أحـــلى الأمــــــاني .. مع حســن كراني .. بس التكنولوجيا شيء ثــاني ..!!! - نادي الهلال السعودي - شبكة الزعيم

سندريلا الهلال · #1 13/01/2007, 05:09 AM

بسم الله الرحمن الرحيم ..

قل للذي زار لبناناً وجنته
فبات من عقله المخدوع مسلوبا ...
لا تذهبن بك الذكري مجنحة ..
وترتقى بك فوق السحب منهوبا
(( فنجــــد)) لبنان في فصل الربيع لذا
أمسى الجمال (( لنجـــد)) منسوبا..

عسى الله لايخلينا من مملكتنا .. ومن رياضنا خـاصة .

.

الرياض .. عاصمتنا ومدينة الجميع

.. تحتضن الجميع ..

وفيها سكّان من كل مناطق المملكة ..

طبعاً الرياض الغالية

.. مايكون الجو زين فيها الا يومين في السنة .

. اللهم لا اعتراض ..

يعنــي جو متقلب زي اللي في الرياض ماراح نشوف .

. يوم صحو.. ويوم غبار.. موسم مطر.. موسم جفاف ويوم برد ..ويوم دفى ..يعني الفصل مانعيشه كامل يعني فصل الشتاء ممكن يكون ربيع وخريف وصيف ..

وحنا الحمد لله ناس متعلمين ومتثقفين ووصلنا لمراحل متقدمة بالتطور والعلم والتكنولوجيا ..

وش اللي يمنع من انه يكون هناك .. نشرة يومية في صباح كل يوم تعلمنا الجو وش راح يكوون ..

كل هذا في علم الغيب .

. لكن فيه شيء اسمه علم الفلك وفيه ناس لهم خبرة في هالمجال ..

يعني بصراحة اهل الرياض مايصدقون يكون الجو زين

عشان يطلعون للبر ويوسعون صدورهم لأننا تقريبا مانملك الا هالوسيلة حتى نرفه عن أنفسنا وأغلبنا يحب طلعات البر ..

يعني مو من عرفنا أنفسنا ومافيه الا حسن كراني

الله يذكره بالخير هو وزملاه.. يقول النشرة الساعة عشرة

بالليل

وكأنها مسلسل تعاد الساعة وحدة ..

نفسها ماتتغير مع ان الجو يتغير بلحظه ..

مافيه الا ضباء.. وتمياء وابو عريش.. وسامطه وهلم جرى

.. الكبرى 35 والصغرى..خمسة عشرة .

. وصورة شمس ولا سحابة ..

المفروض ان الواحد يقدر من خلال شاشة التلفاز اللي عنده يعرف وش رايح يصير عليه

هل الجو داخل المدينة

يختلف عن اطراف المدينة وهل الجو مناسب لأي طلعة

.. حتى يروح وهو على بينة مهب نعتمد على الجو من سور البيت

.

مثلا اليوم احنا قررنا نطلع للبر ..

معتمدين على ان الجو دافي وراكد

.. لكن يوم وصلنا للبر صرنا مانشوف

بعض من الغبار

وكان الهواء شديد مررة

فاضطرينا ..نروح لأحد المنتزهات نتغدى فيها

..لأن الغداء بدل مايكون رز ولحم راح يكون رز ولحم بطعم الغبار ..

وطبعاً كان نقدر نروح أماكن .. في البر يكون الهواء فيها أخف .. مثل المخططات .. اللي على طريق الثمامه لكن

لكثرة الناس ماشاء الله ,

, وصعوبة جلوس العائلة جنب العائلة

اضطرينا نروح لمنتزة عائلي

.. فلو ان

الاراضي اللي في اطراف المدينة لا يتم اغلاقها حتى تبنــى لكان حل رائع

لتوفير أماكن للمتنزهين في رياضنا اللي تسكن نفوسنا قبل نسكن أراضيها ..

جاء الربيع فماس الكون ترحيبا ..
وغنت الورق فوق الأيك تطريبا ...
وصارت الأرض مخضرا جوانبها ...
بالنبت تلقاه مفروشا ومنصوبا ..
فلو نظرت ضحى نحو ((الريـــــــــاض)) وما ..
فيها من الحسن مبثوثا ومسكوبا ...

وكـل عــام ونحن ومملتكنا وأمتنا الأسلامية بخير وصحة وأمن وأمان ..

**الـــــــــواوا** · #2 13/01/2007, 05:36 AM

اعلام سعودي ماعندك احد
حتى الاخباريه المشغل النسائي ماتجيب اخبار الطقس
والظاهر يقيسون درجه الحراره فقط اما الرياح والاتربه وووو على جنب

حلوه تعليقك على صوره الشمس وصوره السحابه
تسلملي فضفضه اخر الليل

العنفوان الازرق · #3 13/01/2007, 06:37 AM

جيتك وانا مشتاق هايم بك والوع
من المحبة امتلى قلب وفاض
خل العتب واللوم ترى كلها اسبوع
خل تهتني عيوني بصافي البياض
لودريت ان الشوق يحني بقلبي اضلوع
مارحلت لديرةٍ غير الرياض

فديت الرياض واهلها

اختي سندريلا ان شاء الله السنة الجاية قبل تطلعون لمكان ادخلي على الرابط هذا تلقينه مكتمل

الرئاسة العامة للارصاد الجوية وحماية البيئة
موقع جيد ومفيد بس ان شاء الله يكتمل
http://www.pme.gov.sa/una.asp

افتخر بالزعيم · #4 13/01/2007, 07:33 AM

لي عودة بعد الدوام بإذن الله..

((شوووق الزعيم)) · #5 13/01/2007, 08:14 AM

آآمين الله لايخلينا من الرياض يازينها ويازين غبارها( وبردها ) وحرها ووووو.....

احبها ياناس هالرياض

وبالنسبه للبر احمدي ربك عالاقل انتم ماشاء الله عليكم تطلعون للبر انا قلبي يفرررك عالبر بس اللي عندنا لاحياة لمن تنادي مايطلعون للبر الاالشديد القوي الظاهر انا اللي صكيتكم بعين وجاكم الغبار((امزح ترى عيني بارده))

اما حسن كراني وشلته لا خبرك عتيق اللحين تطورت السعوديه الاولى ماعاد صاروا يطلعونهم

لاوالنشره الجويه يلعبون علينا في عز الحر تكون درجة الحراره 50ويقولون 35وفي عز البرد تكون درجات الحراره تحت الصفر ويقولون 15والا16

وتبين نصيحتي اذا بغيتوا تطلعون البر اطلعوا شختك بختك لاتطاوعون كراني ولاغيره ترى احسن من لاشي خخخخ

تحياتي لك سندريلا امتعتينا يعطيك الف عافيه
اختك /شوق

الكلاسيكي · #6 13/01/2007, 11:05 AM

ومع الغبـــار وتقلب الجو إلا اننــا نحب الرياض ..
وما نستغني عنهـــا .. وعن ترابها ..

والله وانا اخوك اشوف ان الاحوال الجويه مايفيدون إلا المطارات والهل الصيد .. طبعا صيد البحر ..
ولا احنا محد جاب خبرنا .. يعني احيانا اكون جالس دافئ في البيت واطله وانصدم بالجو ..
اما غبار .. او عواصف .. او حر قوه .. او برد قوه ..

عاد مثل ماقلتي احنا في نجد طول السنه والفصول تداخل في بعضها ..
معاد ندري وش الشتاء من الربيع ..

الله يزين الحال .. الظاهر مالك الا كل يوم اطرح لك هنا الاحوال الجويه بالتفصيل ..
واصير احسن من حسن كراني .. وعبداللطيف العيويني

.. الله يذكرهم بالخير ..

جونا في الرياض غايه .. يعني يحب المفاجأت ..

دمت بخير ..
اتمن لك قضاء اجمل الاوقات في جونا السبرايت !!

الهلالي دائماً · #7 13/01/2007, 11:17 AM

السلام عليكم ورحمة الله وبركاته ...

هلا وغلا بالمبدعة سندريلا ....

اجل الرياض تغطي على لبنان

الا على طاري الارصاد الجوية اذكر قبل سنتين بغينا نكشت فواحد من العيال قال لي

دق على الارصاد الجوية وسألهم وش حالة الطقس

انا ظنيته يستهبل ولكن الموضوع طلع جد
ودق عليهم والله ويعطوني التوقعات وكانت تساعد على الكشته

ومن ذيك اليوم صرت ادق عليهم كل ما بغيت اكشت

والا لو على كراني عز الله رحنا فيها خخخخخخخخخخ:p

شكرا سندريلا والله يعطيك العافية ,,,

عزوز الأزرق · #8 13/01/2007, 11:17 AM

كلكم تحبونها ...؟؟!

ههههههههههههههههه

اجل وش رايكم قررت احبها حتى انا < < هي خاربه خاربه ..

اقولكم .. سوو بحر فالثمامه يمكن يمسك الغبار ...

والا شجروا .. كود الغبار يركد شوي...

حسن كراني .. ماعاد للنشره طعم بدون أحلى الاماني...

سندس .. خيرها فغيرها ... وهالايام ينصحون بجووو جده... اللهم لك الحمد .. اللهم اديم النعمه ..

ماابي اوصف لكم .. اخاف تقولون ماجابوها فالاخبار ..
اسألوا من تعرفوووون .. الاسبوع اللي مر ولا اروووووووع ..
جعل ذا الاسبوع مثله ..

سي يااااااااااااااااااااااا..

هلالي وشقاوي · #9 13/01/2007, 11:55 AM

أصلا احنا في الرياض لازم نسوي لانفسنا ترمفاجآت علشان كذا نحب يكون الجو مفاجئة امحق خخخخخخخخ

بس احب اعلق على حاجه ياسندريلا الدبيه الرشيقة .

الرياض مع الأسف مافيها اي شي سياحي اقولها وبكل صراحة يعني أنا لما أبي اطلع البر لازم امشي 150 كيلو وغيرنا من المدن يبي البر يروح عشرين كيلو بس .
فعلشان كذا مانبي نعرف حالة الجو وش الفائدة .

الزعيم9000 · #10 13/01/2007, 12:07 PM

مشكوره سندريلا

افتخر بالزعيم · #11 13/01/2007, 07:07 PM

هلا سندريلا

عساكم انبسطتوا بس ;)

الله يذكر ايام كراني بالخير هو وشلته الباقية

لكن الحين الوضع تغير صارت مصادر المعلومات وخصوصا بمثل هالامور اكثر من ان تعد وتحصى صار الشخص باي مكان وباي وقت يقدر يحصل المعلومة الصحيحة وبدون اي تعب

يعني في اكثر من موقع تقدر تعرف من خلاله درجة الحرارة باي مكان بالعالم وباي وقت وحتى حالة الجو اذا كان ممطر او صحو او غبار او غيره ويحدث ثانية بثانية وحتى تقدر تعرف الجو داخل المدينة والجو حول مطار الملك خالد ( يعني عند الثمامة )

http://www.weather.com/

http://weather.yahoo.com/_sv=off

وصدقيني مثل هالمواقع العالمية المتخصصة تغنيك عن الف نشرة احوال جوية واصدق منهم الف مرة

بالعكس الا بعض الاحيان ( مصلحة الارصاد وحماية البيئة ) تاخذ من هالمواقع

لان اكيد التقنيات اللي عندهم افضل من اللي عندنا بالفين مرة

متألقة دائما بحضورك مستشارتنا ...

دمتي بخير..

...SoMe OnE... · #12 13/01/2007, 07:30 PM

,,,
,,
,

الله يذكركـ بالخير .. حسن كراني / عبداللطيف العيوني

كلهم كانوا عمالقه في الاحوال الجويه .. لكن الادهى منها ان حسن كراني خرج على الناس في استراليا وقدم لهم النشرات الجويه .. لكن بعد ذلكـ هُدد بـ القتل من احد المزارعين لـ تعارض مايقول عن الاحوال التي يراها الناس ...!!

وفيما يخص الرياض .. في اعتقادي انها المدينه الوحيده والتي تجتمع فيها الفصول الاربعه في يوم واحد .. فـ هي حقيقة مدينة ( الفصول الاربعه ) ولعلَ مايثير الغرابه اننا في فصل الشتاء ونرى الغبار المتطاير يمنة ويسره .. وهذا مايناقض توافق هذه الاجواء مع مانعيشه لكن في اول الامر واخره نسال الله العلي القدير ان يمن علينا برحمته وان يرزقنا من وافر رحمته ,,

/
\
/

سندريلا الهلال

امنياتي لكـِ بـ نزهه رائعه في هذه الايام في ربوع المدينه الرائعه ,,
وان تكون الاجواء ملائمه بعيدا عن البروده والغبار وبعض التفاصيل الغير المحببه ,,
اشكركـِ جزيل الشكر على هذه النافذه وفي كل مرة نلتقي فيها مع قلمكِـ
يكون لنا موعد جديد مع التالق والانسيابيه في الطرح فـ هنيئا لنا بكـِ ايتها المتالقه ,,
امنياتي لكـِ بدوام التوفيق ,, والى الملتقى باذن الله ,,

****

كوني بخير
...SoMe OnE...

السلام الزعيم · #13 13/01/2007, 07:31 PM

رحمتتس ياسندرلا كان انتي اختبرتي الجو بنفستس قعدتي تراقبينة لاتعمتدين على نشرة الأحوال الي عندنا لأن الدرجات على مزاجهم

مشكوورة

صاحبة المجد الهلالي · #14 13/01/2007, 07:56 PM

هلا وغلا سن سن من زمان عنتس

اشتقنالتس

أجل تبين نشرة جوية كل صبح ياحليلتس أحيي فيتس هالطموح

يابنت الحلال حنا محلك سر مانتقدم ولا نتأخر رابضين

اللي يقول أدخلي على مواقع

طيب فيه ناس ماتعرف هالمواقع وفيه كبار في السن مايدرون وش السالفة

لازم نحط لهم مثل هالنشرات تعلمهم جدي الله يذكرة بالخير اذا جت نشرة كراني تقل مباراة نهائية مايفوتها وينصت لها كنه يسمع أهم الأخبار الشيّاب يقدسون هالأشياء ولايعرفون يروحون يفتحون روابط ويدخلون مواقع

الا فيه تقصير وتقصير واضح بعد >>>> حندزت (( بمعنى عصبت))

سندريلا تصدقين هذي حوبتي تروحين ولا تقولين لي لكن ربتس بالمرصاد

شكراً لتس يالمستشارة المدّهرة:p

نـــــــ15ــــــمر · #15 13/01/2007, 08:24 PM

المشكله ان الجو عندك هنا ما يساعد في دقايق يقلب الجو 180 درجه
واحلى شي اذا جيت اطلع بالسياره مره تشوفني مسكر الشبابيك ومره فاتحها ومره فاتح المكيف ومره فتحه
ومره ومره ....................الخ..

يعني حتى لو تكلمو ما راح تطلع صحيحه

سندرلا
كلمه حق تقال
ابي اسميك الناقده الاجتماعيه

تشـــــــــاو