( ردت إلي ضالتي في غضون ثلاث ساعات ) سيناريو وحوار مرسول الهلال والحرامي المحترم
السلام عليكم ورحمة الله وبركاته
اعلم اذا كان اتصالك دايلوب مثلي انصحك تفصله وبعدين تسوي اتصال مرتن اخرى اذا كنت تبي تحط رد
واذا كان غير ذلك فكمل وتجاهل هذان السطران او هذين السطرين
في صبيحة يوم اشبه بـ (الاقشر) لانه يجمع قومة الصبح المشينه وهم الاختبار الاغبر ,وعندما هممت بتشغيل السيارة وتحميتها لايصال بعض الوراعين لمدراسهم
والنفس واصله حدها ..
<----- دوامي مسائي بس الظروف تخلينا بالغصب نقوم الصبح
طبعا شغلت سيارتي ووصلت العيال لمدارسهم <---- ترى واحد بس لكن اسلوب الجمع دايم على لساني
رجعت للبيت على الساعه 7.08 صباحا وكالعادة وقفت سيارتي وطلعت للبيت عندي مذاكرة للاختبار .. بالغلط ولا بالقد حطيت محفظتي داخل درج السيارة <--- ليش ؟
لاني كنت ناوي اذاكر الى 9 الصبح وبعدها نروح نفطر في بوفية كبدة يمدحونها الشباب يوم كنت في ثاني ثانوي ..
عينت من الله خير وذاكرت الى 9 ونص من زود الدفرة وعندما هممت بالخروج للسيارة شاهدت ما لا يحمد عقباه
باب سيارتي مفتووح ؟؟ لا لا راح بالي على المحفظة .. لا لا المحفظة انسرقت ...
حسبي الله ونعم الوكيل
وش اسوي وش ماسوي .. على طول دايركت اتصلت على 999
999 : هلا هلا
مرسول : اهل اخوي بغيت ابلغ عن سرقة
999 : وش انسرق منك ؟
مرسول : سيارتي
999: سيارتك كلها انسرقت ؟؟
مرسول : لالا لقيت الباب مفتوح والمحفظة انسرقت وبعض الاغراض
999 : وين انت ساكن ؟
مرسول : الروضة
999 : طيب خذ رقم مركز شرطة الروضة واتصل عليهم
مرسول : طيب على امرك 
عطاني رقم المركز واتصلت عليهم
الشرطة : اهلا
مرسول : هلا اخوي محفظتي من سيارتي انسرقت <---- عدتها 6 مرات وبالغصب فهم
الشرطة : فيه اثار للسرقة ؟
مرسول : لا لا اتوقع نسيت القفل مفتوح وجاء واحد وسرق محفظتي
الشرطة : طيب تعال لنا وبلغ
مرسول : طيب طيب طيب <---- جلست اقولها وحتى يوم هو مقفل
رحت طول الله عمركم للمركز وهناك دخلت على الاستقبال وحولني على قسم البحث والتحري ..
دخلت عندهم وقلت السالفه قالي مانقدر نسوي لك شئ !!
ليش ؟
العذر ان مافيه اثار للسرقة
( طيب بالعقل بروح اتعب نفسي واتمرمط عندهم واخرتها اتسذب عليهم ؟ )
قلت طيب لو سمحت المحفظة تحتوي على ( اثبات - رخصة - بطاقة جامعة - تامين - بطاقة صراف - مبلغ مالي ) + عطر <-- تراه غالي
+ علبة نظارات
قلت يعني لو تعطيني اوراق للبلاغ علشان لو احد مسكني برا من اخوياكم اثبت لهم اني مسروق
قال والله النظام مايسمح لكن الله لا يهينك روح الاحوال وطلع بدل فاقد وبالنسبة للباقي روح راجع كل مفقود لمكانه المناسب ؟؟
بعدما فقدت الامل طلعت ورجعت للبيت وافطرت صامولي بالجنبة مع شاهي بعدما طفرنا
فجأة وانا جالس افطر دق الثابت حق البيت
مرسول : هلا
المتصل : السلام عليكم هذا بيت فلان بن فلان <---- يقصدني
مرسول : ايه وصلت
المتصل : حصلت بطاقات لك طايحة بالشارع
مرسول : والله ... الله يجزاك خير
بعدها اخذت وصف المكان ورحت له وحصلت عنده اغراضي ماعدا المحفظة والفلوس
اللي خلاني اسميه الحرامي المحترم .. طبعا هو يوم سرق المحفظة فتحها وطلع بطاقاتي والاشياء اللي مايحتاجها وحطها في علبة النظارات وحذفها عند محطة وراعي البنشر شافها وفتحها وحصل رقم الثابت في الرخصة وماقصر الله يجزاه خير اتصل ووصلها لي
طبعا المحفظة والفلوس راحت راحت راحت ... اللهي عوضنا خير منها
قدر الله وما شاء فعل
نقاط :
1- السرقة تمت مابين الساعه 7 ونص الى 9
2- الاتصال الي جاني على الثابت من فاعل الخير كان بحوالي الـ 11 ظهرا وعلى حسب كلامه يقول انا لقيتها من 10 الصبح
3- اذا واحد صار له مثل موقفي ولم تتضح معالم السرقة لا يتعب حاله ويروح يبلغ ترى ماينفعونك
4- الضابط هناك قالي الشرطة ومحاولات البحث عن المسروقات لم تكن مثل زمان اول <--- على لسانه
واتمنى لكم اسعد الاوقات مع شاهي البيت وصامولي بالجبن
دمتم سالمين
الوضع المتطور
