نادي الهلال السعودي - شبكة الزعيم - الموقع الرسمي - ابو هنـــــدل يروي قصــــة الهندلة ولماذا سي بهذا الاسم ؟؟

- منتدى المجلس العام (http://vb.alhilal.com/f1/)

ابوهندل يعترف لكم بأنه000000 بعد هذ

جاني على الايميل سؤال من بعض الاخوان يسألون عن سبب اختيار اسم ابو هندل كالقب لي في كتاباتي في المنتدى وحبيت ابين السبب وهي قصة قديمة تستحق القراءه

كنا ساكنين في احد حواري وسط الرياض القديمة في بيت طين كل يوم طايح علينا لبنة ( ما ادري جيل جواد ورامي عياش يعرفون وش هي اللبنه 0 ماعلينا ) ولو تمر سيارة موحفة من عند البيت قعد الباب يرقل ساعة 0 واذا جاء المطر انقلبنا تماسيح كلنا يسبح ما نقدر نمشي يصير البيت بركة موية 0 المهم كان عند الوالد سيارة جيب ماركة ويلز تعادل اللحين الفياجرا السيارة مهيب الحبوب لايروح تفكيركم بعيد اعرفكم تحبون تتخيلون 0 وانا كنت صغير وكان ابوي يشتغل عند واحد من الامراء مات الله يرحمه وحنا الى هالحين وحنا طفارى 0 وانا اكبر اخواني ولان ابوي مشغول ومرتبط مع الامير على طول توهق وعلمني السواقة علشان اقوم بواجبات البيت المدرسية قصدي مقاضي البيت وروحات وجيات الاهل وهالجيب اذا جاء الشتاء ودخلت المربعانية وقامت حنوكك تراقل وركبك تصافق وشصب خشمك لو تلمسه تفتت 0 مش خشتك ان انه بيشتغل الا بوحدة من هالطرق تشب لك في جرذام او خشبة اللين تجمر وتحطها حول المكينة او تحتها حتى تحمي الطريقة الثانية تحمي لك موية للدرجة الغليان وتصبها على المكينة او تجيب الهندل وتدعسه في خشة الجيب وتعض ثوبك وبقوة امك وبوك وتهندل اللين تمد لسانك كنه شراب وتستعين بعيال ا لحارة علشان يهندلون معك ويالله يشتغل واذا اشتغل هلل وكبر تقول قامت الحرب وقام يرعد ويسمع صوته اللي في الحارة الثانية وما يبقى شايب او عجوز او بزر نايم يقومون تقول مروعين لأن كنداسة الجيب الله لا يهيني محصومة من عند القزوز بس مع الوقت صار صوت الكنداسة وش زينه مثل صوت نجى كرم وش زينها 0 فهو ساعة الحارة الخراش والحالة والمعاناة مستمرة للجميع الله يعظم اجرنا 0 حتى ان واحد من سقيط الحارة صار بطل الحارة في كمال الاجسام من كثر الهندلة وشارك في اولمبياد السبالة وطلع في المركز الاخير ماشاءالله عليه خاف من العين ؟ وفي الحارة ما كان احد عنده سياره الا انا وواحد عزوبي داشر يدق عود علشان كذا صرت احسن واحد وكلن يحبني وصرت في الصدارة لانه مابقي احد ما استفاد من هالجيب فالخدمات اللي اقدمها كثيرة فهذا بزر موديه للحساوي في الديرة يختنه او يرفعه 0 وهذي عجوز ا و شايب موديهم للضمان الاجتماعي وادخل معهم واكمل اجراءاتهم واذا جو يستلمون الدراهم قالوا لي رح خلك عند الموتر لإحد يسرقه يخافون اشوفهم وهم يأخذون الشونة وانا اطيعهم واروح ادربي راسي واذا طلعوا معهم الفلوس قلت هاه بشروا استلمتوا قالوا لا والله يا ويلدي فهقونا 0 والا هذي حرمة حامل عندها موعد في المستوصف الا طايراً بها وعلى فكرة كان الممرض اللي في هالمستوصف هو الحكم القديم واسمه الجمل كان هو الدكتور وهو المدير وهو اللي يطق ابر وهو الفراش يعني مثل بعض الناس (( جار القمر )) يعني الكل في الكل ويفهم كل شي 0 والا هذا ورع يبغى من يسجله في المدرسة موديه لان الروضة لعيال الاشوام 0 والا حرمة بتولد الا عاطاً بها للمستشفى في الليل او النهار وكم حرمة ولدت قبل ما نوصل للمستشفى من الخضة من المراتب ماشاء الله مخمل حديد والبزر يطلع راسه عايب 0 يعني صاير ديلفيري سريع مرة اشتغل اسعاف ومرة اروح اجيب مقاضي للأهل الحارة ومرة مودي عنز الى زميلها التيس لانجاز ما يجب انجازه 0 والا هذا واحد رايح اجيب له غاز او قاز او علف للغنم 0 والا هذولا معطيني قطو في خيشة ماكل دجاجهم او حمامهم ويبغوني ارميه في الحياله والا في قليب 0 والا هذي حرمة مطلقه واروح اجيب اغراضها بعد انقطاع حبل المواصل 0 والا هذي عروس بتعرس ومودي دراريعها وديرمها وحناها مشاطها (( يعني ادوات مكياج باسكال )) ومعه مطرحتها لأن المطرحة على العروس يعني على ارضها وبين جماهيرها0والا هذي حرمه موديها للهيئة ماسكين رجلها البارح نايم في كنادره (( يعني مخترش )) وكان جدولي اليومي يبدأ من صلاة الفجر وكان الامام بعد الصلاة يقرأ اسماء الحارة ويحضر المصلين ويعرف الغايبين واذا انتهت الصلاة تجمع الإمام والمؤذن وبعض الجماعة ويعطوني العيبات (( اداة لحفظ الخبز حار00 اه يا النحوي )) او الفوط ويعطوني على ريال او على نص ريال اجيب خبز وبقرشين وفول وارجع الباقي 0 الريال يجيب ثمان خبز عادي وبفرشين فول تعادل ما تشتريه اللحين بخمسة اريل 00 واروح للبيت واهندل الجيب واذا شتغل وارعد ما يبقى ابن امه نايم اطلق شنب ما يقدر يعود ينوم من غرفة العقل وانطلق الى ابو يمن راعي المخبز والقاه فاقا ثمه يحتريني وعرقه يقطر على العجين لان الدراهم اللي معي بالنسبه له صفقة العمر واعطيه قائمة الطلبات ايوالله يالمرديان وبعدها امعط للفوال وامحط بالمواعين 0 ثمنا تبدا مرحلة توزيع الاعاشة على البيوت ومن صوت الكنداسة يدرون اني وصلت قبل ما يشوفوني ويقولون جاء ابوهندل 0 والمشكلة انهم ينزقون علي ليش ابطيت علينا البزران ماتوا من الجوع ولا واحد منهم يقول اقلط 0 ثم اروح للبيت وافطر واشخص واللبس الثوب ابو تفاحة كنة خيشة طحين يخرفش ويطلع اصوات وانت تمشي والغالوقة من وسعها يدخل معك اخوك الصغير كنه ثوب كنبو ؟؟؟؟؟ ايه يالمتمدن وتقوم الوالدة تتبك الشماغ اللين ما تبقى الا عيوني تشوفها تلاقط كنها عيون حصني ثمنا انطلق وأخم مبزرة الحارة واضفهم اوديهم للمدرسة حتى مدير المدرسة ما عنده سيارة واطلق مدرس عنده سيكل 26 كفراته تك بعد مهيب بلون 0 وحتى المدرسة مستفيدين من هالجيب اودي البزران المفلوقين والا المطاقين يجيني المقسوم اما كف والا شوته والا تفلة واقلها دعوة علي 0 والا اروح انا واحد المدرسين نجيب بسط لانه مافيه كراسي نقد عليها والا طباشير واذا طلعنا من المدرسة نفس المنوال والموال واروح للبيت وتجي امي تعطيني جدول الرحلات اليومي 00 ام فلان تبغاك تمرها وتوديها لأم فلان وفلان عند مشوار وجيرانا عندهم شغل يبونك توديهم وعلان بيروح للسوق يقول لاينسانا وعلى هالبرنمج اليومي وانا مبسوط ومستانس 0 ولا عندي اية مشكلة او اتضايق علشان كذا تلقاني على علاقة ممتازة مع الجميع الصغير والكبير والحرمة والرجال و لا احد يقدر يزعلني لانه هو الخسران ادخل اطلق بيت ولا يردني الا المطبخ 000 ولكن النية كانت طيبة وصافية 0
وفي النهاية يمكن احد اذا قرا القصة يعرفني ويسترجع الماضي بس يقراها ويسكت والا فضحته فانا اعرف اسماء كل حريم وبنات الحارة وابعلم بأسم امة او اختة 0

ملاحظة : يمكن فيه كلمات ما تعرف معناها اسأل ابوك او امك

بوهندل يعترف لكم بأنه 00000 بعد هذه المدة

إقتباس:

باقتباس من مشاركة أبو هندل

جاني على الايميل سؤال من بعض الاخوان يسألون عن سبب اختيار اسم ابو هندل كالقب لي في كتاباتي في المنتدى وحبيت ابين السبب وهي قصة قديمة تستحق القراءه

كنا ساكنين في احد حواري وسط الرياض القديمة في بيت طين كل يوم طايح علينا لبنة ( ما ادري جيل جواد ورامي عياش يعرفون وش هي اللبنه 0 ماعلينا ) ولو تمر سيارة موحفة من عند البيت قعد الباب يرقل ساعة 0 واذا جاء المطر انقلبنا تماسيح كلنا يسبح ما نقدر نمشي يصير البيت بركة موية 0 المهم كان عند الوالد سيارة جيب ماركة ويلز تعادل اللحين الفياجرا السيارة مهيب الحبوب لايروح تفكيركم بعيد اعرفكم تحبون تتخيلون 0 وانا كنت صغير وكان ابوي يشتغل عند واحد من الامراء مات الله يرحمه وحنا الى هالحين وحنا طفارى 0 وانا اكبر اخواني ولان ابوي مشغول ومرتبط مع الامير على طول توهق وعلمني السواقة علشان اقوم بواجبات البيت المدرسية قصدي مقاضي البيت وروحات وجيات الاهل وهالجيب اذا جاء الشتاء ودخلت المربعانية وقامت حنوكك تراقل وركبك تصافق وشصب خشمك لو تلمسه تفتت 0 مش خشتك ان انه بيشتغل الا بوحدة من هالطرق تشب لك في جرذام او خشبة اللين تجمر وتحطها حول المكينة او تحتها حتى تحمي الطريقة الثانية تحمي لك موية للدرجة الغليان وتصبها على المكينة او تجيب الهندل وتدعسه في خشة الجيب وتعض ثوبك وبقوة امك وبوك وتهندل اللين تمد لسانك كنه شراب وتستعين بعيال ا لحارة علشان يهندلون معك ويالله يشتغل واذا اشتغل هلل وكبر تقول قامت الحرب وقام يرعد ويسمع صوته اللي في الحارة الثانية وما يبقى شايب او عجوز او بزر نايم يقومون تقول مروعين لأن كنداسة الجيب الله لا يهيني محصومة من عند القزوز بس مع الوقت صار صوت الكنداسة وش زينه مثل صوت نجى كرم وش زينها 0 فهو ساعة الحارة الخراش والحالة والمعاناة مستمرة للجميع الله يعظم اجرنا 0 حتى ان واحد من سقيط الحارة صار بطل الحارة في كمال الاجسام من كثر الهندلة وشارك في اولمبياد السبالة وطلع في المركز الاخير ماشاءالله عليه خاف من العين ؟ وفي الحارة ما كان احد عنده سياره الا انا وواحد عزوبي داشر يدق عود علشان كذا صرت احسن واحد وكلن يحبني وصرت في الصدارة لانه مابقي احد ما استفاد من هالجيب فالخدمات اللي اقدمها كثيرة فهذا بزر موديه للحساوي في الديرة يختنه او يرفعه 0 وهذي عجوز ا و شايب موديهم للضمان الاجتماعي وادخل معهم واكمل اجراءاتهم واذا جو يستلمون الدراهم قالوا لي رح خلك عند الموتر لإحد يسرقه يخافون اشوفهم وهم يأخذون الشونة وانا اطيعهم واروح ادربي راسي واذا طلعوا معهم الفلوس قلت هاه بشروا استلمتوا قالوا لا والله يا ويلدي فهقونا 0 والا هذي حرمة حامل عندها موعد في المستوصف الا طايراً بها وعلى فكرة كان الممرض اللي في هالمستوصف هو الحكم القديم واسمه الجمل كان هو الدكتور وهو المدير وهو اللي يطق ابر وهو الفراش يعني مثل بعض الناس (( جار القمر )) يعني الكل في الكل ويفهم كل شي 0 والا هذا ورع يبغى من يسجله في المدرسة موديه لان الروضة لعيال الاشوام 0 والا حرمة بتولد الا عاطاً بها للمستشفى في الليل او النهار وكم حرمة ولدت قبل ما نوصل للمستشفى من الخضة من المراتب ماشاء الله مخمل حديد والبزر يطلع راسه عايب 0 يعني صاير ديلفيري سريع مرة اشتغل اسعاف ومرة اروح اجيب مقاضي للأهل الحارة ومرة مودي عنز الى زميلها التيس لانجاز ما يجب انجازه 0 والا هذا واحد رايح اجيب له غاز او قاز او علف للغنم 0 والا هذولا معطيني قطو في خيشة ماكل دجاجهم او حمامهم ويبغوني ارميه في الحياله والا في قليب 0 والا هذي حرمة مطلقه واروح اجيب اغراضها بعد انقطاع حبل المواصل 0 والا هذي عروس بتعرس ومودي دراريعها وديرمها وحناها مشاطها (( يعني ادوات مكياج باسكال )) ومعه مطرحتها لأن المطرحة على العروس يعني على ارضها وبين جماهيرها0والا هذي حرمه موديها للهيئة ماسكين رجلها البارح نايم في كنادره (( يعني مخترش )) وكان جدولي اليومي يبدأ من صلاة الفجر وكان الامام بعد الصلاة يقرأ اسماء الحارة ويحضر المصلين ويعرف الغايبين واذا انتهت الصلاة تجمع الإمام والمؤذن وبعض الجماعة ويعطوني العيبات (( اداة لحفظ الخبز حار00 اه يا النحوي )) او الفوط ويعطوني على ريال او على نص ريال اجيب خبز وبقرشين وفول وارجع الباقي 0 الريال يجيب ثمان خبز عادي وبفرشين فول تعادل ما تشتريه اللحين بخمسة اريل 00 واروح للبيت واهندل الجيب واذا شتغل وارعد ما يبقى ابن امه نايم اطلق شنب ما يقدر يعود ينوم من غرفة العقل وانطلق الى ابو يمن راعي المخبز والقاه فاقا ثمه يحتريني وعرقه يقطر على العجين لان الدراهم اللي معي بالنسبه له صفقة العمر واعطيه قائمة الطلبات ايوالله يالمرديان وبعدها امعط للفوال وامحط بالمواعين 0 ثمنا تبدا مرحلة توزيع الاعاشة على البيوت ومن صوت الكنداسة يدرون اني وصلت قبل ما يشوفوني ويقولون جاء ابوهندل 0 والمشكلة انهم ينزقون علي ليش ابطيت علينا البزران ماتوا من الجوع ولا واحد منهم يقول اقلط 0 ثم اروح للبيت وافطر واشخص واللبس الثوب ابو تفاحة كنة خيشة طحين يخرفش ويطلع اصوات وانت تمشي والغالوقة من وسعها يدخل معك اخوك الصغير كنه ثوب كنبو ؟؟؟؟؟ ايه يالمتمدن وتقوم الوالدة تتبك الشماغ اللين ما تبقى الا عيوني تشوفها تلاقط كنها عيون حصني ثمنا انطلق وأخم مبزرة الحارة واضفهم اوديهم للمدرسة حتى مدير المدرسة ما عنده سيارة واطلق مدرس عنده سيكل 26 كفراته تك بعد مهيب بلون 0 وحتى المدرسة مستفيدين من هالجيب اودي البزران المفلوقين والا المطاقين يجيني المقسوم اما كف والا شوته والا تفلة واقلها دعوة علي 0 والا اروح انا واحد المدرسين نجيب بسط لانه مافيه كراسي نقد عليها والا طباشير واذا طلعنا من المدرسة نفس المنوال والموال واروح للبيت وتجي امي تعطيني جدول الرحلات اليومي 00 ام فلان تبغاك تمرها وتوديها لأم فلان وفلان عند مشوار وجيرانا عندهم شغل يبونك توديهم وعلان بيروح للسوق يقول لاينسانا وعلى هالبرنمج اليومي وانا مبسوط ومستانس 0 ولا عندي اية مشكلة او اتضايق علشان كذا تلقاني على علاقة ممتازة مع الجميع الصغير والكبير والحرمة والرجال و لا احد يقدر يزعلني لانه هو الخسران ادخل اطلق بيت ولا يردني الا المطبخ 000 ولكن النية كانت طيبة وصافية 0
وفي النهاية يمكن احد اذا قرا القصة يعرفني ويسترجع الماضي بس يقراها ويسكت والا فضحته فانا اعرف اسماء كل حريم وبنات الحارة وابعلم بأسم امة او اختة 0

ملاحظة : يمكن فيه كلمات ما تعرف معناها اسأل ابوك او امك

ابو هندل... عن عن عن عنننننننننننننننننننننننننننننننننننننن

اقول فول بقرشين متى صارت يأخى شكل عمرك الف وشوى:eek:

اقول ابو هندل ؟ عنديلك كم سؤال ؟ وابشرك ما ابي عرفك .. وش ابغابك ؟:D

ماعلمتنا وش صارلك بعدين ؟ :rolleyes:

انت تطورت وسكنت بالعليا وركبت الفياقرا ؟.:rolleyes: . وصرت من اللي ياكلون بالشوكة والسكين ؟:rolleyes: ويجلسون على الكنب ؟ :rolleyes: ويطلعون بالأصنصير ؟:rolleyes: والخ ... الخ ... الخ .
ولا لايكون لهالحين ببيتك الطين ؟:rolleyes:
ووش اخبار ولدك هندل وبنتك هندولة ؟ واي الجيران اللي زوجك ؟:rolleyes:

لاتخاف ماني سائلك عن الويلز لأني ادري انكم حنطتوه .وحطيتوه فوق السطح :D
هذا اذا ماحنطوك انت :D

وياليت اذا ممكن تتبرع بالهندل حقك لكم لاعب من لعيبتنا هالحين .. اللي يالله يشيلون رجليهم .. والبركة بالرباط الصليبي اللي ماعرفناه غير ذي الأيام :D

وتحياتي لك يا زعيم :)

أبو هندل .... يا أيها الغارق في في أعماق التاريخ ,,,

أبو هندل .... ياعبق الماضي والأصاله ,,,

أبو هندل .... ياصاحب الجذور الضاربه في أعماق التراث ,,,

أبو هندل .... ياسفير الجنادريه في شبكة الزعيم ,,,

أبو هندل .... أنت وش تبي بالضبط !! :rolleyes: ,,,

روعه يا بوهندل هذي السرد السهل والبسيط وبعبارات سلسه وخفيفه ,,,

أنا مستغرب ليه ماشفنا مثل هالإبداعات قبل كذا ؟! ,,,

إمكانات جباره ماكان له داعي تدفنها في منتدى الجمهور الداج :cool: ,,,

وش رايك نشتري عقدك في المنتدى العام ونعطيك الحد الأعلى من الأجور ... بس ماتقعد تتشرط علينا عند التجديد , ترى الميزانيه عندنا يادوب تكفي المحترفين الأجانب :rolleyes: ,,,

تحياتي لك ,,,

اخوي ابوالذهب
شكرا على ردك الاولي
والحمد الله انك اشتغلت على طول وما تحتاج هندلة ولو ان فيك تنتيع لكن هذي مشكلة اللي ما يكمل دراسته 0
ولو تدري عن هالفول وش فيه من الخلطات الله اعلم بها ووش المكونات مرة تلقى قعس ومرةتلقى قمر بيبسي على العموم بدات ضحايا الزيود تظهر هالايام 0 وبعدين انا عمري مهوب كبير يعني قد عمر بعض الناس جار القمر 0

هلالي ا لجوف
حبيب قلبي شكلك وانت تكتب الرد داق اللطمه ومتلملم في الفروة وترقل من البرد وشكلك ممن عاشوا المعاناة ولا تصير كنت تهندل معنا ورحت للجوف خايف احد يعرفك 0 وبعدين ترى الموضوع على حط يدك وابشرك معي فياجرا هنقلين وشكلي عرفتك وابا اعلم بأسم الوالدة 0 اما هندل وهندولة هم السبب اللي خلاني اتعلم الانترنت 0اا الجيب الويلز فقد كانت نهايته ماساويه طاح عليه بيت العزوبي
ولك مني اطيب الهنادل 0

الاخ ابراهيم
يتشرف الموضوع بردكم ومشاركتكم
وبعدين انا ماني غارق و طافح في التاريخ ولا الفقه 0
اما كلمة عبق لاتصير كلمة مهيب زينه وبلا اصالة بلا عتاب تراهم نفس الملامح والشبه ( ايه هين ) دعابة
اما سفير الجنادية في شبكة الزعيم فصدقني جازت لي عبارة رايقة بس ترا ما اعرف اللبس الكرفته 0
كذلك صدقني حتى انا ما اعرف وش ابي 0
واذا بتشتري عقدي لازم تأخذ موافقة معزبي (( لاني خالد عنده)) (( ودايخ من )) والا تراه بيبعني على واحد في جدة بيدفع هو ا (( الوالد )) شكلي ابعدت وضيعت 0

وتقل اطيب التحايا

وانشاءالله ربنا يخليكوا

سجل داج جديد معنا ..... سجل يا ولد:D

هلا والله با ابو هندل وهندل وكل عائلة الهنادل ===> على وزن السنافر:D

والله موضوعك رهييييييب وماشاء الله عليك خادم كل الحارة بس ما قلت لنا الجانب الثاني من حياتك وهي المضاربات والطقاق وكلش :D
ننتظرها بموضوع ثاني إن شاء الله :)

ويالله يا هيمو تكفون بسرعة وقعوا معه لا ياخذه احد ثاني :D

صحيح هو كبير بالسن شويتين ( قصدي مليونين ) ايه بس أهم شيء الخبرة والمهارات :D:D

هلا وغلا بك يا ابو هندل بين ربعك واحبابك في منتدى المجلس العام :)

والله يخليك ....

ولا تخلينا من هالمواضيع الرائعة تكفى :);)

ألف شكر لك على هالروعة والابداع وتسلم لنا .... :)

أخوك : البارق2000;)

اخوي البارق تو ثاوزن
شكرا على الاحترام الزايد والمتكبب
وبعدين انا ما اعرف السنافر لا يصير يقربون لك 00 انا اسألني عن عائلة بن كاترايت دينس واخوانه 000 وعن برنامج من كل بحر قطرة والليل الطويل 00 ايه هين تراك بتعرفها 0000 ؟
اما الطقاق والهواش المضاربات فرفيقك تأكل القطوة عشاه مسالم الى ابعد درجة وحبيب وياما كفخ عند المفاكه بين المتطاقين هذا بقس طايش وهذا كف مضيع ما لقى غير وجهي يسنتر فيه لأن اللقافة تولد مع الانسان 0
ولك تحايا الهنادل00
واتمنى التواصل بين الداجين لتوسعة صدورنا المنتكه0
وربنا يخليك