المشهد الثاني ..

خارج المدينة / الرابعة فجراً...

الصوت : مزج بين ( ركض جواد ) طربق طربق طربق + ( دقات قلب ... "إيقاع سريع" طق طق طق ) ..
الصورة : فارس ملثم يمتطي صهوة جواده قادم من أعماق التاريخ.. يحاول جاهداً ان يدرك ظلام الليل قبل ان تغتاله يد الصبح ليستتر بغطاء الليل الأسود ويلتحف بظلامه الدامس ...
ولكن قبل ان يصل إلى أبواب المدينة تدركه طلائع النور
فتكشف عن وجهه الشاحب وقواه المنهك ..حينها ..
يقف ليصرخ بأعلى صوته الذي تُردد الصحراء صداه
ماء لا أريد إلا الماء ....

طبعا اذا قمت الفجر ولقيت الماء بارد هذي مشكلة لكن إذا قمت الفجر ولقيت الماء منقطع أعتقد هذه مصيبة ..!!

أي والله ان الماء نعمة كبيرة ياليتنا نحسن استخدامها ..

# تنبيهات قبل الإقلاع ..

@ هذي السوالف قديمة قبل 6 سنوات تقريبا وقبل ما يطلع لي ضرس العقل ...
@ بصراحة رغم الشقاوة كانت علاقتي مع اكثرالمدرسين رائعة ومستمرة إلى الآن واعتبرهم أخواني وأكثر ...
@ الموضوع سواليف فلا يجي واحد من شياب المنتدى يقول انت تخرب عيالي وأحفادي ..
@ لو استقبلت من أمري ما استدبرت ما كنت هكذا ..

نقطة للانطلاقة ...

في البداية بعطيكم وصف للفصل والمدرسة لكي تكونوا في الصورة ..
كنت ادرس في مدرسة في الملز وكان مبنى المدرسة في الأصل قصر للمك عبدالله الله يحفظه
وكان فصلنا في فلة مستقلة قديمة ما فيها الا ثلاثة فصول ..
>>> اتوقع انها كانت نادي وفصلناغرفة البلياردو
والدور الثاني كان فاضي (( مزبن على كيفك )):p
وكن نقضي فيه الكثير من الوقت مابين شاي وورق وبليلة ..;)
ولان المبنى الأساسي بعيد كان نادر يجينا احد من الإدارة ..


~~ أنا ومايكل شوماخر ~~

كان الطلاب في الفصل يصدرون أصوات والأستاذ مايدري من وين يجي الصوت
وكنا نقلبها بعض الأحيان مقومات يعني أصوات سباق سيارات ..
وفي مرة من المراريت رحت مع احد الأساتذة لغرفة المدرسين >>> طبعا أشيل الدفاتر ..
وقبل ما اطلع من غرفة المدرسين ناداني احدهم وقال ماجد تعال !! رحت وأخذني على جنب وقال أنت تحب مايكل شوماخر !! أنا انهبلت وراح بالي إلى حارس الدنمارك وتوقعت انه درى
اني قالب الفصل استديو تحليل رياضي
فقلت ما اعرفه ياستاذ منه ذا ؟؟
وبدا يستدرجنى وطبعا كانت عندي قاعدة تقول اجحد
ولما أصابه اليأس قال هذا شوماخر حق سباق السيارات !!
أنا ضحكت وقلت لا والله ما أحب سباق السيارات ابد
فقالي طيب لي تطلع أصوات سيارات سباق في الفصل.. ؟
عاد قلت في نفسي والله انك مشوار كل ها اللف والدوران
وضيعت علي الفسحة وأخرتها ها الموضوع البايخ
ومن دون شك ما في الا اجحد ثم اجحد ثم رح لفصلك ..

~~ قصتي مع مدرس النحو ~~

كان عندنا مدرس نحو ما اتفق أنا وياه ابد ومن أول يوم جانا بدت مشاكلي معه
وحصته إما أنام أو اتكي في الدور الثاني ..

وفي احد الأيام قررت إني أنام لكن الطلاب قالوا اليوم اختبار
قلت اجل أبطلع برا وأنا طالع شافني الأستاذ وقالي وين رايح ماجد منت
مختبر قلت لا اليوم تعبااان ومالي خلق اختبر ..
عاد بعد الاختبارات جاني واحد من العيال وقالي وش سالفتك أنت ومدرس النحو
كل ماجاه واحد يراجع درجته يقوله انا معطيكم اكثر من حققكم وفي طالب اسمه ماجد
عطيته اعمال السنة درجة وحدة وهو مايستاهلها ...
>>> كلفت على نفسك ياشيخ
طبعا من باب الإيثار قلت لخوي ما بيها رح خذها !


وهنا تبدأ الحادثة الغريبة !! إرسالنا إلى المستشفى ؟؟ والتي غيرت مجرى حياتي ...

~~ الوردة الأولى ~~

في صباح يوم ليس له ملامح !! ونحن في الفصل إذا بالباب يطرق ..
دخل احد الأساتذة واستدعى خمسة من الطلاب ..
اجتماعهم لا يبشر بخير !! سأله الأستاذ الأخر من يريدهم ؟؟
فأجاب المدير !! فأمرنا بالخروج ولسان حاله يقول اذهبوا غير مأسوف عليكم .. :sad:
في الطريق إلى الإدارة كنا ننظر لبعضنا مستغربين ونقول أصبحنا وأصبح الملك لله ...
ماذا حدث وماذا يريد المدير ؟
وصلنا إلى مكتب المدير تعلونا الدهشة ويتملكنا الخوف !
كانت المفاجأة أننا نجد المدير يرحب بنا بل يأمرنا بالجلوس !
سبحان مغير الأحوال .. بدأ المدير يتكلم عنا واننا من خيرة الطلاب وفينا من الخير الكثير !!
ومهما حدث فنحن أبنائه
والمدرسين لايريدون لنا إلا الخير !!
وبعد محاضرة قصيرة انبتت النخل في رؤوسنا ..
قال ان وزارة الصحة طلبت من المدرسة ان ترشح لهم بعض الطلاب (الجيدين )
حتى يشاركوا في حملة التطعيم ضد شلل الأطفال وقد تم ترشيحكم لهذه المهمة
فأنتم واجهة مدرستكم وانتمى ان تعكسوا الصورة الحسنة لها !!

بعد ذلك خرجنا من مكتب المدير بعد ان شكرناه على هذه الثقة ووعدناه ان نحسن التصرف ؟؟
بالطبع لم نصدق ما حدث والفرحة كانت كبيرة فترشيحنا لهذه المهمة من بين أكثر من 1000طالب يعد تميزا لنا ..



~~ الوردة الثانية ~~

في المستشفى أو على الأصح المستوصف
تجمعنا بعد صلاة العصر تم استقبلنا ورحبوا فينا قال لنا المسئول
اننا بنصير مجموعتين وبيحط مع كل مجموعة ممرض وممرضة !!
اكيد استانسنا وماكنا مصدقين انه بتركب معنا ممرضة ..
توقعنا انه لبنانية وبدت الاحلام وكل واحد يطلع بطلعة غبية
و اللي يقول انا باخذ الصغيرة وانت خذ الكبيرة
>>>> على بالهم زواج :p
لكن يوم شفنا الممرضات غيرنا راينا على طول وقلنا للمسئول بنطلع كلنا قروب واحد
ولا نبي معنا احد وبعد أخذ وعطا وافق المسؤول واعطونا حقن التطعيم
اللي كانت تعطى عن طريق الفم وشرحولنا كيفية استخدامها
وحددوا لنا الحي اللي بنكون فيه ثم انطلقنا على بركة الله ...

~~ الوردة الأخيرة ~~

كان الحي اللي حنا فيه كله فلل سعودين وبدينا نشتغل بإخلاص بس المشكلة أنهم كانوا يلطعونا قدام البيت ربع ساعة لين ما يفتحون الباب وأسئلة وتحقيق وأخر شي ما يطلع عندهم بزارين !! وكان بيت اخوي قريب من المنطقة اللي حنا فيها قلت للشباب خلنا نروح نطعم عياله واكشح قدامه إني دكتور يوم جيته وقلت له قال ما في أمل اخليك تطعمهم والله لو اني لاقيهم في الشارع وقال انه بيطعمهم في المستوصف عاد إنا طلعت ومن النذالة لزقت على بابه أربع استكرات وكتبت عليها تم التطعيم ..
ويوم شفنا الوضع كذا قلنا لازم نغير موقعنا احد الشباب اقترح نروح شقق كل اللي فيها من ديار الشام واتفقنا على كذا طبعا الشقق خارج منطقتنا ويوم وصلنا رحت لاحد الشقق طقيت الباب طلعت لي زولة سودانية وجابت ولدها الصغير
قلت نطعمه والأجر على الله وأنا أعطيه القطرات الزول شفط العلبة كلها رغم ان طعمها بااااااااااايخ
برضوا الشقق مانفعت معنا وطلع واحد من العيال باقتراح يشق الجبهة وقال ليش ما نروح المجمعات السكنية
(( كامباوند)) طبعا هذي السالفة قبل 11 سبتمبر ..

~~ الوردة الحمراء ~~

وشدينا الرحال إلى احد المجمعات في الملز ..
وعند البوابة قلنا للهندي حنا وزارة الصحة ;) ونوريه علب التطعيم المسيكين دخلنا على طول مع سيارتنا . .
وفي داخل المجمع ما تحس انك في السعودية البنات يمينك ويسارك بالجنز كالبنز
طبعا حنا طلاب ثانوية ما شفنا خير
وأنواع السواليف وهذي تجيب أخوها وهذي ولدها وتجمعوا علينا من كل حدب وصوب
وجاتني هندية تقول ان أختها ولدت قبل أسبوع هل تطعمونه اللي معي قال ايه وينه بس
انا بصراحة خفت وقلت والله ما ادري اتصلوا على الدكتور ..
اتصلوا والدكتور قال عادي ما في مشكلة فقالت لي ادخل جوا البيت أمه تبي تشوف وأنت تطعمه ;)
وادخل ويجبونه يحليله هندي صغير وأطعمه وهم حولي يناظرون ويضحكون ..
بالطبع الشباب أنواع الأفلام والمواقف الطريفة .
بعد ما خلصنا طلعنا من المجمع إلى المستوصف وسلمناهم الأسماء
اللي نصها تأليف وتمت أول أيام التطعيمات بسلام ..

# تنبيهات قبل الهبوط ..

@ من ناحيتي حظرت أول يوم فقط ولم أكمل معهم مسيرة التطعيم التي كانت ثلاثة أيام ..

@ طبعا المدرسة رشحتنا لان ذيك الأيام اختبارات ويدرون اننا ما نذاكر ولان الموضوع فيه كرف وشحلطة في الشوارع على غير سنع يعني لا مكافاءة ولا شهادة ولا درجات ولاشيء ..

@ التطعيم كان عبر الفم وللأطفال من خمس سنوات فما دون ..

@ اللي ما تطعم من أعضاء المنتدى الكرام يرسلي على الخاص ويبشر ولا يشيل هم ..

@ مدرس النحو تغير وصار النحو من موادي المفضلة ..

@ العدد القادم هو العدد الأخير فلا تخافوا..
وفيه : * العريف الجديد وقصائد الهجاء !
• نقلي من الفصل وقصيد في الحنين !

أحبتي كتابتي لهذه المواضيع جعلتني بين نارين
الأولى ان بعض الأحباب أعجبوا بموضوعي وشاركوني ذكرياتي فمن القلب شكرا لهم ..
والثانية ان بعض الأحباب عتب علي كتابتي مثل هذه المواضيع وما ذلك إلا حبا لي فشكرا لهم ..

وقال خليلي الفرار أو الردى
فقلت هما أمران أحلاهما مرُ ...

اعتذر عن الاطالة ...
دمتم في حفظ الله ورعايته ,,,