بقلم شاب شريف !! - نادي الهلال السعودي - شبكة الزعيم

Mr.GoaL · #1 23/01/2007, 09:09 AM

السلام عليكم

طوني: سلطان حبيب قلبي شوهالسيارة؟
سلطان: هذي سلمك الله عرواي؟

طوني: شو يعني عراوي؟

سلطان: يعني بيك اب؟

طوني: ياخيي فهمان عليك. بعرف شو يعني بيك اب. بس ليش راكب هالسيارة وانت جامعي وموظف إداري؟

سلطان: لأني أكد عليها بالليل.

طوني: طيب ياخيي اشتريلك سيارة مثل سيارتي كبيرة وواسعة.

سلطان: وش سيارتك يا طوني؟

طوني: رانج روفر.

سلطان: ما شاء الله.. بكم هذي يا طوني؟

طوني: شي 250 الف ريال بس.

سلطان: ليش كم تستلم راتب يا طوني؟

طوني: يا خيي عم بستلم 50 ألف راتب اساسي وبدل مواصلات 10 آلاف ريال وبدل اتصالات 8 آلاف ريال وبدل تذاكر وسفر وغربة 5 آلاف ريال وبدل طبيعة عمل 3 آلاف ريال بس.

طوني: وانت كم تستلم يا سلطان؟

سلطان: 3210 ريالات.

طوني: وهيدا بدل شو؟

سلطان: هذا سلمك الله بدل «ما اشحذ».!

باتجاه الابيض

تعليق حول الموضوع ::

زاوية باتجاه الابيض للكاتب سعد الدوسري بجريدة الرياض
واللي معروف عنه اهتمامه بقضايا الشباب في المجتمع

الله يجزاه خير ويكثر من امثاله

للاسف وبكل قوه هذا واقعنا الاجنبي راتب خيالي والسعودي مايؤكله عيش !!

احببت نقل هذا الموضوع للجميع لانه يهتم بقضيه نعاني منها جميعا

والسلام عليكم ورحمه الله وبركاته

ابويارا المغترب · #2 23/01/2007, 09:21 AM

إقتباس


	طوني: وهيدا بدل شو؟ سلطان: هذا سلمك الله بدل «ما اشحذ».!

روووووعه بروعة كاتبها وناقلها.......

للأسف شر البلية مايضحك...>>>>> هذا المستخدم ميت من الضحك

hilalemooot · #3 23/01/2007, 09:40 AM

السلام عليكم

يعطيك العافية تركي ..

واقع مؤلم اللي نشوفة .. الشاب السعودي وكأنة غريب في وطنة .. بينما الأجنبي يسرح ويمرح وياخذ اعلى الرواتب وانواع البدلات !!

تسلم على النقل

فـ مان الله ,.,.,

زعيم سديراوي · #4 23/01/2007, 11:28 AM

الله يعطيك العافية ويجزاك الخير ..

وللأسف الأمر راح يكون مثل ماكان وأردى ...

حاولت أتفأل إن الأمور راح تتعدل لكن عجزت ...

التفاؤل بكبره مو مقتنع إنه يتفأل ...

وشكراً لك ...

الكلاسيكي · #5 23/01/2007, 11:30 AM

يـــاهــلا فيكـ اخوي تركي ..

الصراحه الكاتب وضع قلمه على واقع عليم وتحسس احد مواضيع الشباب ومعاناتهم ..
وانا واحد منهم .. والحوار الليب دار بين طوني وسلطان يحكي واقعنا للاسف ..

الآن الاجنبي يستلم رات ضعف راتب السعودي ثلاث مرات .. مع ان السعودي احق بانه يستلم
بمثل هذي المبالغ الطائله .. ولكن في الفتره الاخيره اشوف ان اكثر الشركات بدات بالاستاعنه
بالشباب السعودي اللي يمتلكون مؤهلات .. ولكن مو لسواد عيونهم ..!! لقلة رواتبهم .. !!!

اتمنى يصلح حال الشباب والرواتب اللي لو سدد فاتورته وعبا بنزين وسدد اجار لللاستراحه انتهى !!

لك الف شكر اخوي تركي على نشر المقال او الحوار اللي يجاكي وضعنا ..
وان شاء الله نشوف الحلول من الحكومه والمسؤلين ..

تقبل فائق احترامي ..
ولك مني ارق التحايا ..

دمت بخير

ريدزاوي · #6 23/01/2007, 02:22 PM

يعطيك العافيه تركي ...

حقيقة انا ماالوم الشخص اللي يستلم مبالغ عاليه اللي هو الاجنبي ..
لكن اخوي تركي اللوم يقع على اللي يرفض شهادات ابناء وطنه ويقبل شهادات الاجنبي لانه اجنبي فقط..
اللوم يقع على اللي يدفع هالاموال للاجنبي بحكم انه استقدمه من بلاد اجنبيه وهو في الاساس في غنى عنهم لان ابناء البلد يحملون هذي الشهادات.

الثقه لازالت معدومه بالكوادر الوطنيه...على الرغم من انهم افضل انتاجا واخلاصا من غيرهم..

ويعطيك العافيه اخوي تركي ..وموضوع في محله

الهلالي دائماً · #7 23/01/2007, 04:30 PM

المجلس منور ياعالم

هلا وغلا اخوي مستر قووول

إقتباس


	طوني: يا خيي عم بستلم 50 ألف راتب اساسي وبدل مواصلات 10 آلاف ريال وبدل اتصالات 8 آلاف ريال وبدل تذاكر وسفر وغربة 5 آلاف ريال وبدل طبيعة عمل 3 آلاف ريال بس.

بس

مسييكين طوني الله يعينوا ئلبي عم بيتئطع تئطع عليه :p
شو مافي انسانية بها العالم خخخخخخخخخخخخ

اخوي تركي والله كم طوني جاء هنا منتف وبعد كم شهر تلقاه طاق BMW :p

ارزاق ياعالم وانا رغم ان خشتي (تقل) لبناني ;) الا مافي احد يقدر ؟؟

شكرا لك استاذ تركي والله يعطيك العافية ,,,

tofo · #8 23/01/2007, 05:44 PM

حبيب الب الماما عم ياخد دبل السعودي شي 10 مرات . ومنيح كتيير انه هيدا السعودي عم يشتغل . لانه فيه كتير سعوديين ماخدين مكانهون الاجانب

شي كتير عم بيحزن وواقع مؤلم كتير كتير

< مسكت خط مع اللبناني

ياليت من سوا تصفيه لديرتنا !!

BOJASSEM2 · #9 23/01/2007, 05:54 PM

ماشاء الله عليه هالطووني

كل هالفلوووس وبعد كل كلمه والثانيه يقووول " بس " حسباله انها قليييييل

اقول الله يعينا

ابوندى الهلالي · #10 23/01/2007, 09:50 PM

إقتباس


	يا خيي عم بستلم 50 ألف راتب اساسي وبدل مواصلات 10 آلاف ريال وبدل اتصالات 8 آلاف ريال وبدل تذاكر وسفر وغربة 5 آلاف ريال وبدل طبيعة عمل 3 آلاف ريال بس.

يعني المجموع 76ألف ريال طاعونين
وتلقاو بديرته مايعرف يسوق سيكل
وحنا ندور على 3000ريال و4000ريال لاكن الحمدلله على كل حال

شاكر نقلك للموضوع

بس السالفة صدق؟

البارق · #11 23/01/2007, 10:49 PM

السيد هدف بزات نفسوووه موقود في المقلس العام ..!! مش معؤوول ..

<--- شكلك تقول الله من المصالة ..

ودي أرحب بك بطريقة جديدة تليق بمقامك ..

نجي عاد للموضوع ..

والله بصراحة هذا واقعنا المرير !!!! يعني مهما قلنا بصراحة الأجنبي ماخذ حقه بزود بمقابل جحود للمواطن ..

صحيح إن فيه بعض الأجانب عبارة عن خبراء في مجال معين ودراستهم اكثر تخصصية من جامعتنا لكن حتى مع هذا المفترض توفير جامعات متخصصة وفقا لسوق العمل لدينا وهذا اللي يسمى بناء للغد ..!!!!

المجال هنا يطول والكلام في هالنقطة كثير .. وما نقول إلا الله يصلح الحال والله المستعان ..!!!!

شكرا لك يا سيد هدف ..

الكناري الأزرق · #12 23/01/2007, 11:56 PM

و عليكم السلام و رحمة الله و بركاتة ..

جبتها عالجرح يا سعد جبتها عالجرح .. آآهـ يهالشاب السعودي في اغنى بلد في العالم و الوظيفه ما فيه و ان لقا فالراتب ما يوكل خبز ! ..

الشاب السعودي تلقاهـ يجيب لك الاول عالدفعهـ .. يجي يبي وظيفه ما حولك احد .. الاجنبي ذكاءه وسط و مكانهـ على دفعته غلط بـغلط و مع ذلك وظيفتهـ جاهزهـ ,,

إقتباس


	طوني: وهيدا بدل شو؟ سلطان: هذا سلمك الله بدل «ما اشحذ».!

لا اعلم هل اضحك ام ابكي ؟!

اكررهــا .. جبتها عالجرح و ربي ! ..

تـُــركي .. يعطيك العافية !

السلام ..

حبيبي توتي · #13 24/01/2007, 03:38 AM

ياهلا والله وغلا بـ Mr.GoaL

منور المجلس اخوي تركي

اما بالنسبه لـ طوني واخونا سلطان
فهذا والله الحال يعني بلد خيره لغيره الاجنبي يستلم الآف وفيه سعوديين من ابناء هذا البلد مايلقون شي ياكلونه

إقتباس


	سلطان: 3210 ريالات. طوني: وهيدا بدل شو؟ سلطان: هذا سلمك الله بدل «ما اشحذ».!

بس هذي غييير
صراحه ماتدري تحزن

او تضحك

يعطيك الف عافيه اخوي تركي

وسلام عليكم ورحمة الله

هلاليه سنعه · #14 24/01/2007, 04:26 AM

والله القهر .. اجنبي راتبه عالي والسعودي في ديرته راتبه يالله يسد لقمته ..
شفنا الكثير اجانب يتحكمون بالسعوديين وبمناصب اعلى والسعوديين يعطون مناصب قليله ..
؟؟؟؟
يعني الاجنبي يفهم يدير والسعودي لا؟؟؟؟؟؟؟
.
اعرف وحده تشتغل بشركه تقوول مافيه الا انا وثنتين سعوديات
والبقيه اجنبيات تقوول يتحكمون فينا ومستحيل نناقشهم او اي شئ رواتبنا قيله
وهم رواتبهم دبل دبل دبل دبل رواتب السعوديات..
ودايم يهددونا ان تكلمنا بيفصلوونا لمتى الاستحلال الاجنبي ..
متى نعطي بناتنا وشبابنا فرصه ونخليهم ياخذون حقهم بالعمل واكل العيش ...
.
الكاتب سعد الدوسري رائع بحق دايم يناقش مواضيع مهمه وحساسه
تعجبني كتاباته ..
اخوي مستر قوول شكرا لك على طرح هالقضيه المهمه ..
الله يعطيك العافيه ..
دمت بخيــر ..’’
.

سندريلا الهلال · #15 24/01/2007, 06:46 AM

السعودي ماله .لا في الصناعة ولا في التجارة ولا في الادارة ..هالمفهوم من وين جاء ..!!!

السعودي رسخت في بال كل شخص انه شخص اتكالي يريد مايحصل عليه من دون تعب..!!

السعودي يُـــدار .. لا يُـــــــدير!!!!!!!

التجربة على السعودي شديدة وطويلة المدى ..أما على الأجنبي في توقيع العقد مافي أسرع منه!!

ولما نحتج يقولون السعودي كسووول!! السعودي مو كسوول ولكنه بعد مايبي يكوون مغبون!!

أجنبي وبنفس مميزاتي ومؤهلاتي ياخذ ضعف راتبي ليه!! حاسب السعودي عندما تعطيه نفس ماتعطي الأجنبي وبعدها .. قارن!!

ملينا من اسطوانة اشتغلوا اي شغله !!! يعني وش يشتغل .. !! توصيل طلبات منازل !! هذا من يزوجه!! اصلا كيف بيتزوج !!

راتبه وش راح يكون !! عاد الله واكبر يالبدلات !!

الشباب من حقه يتوظف وظيفه محترمه ..بعلمه واجتهادة !!

الان الأسعار لاحول ولاقوة الا بالله!! شيء لايطااق !! واحد راتبه 4 آلاف هذا كيف يبني ويكوّن أسرة!!

مصاريف من ............الى!!!

بصراحة الشباب هنا وضعه جداً جداً جداً يحتاج الى اعادة جادة لهيكلة وضع الوظائف والرواتب !!

انا ما اقول كل الشباب لازم يصيرون مدراء !! بس لازم رواتبهم تتحسن حتى لو مسمى الوظيفة متوسط!!

ليس الأهم ماتعمل !! بقدر كم تأخذ لأن الراحة في العمل اساسها ماتستلم نهاية الشهر !! فأنت تحتاج عمل من اجل كسب الرزق لما من اجل ان تتباهى بمركز دون نتيجة !!

الله يوفقنا جميعاً والله يعطيك ألف عافية على هالموضوع اللي يهمنا جميعاً