12/12/2006, 10:53 PM
|
| عضو سابق في اللجنه الإعلامية | | تاريخ التسجيل: 13/08/2005 المكان: الرياض
مشاركات: 7,427
| |
«®•°•ღ•° سواقة المرأة .... «®•°•ღ•° >>> موضوع نقاشي السلام عليكم ورحمة الله وبركاته ،،،
بسم الله الرحمن الرحيم …[ سواقة المرأة ]…
حبيت أطرح موضوع يغــير جو المنتدى شوي , هو موضوع فكاهي أكثــر من أن يكون جدي , فياريت الأخوان ينتبهون لها النقطة ...
وعلى فكره سوينا مقابلة مع أربعة أعضاء (( كلاسيكي – رعبوبة الزعيم – هلالية سنعه – الكناري الأزرق )) هنا وسألنهم بعض الأسئلة ...
الموضوع مثل ما تعرفون هو عن سياقه المرأة في السعودية , الله لا يجيب ذاك اليوم بس نبي نتكلم عنه ، البعض يقول أن سياقة المرأة قادمة لا محاله .
نبدأ بالتكلم في الموضوع حبه حبه .. …[ من الناحية الشرعية ]…
كثر الكلام من الناحية الشرعية فما أبي ادخل في دوامات أنا عني عنها.
بأختصر الكلام كله في مقابلة كانت مع الشيخ الدكتور \ عائض القرنــي .
المقابلة كان فيه السؤال هــل سواقة المرأة جائزة ؟
فجاوب فضيلة الشيخ ] بأن سواقة المرأة دام أنها لابســه اللبس الشرعي ولا يوجد أي شي محـــرم فالسواقة جائزة ..... [
فأعتقد أن الكلام وافي من الناحية الشرعية . …[ من الناحية الاجتماعية ]…
أنا ما كملت مقابلة الشيخ عائض القرني ...
يقول الشيـــخ بعد الكلام اللي قاله فوق ] بأن الشيخ لن يسمح لأخته ولا لزوجته ولا لأمه ولا لبنته [
يعني أعتقد أن الشيخ عائض القرني أختصر علينا كلام واجد . …[ مصلحة الدولة ]… أ-الإيجابيات :-
- مناظـر طبـيعة خلابــه بما يمتلـكون الفتـيات السعوديـات من جــمال و روعـــــــــه خياليه >>>>> أمحق
- قلت العمالة الإجنبية :- فخلاص ما يحتاج سواويق . ب - السلبيات :-
- يبيلنا طريق ملك فهد ثاني .
- كثـــرة الحوادث , كما تعلمون أكثر شخص خواف هو المــرأة . …[ مـاذا تستفيد المـرأة من السواقة ؟ ]…
-البعد عن منّة الأخوان والأزواج ، فهذي كفيلة من اللي بتستفيد منه المرأة من السواقة غير أنها بتتفرغ في تلبية طلباتها اللي ما تنتهي من ذهاب للأسواق و روحات ومنتزهات . …[ ما المشكلات التي سوف تواجه المرأة في القيادة داخل الشوارع السعودية ؟ ]…
1ـ المعاكسات :- يعني تجي بنت على نياتها واقفه عند الإشاره تنتظر تصير خضراء ما تدري الا واحد مسوي نفسه مملوح وفاتح الدريشه وقاعد يتبسم <<< مسوي دعاية معجون اسنان ، الشي الثاني واقفه عند المحطه بتعبي فل الا الشباب السعودي يتاهوشون كل واحد يقول انا اللي بدفع الحساب >>> عيال حاتم الطائي .
2- المشكلة الكبيرة اذا بنشر الكفــر (( غزال ومبنشر )) :- اذا بنشر الكفر ما هيب عارفه وش بتسوي فا تأشر بيديها الكريمه للشباب فطبعن معروف عن الشباب السعودي بانه شقردي خاصه اذا صار في الموضوع بنت ...
وصلنا هنا لنهاية الموضوع واتركم مع المقابلة اللي سويتها مع الأعضاء ..
ونتركم مع الاخت رعبوبة الزعيم <<<< شكلها في المستقبل سواقة تاكسي @@ رعبــوبة الزعيـــــمـ @@ سـ 1 [ وش ردت فعلك اذا نزل قرار سوااقة المرأة في السعووديه؟
طبعا بفرح حيييل..وبدق على صديقاتي ابشرهم وهل رااح تسووقين ؟
لو كان علي كان على طول اقرب معرض سيارات وداقه الرنج او BMW <<<<<< ((ددسن 85 ومظلل ومركبه جنوط يخب عليها ))
وابمر صديقاتي وعلى طول تشيليز او الظهران مول نتعشى ونرجع
وبجي الرياض وآخذ هنوووفه ونطلع انا وهي مع بعض وننبسط وارجع
للشرقيه.. هذا لو كان الأمر بيدي
بس هذا الشي صراحه راجع لأبوي الله يحفظه اذا رضى اسوق ابسوق
وإذا مارضى عادي عندي سـ 2 وش بتسووين اذا احد حااول معاكستك عند الاشاارة ؟ او وانتي قااعده تعبين بنزين فالمحطه؟
إذا كان مكان فيه تراب بغبر عليه >>>> ( وينا قاعدين فيه الله يهديتس )) وأمشي هذا اذا كان واحد بس بالسياره
واما اذا كنت لحالي ومجموعة شباب بالسياره ابقفل السياره علي واسكر الشبابيك اذا كانت مفتوحه<<خوافه (( ايه اهجدي )) واحقرهم وامشي عنهم ..واذا كان معي احد ابقولهم يللي ماتستحون
ترضون على اخواتكم احد يعاكسهم سـ 3 وش ردت فعلك لما تتعطل السياارة فجااه ؟ وجواالك فااضي شحنه ؟
بسوي كول مي واذا طنشوني اللي سويت لهم كول مي اشمر يديني
واشتغل واذا مانفع ألجئ للتكسي >>> ما تدري ان التكسي اخطر مع (( الباكســـــــتاني )) سـ 4 [ ســــــــؤااال مــــــنــــــســــــدح ] وش بتسمعين FM او بانوراما ؟
مـــاجد المهندس
ونشكر الأخت رعبوبة الزعيم على تجاوبها معنا وردها السريع لنا
الحين مع الأخ @@الكلاسيكي@@ سـ 1 [ وش ردت فعلك اذا نزل قرار سوااقة المرأة في السعووديه؟
ردت فعلي راح تكون ردة فعل محايده ليس مع ولا ضد .. ولكني مع الشرع وأنا اثق تماماً بأن مشايخنا ومفتينا ومولاي خادم الحرمين الشرفين (حفظه الله) لن يسمح بتفعيل قرار اضراره اكثر من سلبياته بشكل كبير .. >> الظاهر أنك اول ما تسمع الخبر بتدق على أخوياك تبشرهم سـ 2 اذا عاكستك فتاة وانت عند الاشااره وش رااح تكون ردة فعلك ؟ [ سطرني اذا عكسك احد ]
بقول غير الزواج ما اقبل < يسمع بالمعاكسه
لا والله ماراح القي لها بال .. وبسوي نفسي مفهي >>>>> علينا يا مناحي سـ 3 اذا صدمتك بنت رااح تسامحها ولا رااح تستقعد لهاا وتطالب بحقك ؟
باطالب وبقووووه .. ليس ضعفاً بحالتي .. ولكن ليعلمون أن قرار سياقتهم قرار جائر , ومو من مصلحة الشعب .. والضرر الكبير عليه(ن) ..واعتقد انه بعد اول
صدمه ومطالبه من الشخص راح تكون اول مره وآخر مره تسوق الفتاة ..
وفي الختام ..
احترم كل وجهات النظر .. ولكني متمسك بقرار شريعتنا اللي يرفض كل هذه
القرارات التي تصب لمصحة اشخاص معينين فقط لا اريد الحديث عنهم ..
ونشكر الأخ كلاسيكي على تجاوبه السريع معنا
ننتقل إلى الأخ @@ الكناري الأزرق @@ سـ 1 [ وش ردت فعلك اذا نزل قرار سوااقة المرأة في السعووديه؟
ابي أسور السيارة فولاذ لان الدقات بتصير عدد شعر راسي
و أبي افتح لي ورشة عشان اصير بأسبوع واحد مليونير <<\حتى انت بتفتح ورشه مثلي سـ 2 اذا عاكستك فتاة وانت عند الاشااره وش رااح تكون ردة فعلك ؟ [ سطرني اذا عكسك احد ]
ابقول هيه يا فتاة لا تكونين غلطانة بالنمرة ! شكلتس ما عاكستين الا انتس [ بلاك ] ! سـ 3 اذا صدمتك بنت رااح تسامحها ولا رااح تستقعد لهاا وتطالب بحقك ؟
لا طبعا منب مسامحها ما اخليها الا اذا اخذت حقي <<----- ايه هين ,, من اول ماتقولك اسف مع شوية نعومة على طول تقول عآدي حلالتس السيارة و راعيها ,,
بيني و بينك اذا كان الحادث اليم لا سمح الله و يكلف فلوس كثير ,, صراحة منب مسامح ياخي وش اسوي داج
و اذا كان خفيف ما يكلف كثير عادي اسامح ,,
ونشكر الأخ الكناري الأزرق على تجاوبه السريع ايضا
وونتقل للأخت السنعه @@ هلاليه سنعه @@ سـ 1 [ وش ردت فعلك اذا نزل قرار سوااقة المرأة في السعووديه؟ وهل رااح تسووقين ؟
جـ1 ..
بصراحه .. ما اتمنى هالشئ يصير ولو صار ابنقهر الحريم يسوقن وانا لا << احلفي
ابتكلم بواقعيه حنا يالحريم دايم بنقاشاااتنا نقووولها بمزح اننا ودنا نسووق وش راح نسووي لاسقنا
يعني مثلا اذا مالقينا احد يودينا طبعا هالكلام كله مزح واذا جينا للجد الله لايقووله لان .. درء المفاسد مقدم على جلب المصالح
وطبعا انا ماراح اسوق بإذن الله لأن اهلي من اشد المعارضين وخصووصا جدي اذا جبنا طاري السواقه انهبل اما جدتي فله تبينا نسووق انا عن نفسي رافضه هالشئ و عندي قناعه ان الرجل
يستطيع التحكم في القياده وضبط النفس .. المرأه بطبيعتها تخاف ولاتقدر تتصرف في القياده ولاتقوى مواجهة الصعاب لوو صار لها موقف يحتاج لسرعة البديهه .. بعدين انتم عارفين مجتمعنا الذكوري البعض منهم الله يهديهم ويصلحهم يسببون مضايقات ومعاكسات.. ماسلمنا وحنا ماشين بسيارتنا مع اهلنا نبي نسلم منهم وحنا لحالنا نسوق .. وايضا سواقة المراه بتفتح بيبان مسكره
منها رفع الغطاء بحجة عدم الرؤيه الواضحه .. ايضا بتكون المراه حره تطلع وتدخل متى ماتبي بلارقيب ولاحسيب فيسبب فلتان في الاسره ..الخ وانا ادري طوولت بس هذا رايي سـ 2 وش بتسووين اذا احد حااول معاكستك عند الاشاارة ؟ او وانتي قااعده تعبين بنزين فالمحطه ؟
جـ2 .. محد معاكسني لأني منيب سايقه ان شاء الله .. سـ 3 وش ردت فعلك لما تتعطل السياارة فجااه ؟ وجواالك فااضي شحنه
جـ3 .. هذا السؤال للي تأيد وودها تسوق .. سـ 4 [ ســــــــؤااال مــــــنــــــســــــدح ] وش بتسمعين FM او بانوراما ؟
جــ 4 .. الصراحه راحه .. انا كنت من فتره اسمع الاف ام .. بس ولله الحمد حاولت بنفسي اني اترك سماعها
لأن الفايده فيها قلييله وتعتمد على الاغاني بالدرجه الأولى .. اما حاليا لا استمع لها والله يثبتني
و الاغاني كثرة سماعها تقسي القلب.. حاولت اشغل نفسي باشياء ثانيه سماع الاناشيد
وتصفح النت .. واذاعة القران في البيت نشغلها بشكل مستمر وفيها فوائد عظيمه .. وصلنا للنهاية الموضوع ...
وأتمنى أسمع أرائكم اللي بتسعدنا ووبتشرفنا ..
وياليت كل واحد يجاوب على الاسئلة ..
وترقبوا موضوع نقاشي آخر واستضافات اخرى ..... |