قصة للعبرة لاتفوتكم - نادي الهلال السعودي - شبكة الزعيم

كلام سليم · #1 16/12/2006, 08:40 PM

قصة للعبرة تسيل لها الدموع
.
.
.
وصلتني عن طريق الايميل
.
.
.
.

ضحية تشجيع نادي ...

ثلاثون عاماً من ...

الوهم والأحلام ..

وأنا صغير مثل : ( كل المراهقين ) كان يجذبني ( اللون البراق ) ونسي والدي

أن يخبرني أن ( ليس كل مايلمع ذهباً )

إنشغال والدي بتجارته ووالدتي بتربية إخواني جعلني فريسة سهله كل من ( في نفسه مرض )

هكذا عرفت .. ( النصــــر )

أصدقاء السوء لم يتركوا لي مجالاً للتفكير ...

ماجد ... محيسن .. الهريفي

شوف الكوبري ياروحي يابوعبدالله اييييييه

اعتقدت ان هذه هي الكوره وهذا منتهى الفن ...

ثلاثون عاماً من ..

( الضيـــــاع والتعب النفسي )

الناس تأخذ بطولات .. !!

وأنا أمدح ماجد ومحيسن !!

يقولون لي :

فريقيك ماجاب الدوري ..

أقول :

إيه بس ماجد جاب كوبري ( أبو الطموح )

يقولون : فريقك مهدد بالهبوط !!

أقول :

إيه بس ماجد لاعب القرن والفريق هو العالمي ..

أشوف النصر ينهزم وأردد مايقول الرئيس عن التحكيم !!

ثلاثين عاماً وأنا إذا دخلت مجلس أتحاشى أقول :

إني نصراوي ..

أو أتكلم بالكورة او أني أمدح برشلونة والريال وكأن ما عندي كورة أو أندية في بلدي

" تعبت نفسياً "

وأصدقاء السوء راحوا مع اللي راحوا

بعد مازرعوا في نفسي كوره غلط في غلط ..

وكالعاده بعد ماغادرت مدرجات ( ملعب الملز ) منكس الراس

وفريقي مهزوم ..

خليت السياره ..

ورحت أمشي حول الملعب

اخفف من الوجع

وأفكر في نفسي ..

وصدفه قابلت زميل كان معنا في الحاره ماشفته من عشرين سنه ..

كنت اكرهه ..

لسبب واحد لأنه كان ( هلالي )

شافني وسلم علي

والسعاده واضحه في ملامحه

عرف قصتي يوم شافني ..

( ماسك العلم النصراوي )

كان .. مؤدب ولا حارشني ..

قال بأدب :

( الله يعينك إلى الحين نصراوي )

بغيت أبكي وخفت يعلم العيال عني

ماقدرت أطالع عينه...

عرف جوابي ..

مشي جنبي ساكت يوم وصلنا السياره

عطاني شريطين للهلال وقال :

إذا شفت نفسك فاضي طالع هالشريطين ..

وعطاني رقم جواله ..

وصلت البيت ..

رميت الأشرطه .. وقلت :

ماناقص إلا أطالع مباريالت الهلال ..

حاولت أنام وكل ماتذكرت ترتيب النصر في الدوري طار النوم ..

رحت أمشي في الحوش وأنا أقول :

الدخان والنصر واحد منهم راح يقضي علي ..

رجعت الملحق اقلب من الدش ملل ..

وشفت الأشرطه اللي عطانياهم صديقي الهلالي ..

قلت : وش أنا خسران بدال هالطفش خلني أشوف الهلال .. وأضحك عليهم !! .

بديت أطالع الاشرطه ..

شي من الهدوء والسكينه

بدأ يتسلل إلى نفسي ..

شفت شي عكس اللي كانوا أصدقائي يقولونه

شفت .. ( فن )

شفت .. ( مهاره )

شفت .. سامي ( اللي كنت أقول انه لاعب )) والحين أقول مجموعة لعيبه في لاعب واحد

شفت الشلهوب والمهاره وعرفت ليه سموه الشلهوب الموهوب ..

شفت التمياط وشفت القحطاني وآه من ولد القحطاني ..

شفت .. ( كوره حقيقيه )

شفت .. ( بطولات من كل شكل ونوع )

الحين عرفت ليش جمهور الهلال أكثر سكينه وهدوء مني ..

ثلاثين سنه من

( التخبط والضياع )

توني أشوف الكوره الصح ..

كل ما خلص الشريط ..

رجعته من الأول إلين نمت ..

صحيت الصبح وكلمت صديقي الهلالي ..

طلبت منه أشرطه ثانيه وثالثه ورابعه ..

ماهو عيب إني عشت ضايع

العيب استمر ضايع ..

عرفت .. الفن

عرفت .. الكوره

عمري اللي راح في القهر والتعب والمجادله الكذابه ..

انضميت لشباب هلاليين علمتهم قصتي ..

أخذوا بيدي ساعدوني ..

خفت أضعف وارجع لاصدقاء السوء ..

كل ماضعفت رجعت شغلت واحد من الأشرطه

وهدأت نفسي واطمأنيت ..

لي سنتين من يوم اهتديت ..

1) أهلي فرحانين بالتغير اللي طرأ على شخصيتي

2) صرت أكثر هدوء وأكثر روقان

3) تحسنت انتاجيتي في عملي وهذا شي طبيعي

4) صرت اذا جلست في مجلس وقلت : إني هلالي ماعاد أحد يتجرأ يتحرش فيني ..

الأرقام تتكلم ..

والمنصات تشهد ..

هذي قصتي ..

أهديها لكل نصراوي في غفله ..

الأيام تمضي

والسنين تركض ..

العمر واحد حرام نقضيه في ذل و تعب و قهر

سعادتي أكبر من إني احطها رهينه لتشجيع كورة غلط في غلط

أو في متابعة تصاريح عن الحكم وتهزئ وشتم وظن سوء في خليقة الله

إلى كل نصراوي ..

أهدي قصتي لتكن عبره وعضه ..

لعل الله ينفع بها أحد التائهين ..

ميلانو هيلانو · #2 16/12/2006, 08:53 PM

اخوي أخيرا صحيت من الغفلة نرحب بك نحن جمهور الهلال وراح تنسى وج الراس
موعيب إنك تعيش ضايع العيب إنك تستمر بالضياع

أبوماضي · #3 16/12/2006, 09:04 PM

وفيه أحد عاقل يشوف الزعيم يلعب ولا يشجعه ؟؟

مشكور أخوي على القصه الرائعه