اولا..
السلام عليكم يا هلاليات ويا هلالين...
ثانيا..
الف مبرووووك الفوز..والتأهل لكأس العالم في اسبانيا...مو لبنان..((متأخره شوي))
ثالثا..
انا كنت ناويه ابارك لكم من بعد المباراة..بس اني بلشت ما لقيت اسم اسجل فيه..
اول شي قلت...ام يعقوب......لا مو مره ما له داعي...
بعدين عاشقة-----...لا ما ودي اتحيز للاعبين..
وبعدين قلت يا بنت ما لك الا ((الهلاليه))...بس بغيت اسم اقوى شوي..
واخيرا طلع معي....هلاليه حتى الموت..
لا وبعد ما سجلت ما رضى اني اكتب فيه...وقعدت يومين وبعدين جربت وزبط..
لاني من جد بغيت اموت في المباراة..لاني اول شي كنت مواصله ذاك اليوم فلما جت حزة المباراة وانا دايخه على الاخر..وثاني شي..اني كنت منقهره وضغطي بيرتفع ومرارتي بتنفجر..ليه البنات ما يروحون للملعب..يحطون لهم قسم خاص..والكاميرات ما تجي عليهم..اجل ليش البنات اليابانيات حضروا المباراة الاولى الي عندهم باليابان...علشان يشجعون فريقهم..واحنا يوم جت المباراة عندنا ما نروح؟؟؟؟وش زودهم...
ولما كان المنتخب بلبنان..يروحون البنانيات يشجعونه؟؟لا والله ما قصروا..
واحنا البنت عندنا لو تشجع او تتكلم عن المباريات او النوادي....قالولها اهلها...خلي عنك سواليف العيال..انت المفروض بنت ما تتكلمين عن هالاشياء..ليه طيب وش فيها؟؟..فيه اشياء كثيره المفروض انها للبنات...والشباب يسونها....
المهم انا ما جبت خبر هذا كله لاني بشجع الهلال رضوا والا مارضوا..الي قارهني اني ابغى اروح للمباراة..طبعا هذا الي ما فيه امل..
وشوي بدت المباراة..وبدا الحماس وطار النوم..وكمل علي هدف شيميزو الاول..
ووصلت معي..واراح صوتي من الصراخ..صحيح نعتبر احنا الفايزين بس ولو لو يدخلون هدف ثاني....
<----تحسب للمستقبل كثير....وخلص الشوط الاول..وجاء التحليل الرياضي..وانا صراحه ما احبه لانهم يتفلسفون فيه بزياده..والي صار صار..قلت باخذ لي قيلوله لما يبدا الشوط الثاني(اخبر القيلوله بالظهر)...بس يله عدوها احنا كانت عندنا المباراة بالظهر...نسيت اقولكم شي بعد قاهرني...ان الجمعان ما لعب.....
المهم انسدخت ونممممت شوي رن التليفون وقمت ورديت لقيتها غاده...قالت لي روحي البسي فستانك حق الهلال بسرعه..
-ليش؟؟
-بنروح نحضر الشوط الثاني(تحسب الي بيروح للمباراة لازم يلبس زي لبس الفريق الي يشجعه)...ترى بمر عليك لا تتأخرين..وجهزي سيارتك علشان لو فاز الهلال نطلع نشجع فيها..(لا تقولون اني غبيه علشاني بروح اشجع بسيارتيوافحط واخربها وهي سيارتها ما تخرب....علشان لمبات سيارتي زرق وهي لا......(احلفي يا شيخه)
-خلاص اوكي......
وانقز وادور فستاني حق الهلال...والبسه..وحبيت اسوي حركه اصبغ شعري خصل ابيض وازرق..بس وين اروح للمشغل واقعد ساعه الا المباراة خلصت..وتجي براسي ذيك الفكره..يا بنت ما لك الا الالوان المائيه...وانقز والون شعري ..واخذ اكبرعلم عندنا بالبيت(علم الهلال طبعا) واحطه على كل السياره..
واقعد استناها..وجع بيبدا الشوط الثاني وهي ما جت وكم يبيلنا علشان نوصل للملعب..واسمع صوت الجرس..واطلع طيران واركبالسياره...ونوصل للملعب والشوط الثاني توه بادي..ونروح ونقعد..وانا طبعا من زين الحظ ما قعدت الا وراء وحده لابسه شي على راسها وش كبرها اشك انه قبعه..وما اشوف منها لا وزياده على كذا شوي واقفه وشوي قاعده....وصلت معي.. انا ماجيت اتفرج عليها اجيت اشوف المباراة..قلت لها لو سمحتي يا افصخي الي على راسك والا تعالي مكاني واجي مكانك....قالت لا وصديقاتي؟؟..صرخت عليها..روحي اقعدي انت وصديقاتك وراء اخر شي...انا جايه اشوف المباراة مو هذا الي فوق راسك..المهم قامت وافصخته...بس بعد ما طلعت روحي...
ما امداني ارتاح منها الا وتجي غاده تحن علي..بروح اشتري فشار..وما معي فلوس عطيني..(يا شين القراوا)خير تحسبين نفسك بسينما..(عاد احنا متعودين عندنا بالرياض 24 ساعه بالسينما)..ومع حماس المباراة واتذكر شي خطير....انه لو فاز الهلال..وشلون نروح للبيت وناخذ سيارتي ونروح نشجع..اكيد الطريق بيصير زحمه؟؟؟يصير التشجيع خلص..يووه
بالطقاق نشجع بسيارة غاده..(حسافة لمباتي الزرق)...بس اهم شي يفوز الهلال..ويقطع تفكيري تشجيع الجماهير..واشوف الملعب...واسمع صوت المعلق
(ما شاء الله صوت المعلق في الملعب)الكوره مع الدوخي يله يا الدوخي..
ويمررها الدوخي للجمعان...والجمعان يله الجمعان..وقووووووووول
وافز من النوم..على صراخ اخوي (عاشر الاشياء الي تقهرني)..
عاد انا طاح قلبي اكيد اليابان دخل الثاني...قلت وانا خايفه..
شيميزو..؟؟
قال..ايه ايه بس ارجعي نامي..
-يله عاد بلا مصاله مين؟؟(ما كأن التلفزيون قدامها)
-الهلال طبعا..
عاد انا المرجوجه لازم افضح نفسي..واقعد اصارخ ايوه تعجبني يا الجمعان..
واخوي يطالعني..وقالي...هذا يسمونه عمر الغامدي..وبعدين مين قالك ان الجمعان يلعب في المباراة؟؟....نامي احسن لك كنت مرتاح تو وانتي نايمه..
سفهته ومارديت عليه لاني دخلت مع جو المباراة..او بالأصح طاح وجهي..
ودقاااايق وانتهت المباراة..بفوز فريق الهلال السعودي علي شيميزو
الياباني.....
بصراحه انا كنت متوقعه الفوز...بس كنت خايفه..
وخلص تسليم الكأس وبدا التحليل الرياضي(يا ثقل دمه)..
وطفيت التلفزيون...وقعدت اتذكر الحلم يا سلاااام لو انه صدق بس ما تجي ذيك ام قبعه تحضر المباراة....
بس اهم شي ان الهلال فاز...رحت المباراة والا ما رحت..
والله يستاهل الزعيم...
********
يا هلال نادتك البطوله ولبيت***تستاهل المجاد مجد ورا مجد.....الخ