابو عبدالله بشحمة ..


@@@@


الف الف تحية ياغالي وتو ما اسفرت وانورت
  #7  
قديم 18/11/2001, 02:35 AM
رئيس تحرير مجلة الإقلاع
تاريخ التسجيل: 11/10/2001
المكان: الولايات المتحدة الاميركية
مشاركات: 75
Thumbs up

ابو دلامه
لن اشرب مودمانيك يا ابا دلامة لين تصف قدامي الجواري كني ابلعب بولنق واصير انا الكورة واتمردغ بينهن (اللهم اني صايم) ممكن نؤجل المشروع يا ابا دلامة اما الى ليل رمضان او الى شوال؟!

وبعدين قديمة يا الحبيب تبي تسوي روحك مثلي علشان تثبت للشباب ان معك ابتدائية؟!
-------> قاعد يدرس ثانية متوسط في امريكا وعايد فيها خمس سنين علشان بزعمه بيتقوى

شكرا لاحتفاءك يا ابا دلامة وبيض الله وجهك(بكلوركس احس ما فيه مبيض في الدنيا الا هو والمزيل بس المزيل بيحوسك يا عزيزي فخلك على الاول)





يا قاهرهم يا سامي


هاهاهاهااااااااااااي
والله ولقيتك يا خوي الغربة؟!

تذكر يا خالي يوم اول مرة شفتك فيها في امريكا يوم انك شعرك الى ردوفك وشكلك طمل واقابلك عند ستار باكس وانت شايل كرتون مكتوب عليه نو فود نو بير؟ّ واجي واخذك واقول لك شف هذا اسمه كمبيوتر وهذا اسمه هلال الكمبيوتر من اعضم اختراعات البشرية والهلال هو اللي يوسع صدور البشرية وسامي قاهرٍ ذولا وذولاك وآولئك لانه عظيم ويوم عاد الله من عليك ومشت امورك قلت اجل ابختار اسم يا قاهرهم يا سامي
----------> الا غصب يصير صديق الرجال ومتفضل عليه

هلا والله وغلا ومسهلا ومرحبا بخالي وترى اللي فوق مزح بس علشان افش غلي يوم تنتر علي بالكيو اول ما تعرفت عليك وانا ما ادري ان يوزر يا قاهرهم يا سامي هو منتسلميستلت التمنيتليبل (قولوا ونعم والله)

---------> بعير وما ينسى


والله يا خالي ان ردك شرفني وودي يبتل اخر واحد راد على الموضوع انت علشان كلن يدري انك صديقي بس عاد تعرف لازم ارد على ابو دلامه ذو الغمامة التي تبلل العمامة والكلام الذي يزيح الملامة... ورأصني يا قدع
---------> دايم تشتبك فيوزاته خصوصا قبل الفطور بشوي
  #8  
قديم 18/11/2001, 04:18 AM
زعيــم متواصــل
تاريخ التسجيل: 31/01/2001
مشاركات: 109
هلالالالالالالا وغلالالالالالالا عمنا
شحالك اخويه
بس حبيت اتطمن عليك واخذ اخبارك
وابارك لك بالشهر الكريم
  #9  
قديم 18/11/2001, 04:51 AM
زعيــم متواصــل
تاريخ التسجيل: 22/12/2000
المكان: الرياض
مشاركات: 55
اخويا الصمرئع
ودة من اية دة , مشيت عليك حداية ولا صحيت من النوم ولئيت نفسك مصرئع لازم تغير هدومك عشان ماتبردش
وبعدين احنا عندنا في الحارة الكورة شراب ( اللي يلبسونة في الرجلين ) ابو القيران اكتر مابيعمل عشان يغيزنا ان يئوم رايح ويغسلها عشان كدا ندي للي حدف الكورة علئة ماخدهاش حمار في مطلع ( وانتم الكرامة )
,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,
اخوي الصمرقع
اسلوبك مميز وتواجدك اضافة حلوة للموقع ولكن اتمنى ان تكملها بالاخبارالهلالية الخاصة ( عدلت كلامي يعني اعرف اني سعودي )
  #10  
قديم 18/11/2001, 06:19 AM
رئيس تحرير مجلة الإقلاع
تاريخ التسجيل: 11/10/2001
المكان: الولايات المتحدة الاميركية
مشاركات: 75
عم تطلي:

هلا ومسهلا ومرحبا اسفرت وانورت، والله كل الحبايب هنا
وشلونكم مع الرمضان والغربة يا بعدي، عساك تغطى زين عن البرد

-----------> كريمة مختار حقت المغتربين


عاشق النور:

هلا والله فيك، وابشر بالاخبار الجديدة، بس كان تبي نجيب لك اخبار عن الركبي ولا عن سباق الضفادع؟

يخوي انتم اللي جيبوا لنا اخبار وجع (كلمة زجر مثل ثكلتك امك) ما يكفي اننا ما عندنا لا سمبوسة ولا طاش ما طاش ولا نشوف مباريات الهلال الا بالريل بلير
  #11  
قديم 18/11/2001, 06:39 AM
9 9 غير متواجد حالياً
زعيــم متواصــل
تاريخ التسجيل: 27/09/2000
مشاركات: 138
Thumbs up

هلا

تصدق عاد اني اسمع فيك بس ماعمري قريت لك موضوع
بس من حسن الصدف اني اليوم فتح صفحة المنتدى وشفت موضوعك

صراحه اسم على مسمى..


تحياتي
  #12  
قديم 18/11/2001, 06:48 AM
رئيس تحرير مجلة الإقلاع
تاريخ التسجيل: 11/10/2001
المكان: الولايات المتحدة الاميركية
مشاركات: 75
9

بسم الله الرحمن الرحيم توني اطالع موضوعي منتب فيه منين طلعت لي؟!

هلا فيك والله:

اجل تسمع فيني ولا شفتني؟ ليش قالوا لك الجمرة الخبيثة(احد عنده معسل على فكرة؟)...


الله يسلمك وشكرا لردك:p
  #13  
قديم 18/11/2001, 11:21 AM
زعيــم فعــال
تاريخ التسجيل: 28/02/2001
مشاركات: 312
Talking

هلا والله بالصمرقع

الشهر عليك مبارك ..

حبيت اسلم عليك فيذا .. ولا موضوعك شايفه في الإقلاع ومعطيه اشكل :p

تحياتي
  #14  
قديم 18/11/2001, 11:42 AM
زعيــم نشيــط
تاريخ التسجيل: 03/01/2001
المكان: Riyadh
مشاركات: 868
هلا بأخوي الصمرقع/

ابو عبدالله ، والشهر مبارك عليك ، وشكلك خشيت في المنتدى لأن سيرفرالأقلاع داون هاليومين ;) ;) ;) ، قلت أتسلى مع الزكرت الين يصلح السيرفر حق الأقلاع .

بس هنك تنحاش عن المنتدى الى صلحتوا السيرفر حق الأقلاع (كفشتك هاه;) ;) )

شهر مبارك علينا وعليكم.
  #15  
قديم 18/11/2001, 12:22 PM
زعيــم متألــق
تاريخ التسجيل: 06/10/2001
المكان: العرين الهلالي الكبير
مشاركات: 1,467
الدائم الله
الله يرفع عنه ولا يبتلينا
الحمد لله على نعمة العقل
   

 

أدوات الموضوع
طريقة عرض الموضوع

قوانين المشاركة
غير مصرّح لك بنشر موضوع جديد
غير مصرّح لك بنشر ردود
غير مصرّح لك برفع مرفقات
غير مصرّح لك بتعديل مشاركاتك

وسوم vB : مسموح
[IMG] كود الـ مسموح
كود الـ HTML مسموح
Trackbacks are مسموح
Pingbacks are مسموح
Refbacks are مسموح



الوقت المعتمد في المنتدى بتوقيت جرينتش +3.
الوقت الان » 12:16 AM.

جميع الآراء و المشاركات المنشورة تمثل وجهة نظر كاتبها فقط , و لا تمثل بأي حال من الأحوال وجهة نظر النادي و مسؤوليه ولا إدارة الموقع و مسؤوليه.


Powered by: vBulletin Version 3.8.7
Copyright ©2000 - 2024, Jelsoft Enterprises Ltd

Google Plus   Facebook  twitter  youtube