الآسيوية : أبي فريق يستاهلني !! - نادي الهلال السعودي - شبكة الزعيم

خالد المحمــد · #1 29/12/2006, 12:54 PM

مطلب الجمهور الأول : الآسيوية !!
تهقون نقدر نجيبها ؟

وضع الهلال الحالي .. هل يساعد على التأهل للدور الثاني من البطولة الآسيوية - فضلاً عن تحقيق البطولة - ؟؟؟

نعم ، أتكلم وأنا أعني ما أقول .. صعبة ينافس الهلال على الآسيوية .. والأسباب كثيرة .. منها :

- عناصر الفريق : لو نشوف عناصر الفريق نلقى فيه ثغرات واضحة وفي مراكز حساسة جداً .. قلب الدفاع ، الظهير الأيمن ، صانع اللعب التقليدي ، الهجوم ..

4 مراكز تعتبر العمود الفقري لأي فريق !!

ناخذها بالترتيب ، قلب الدفاع ، تفاريس ما عليه كلام .. المرشدي .. نقول كويس .. طيب .. فرضاً أصيب المرشدي أو اصيب تفاريس في مباراة حساسة ومهمة .. من البديل ؟؟ المفرج السيئ جداً ؟؟ خليل البطئ والكبير في السن ؟؟ من البديل ؟؟ للأسف لا يوجد بديل !!

طيب وش الحل ؟؟ الحلول كثيرة .. استعارة أحد اللاعبين المحليين المبدعين في هالخانة يعتبر أحد الحلول .. ماجد العمري كمثال ، اللاعب ممتاز مع فريقه الاتفاق وأعتقد ممكن يفيد الهلال بشكل كبير ..

الظهير الأيمن ، الخانة اللي نعاني منها بعد رحيل الدوخي (( كانت ميب ذاك الزود على أيام الدوخي لكنها أرحم بكثير من اللي نشوفه الآن !! )) .. مع احترامي للكابتن العبدالسلام الا انه موب اللاعب اللي يسد الخانة باقتدار .. معقولة ننافس في الآسيوية بالعبدالسلام ؟؟؟ اللاعب يعتبر عادي في هالخانة .. إمكانياته عادية جداً جداً - ما أدري عن إمكانياته في الوسط - .. لكن كظهير أيمن .. ما يعتمد عليه أبداً .. وش الحلول ؟؟ الحل إننا نجرب العنقري اللي صار على صفقته مد وجزر .. والله إذا كان كويس خير وبركة .. إذا كان موب الطموح فحسن معاذ موجود .. لاعب مبدع وممتاز دفاعياً وهجومياً .. يمكن المشكلة اللي تواجهنا هي ناديه - الشباب - .. لكن لاحظوا ان الرئيس هو خالد بن سعد واعتقد ما عنده مانع يبيع أي لاعب خصوصاً إذا كان العرض كبير ..

صانع اللعب ، وهنا مربط الفرس .. صانع اللعب الوحيد هو طارق التايب فقط .. الشلهوب والتمياط مستحيل تضمنهم يمكن بأي لحظة ياخذهم المنتخب .. رودريقو لاعب لايمكن يشيل الوسط لحاله .. احمد الحربي لاعب مستحيل التفريط فيه ولكن لايضمن من الاصابات ..فيصل الصالح لاعب مصاب يعد من افضل اللاعبين لكن الاصابة مأثرة عليه واتمنى انه يرجع بالقريب العاجل .. لا يوجد غير التايب .. والتايب عنده مشكلتين تقلل من حظوظه في المشاركة باستمرار .. المشكلة الأولى هي اللعب مع منتخب بلاده .. وش يضمن لنا ما يستدعونه والهلال مقبل على مباراة مهمة ؟؟؟ هذي نقطة .. النقطة الثانية هي اصاباته المتكررة .. طبعاً هي قضاء وقدر ولا أعتقد أنها مزمنة .. لكن اللي أعتقده أن اللاعب عنده قابلية كبيرة للإصابة .. بمعنى ، احتمالية إصابته أكبر من باقي اللاعبين ، يمكن يكون لضعف العضلات ، ضعف العظام ، الله أعلم .. لكن الأكيد أن اللاعب قابل للإصابة أكثر من غيره وتاريخه مع الهلال يشهد ..

وش الحل بخصوص صانع اللعب ؟؟ أعتقد التعاقد مع أجنبي ممتاز يكون معروف انه صانع لعب بالمعنى الحقيقي كفيل بسد هذه الخانة ..

بالنسبة للهجوم ، ياسر مؤدي دوره كما يجب وزيادة .. لكن لازم نعرف أن ياسر بشر !! ياسر معرض للإرهاق خصوصاً في ظل طريقة اللعب الحالية - اللي يجهد ياسر نفسه فيها كثيراً - .. من البديل ؟؟ العنبر العائد من الإصابة ؟؟ خيار مناسب .. الصويلح ؟؟؟ ما أعتقد أنه مناسب أبداً !! الخراشي ؟؟ ممكن يكون مناسب لكن انقطاعه عن المباريات يقلل من احتمالية نجاحه ..
سامي ؟؟ كثر الله خيره .. كفى ووفى .. لكن البطولة يبغى لها نفس طويل .. ولعب باستمرار ..

الحل ؟؟ الحل استقطاب مهاجم محلي ، ليش ما يكون عبدالرحمن القحطاني مثلاً ؟؟ خصوصاً انه يجيد اللعب على الأطراف كثير وممكن تلعبه مهاجم ..

هذا بخصوص اللاعبين ..

- مدرب الفريق : هو أحد الأسباب اللي ممكن تصعب من فرصة تأهلنا للأدوار الثانية ، المدرب له أخطاء كثيرة .. التشكيل اللي يبدأ به كويس و ممتاز .. لكن التغييرات هي المشكلة .. تطلع وسط وتدخل محور وتقدم الغامدي .. هذي ميب طريقة .. ممكن تقدم الغامدي اذا كان معه صانع لعب تقليدي .. لكن تقدمه وما معه الا رودريقو !! فهذي مصيبة .. ولا واحد منهم يقدر يشيل الوسط .. وهذا مأخذي الوحيد على المدرب ..

- الإدارة : إدارة أبو سلطان أسعدتنا كثيراً وكجمهور هلالي نحب أبو سلطان وكأنه أحد رموز الهلال .. ولكن ، لازم يركز على الآسيوية بشكل أكبر ولا يفكر في الشكليات - مثل برشلونه وخلافه - بشكل كبير .. قدامنا آسيوية والآسيوية لها متطلبات كبيرة .. بالتأكيد ليس من ضمنها احتفال الخمسينية .. التعاقد مع لاعبين محليين وتحسين وضع الفريق من الناحية التدريبية - مناقشة بوسيرو مثلاً - أعتقد أنه سيساعد الهلال كثيراً في المنافسة والحصول على اللقب ..

ختاماً ، البطولة الآسيوية يبغى لها جهد كبير .. لاعبين <بدون ذكر اسماء>لا يمكن تعتمد عليهم اذا خُذلت من الاتحاد السعودي أو إذا فاجأك أي ظرف قاهر ، تذكروا البطولات الآسيوية الست اللي حققناها ولاحظوا الفرق بين نوعية اللاعبين بل وحتى الاحتياط .. تبي تكتشفون أن الآسيوية يبغى لها شغل ومجهود كبير من الإدارة .. وإن شاء الله أن الإدارة قدها ..

صدوق الود · #2 29/12/2006, 01:00 PM

إقتباس

الرسالة الأصلية كتبت بواسطة خالد المحمــد


	مطلب الجمهور الأول : الآسيوية !! تهقون نقدر نجيبها ؟ - عناصر الفريق : لو نشوف عناصر الفريق نلقى فيه ثغرات واضحة وفي مراكز حساسة جداً .. قلب الدفاع ، الظهير الأيمن ، صانع اللعب التقليدي ، الهجوم ..4 مراكز تعتبر العمود الفقري لأي فريق !!

والله أنـــا مـعــكـــ وضــع الهــــلال لايـســر وخــاصـة في المـراكـز الي ذكـرتهــا .."

الله يــوفـق الـزعـيــم وين مـــــارااااااااااااااااااااااح ..."

Turki(الرايق)Turk · #3 29/12/2006, 01:03 PM

باذن الله ستكون هناك وقفة قوية من جمهور الهلال

من جميع مناطق المملكة

وان كان ما فيه جمهور اكيد ان الهلال ما راح يفوز الهلال دايما ما يفوز ما ياخذ البطولات الا بالجماهير الحبيبة

مشكور اخوي على الموضوع

الحزين&&& · #4 29/12/2006, 01:24 PM

كلامك صحيح بس العبد السلام كويس بس الخبره متساعد على الأسويه
صانع اللعب الشلهوب أه أه قهر تتكلم عليه بهاذ الأسلوب
الهجوم : الأداره أخبر في أحضار لاعب المناسب
الاختلاف في الراي لا يفسد في الود قضية