التسول وسيلة أم عادة؟ - نادي الهلال السعودي - شبكة الزعيم

=مـاجــد= · #1 27/12/2006, 05:14 PM

بينما أنا أخرج من المكتبة ومتجه لسيارة واذا برجل لابس شماغ وعقال وجاكيت وجزمات ومتزن في حدود الخمسين من عمره

ويقول لي لو سمحت أنا أبنتي بتسوي عمليه وتحتاج فلوس كثير فما استطعت اني ارده وعطيته ولكن كان منضره مهاب

ومبين عليه ان حالته لا بأس فيها وسعودي الأصل فتعجبت صراحه وايقنت ان هذي الضاهر تفشت في المجتمع بشكل كبير

فلا تكاد تصلي صلاة في المسجد الا ويقوم أحد المتسولين يسأل الناس وعند الأبواب من النساء والاشارات في الشوارع

والاسواق وفي كل مكان.....

وأيضا هذي حادثه صارت لخالي كان يمشي في السوق واذا في بنات عبدات يشحذونه فلوس وعطاهم احتسابا للاجر

وبعد ربع ساعه دخل محل ولما جا بيحاسب واذا محفضته مسروقه سروقها العبدات وفيها كل شي !!..

أنا أرى أنها ضاهره سيئه ودنيئه والغريب في الامر أن الدولة صامته ولا فيه عقوبات لمن يفعل مثل كذا

لانه لو لاحضنا كل سنه ورى سنه تكثر وحتى العبدات اللي في مكة وصلوا لرياض ولكن هناك عدة أسأله تدور في بالي ياليت تجاوبوني عليها وتعطوني آرائكم ألا وهي :

س1_ضاهرة التسول هل أصبحت وسيلة لرزق عند بعض الناس أم هي عادة دنيئه؟

س2_ ماذا تفعل اذا جاء من يشحذ منك هل تعطيه أم ترده؟

س3_ واذا كنت تعطيه هل تعطي أي واحد ولا فئات معينه؟

س4_هل حصلك موقف مع أحد منهم في يوم من الأيام؟

س5_برأيك ما هو الاجراء المناسب في التعامل معهم؟

س6_ هل لاحضت أو لمست أثر ادارة مكافحة التسول؟

هامور البورصه · #2 27/12/2006, 05:22 PM

هلا والله اخووي مااجد

اخووي الظاهره هذي منتشره بشكل غير طبيعي عندنا بالريااض

واكبر مثال على ذلك قبل شووي قبل ماروح المسجد قرية موضوعك وانا دااخل اصلي

اقوول في باالي اكييد فيه وااحد بيقووم وفعلاً ممدانا نقوول السلام عليكم الا وهو طاامر

انا شاايب وعندي عياال الاسطووانه الي كل مرة نسمعها ورااح قعد عند الباب يووم طلعت

لقيت فيه حرمتين يشحتني وجايبين عياالهم صغاار في هالبرد بس عشاان نرحمهم يعني

ولما طلعت من سااحة المسجد لقيت هندي قااعد يبيع شرااب ومدري شبعد لااحض الهندي يبيع وهذوول يطروون

انا قبل خمس سنواات او اكثر كنت اصلي في المسجد وكالعااده طلع وااحد يطر فجووه مكافحة التسول وركبووه بااص

وكاان البااص ملياان شيااب وسالنااهم وش بتسوون بهم قالو لا مااعليكم بنهتم فيهم وهذيك اخر مرة اشووف فيها بااص تسوول

قسم بالله ماتوقف عند اشاره الا وتلقى حرمه تشحة واذا عطيتها الفلووس اشك هي رجال ولا مرة صرااحه اصوااتهم اصواات رجاجيل !

ويديهم يدين رجاجيل ولا امكن الشمس اثرة فيهم على العموم الظاهره هذي بهذلتنا قسم بالله لاازم يشفوون لها حل

والي اشين من كذا الي يدق عليك باب بيتكم واذا فتحت يستنقصك مايقوولك يقوولك رح نااد ابووك انت شي طبيعي بتقووله اقلط

واذا قلط طلع لك ذيك الصكوك والفوااتير وقاام يصيح وشينه انك ترده وشاايب والله انك تخااف انه يصررق المجلس او الملحق لما تروح تجيب

له فلوووس

على العموم الله يعطييك العاافيه على الموضوع وشكراً لك ولا عدمنااك والاسئله ماراح اجااوب علهيا وابيك تعذرني

ودمتم سالمين

=مـاجــد= · #3 27/12/2006, 06:11 PM

هلا بك عزيزي هامور البورصه عطرت الموضوع بمرورك الكريم

لكن زين انك شفت باص انا ادارة التسول اسمع فيها لكن ما قد شفتها ولا قد شفت لهم باص ولا غيره...

على طاري الرجاجيل الي يطرون عند الاشارات ومسوين انفسهم حريم مره صديقة اختي تسولف تقول

مره ولدها واقف عند الاشارة ومعاه امه وقدامهم واحد لابس عباية ومسوي نفسه بنت تشحذ

وقال لأمه ترى هذا رجال مو بنت قالت لا مو صحيح قالها هذاني بثبت لك وفتح القزازه وقال هيه انتي تعالي

وقال لها اذا كشفتي عن وجهك بعطيك الف ريال وكشف عن وجهه وطلع شنب وعلى طول مشي با السيارة وسحب عليه.....

عزوز الأزرق · #4 27/12/2006, 09:04 PM

إقتباس


	س1_ضاهرة التسول هل أصبحت وسيلة لرزق عند بعض الناس أم هي عادة دنيئه؟

هي وسيلة لرزق لمن هو محتاج بجد ولغيره من النصابين.. .. وطيبت قلوبنا ساعد على انتشارها..

إقتباس


	س2_ ماذا تفعل اذا جاء من يشحذ منك هل تعطيه أم ترده؟

غااااالبا ارده ... الا اذا جتني دعوووووه حلوه .. اعطيه..
ترى بعضهم يختار دعوات لكل فئة ..
يعني زي حالتنا شاب توه .. يقولون له ( الله يرزق الزوجه الصالحه والذرية و وو الخ)<<< صارت لي شخصيا ..
وان شافتها ام والا اب ( الله يقر عينك بعيالك ويرزقه بره ) < < صارت للوالده وانا معها فالحرم..
وعلى هالحاااااااااااااااال..

إقتباس


	س3_ واذا كنت تعطيه هل تعطي أي واحد ولا فئات معينه؟

فئات معينه .. يعني بعضهم تطالع فيه فسقااااااان يقدر يشتغل ويكد .. ذا مااعطيه ..
بعضهم ضعيف و معااق ومن هالاشكال .. احيان اعطيه ..
والبعض يتحفك بدعوات .. يخليك غصب تعطيه..

إقتباس


	س4_هل حصلك موقف مع أحد منهم في يوم من الأيام؟

كثييييييييييييييييييييييير... وش اقول ووش اخلي..
مره واحد شحاد يصرف لبنقالي قدام عيوني ..
البنقالي اعطاه خمسه قاله رجع اربع ريال هههههههههههههههههههههه

إقتباس


	س5_برأيك ما هو الاجراء المناسب في التعامل معهم؟

بصراحه ماادري..لكن هالايام ماعاد تعرف المحتاج من غيره ..
لذلك انصح اي واحد بيعطي يتاكد من اللي بيعطيه ..

إقتباس


	س6_ هل لاحضت أو لمست أثر ادارة مكافحة التسول؟

ادراة مكافحه هاه .. امحق ادرة .. ذي ادارة مساعده التسول...
بالعربي مااااااالهم اثر اببببببببببببببببببد ..

قبل ان اغادر ... اتمنى من الجميع تذكر ( فاما السائل فلا تنهر )
مهما كان السائل اياك اياك ان تنهره ...

انتهى , , ,