ما ودي أعــــــــــــــرس - نادي الهلال السعودي - شبكة الزعيم

عـــواكيس · #1 08/11/2001, 05:42 AM

في ذات يومٍ من المرات كنت قاعدون مع أمي وكانت الساعة تشير إلى الثنتين ظهراً بعد ما خلصت الجامعة وتكللت جهودي بنجاح منقطع النظير وتخرجت بمعدل خطير ولا أحد مصدق أني تخرجت مع إن كل شيء ممكن ما يصير ((لزوم القافية و إلا مالها سنع أبد))وكان هذا كله في إجازة الصيف والوالدة معطلتن من المدرسة قاعدين نسولف ونتجاذب أطراف الحديث ونلعب ورقة والشمس ما غير تشوينا والعرق يتصبصب صايرٍ الواحد تقل دجاجة منكبٍ عليها ماء ونحن نرفض أن لين ونشجب كل عمل مهين ولا نأبى بحرارة الشمس آه يا رب يا معين ما غير نسولف ولا همنا

يا وليدي ما دام إنك خلصت الجامعة وش النية وين تبي تتوظف

أصلاً أنا ما ودي أعرس ولا تقعدين تصيرين مثل هالأمهات التاليات ما تلقين غير الواحدة فيهن لا عندها مهنه ولا مشغلة غير أنها تقول كل يوم لولدها أعرس ودي أشوف عيالك قبل ما أموت شوفي عاد إذا لك نية تموتين موتي أنا مالي خص فيك من اليوم ورايح لي حياتي ولك حياتك دعيني أستمتع بريعان شبابي أنا ما نيب معرس يعني مانيب معرس ما أبيك تزنين على رأسي

وجع وبلى وطواعين ومواعين إن شاء الله عسى ما شر من جاب طاري العرس الحين أنا ما تحملّتك تبي تجيب عيالك لي لا تعرس أبد الدولة الرشيدة ماهيب ناقصتن عاهات مستديمة

أخسي يمه أحلى يا مستديمة أنتي يا حركات شوفي عاد أنتي تعرفين مدي معزتك وغلاوتك لا تعتقدين إني قاعد أستجدي عطفك على الكم طبخة لا ما هو أنا من النوع الإستفزازي أو الإنتهازي صحيح أنتي في موقف ضعف الآن و أسهمك راحت وطي لكن لا بد أن يدور في خلجات نفسك أني لا أحب أرد لك طلب و كما تعلمين عن مكانتك الكبيرة عندي وكل يومين اهدي لك أغنيتن بالراديو وعساي ألحق جزاك بس العرس ما أقدر وصعب ويبي له مجهوداتٍ كثيرة بس عاد شوفي ما دام هذي منوتك قبل ما تتسهلين وتموتين غالي والطلب رخيص وما راح أرد حلفتس وما نيب قايل لك لا أنا كم عندي من أم في حياتي العامة خلاص اللي تشوفينه سويه أنا راح أعطيك المواصفات مانيب طماع ولا لي شروط والحمد لله مستقبلي زين مالي كم يوم متخرج من ثاني متوسط و كلن يتمنان بس عاد أنت عارفة لزوم الأتيكيت لأزم أتشرط

أمي لا حول ولا قوة إلا بالله وش فيك إنهبلت تبين أوديك للشيخ يقراء عليك شكل اللي فيك يا وليدي ما هوب جني وحيد شكله ددتسن محملتن من هال جن أقول أركد لا الحين أكمخك وأغير ملامح وجهك لا وتبي تتشرط بعد و قاعد تجيب كلامٍ ما أدري من وين تجيبه من كثر ما تقعد عند هالراديو خرب أفكارك من هي بنته هالتيكيت هذي ومن وين عرفتها ومن قال لك عليها وعسى ما شفتها بالراديو علمن بكل شيء أنت كل ما تكبر تنهبل

يمه وش فيك طبيتي فيني خليك من الاتيكيت الحين متى راح تخطبين لي بعد شوفي يا يمه أنا أبي لي مواصفات خاصة فتحة و أنوار غازيه وجنوط نيكل وجناح و ولاعة ودرج كل شيء أبي اكتبهن لتس بورقة و ابيتس تحرصين ما دام إنك حالفتن تزوجيني قبل ما أنحرف لأني وآلم يا تزوجيني يا والله لأصير داشر واتتن كل يوم و لا أتروش أبد و أتعلل لين الساع 10 من تالي الليل ولانيب مدهنتس ولا مارختس والله لو تقعدين تصيحين مالي داخل

دخيلك الله وسبه جهاتٍ من الله حرجتك و أنا أمك أنك ما تعود للتتن آقين مانيب ناقصه خلاص ما قلت شيء قلي مواصفاتك ويكون خير إن شاء الله

المواصفات
· عيون كبيره تقل مفك غاز رقم 22
· توانك ******* الترجمة مشفرة
· فتحة يعني لابسة تنوره مفتوحة
· درج يعني عندها لها مخباة في مقطعها
· ولاعة يعني معها كبريت وتحطه في مخباتها يمكن احتاجه إذا غيرت رأي وكان ودي أنحرف
· منزلة يعني قصيّرة ما أبيها تصير أطول مني عاد وشلون أطولها بعدين
· لازم تكون استوائية يعني مع الجو تسمن و تنتفخ بالبرودة و تتعصقل و تنحف بالحرارة
· 8 سلندر يعني أبيها تفر البيت فر أبيها تكون سنعه ونشيطه وكل ما أدخل ألقاها ما غير تدور
· أبيها تكون ديزل يعني مهر رخيص ويابانية يعني صبورة وتتحمل و ألمانية يعني كشخه ومصرية يعني طرطره وبربره

شفتي يمه طلباتي متى راح أتزوج إن شاء الله

وش ذا والله يا وليدي إني ما فهمت شيء وش هالبربره بس على اللي أنت حاط راح أعمل قصارى جهدي و الله يكتب مابوه خير لمصلحة الأمة العربية و الإسلامية
معاني الكلمات :
معطلتن = متأجزتن
يتصبصب = يتناثر
دجاجة منكبٍ = كل ما عليك فعله هو أن تحضر دجاجة لونها أبيض ويكون رأسها مصلّع وبعدين كب عليها ماء
تقعدين = تجلسين
التاليات = الجيل الجديد
أبيك = لها عدة معاني ممكن تكون أبيك يعني أبوك أو أبغاك أو أريدك أو يا ليتك أو إذا ما عليك أمر يعني أنت وضميرك
تزنين = تحنين
وطواعين ومواعين = كيف الحالK
ناقصتن = مأخوذة من نقص ينقص نقصا يعني من جنبها
أغنيتن = جمع أغنية
ألحق جزاك = اللي يعرف معناها يعلمني
منوتك = أمنيتك
حلفتس = حلفك
كلن يتمنان = والله من زين الهرج آيه كثر منها
ددتسن محملتن = ونيت محملتن
علمن = tell me
حالفتن = قاسمتن بالله
وآلم = جاهز
داشر واتتن = أتتن و ادشر
أتروش = أتحمم
أتعلل = أسهر
مدهنتس ولا مارختس = دهن يدهن دهناً ومنها يطلع لنا علم التدهين وهو أن تحضر فيكس وتفرك فيه ظهر اللي قدامك وتفرك فيه فرك وتخلي يدينك تطلع من عند بطنه أما مارختس مأخوذة من مرخ فريق كرة القدم وعنده عدة العاب أخرى فريق مكافح
انفلت = انطلق
مخباة = الشق بالجيب حق الفلوس والمناديل و تكمن اهميته والبودر والديرمان وكل متطلبات الحياة الضرورية راح تقولون لي ليش مو مهم للفلوس و المناديل أقول لكم لأن الفلوس والمناديل تقدر الوحده تدسهن في اماكن أمنه ولا الجن الزرق يقدر يطلعهن
مابوه = ما فيه

والسلام عليكم ورحمة الله وبركاته ولا تشرهون