#1  
قديم 10/12/2006, 02:45 PM
زعيــم مميــز
تاريخ التسجيل: 25/02/2002
مشاركات: 1,576
لا طبنــــــــــــــــــــــــــــــا .... ولا غدى الشــــــــــــــــــر


بسم الله الرحمن الرحيم

وضعنا الرياضي لا يسر صديق

المشكلة بسيطة لكن في ظل السلبية اللي نشوفها رايح تزيد المشاكل بشكل اكثر سلبيه من اللي حاصل الآن ..


تسألوني ليه ؟؟ اقول لكم :


وش اللي يبي بيصير قبل اي مباراة للهلال أكثر من اللي حاصل الآن ؟؟

ولا حاجه !!

المخطط ماشي مثل مايبون

تهييج للرأي العام ضد الزعيم

كتابات تنضح تعصب

تحفيز للفرق المنافسه ومشجعيها للتحزب ضد أي شي هلالي

الوقوف بالمرصاد لكل ما يمت للزعيم بصلة

من تابع مباراتنا ضد النصر و الأهلي يرى ان الجماهير تحتج وتهيج حتى عند رمية التماس

يعني الوضع تمام بالنسبة لهم كل شيء جاهز



وش اللي يبي بيصير اكثر من اللي صار في اي مباراة جاية او بعدها

ضرب اوادم ؟؟ حصل

تكسير سيارات وشغب ؟؟ حصل

اشعال النار في المدرجات ؟؟ حصل

حرق اعلام ؟؟ حصل

رمي حذيان ( الله يكرمكم ) ؟؟ حصل

تصاريح تتهجم على الحكام وتشكك في ذممهم ؟؟ حصل

صحافة ومراسلين ( اللون الأصفر ) وتعليقاتهم الصفراء ؟؟ حصل

مادام كل هذا حصل والنتيجة نقل مباراة فاستعدوا للي جاي لأنه اشد واقوى



اللي قاهرني انه مع كل اللي حصل .... ( طويل العمر يبي يشكل لجنه ) وينتضر تقارير حكم المباراة والمراقبين والشرطة !!!!!!!!!!!!!!




انا ما ادري ليه اللجنه ؟؟ اللي اعرفه اذا بغيت تموت اي موضوع .. شكل له لجنه


يعني سموّه : مشغول بأمور سياسية ولا اقتصادية ولا شاف المباريات الاخيره ولا يقدر يتخذ قرار الا بتقرير هاللجنه ؟؟؟


هالحين المستشفيات تأكد عندهم الخبر وصاروا يزيدون حالة الطواريء في المباريات المهمه واتحادنا يتفرج ويشكل لجنه !!!



يمكن ما عنده صلاحيات يطبق اقصى عقوبه بحق من يتلاعب برياضتنا ويساعدعلى نشرالتفرقة والعصبية ويحزب ابناء البلد الواحد ضد احد انديته ؟؟

لكن ما اعتقد !!!



رئيس الاتحاد السعودي ورئيس الاتحاد العربي ورئيس (عد واغلط) ولا يقدر يسوي شيء ؟؟

أمر تحته 100 خط احمر




فهمونا ياناس .. وش اللي صاير بالضبط ؟


هل فيه مصالح عليا او شخصية تمنع من قرارات رادعه ؟؟



ودي اسأل هالحين جاوبوني تكفون .. وترى تكفي تهز الرجاجيل :


صاحب سمو ملكي ويرأس عدة اتحادات وله عدة مناصب قيادية وصار له كم سنه نائب للمرحوم

ما يقدر يسيطرعلى الوضع في هالمجال ( كوره ) !!!! ولا انا ماعندي سالفه ؟؟



يعني كل سنيننا اللي راحت وحنا مالنا سيره الا راح سلطان جا سلطان ..

لا نصير .. داجيــــــــــــــــــــــــــن !!!


طول عمرنا نشكي من الظيم في الاتحاد الآسيوي .. لا يصير هو السبب ؟؟

حقوق الزعيم داخليا وخارجيا على الرف ولا احد يلتفت لنا .. لايصير السبب طويل العمر ؟؟




بصراحه ما فيه غير هالسبب .. لأن :


الناس تتقدّم وحنا نتراجع

الناس تتطور وكورتنا تتدهور

اليابان والامارات وقطر وعمان اللي كنا نرأف بحالهم صاروا أحسن منا

كان دورينا أحسن دوري عربي .. والآن افوض دوري عربي

تأجيل المباريات على حسب النادي اللي يطلب (خيار وفقوس )

مشاركات لاعبين المنتخب مع الاندية خارجيا ( لامانع ماعدى الهلال )

أي لاعب هلالي يشارك مع نادية ( النائب يزعل ويهدد بالاستقاله )

نادي ( يكوش على البطولات ) ويرشح غيره للمشاركات الخارجية

النجمه يحقق المركز الرابع بالدوري ويشارك فريق جبر الخواطر خارجيا

حقوق فريقنا المستحقه لايسأل عنها (نادي القرن )



وش اكتب وش اخلّي ؟؟

بصراحه (على رأي القصبي ) ما يحدث عندنا مهزلة مابعدها مهزلة


الحل بسيط جدا .. والعمى يعرفه لكن وين المسئول اللي يقدر ينفذه ؟؟

المطلوب تطبيق الأنظمة بحذافيرها على من يخرج عن النص كبيرا كان او صغيرا فقط ....

اعرف انه لايوجد انظمة دقيقه تشمل جميع الملابسات والاحداث الرياضية .. ولكن


الأنظمة اللي انا اقصد هي انظمة الدين والعرف قبل الانظمة الرياضية :


*-اي شخص يصرح (مهما كان وضعه) ينتقص من عباد الله ويصفهم بأوصاف لو قيلت في حقه لسال على اثرها شعيب دم .. يوقف عند حده .. فلا الدين ولا العرف يقبل بها .

الناس ماهيب متحملة مرمطه وتهزيء .. وقت الغلمطه والسكوت على سقطات بعض المسئولين لابد أن ينتهي .. يكفي 40 سنه من الردح والتشمت والانتقاص ( والمعايير ) لخلق الله .. هذا ابو شامه وذاك اللي مايملك من اسمه شيء حتى اصبحت الفاظ يرددها الجميع تيمنا بمن اطلقها .. والآن بدأ الوريث .. اسأل أي شخص رياضي عن الجاهل .. سوف تجد الرد عيني عينك لأنها صدرت من رئيس نادي ولم يحاسب ولو حتى بلفت نظر .

*-اي صحفي يشن هجوما على حكم ويتهمه في ذمته وأمانته .. يسحب على خشمه . اما يثبت أو يحول للشرع .

*-اي مستصحف يشكك في نادينا ( حتى لو كان خارج الجريدة مثل الصحافة الصفراء وكتابتهم بأسمائهم الصريحة بالمنتديات ) ويقول حكام ورشاوي وما الى ذلك .. يجرّ على خشمة ويعلّم المسئولية .

على طاري مستصحفي المنتديات .. قريت وضحكت وشر (المستصحفين) ما يضحك .. موضوع لواحد من اللي انتم خابرين يقول فيه ان النصر مسحووووووور .. بالله عليكم اي عقل وأي منطق يتكلم به أحد منسوبي الصحافة الصفراء ؟؟؟؟؟؟؟

هذا وأشكاله هم اللي اوصلونا الى هالمواصيل تحت مرآى ومسمع من بيده الأمر والنهي دون اي ردة فعل .

*-اي شخص يتجرأ على الممتلكات العامة أو الخاصة مثل ما حصل بعد بعض المباريات .. يجب أن يأخذ الجزاء الرادع حتى يكون عبرة لمن يفكر في هالشيء مرة ثانية أو يفكر انه ياخذ حقه بايده مثل ما اتوقع ان يحصل في مباريات الرد في الدور الثاني .

*- مشرفي المنتديات الرياضية ناس معروفين .. يجب محاسبة كل من يسمح منهم بالمساس بأعراض وذمم خلق الله أو يسمح بترويج (ولو) لفظ نابي . لك ان تتصور أن في المنتديات وصلت المواصيل الى أن يشبه أحد اندية الوطن بإسرائيل .. نعوذ بالله من هالحال .. والصرعه الجديدة بالمنتديات الصفراء ( التهديد بالقتل )

هذا فيض من غيض .. فالمسألة ماهي صناعة صاروخ أو وصول لسطح القمر .. بتعميم يقول أن كل شخص مسئول عن ما يفعل أو يقول أو يكتب وفي حالة الشكوى سيكون هناك احالة الى جهاة الاختصاص فقط .
اضافة رد مع اقتباس
   


إضافة رد

أدوات الموضوع
طريقة عرض الموضوع

قوانين المشاركة
غير مصرّح لك بنشر موضوع جديد
غير مصرّح لك بنشر ردود
غير مصرّح لك برفع مرفقات
غير مصرّح لك بتعديل مشاركاتك

وسوم vB : مسموح
[IMG] كود الـ مسموح
كود الـ HTML مسموح
Trackbacks are مسموح
Pingbacks are مسموح
Refbacks are مسموح



الوقت المعتمد في المنتدى بتوقيت جرينتش +3.
الوقت الان » 02:22 PM.

جميع الآراء و المشاركات المنشورة تمثل وجهة نظر كاتبها فقط , و لا تمثل بأي حال من الأحوال وجهة نظر النادي و مسؤوليه ولا إدارة الموقع و مسؤوليه.


Powered by: vBulletin Version 3.8.7
Copyright ©2000 - 2017, Jelsoft Enterprises Ltd

Google Plus   Facebook  twitter  youtube