#1  
قديم 11/01/2007, 11:11 PM
زعيــم مميــز
تاريخ التسجيل: 21/02/2005
المكان: الصين مؤقتاً
مشاركات: 1,663
~^*~جهزوا زنجبيلكم وحبيباتكم وحياكم معي بالسوالف~^*~






هلا وغلا بالزعماء .... من زمان عنكم .....

كيف النفسيات عساها تمام ;) ......

وامتحانات العملي عسى قدمتوا شي يرفع الراس بس ;)



لي فترة وأنا بكتب ذا الموضوع بس كل يوم أقول بكرة ...

المهم أنه بعد صراع نفسي شديد قررت أني اكتبه ذا اللحظه :p ...

فضغت على وعقبها توهقت ...

ماعرفت اكتب شي تدرون لي فترة ماكتبت موضوع ...
وحسيت أني بإختبار وقعدت أهوش نفسي وأقول وش اللي حادك تبلشين عميرك:sad: وتوهقين نفسك بشي أنتي مب قده <<< حدك وش قصدك يعني أني زلابه >>> لا :p بس أجل وشوله كل ذا التوتر <<< تدرين بعد أن كل أعضائنا مواضيعهم وش زينها أخاف يصير موضوعي ماش من بينهم:sad: >>> أها بس توكلي وابدي وأن شاء الله يدّهر مخك هالفاصل ومايقصر <<< سمي طال عمرك:p
8888
888
88
8

لا تشرهون دايم أتهاوش مع نفسي



خلونا نبدأ بموضوعي الصغنن ....







جلستي مع جدي وهاتك ياعلوم الأولين


محسوبتكم تحب هالسوالف عشان كذا تلقوني دايم لا جلست مع جدي ((ولا أي أحد كبير بالسن الله يخليهم لنا ويطول لنا بأعمارهم على طاعته)) اقعد اسأل عن حياتهم وعن قصصهم وعن معاناتهم لتحصيل لقمة عيشهم;) ....
ذاك اليوم عاد قعدت مع جدي بجمعتنا لشرب الشاهي وتقشيم الحبيبات ....

وذاك اليوم بررررررد وكنت لابسه جكيت قالي جدي بردانه قلت إيه متى نفتك من ذا البرد

قال يووووك توك بأوله .... قلت أفاااااااا:sad:

عاد قعد يشرح لي عن المواسم والنجوم :p ومتى بداية البرد وأنا مغير اسجل معلوماتي ...






بدى بالوسم


يقول أنه 52 يوم ونجومه هي العواء والسماك والغفر والزبانا

كل واحد 13 يوم ....

خلوكم منهم:p وركزوا على الزبانا لأنه هو بداية البرد تقريباً ...
يقولون الأولين عن الزبانا ( إلحق بأهلك ولا تتوانا ) يقصدون أن البرد جاهم






وعقبه يجيك المربعانيه


39 يوم ونجومها الأكليل وهو 13 يوم ...
والقلب ( يقبل البرد قبال الكلب ) بعد 13 يوم
والشوله اللي حنا فيها الحين وهي بعد 13 يوم ومابقى لها إلا 3 أيام وتفكنا ...
يقولون الأولين عن الشوله ( تعجل الشيخ البوله ) اعزكم الله
وهذا اللي صاير معنا الحين مب بس الشيّاب :p :p

وعاد من الشر اللي في المربعانيه أنها توصي عيالها مثل ماقال أخوي سهل ;) ....(في موضوع ماجد )
تقول للشبط مريتهم ولا ضريتهم عليك باللي وقودهم ليف وماكولهم دويف واللي وقودهم سمر وماكلهم تمر أبعدي عنهم ...

يعني عليكم بالتمر والحنيني والفريك وهالشغلات;) ....







نجي عاد للشبط ...


أيامها الحمد لله مب زي المربعانيه 26 يوم بس ...
ونجومها النعايم والبلدة ....
من ناحيتي هي احسن من المربعانيه لأن البرد يكون برى البيت مب زي المربعانيه البرد جوى البيت
دايم بيتنا صقعه مع أن الدفايات الزيتيه اربع وعشرين ساعه مولعه








وعقب تجينا العقارب


يقولون الأولين إذا دخلت العقارب ترى الخير قارب وهي 39 يوم مثل المربعانيه

ونجومها سعد الذابح (يحمى أهله النابح ) ويسمى سم وطبعا هو 13 يوم
وسعد بلع ( شده البرد قد انقلع ) ياهوووووووووووه ويسمى دم وبرضوه 13 يوم
وسعد السعود ( يموع كل جمود ويكره في الشمس القعود;) ) ويسمى دسم وهو بعد 13 يوم
هنا أنواع الفله بدايه الربيع والكشتات الزينه







اللي بعد العقارب الحميمين



يقولون الأولين ياربنا ياكريم اكفنا برد الحميم;) ...
وهو برد العجوز ويسمى بيّاع الخبل عباته ...
لأن الناس منول مايصدقون يدفى الجو إلا ويبيعون عباياتهم حقت الشتاء :p لأنهم يحتاجون للفلوس:sad: فعقب ينقلب الجو ويرجع البرد عليهم ويتوهقون فطلعت هالتسميه

ونجومه سعد الأخبيه ( تخرج الناس من الأبنيه ) وعدد أيامه 13 يوم
والمقدم وعدد أيامه 13 يوم


وعقب عاد يجي الحر ماهنا ربيع ولا خريف في السعوديه:p :p
مغير صيف وشتاء أما برد ولا حر ماهنا وسط




عاد الله الله بأنفسكم ... ترى الأنفلونزا شابّه على العالم ...
تدفوا زين;) ... وعليكم بالبرتقال والفيتامينات:p عشان يقاوم جسمكم ....

وبس
خلصت سالفتنا عن المواسم حقت البرد:p ,,
عساكم استفدتوا زيي






كنت بحط أكثر من فقرة بس حسيت أن الموضوع بيكون طويل مرة;)
وأنا عارفه أن الوقت من ذهب بهالفترة :p ( المفروض دايم مب بس بالأختبارات;) )
عشان كذا قررت أكتفي بفقرة وحده
وأخذت براي الهاوي بقلة الدناديش والحوسه









يالله فتكو بعافيه :p ...
واختبارات موفقه للجميع ....








اضافة رد مع اقتباس
  #2  
قديم 11/01/2007, 11:26 PM
زعيــم مميــز
تاريخ التسجيل: 30/09/2005
مشاركات: 2,202
تخاريف مخرفة


هذولا الشياب مايفكونا من فقشاتهم :p


عاد انتي تنكة تصدقين على طول


هخخخخخخخخخخخخخخخخ


شوفي انتي تقولي باقي ثلاث ايام وتنفكون من البرد ..


بجيك بعد ثلاث ايام بسألك باقي برد ولالا :p..؟


ذاك الوقت تعرفين ان الله حق


هههههههههههههههههههههههه


يعطيكي العافية عالموضوع .. ولله يثبت معنوياتك ونفسياتك .. ويجعل مثواها الجنة



ملاحظة:اتمنى من ادارة المنتدى زيادة عدد الوجيه الي تضحك مثل >>> :p ...

لان بعض الناس خلصوها





بالتوفيق ...
اضافة رد مع اقتباس
  #3  
قديم 11/01/2007, 11:40 PM
الصورة الرمزية الخاصة بـ فهد عاشق البرسا
زعيــم مميــز
تاريخ التسجيل: 29/11/2006
المكان: الـبـار
مشاركات: 3,137
(وش اللي حادك تبلشين عميرك)

والله هالكلمة موتتني ضحك

لا يهمك أحد والله موضوووع رائع يجنن
مقدمتة أحسن من قصتة وقصتة أحسن من مقدمتة

ذكرتيني بجدتي الله يشفيها ويحفضها
كل ماقعدت عندها قامت تكلمني عن قبيلتي
وتفسرها وتحللها وفلان تزوج فلانة
وولد عمك (أخو مرت ولد عمي) أخذ بنت عمك(بنت بنت خالت عمي)
وأنا أهز دمجتي كني فاهم..

الله يكفينا شر البرد ولا يحرمنا من خيرة

تحياتي يا (فرصة ضائعة)...
واصلي الأبداع
اضافة رد مع اقتباس
  #4  
قديم 11/01/2007, 11:42 PM
زعيــم مميــز
تاريخ التسجيل: 05/05/2005
المكان: R ! y a d h
مشاركات: 2,831
هههههههههههههههههههههههههه
بس اللي اعرفه ان المربعانيه برد داخل البيوت
واللي بعده اللي ما يتسمى دفى في البيوت وبرا برررررررد
هلالي راقي
ما لقيت الا هذا ينفع ولا لا
والباقي يقولوا خلصت
هههههههههههههههههههه
اضافة رد مع اقتباس
  #5  
قديم 12/01/2007, 02:21 AM
زعيــم مميــز
تاريخ التسجيل: 09/08/2006
المكان: الريــاض
مشاركات: 2,215
,,,
,,
,









فرصـه ضايعه








حياكـ الله ومنور المجلس بـ موضوعكـ
بصراحه احلى جلسه هي جلسة الشياب .. ماتنمل لو يجلس يسولف لـ الصبح ..
وعاد في ذا البرد مع كوب موكا حار كانكـ تشوفين قناه تراثيه
احلى شيء مثل ماقلتي زنجبيل ولا دلة قهوه فيها زعفران وهاتي سوالف




إقتباس
من ناحيتي هي احسن من المربعانيه لأن البرد يكون برى البيت مب زي المربعانيه البرد جوى البيت
دايم بيتنا صقعه مع أن الدفايات الزيتيه اربع وعشرين ساعه مولعه







الحين اعوذ بالله ماعاد ينفع لو تدحمل المرء بـ كومتن من الملابس
الدحمله = لبس اكثر كميه من الملابس خشية البرد :p









إقتباس
ونجومها سعد الذابح

إقتباس
(يحمى أهله النابح ) ويسمى سم وطبعا هو 13 يوم
وسعد بلع ( شده البرد قد انقلع ) ياهوووووووووووه ويسمى دم وبرضوه 13 يوم
وسعد السعود ( يموع كل جمود ويكره في الشمس القعود;) ) ويسمى دسم وهو بعد 13 يوم
هنا أنواع الفله بدايه الربيع والكشتات الزينه




ماشاءالله كل النجوم من فصيلة آل سعد الله يحفظه والله حموله طيبه
بس احلى مافي البرد لا زحمة شوارع ولا قلق طلعات .. صح ان الملامح تتحسن
لانها ماتتعرض للشمس مثل الصيف لكن الجفاف ماعاد ينفع معه ولا حتى
جوالين مرطبات







يعطيكـ العافيه على ذي السوالف ,, والله لا يخليكـ من جلسة جدكـ يارب ,,
امنياتي لكـ بـ التوفيق في امتحاناتكـ ,, وعسى الله يسعدكـ يارب ,,
الف شكر وان شاءالله نشوف طلتكـ الجايه في موضوع ذو فقرات ;)










****










كوني بخير
...SoMe OnE...
اضافة رد مع اقتباس
  #6  
قديم 12/01/2007, 02:29 AM
زعيــم مميــز
تاريخ التسجيل: 23/04/2004
المكان: بين النجوم
مشاركات: 4,461
فرصه ضايعه


كل عام وانتي بخير ومن العايدين بعد الزحمه =هالمره عايدتك لحالك

وبالنسبه للبرد وعلومه ما احبها اعرف البس وتدف وحط راسك جمب الدفايه
ولا اذا جا شاهي الحطب او حليب حار اروووووووووووح وطي ما ألذه
اما المربعانيه والشباط وهالامور مو لي تاركها لك وللشياب

تشــــــــــاو
اضافة رد مع اقتباس
  #7  
قديم 12/01/2007, 03:05 AM
الصورة الرمزية الخاصة بـ الكلاسيكي
عضو مجلس إدارة الموقع الرسمي
تاريخ التسجيل: 06/04/2003
المكان: دنـيــآي ~
مشاركات: 18,713
هـــلا فيــكـ اختــي فرصــوووووه ..

عــوداً حميداً .. << داري انكـ مارحتــي .. بس احس زمــان ماشفنــا لكـ موضوع ..
اجل انتي عكسي .. اذا فتحت كتابة موضوع معاد ودي اوقف .. لو ما تقضى الحروف كان طولت بعد ..

والله صحيح النفسيات هاليومين .. زفت .. برد واختبارات .. بس هونيها وتهون ...
عسى بــس مو تصير معكـ دايم تحاكــي روحكـ .. بسم الله عليك بس ..

انا مثلك اسنتر عند سوالف الاولين .. احس بالفرق بيننا وبينهم واعرف ان احنا بخيـــــــــــــر ..
واحنا ماندري ..وفي رخا . بس تعجبني في حياة الاولين بساطت حياتهم .. وعفويتهم ..
وطيبة قلوبهم .. وقلة فلوسهم << للسجع بس

ماشاء الله عليك .. انا اتوقع انك مشروع فلكيه قادمه بقوه ..
كويس انك تسجلين اخبار الفلك .. وكلها معلومات اكثرها جديد علي ..
لاني قرايتي لعلم الفلك والنجوم وهذي نادره .. بس اهم شي اذا جاء برد لبست ..
واذا جاء حر مممم قللت من الملابس

الحين انتي الثانيه اللي بتصيرين خبيرة فلك .. مع ماجد .. والله البرد طلع مواهب ..
عموماً اتمنى لك نوماً هنيئاً .. وبالتوفيق لك بالاختبارات ..

لك الف شكر ع المعلومات وع الموضوع الممتع ..
تقبلي ارق التحايا ..
دمتي بخير ..
اضافة رد مع اقتباس
  #8  
قديم 12/01/2007, 09:35 AM
زعيــم مميــز
تاريخ التسجيل: 29/07/2004
المكان: شبكة الزعيم
مشاركات: 7,277
هلا وغلا بأختي فرصه ضايعه

والله هالايام هذي الواحد يكثر جلوسه من جدانه مو دين كل علشان البرد وسواليفهم

وأحب أهنئيك يالعالمه الفلكيه (( إدعي بسلامة جدك))

إقتباس
ونجومها سعد الذابح (يحمى أهله النابح ) ويسمى سم وطبعا هو 13 يوم
وسعد بلع ( شده البرد قد انقلع ) ياهوووووووووووه ويسمى دم وبرضوه 13 يوم
وسعد السعود ( يموع كل جمود ويكره في الشمس القعود ) ويسمى دسم وهو بعد 13 يوم
هنا أنواع الفله بدايه الربيع والكشتات الزينه

يـــــا أحلاهــــــم اشوف اسمي مسيطر على الوضع

يعطيك العافية اختي فرصه
وخلي عنك السوالف مع الشياب وذاكري مابقى شي


وبالتوفيق
اضافة رد مع اقتباس
  #9  
قديم 12/01/2007, 10:05 AM
مشاكس اجتماعي بالمجلس العام
تاريخ التسجيل: 30/10/2005
المكان: الكرة الأرضية
مشاركات: 1,847
إقتباس
تدرين بعد أن كل أعضائنا مواضيعهم وش زينها أخاف يصير موضوعي ماش من بينهم

مادام ابو راس يعرف يكتب
اي عضو يقدر يكتب

وش دعوى فرصة
اذا انتي موضوعك ماش وش بقى اجل
بالعكس
مواضيعك دوم سلسة وجميلة ..
ما شاء الله تبارك الله ;)

إقتباس
وكنت لابسه جكيت



اجل هذا انتي الصغينونة بالجاكيت ..
بس من وين جا الثلج يالمقيمة بسويسرا..


المهممممممممممم
يسلمووووووو ع الموضوع الحلو والمفيد
هذي علوم الشيبان ما صرنا نعرفها ذي الايام
نعرف ديسمبر لفبراير برد وبس


تشكرررررررراتي



محبكم
ابو راس;)
اضافة رد مع اقتباس
  #10  
قديم 12/01/2007, 01:30 PM
الصورة الرمزية الخاصة بـ عسيريه
مُصممه محترفه
عضو استشاري سابق للمجلس العام
تاريخ التسجيل: 21/11/2005
المكان: في رجا اللي عيونه ماتنام
مشاركات: 2,402
ياهلا وغلا فرصووووه

والله ياهالبرد مقطعنا تقطع والا بالمدرسه استغفر الله حتى بالفسحه ما انزل تحت
اجلس بالفصل كأني قطوه من شدة البرد

ثانكس فرصه ع الموضوع و ع المعلومات القيمه:p

مع التحيه
اضافة رد مع اقتباس
  #11  
قديم 12/01/2007, 01:46 PM
زعيــم مميــز
تاريخ التسجيل: 08/09/2006
المكان: الرياض
مشاركات: 2,059
هلاا والله فرصف

الله يكفينا شر البرد وايامه
بس احس ان الشبط ابرد من المربعانيه
اضافة رد مع اقتباس
  #12  
قديم 12/01/2007, 02:14 PM
عضو استشاري سابق للمجلس العام
تاريخ التسجيل: 25/05/2005
مشاركات: 4,563


يا سـلامـ على الموضوع ماداامـ فيه زنجــبيل ..


إقتباس
وحسيت أني بإختبار وقعدت أهوش نفسي وأقول وش اللي حادك تبلشين عميرك:sad: وتوهقين نفسك بشي أنتي مب قده <<< حدك

لا تذكـرينا بالأختبار ..!!

تهـاوشين نفسكـ .. " عميركـ " <<< مفـردة العجـز والشيااب !!

إقتباس
وش قصدك يعني أني زلابه >>> لا :p بس أجل وشوله كل ذا التوتر <<< تدرين بعد أن كل أعضائنا مواضيعهم وش زينها أخاف يصير موضوعي ماش من بينهم:sad: >>> أها بس توكلي وابدي وأن شاء الله يدّهر مخك هالفاصل ومايقصر <<< سمي طال عمرك:p
8888
888
88
8

لا تشرهون دايم أتهاوش مع نفسي

ألى ألحـين تهـاوشين نفسكـ ..

أنت ما شاء الله مواضيعكـ رووووعة .. ويكفي هذا الموضوع ..



إقتباس
جلستي مع جدي وهاتك ياعلوم الأولين


محسوبتكم تحب هالسوالف عشان كذا تلقوني دايم لا جلست مع جدي

اللـهـ يعينكـ عليهمـ .. انا اذا جلست يقولون انتمـ جيل نيدو .. عاد وجهـي يصــير طماطة !


إقتباس
قال يووووك توك بأوله .... قلت أفاااااااا:sad:

واللهـ صـــادق .. نتى يروح ويريحنـا !!

إقتباس
عاد قعد يشرح لي عن المواسم والنجوم :p ومتى بداية البرد وأنا مغير اسجل معلوماتي ...

انـا بالأمـور هذي .. ما أسوى فيها شيء !! مثلـ قالوا جيل نيدو !! ههههههه


إقتباس
نجي عاد للشبط ...


أيامها الحمد لله مب زي المربعانيه 26 يوم بس ...
ونجومها النعايم والبلدة ....
من ناحيتي هي احسن من المربعانيه لأن البرد يكون برى البيت مب زي المربعانيه البرد جوى البيت
دايم بيتنا صقعه مع أن الدفايات الزيتيه اربع وعشرين ساعه مولعه

من اليومـ وراايح .. بألبس جاكيت وو .. لأني عاارف وش يسوي الشبطـ ..

مادامـت المربعـانية .. طيحت فيني الفرااش .. أجلـ وش تسوي الشبطــ !!

اللـهـ يســتر..!!

اللي بعد العقارب الحميمين


إقتباس
وعقب عاد يجي الحر ماهنا ربيع ولا خريف في السعوديه:p :p
مغير صيف وشتاء أما برد ولا حر ماهنا وسط

واللــهـ .. صـادقـة خيتو .. ما غير بررررد وحرررر .. ولا زيدي على ذلكـ عج وغبرااات !!

اجوااء .. مزاااجيــة !!




إقتباس
كنت بحط أكثر من فقرة بس حسيت أن الموضوع بيكون طويل مرة;)
وأنا عارفه أن الوقت من ذهب بهالفترة :p ( المفروض دايم مب بس بالأختبارات;) )

المرة الثانيـة .. حطي أكثر من فقــرة ..




إقتباس
يالله فتكو بعافيه :p ...
واختبارات موفقه للجميع ....

وأنتي بعـافية ..

ويارب نتوفق بالأختبـارات ,,
اضافة رد مع اقتباس
  #13  
قديم 12/01/2007, 04:18 PM
الصورة الرمزية الخاصة بـ الهنوووف
عضو استشاري للمجلس العام
وعضو تحرير مجلة الزعيم
تاريخ التسجيل: 18/01/2005
المكان: زاوية ارى الناس ولايروني
مشاركات: 11,544
إقتباس
وغلا بالزعماء .... من زمان عنكم .....

كيف النفسيات عساها تمام ;) ......

وامتحانات العملي عسى قدمتوا شي يرفع الراس بس ;)




وعليكم السلام
هلا فيكـ وحبينا نتواصل معاكـ قبل مانبدا اختبارات
انتي اخبر بالنفسيات


إقتباس
وعاد من الشر اللي في المربعانيه أنها توصي عيالها مثل ماقال أخوي سهل ;) ....(في موضوع ماجد )
تقول للشبط مريتهم ولا ضريتهم عليك باللي وقودهم ليف وماكولهم دويف واللي وقودهم سمر وماكلهم تمر أبعدي عنهم ...



وش تبي ذي الحين هي وعيالها


إقتباس
ونجومها سعد الذابح

إقتباس
(يحمى أهله النابح ) ويسمى سم وطبعا هو 13 يوم
وسعد بلع
( شده البرد قد انقلع ) ياهوووووووووووه ويسمى دم وبرضوه 13 يوم
وسعد السعود
( يموع كل جمود ويكره في الشمس القعود;) ) ويسمى دسم وهو بعد 13 يوم
هنا أنواع الفله بدايه الربيع والكشتات الزينه



حمولة طيبة اجل هالسعد :p
إقتباس

إقتباس
عاد الله الله بأنفسكم ... ترى الأنفلونزا شابّه على العالم ...
تدفوا زين;) ... وعليكم بالبرتقال والفيتامينات:p عشان يقاوم جسمكم ....



ايه والله شابة وبقووة مايمديني اتشافى الا رجعت





يعطيك العافيه ^فرصة ضايعه^
وماودي اقول الله يفكنا من البرد لانه احلى من الحر
بس الله يحنن قلبه شووي ويصير بارد شووي

ماوصيكم ادعو على هالحرمة وعيالهااا يجيها شي وتوقف ماتجي :p

دمتي متالقـة

اضافة رد مع اقتباس
  #14  
قديم 13/01/2007, 01:02 AM
الصورة الرمزية الخاصة بـ الهلالي دائماً
مشرف منتدى الجمهور الهلالي
تاريخ التسجيل: 20/01/2002
المكان: وسط المعمعه
مشاركات: 12,895
فرصة مرة واحدة من زمااااااااااان ياشيخة خخخخخخخخخ
ماشاء الله تبارك الله موضوع يجيب الدفى

لي عودة انشاء الله سريعة


___________________________________

عدنا ;)

والله يافرصة ان موضوعك رهيب بالحيل بس عندي استفسار بسيط :p

اللحين جدك هو سهل خخخخخخخخخخخ

الله يحفظه وبصراحة ودي اكشت معه احس انواع السواليف والحكم والامثال

ليت الهنوووف جابته معنا لكشتتها

واما سالفة ها البرد فالله يستر علينا وانا الحمد لله اخذت كل الاحطيطات اللازمة

واعلنت حالة الطوارئ في البيت والعمل >>> من جد خواااااااااااااااف:p

بس الله يستر وتعدي الايام لين يجي سعد ال سعود ;)

والجو الزين وتحلو الطلعات والكشتات

شكرا لك فرصوه والله يعطيك العافية ,,,

اخر تعديل كان بواسطة » الهلالي دائماً في يوم » 13/01/2007 عند الساعة » 09:21 AM
اضافة رد مع اقتباس
  #15  
قديم 13/01/2007, 09:44 AM
ناقد اجتماعي
تاريخ التسجيل: 05/12/2001
المكان: نيويورك - الولايات المتحدة الأمريكية
مشاركات: 2,053
وعليكم السلام ورحمة الله وبركاته،،

يا هلا ومسهلا بالفرصه الضايعه

إقتباس
وامتحانات العملي عسى قدمتوا شي يرفع الراس بس

يا قدمكم الى هالحين فيه اختبار عملي المشكله مابوش اي فايده اللي يسمعهم يقول انه تخصيب يورانيوم

إقتباس
لا تشرهون دايم أتهاوش مع نفسي

بسم الله عليتس ايـــه الهــُبال دا ؟؟ مدخلك كنه مدخل شقق عزاب <<<<< متعقد من المدخل

إقتباس
جلستي مع جدي وهاتك ياعلوم الأولين

الله يعطيه الصحه والعافيه ويطوّل عمره على عمل صالح..

إقتباس
ذاك اليوم عاد قعدت مع جدي بجمعتنا لشرب الشاهي وتقشيم الحبيبات

وعسى جدك مهوب يقشم فصفص ما شاء الله عليه جدي الله يرحمه يوم كمل السبعين طاحن ضروسه وبدا ما ياكل الا قرع وخبز

إقتباس
بدى بالوسم


يقول أنه 52 يوم ونجومه هي العواء والسماك والغفر والزبانا

كل واحد 13 يوم ....


والوسم عموماً مليح ومابه برد

إقتباس
إلحق بأهلك ولا تتوانا ) يقصدون أن البرد جاهم

" اذا جاك الزبانا إلحق بأهلك ولا تتوانا "

ياسلااااام هذي جديده علي

وهم صادقين لأن بعده تدخل المربعانيه على طول واللي ما يزبن بالمربعانيه يخلف الله عليه.

إقتباس
وعقبه يجيك المربعانيه

يقولون الأولين عن الشوله ( تعجل الشيخ البوله ) اعزكم الله

أثري شيخ و أنا م أدري

إقتباس
نجي عاد للشبط ...

ميزة الشبط ان الزبنه فيها تنفع يعني البيت الاستراحه راح تكون دفى باذن الله لكن البلا بالروحه والجيه والهواء اللي يصفق الراس

إقتباس
وعقب تجينا العقارب


يقولون الأولين إذا دخلت العقارب ترى الخير قارب

واضح ان جدك يقرالي بالمنتدى ولا وشلون درى يالعقارب والخير قارب;)

إقتباس
هنا أنواع الفله بدايه الربيع والكشتات الزينه

ايه نعم وهو صادق بهالوقت يازين الشمال زيناه


إقتباس
اللي بعد العقارب الحميمين



يقولون الأولين ياربنا ياكريم اكفنا برد الحميم ...
وهو برد العجوز ويسمى بيّاع الخبل عباته

هذا عاد حبيب ومهنا زود برد لكنه غدار يطبق لك فيه كم يوم صقيع بدون هواء

إقتباس
تدفوا زين ... وعليكم بالبرتقال والفيتامينات عشان يقاوم جسمكم

والله ان البرتقال زين ومفيد بالشتاء ويعطي مناااعه لكن الحموضه شينه

إقتباس
عساكم استفدتوا زيي

بالنسبه لي استفدت ودفيت واستمتعت بكم وحده جديده


إقتباس
وأخذت براي الهاوي بقلة الدناديش والحوسه

كذا صح شوفي موضوعك طلع مليح وخفيف ووش زينه وأكبر دليل انك ما قلتي في النهايه ياسفابي

يامال العافيه يالفرصه موضوع شيّق وخفيف ومعلوماتي ثقافي بأوقات البرد وطوالعه

تشكراااتي لك ،، وسلمي لي على جدك سلام كثير ، ولا تكثرين فصفص ترى ينشب بين الضروس


فماااان الله،،
اضافة رد مع اقتباس
   


إضافة رد

أدوات الموضوع
طريقة عرض الموضوع

قوانين المشاركة
غير مصرّح لك بنشر موضوع جديد
غير مصرّح لك بنشر ردود
غير مصرّح لك برفع مرفقات
غير مصرّح لك بتعديل مشاركاتك

وسوم vB : مسموح
[IMG] كود الـ مسموح
كود الـ HTML مسموح
Trackbacks are مسموح
Pingbacks are مسموح
Refbacks are مسموح



الوقت المعتمد في المنتدى بتوقيت جرينتش +3.
الوقت الان » 07:05 AM.

جميع الآراء و المشاركات المنشورة تمثل وجهة نظر كاتبها فقط , و لا تمثل بأي حال من الأحوال وجهة نظر النادي و مسؤوليه ولا إدارة الموقع و مسؤوليه.


Powered by: vBulletin Version 3.8.7
Copyright ©2000 - 2019, Jelsoft Enterprises Ltd

Google Plus   Facebook  twitter  youtube