|
الأرنب الأزرق و قرقعان ..وباص عيون جدا تلفان السسسسسسسسسسسسسسسسسلام عليكم :D أولا مبروك الفوز .. ولكن الهدف الملغي خلى طعم المباراة غير .. لأول مرة أشوف النصر يسلبون له حق .. على مدار تاريخ النصر مع الإعتراضات .. أشوف الهدف ماعليه غبار .. وهو غلطة حكم الراية .. وأتمنى أن تصدر عقوبة رادعة له .. :) الهلال كان الأجدر بالفوز نظرا لتفوقه وضياع الكثير من الفرص .. لكن بالشكل هذا مابغيت .. صحيح الحكم بشر ولا كان قصده ... بس غلطة ضيعت طعم الفوز .. ماعلينا .. بس كنت بعلق على النتيجة بس .. وهارد لك أخواني النصراويين في شتى بقاع الأرض .. أخواني أخواتي اللي يقرون الموضوع ... اسمحوا لي دقيقة مع أصدقائي المشرفين وحقين إدارة الموقع .. أبيهم بكلمة راس قبل استتب بالموضوع :D أصدقائي القائمين على الشبكة من إدارة ومشرفين السلام عليكم أما بعد : ياجماعة الخير قسمن بالله إن لو فيه جائزة من الإتحاد الآسيوي لأكثر واحد انحذفت مواضيعه .. بياخذها خلفان مدري وش اسمه .. بس بصير المركز الثاني أكيد :D موب أنا ابن المنتدى ..؟ .. وأنتم أخواني وسندي وقت الشدايد ..؟ .. ليه كذا بس علموني..؟ .. المشكلة موضوعي ينحذف بدون رسالة تعريف بسبب الحذف ..وقسمن ماشوف فيه شي يستاهل حذف .. !! تراي إنسان والإنسان يخطيء ويصيب .. على الأقل قولوا لي سبب الحذف علشان ماتعود له :D هالموضوع ودي آخذ راحتي فيه .. ماراح أشتبك مع أحد أبدن .. بصير صديق البيئة :D وأي اشتباك في الموضوع اتركوا لي فرصة أحله وأقرب وجهات النظر بدون تدخلات وأوعدكم نكون سمن على عسل .. وأهدي هالكلمات للشاعر نزار قباني لجميع القائمين على شبكة الزعيم :D وعدتكي أن لا احبكي ثم أمام القرار الكبير جبنت وعدتكي أن لا أعود ..... وعدت وان لا أموت اشتياقا .... ومت وعدت مرارا وقررت أن استقيل مرارا ولا أتذكر أني .... استقلت وعدت بأشياء اكبر مني فماذا غدا ستقول الجرائد عني أكيدا ستكتب أني جننت أكيدا ستكتب أني انتحرت أتمنى إن الإهداء حاز على إعجاب القائمين على المنتدى .. والأعضاء لهم إهداء ثاني بس خلو الادارة ترضى قبل :D ^*^*^*^*^*^*^ رسالة لبعض أصدقائي الأعضاء : أصدقائي عندما تدخلون لموضوع حسسوني بالدفء والحنان .. لا تحسسني إني نصراوي .. جدا أتفاجأ عندما يتم وضع رد من أحد الأعضاء ويتعرض لشخصي الحساس بكلام يجعلني أعتزل الكتابة على الفور .. صدقوني موضوع سواليف وضحك وتبادل آراء ماهنا كلافة .. وشكرن :D ^*^*^*^*^*^*^ عاد نبدأ بالموضوع .. كلنا شفنا المباراة .. وكلنا عندنا بعض الملاحظات .. سواءا فنية أو إدارية أو تنظيمية .. بداية ماراح أتكلم عن بيسيريو لأنه مدرب له أخطاءه بس إنه جيّد ومايصلح نغيره .. نبي نتكلم في التنظيم الجماهيري الهلالي أولا.. بصراحة الحضور رائع .. والتفاعل ممتاز جدا .. والجماهير كانت على الموعد .. لكن الأرنب الأزرق مادري من اللي شار به :D معليش بس كانت فكرة جدا ساذجة .. ولا تعكس الحضور الواعي .. على كذا يجيبون النصراويين لازم يجيبون تويتي ..؟ :D أعرف إن الحوت يعني العملقة والقوة والسيطرة ... لكن الأرنب .. وش دخل دينه بالموضوع مادري ..!! أنا يوم شفت الأرنب .. تلخبطت علومي .. قمت أتحكك وأتصدد وأطقطق بالجوال يعني ماشفت شي ..:D أتمنى من الأخوة النظر بموضوع الأرنب الجائع لأنه فعلا نرفزني وبغيت أصبخ التلفزيون بالجدار .. والتنظيم الجماهيري النصراوي .. حضور قوي من جاهير النصر .. ووفاء غير عادي .. اللهم الدقايق الأخيرة وإعتراضاتهم .. يعني الهدف ألغي سواء معك حق والا لأ .. ماراح يرجع لك هدف .. لكن اللي شد انتباهي أهازيج الرابطة :D ياجماعة قسم بالله أحس المباراة بين فريق خامس ب × رابعة أ ... :D وش قرقعان قرقعان ..!!! .. ياساتر وصلت المواصيل يغنون قرقعان بالملعب :D يعني عادي نسمع فتاحي ياوردة .. وشبرا أمرا شمس نجوم .. :D:D وقسمن سمعت أهزوجة مدري وش كلماتها .. بس كنه يقول نصّوري يبي ينام .. نذبح له جوز الحمام :D ورئيس الرابطة حقهم القبطان نامق مدري العمدة ضارب مشوار من العين .. ياجماعة في كوادر وطنية :D والله مدري شلون الجماهير سمحوا له يكمل .. ياجماعة رفقا بالعقول .. والله ان فيه ناس ودهم يتفاعلون مع الأهازيج .. بس مع قرقعان وفتاحي ياوردة وحدارجا بدارجا .. ماحد متكلم ولايهون الأرنب الجائع و المصري اللي يطق طبل كنه بسفينة .. .. والله اليوم الجماهير النصراوية والهلالية عليهم طلعات مادري وش تبي .. نبي تنظيم جماهيري عالمي .. يكون فيه تشجيع على الطريقة اليابانية .. وأهازيج أوروبية .. حتى الشغب اللاتيني نبيه .. أما حركات نطل نعال وأنتم بكرامة ومدري وش قسمن لو نتفرج على رقّاصات ماسويناها ... ^*^*^*^*^*^*^ طارق التايب .. برنس العرب .. مايحتاج نتكلم عنك .. لأنك لاعب لك وزنك وثقلك عربيا .. لكن يابرنسنا يافديت قلبك أنا .. فيه شي اسمه لعب واقعي .. مايصلح تلعب تقل مضيّع لك غرض .. بس تلفت يمين ويسار .. باص عيون حلوة تكون مرة ومضمونة .. اذا على الباص عيون .. مستعد أثبت راسي بمسامير .. بس ألبس شعار الهلال :D لعبك يابرنس كله استعراض × استعراض صدقني لعبت 20 دقيقة واقعي شفنا منك لمسات حلوة .. وشفنا هدف .. لكن مايصلح لك حركات الكابتن ماجد وتدخل من بين ثلاثة .. يابرنسنا إذا لعبك بيكون كذا .. يوم مصاب .. يوم مع المنتخب .. وتلعب لك 10 دقايق .. مايصلح لنا هالشغل .. ردريقو وقسمن إنه يأدي ضعف اللي يأديه التايب .. التايب يمكن يمرر تمريرة باص عيون .. ردريقو يسجل ويركض ويتعب ويعدي ويتعرض لمخاشنات .. مع ذلك نجم الهلال يريد لاعب يقدم له شي .. لأن الجمهور راح يمل اللعب الاستعراضي اذا ماكان بوقته أتمنى من إدارة الزعيم الثبات على المحترفين الثلاثة .. التايب وردريقو وتفاريس .. واذا قررت تستغني عن أحد .. أتمنى تستغني عن التايب لأنه لاعب منتخب والمنتخب الليبي ماعنده تساهل حتى بالمباريات الودية .. وثانيا لأن التايب يصاب كثير .. وثالثا التايب يأدي في الهلال بشكل استعراضي وكأنه مكسب الهلال .. ^*^*^*^*^*^*^ هذا اللي حبيت أقوله لهذا المساء ... والمباراة كانت قمة من الهلال والنصر .. لكن مع الأسف تمنيت يكون ختامها مسك .. ولكني كهلالي أبارك للنصر المستوى .. وتمنيت جماهير النصر تكون أرقى من هالكلام .. لكن الشكوى لله ولو بيدي عطيتهم هدفين موب هدف واحد .. أنا يكفيني مستوى الهلال الراقي :) والسلام عليكم ورحمة الله وبركاته أبوساري |
كل شيء طيب فيك يا أبا ساري ماعدا كثرة القسم في غير محله ، ليتك تنتبه مستقبلا !!! |
ابو ساري الله يهديك قسم قسمات اني تمزعت من الضحك وخاصه على الأرنب وتويتي ياحليلهم عيال والت دزني حاضرين بكل مكان وليتين شايف باص العيون حق التايب قهر ماشفته على العموم تراني حافظ مقدمت عندنا ولينا ان كان احد يبيني اغنيه لهم بالمباره الجايه تراني جاهز يعطيك العافيه |
ليش القسوه على البرنس حرام عليك هذي اول مباره يلعبها اساسي |
شكرا لك ... موضوع مميز اتفق معاك بخصوص الجماهير وحراج السيارات الي مسويه عمدة العين ولكن اختلف معاك كليا بخصوص طارق التايب ... لاعب من طراز نادر وسترى منه الكثير صدقني ... |
مشهوووووووود لك بالرجة وموضوع ساخر ووقوي بنفس الوقت تشكر عليه |
إقتباس:
اقسم بالله يبو ساري انك قطعت مصراني من الضحك اجل حدارجا بدارجا وانا اقول وراه اخر المباراة بديت اسمع تبي نملة ولا صارور خخخخخخخخخخخخخخخخخ يعطيك العافية يبو ساري وانا اتفق معك بكل كلمة صح ان التايب مهاري درجة اولى .. بس تراه ماحسب لمباراة حساب .. يعني اول مره يلعب مباراة الا دقيقتين بعد المصارعة بس نرجع ونقول يعطيك العافية على هالطرح |
قرقعان وقرقعان ولا تكملتها غبيه بس ناسيها خخخخ الله يفشله ذا ابو كحل..ضارب مشاوير وازعاج على الفاضي..! بس وش سالفه الارنب الازرق ماشفت الا بس البطة دنيلسون |
مرحبا أخوي :) صحيح لاحظت كلمات غريبه قرقيعان وماقرقيعان ! لكن ماتقول إلا الشرهه على الي جابه من العين تقول مافيه مشجعين بجواز وطني :D ممكن سؤال وش المقصود من باص عيون ؟! خخخ |
ههههههههههههههههههههههههههههه الله يرجك يابو ساري اجل قرقيعان اموت واعرف هذا جاي من الامارات علشان يغني قرقيعان لا وازيدك من الشعر بيت بين الشوطين يقول مافية راحة ويعطينا قرقيعان ويسكت إقتباس:
الكورة للاعب اللي يبية بالسنتيمتر |
إقتباس:
أها توقعت كذا الله يعطيك العافيه حبيبي s60s |
ههههههههههههههههههههههههههههههههههههه صراحه قطعت مصراني من الضحك الله يرجك ياشيخ تقبل احترامي واعجابي ,, |
أتفق معاك إلا في كلامك عن طارق التايب , اللي متابع التايب قبل مايجي للهلال يعرف ان هذي طريقته باللعب...وبصراحة لاعب منتهي , يصنع يراوغ يسجل وش تبي أكثر من كذا....... |
عجبت عجبي (لا يعجبك عجب ولا صيام في رجب) السلام عليكم تعرف ياأخي منذ مدة وأنا أقرأ المواضيع في منتداكم ولا أكتب ردود مع أن المواضيع غريبة وعجيبة وكل واحد يحلل وينظر ويظن نفسه فلتة زمانه. مرة قرأت أن ياسر هو المبدع في تسجيله للهدف الذي جاء من تمريرة باس عيون من طارق التائب وكتبت ردود عديدة تمجد ياسر واحد لأنه لاعب كبير وأخر لأنه عارف كيف يوقف في الميدان المهم الخلاصة لايريد أحد أن يعترف بفضل التمريرة ولكن الكل تكلم عن مسجل الهدف. واليوم عندما سجل التائب من تمريرة متقنة من ياسر الكل أراه تغاضي عن مسجا الهدف وكأنه لم يجلب النقاط الثلاثة ويتحدثون عن الممرر فما أشبه اليوم بالأمس (غريب جداً). ثم إن اللاعب ياإخوان معاه 10 لعيبة آخرين فبمفرده لايفعل شىء وأنتم تريدون من التائب أن يكون 90 دقيقة بدون أخطاء وكامل (غريب جداً). ثم أحب أن أضيف أن اللاعب الذي يعطيك تمريرة وتسجل منها هدف فهذا يكون اللاعب الذي أدى ماعليه لأنك حبيبي تريد الثلاث نقاط وإلا لما لم يسجل أي لاعب أخر هدف أو يمرر تمريرة هدف فهناك 10 لاعبين آخرين وإلا ذلك حظ (غريب جداً). اللاعب في الدول المتقدمة كروياً تقاس له تمريرات الهدف في نهاية كل موسم عزيزي. أما بخصوص الباص عيون والتي محيرة الجميع وكأن الجميع لا يفقه شىء في الكرة ألا تعرفون شىء في كرة القدم يسمى التمرير التمرير أي ما يدعى بالأنجليزية أو حتى الإيطالية الباس (Pass) أي التمرير والباس عيون أي التمرير بخداع البصر. وأخيراً على كل مشجع غيور على فريقه ألا يتسرع بالحكم من مبارة وبعض الدقائق تريد العجائب من بشر لديه أحاسيس ويتأثر بالظروف المحيطة مع إنه صاحب 6 نقاط أكيدة حتى الأن . ودمتم مشجعين واعيين وأبعدوا الدخلاء عن منتداكم ولا تنجرون وراء كتاباتهم وتشجعونهم بالإطراء على مايكتبون بل ردوا عليهم الرد المقنع البعيد عن العواطف التي تكنونها للاعبيكم المحليين وأعطوا كل ذي حق حقه. السلام عليكم |
إقتباس:
إقتباس:
:thumbup: :thumbup: :thumbup: :thumbup: :thumbup: :thumbup: :thumbup: :thumbup: :thumbup: :thumbup: :thumbup: :thumbup: :thumbup: :thumbup: :thumbup: :thumbup: :thumbup: :thumbup: :thumbup: :thumbup: :thumbup: صح لسانك عيني عليك بارده |
| الوقت المعتمد في المنتدى بتوقيت جرينتش +3.
الوقت الان » 04:06 AM. |
Powered by: vBulletin Version 3.8.7
Copyright ©2000 - 2024, Jelsoft Enterprises Ltd