بسم الله الرحمن الرحيم
السلام عليكم ورحمة الله : بدخل بالموضوع ( دغري ) البارح كنت ناوي اروح للفيصليه . المهم وقفت موتري عند المحطة الي في شارع الثلاثين بجنب مطعم ابو كمال . المهم وانا ماشي على رجولي ومتجه للفيصليه مريت بمحل اسمه ( بيت الكمبيوتر ) عاد حاطين صور سوني 3 واكس بكس 360 صراحه . انا على طوول دخلت قلت ياولد خلني ادخل واسأل عن كل شي عن الجهازين . المهم اول مادخلت المحل جاني ذاك السوري الي طوله مترين وقالي ( اهلين وسهلين شوبتأمر ) قلتله عندكم سوني 3 قال( ايه ) قلت بكم . قال: ب 3950 ريال ( امريكي ) مع شريطين سوني 2 . والياباني على ما اظن قال ب 3400 . المهم قلت كيف العابه . قالي : (بدك تجربه) انا على طووووول قلتله ( ايييييييييه ياليت ) قال : اتفضل اليد . والله عطاني اليد . ولا اليد زي يد سوني 2 لاكن بدون سلك . وكان في محلهم مشغلين لعبة سيارات قتاليه . عاد الحين عاد بقولكم كيف كان شعوري وانا العب . الحقيقه : ( القرافيكس ) او معنى اخر الرسومات كانت افضل من سوني 2 بقليل وشعرت كاني العب سوني 2 . اما عن حركة السياره فكانت عاديه وطريقة تصويب الرشاشات والمدافع صعبة بحيث لكل نوع من الاسلحه زر مثل ار تو أو ال تو . المهم وقفت اللعبه ورحت للزاويه الثانيه للمحل والي كانو مخصصينها لجهاز الاكس بوكس 360 . جربت لعبة قتال . كانت المرحله بالليل وكانت المدينه ضلام شديد وكل شوي اطيح من فوق جدار او شبك وكرهتها بسرعها وقلت لهم غيرو اللعبة . شوي جابولي لعبة سيارات .السوري قاعد يمدح فيها ساعه . اول ما لعبت صراحه الرسومات حلوه وصوت الموسيقى كان رائع . لكن اول ما بدى السباق وحركت السياره باتجاه اليمين واليسار جلست اضحك على الغباء الفني من الصانعين الامريكان .تخيلو يا جماعه حركة السياره لما تلف ذكرتني ب لعبة السيارات الي بجوالي بحيث كانت لفت السياره أو حركه السياره غير طبيعيه وسريعة جدا سببتلي ( الدوخه) وقفت اللعبه على طول وطلعت من المحل وهذا هو الانطباع العادي الي عشته من تجربة الجهازين وشكرا لكم وسامحوني على الاطاله وذكر التفاصيل والسلام عليكم