رمضان منذ مبطي ......
ـــــــــــــــــــــــــــــــــــــــــــــــــــــ بسم الله الرحمن الرحيم ـــــــــــــــــــــــــــــــــــــــــــ
السلام عليكم ورحمة الله وبركاته .....
بداية أحب أن أبارك لكم بهذا الشهر الفضيل وأعاده الله علينا وعليكم بالخير والسرور ونحن بأتم صحة وعافيه .....
وأحب أن أذكر أخوتي أن دخول الشهر بقي عليه أيام قليله والبعض ربما نسي أن عليه أيام قضاء وأنه ربما قد أفطر العام الماضي أما لسفر أو لمرض أو لأي سبب كان ومن قد نسي نذكره بوجوب القضاء ونسأل الله القبول منّا ومنه .....
*************************************************
تحذير شديد اللهجه .....
هذا الموضوع طويل مره ولكن فيه مواقف حلوه جدا ماقدرت اختصر شيء منها ولكن انا واثق بانا سوف تحوز على رضاكم ...
أحب شهور السنه لي هو شهر رمضان لاسباب كثيره منها منها كثرة الخير اللي في هالشهر وكثرة الاحسان على الفقراء وصفاء النفوس وتغيير نظام النوم والسنبوسه واجد
واشياء كثيره جدا تجعل الشهر في مقدمه الشهور وبالتاكيد الامر الاهم والاعظم هو الصوم اللي ماتعرف كم حسناته ولا عددهها ((((( الا الصوم فإنه لي وأنا أجزي به )))))
وطبعا هاليومين جالس أتذكر أيام رمضان زمان وأقارنها بهالايام هذي وحقيقه وجدت اختلاف شاسع وكبير بين أيام زمان والايام هذي ...
وأبذكر لكم مقارنه صريحه وصادقه لرمضان الطفوله ورمضان الشباب والكسل ..... وطبعا بالمواقف الطريفه والمضحكه ....
كنا ايام زمان اذا سمعنا أن رمضان بكره قام المدفع يثور علشان يعلم الناس ان رمضان دخل واذا كان الوقت مبكر صلو التراويح ونروح نصلي وبعد الصلاة ننقز مع الوالد رحمة الله عليه ( من يقرأ هالكلمات رجاء يترحم على والدي وعلى اموات المسلمين جميعا ) الى السوق نشتري الخضار والمقاضي وطبعا اخوكم اهم شيء كان في حياته الرمضانيه ومازال هو التوت او ( قواطي الفيمتو ) وبصراحه ماحس لرمضان طعم بدون وجود التوت والوالد كان يحب قمر الدين لكن انا ماحبه وعلشان كذا اذا شروه اقوم امسك هالقمر الدين واغفصه بيديني الين يغدي زي العلكه
<----- نذل
وطبعا مايحتاج اقولكم وش الزحمه في الاسواق هكالليله وكم حجم المشتروات اللي نشتريه شي له لزوم وشي ماله لزوم .....
وفي اول يوم ننقز للمدرسه وكانت بجنب البيت ونروحلها مشي بس في هاليوم حليلين ولا نرش ماء من بزبوز المسجد على العمال ولا نطق سواق الجيران بزعم اننا صايمين ....
واذا وصلنا للمدرسه تشتغل التهاني والتبريكات على المدرسين وطبعا تشوف المدرسه هاديه ولا فيه ازعاج كالعاده ولكن نشوف بعض المدرسين قافله معهم ولاعرفنا الا بعدين ان سبب هالتقفيل انهم صايمين عن الدخان
ويجون ويحطون حرتهم في هالبزارين الضعوف ...
وبرجعتنا للبيت بعد نهاية الدوام والجو قيض وحر لايطاق نروح للبراده كاننا بنتمضض علشان نرطب السنتنا لكن الواحد مايترك البراده الين تمتلي معدته مويه ويروح يسير على الثلاجه لعل وعسى يلقى شي جاهز يسرقه ويركض فيه للملحق بعيدا عن عين الرقيب ....
طبعا الاهل كانو اذا شافونا تعبانين سامحونا وغضوا الطرف عنا لكن ايام تمسك معهم غلط وهات ياكفوف ونعال تجي مجاوبه ثلاث الاف كل وحسب مزاج المفطر واللي سامحله بالافطار , وطبعا ماننسى ان فيه اشياء نحللها واشياء نحرمها على كيفنا وحسب الجو يعني اذا كان مافيه بالثلاجه الا موز وتفاح هذا حلال مايفطر واذا كان فيه رز هذا هو اللي مايفطر اصلا ( شوفو وشلون براءة الاطفال ليتها ترجع هذيك الايام )
وطبعا اخوكم لازم يفطر اول يوم لانه من زمان عن التوت ومشتاقله ولايقدر يقاوم
وطبعا بعد افطار اول اليوم وبوجود جميع الاعمام حفضهم الله والوالد وجدي الله يرحمهم نتبطح من كثرة الاكل وبزعم اننا كنا صايمين وتعبانين والاهل كانو يفرشون السفره مره وحده مافيه على دفعتين فاذا افطرنا ماعاد نقدر نفتح عيونا وتلقى الواحد شارب اربعين كاس توت ونروح نصلي المغرب بتثاقل وتلقى الواحد من هالبزارين التوت لاعب في خشته وراسمله شنب وهذي حركه رهيبه جدا
والثوب من تحت كله شوربه وزيت متقاطر من اثر اكل السنبوسه بسرعه لانها اذا مالحقت واكلت اكبر كميه من الفطاير انت الخسران وفاتك الاوكازيون ......
وبعد الصلاه كنا نجتمع ونتقهوا ونشرب شاهي لان التلفزيون مافيه شي كاميرا خفيه حقت المصريين ملو منها وتوه يعرضها تلفزيونا على بالهم شي جديد ولايمديك تصفي القناة الثانيه الا وانتهت برامجهم وبعدها مانلحق الا على برنامج فوازير رمضان للكبار واذكر رقم الايه واسم السوره ( اعتقد الى الان يعرضونها مادروا انه من عشر سنين اخترعوا برنامج في الحاسب يطلعلك اسم السوره ورقم الايه بثانيه وحده )
وطبعا نسيت فوازير رمضان للصغار كنا نشتري بثلاثه ريال اوراق الاجوبه من اي بقاله و نسنتر قدام التلفزيون علشان نحلها لكن مانفهم منها شيء كلها كلمات صعبه او وشو الشي اللي يقول ترن ترن
وطبعا لايمكن اننا نفوت صلاة التراويح واللي يفوتها هذا بينجلد بينجلد الله لايعوق بشر ....
تذكرت موقف حلو ومحزن في نفس الوقت ... في احد ايام رمضان كانو يصلون التراويح وانا قمت اروح اشرب ماء واطق بزر ولا اثنين وارجع للمسجد اركض وبدخلتي للمسجد شفت المبخره وطبعا مافيه امل تسلم من شري ومسكتها ابتطيب وطاحت من يدي انا وقتها ماقدرت اسوي الا اني اتلفت يوم دريت ان مااحد شافني رحت اصلي لكن بعد ماسلم الامام لقيت رجال جالسين يصفون النار وربي حفظنا لانها كانت عند الباب ولو مافيه احد كان حاصرتنا النار داخل المسجد وجيت انا اسال وش فيه كان مالي خبر وقمت العن هاللي سوى كذا وزعل علي ولد الامام وقال لاتلعن
( شكله كان حاس ان المجرم واحد من اخوانه الكثيرين علشان كذا زعل )
وبعد مانصلي التراويح نروح علشان نلعب كوره حنا وعيال الحاره ونكون شارين اطقم سفاري وكلها عليها يارقم 5 او 15 يعني نص الفريق صالح النعيمه والنص الثاني ابو يعقوب وكان ابو يعقوب في عزه وتوه شباب جديد
لكن انا كنت مابي اكون لاعب فريق لانهم مايبوني اول شي لاني اذا ماخلوني اسوي كل شي اخذت الكوره لانها لنا ...
وكانت مهمتي ملاحق الكور وكنت بهالحاله اضمن ميداليه ذهبيه بدون مالعب وبنفس الوقت كل يوم اشجع الفريق الفايز علشان بعد المباراة تشتغل الصواريخ والشروخه بجميع انواعها هذا اذا ماخذهن مني مؤذن المسجد وضربني
وطبعا اذا جاء راعي الارض الفاضيه طردنا من الارض ( نذل ارض فاضيه ليش مايخلينا نلعب ) وبهالحاله مالنا الا بيتنا او بيت جيرانا لانهم فيهم احواش واسعه واذا رحنا لبيتنا ماتكتمل نص المباراة الا وجاي احد اخواني او اعمامي وطرد الاعبين كلهم واللي مايطلع بسرعه بيشوته بالزبيريه ....
لكن في بيت جيرانا مااحد يقولنا شيء لان اكبر ولد عندهم يلعب معنا واذا فاز فريقه جابلهم توت لكن اذا انهزموا طردهم كلهم ومايخلي الا حنا علشان عارف ان بكره اللعب عندنا .....
طبعا من المواقف اللي مانساها من شطانة الطفوله عطيت ولد جيراننا دستة شروخ كامله وقلتله رح ولعها في مصلى الحريم هو ماصدق انه بيولع شروخ ومن الفرحه وافق وعطيته الولاعه بعد وانتظرته برا ويوم بدا مسلسل الرعب عند الحريم وقاموا يصارخون وبعضهم هربن من المسجد جوا ومسكونا لانهم عارفين اني من اكبر موردي الشروخ للحاره ودايم جيوبي مليانه خيرات لكن لزقتها بولد كان لي مشكله معه في المدرسه وهو من الحاره اللي بجنبنا ( مدري وش صار عليه ) ....
المواقف كثيره وكثيره جدا ولكن احلى المواقف اذا كنا معزومين على فطور عند احد ورحنا لبيته انا متاكد انه بيحرم يعزمنا مره ثانيه لان حوش بيته بيتحول الى ساحة حرب بين العراق وايران والله يعينه
وطبعا اذا عطلنا من المدرسه وعزموا الاهل يروحون لمكه ننبسط لاننا بنجتمع مليون وثلاثين الف طفل في جمس واحد ( الله يعين السواق )
والباقين في سيارات كثيره لكن اهم شيء اننا مع بعض حنا يالصغار واذا وصلنا لمكه كل حرمه تمسك بزرانها وتنتبهلهم واذكر مره اني تهاوشت مع اخوي وجحدتهم ومشيت وعقبها ماذكر الا اني ضعت ولا حصلوني الا بعد صلاة الفجر في قسم الشرطه هايت بشوارع مكه الين لقاني واحد الله يجزاه خير ابكي ووداني للشرطه ويوم دخلوني للقسم وشفت المسدسات الحقيقيه عجزت انام يومين
طولت عليكم صح
عموما ترقبوا الجزء الثاني عن رمضان هذه الايام وبتفاصيل اقل
بعد يومين باذن الله ........
موضوع رائع بمعنى الكلمة 
الوضع المتطور
